Missále románum 1957 en préparation

FESTA MÁRTII

S. CATHARÍNÆ FLISCÆ ADÚRNÆ

***

SITÍVIT ánima mea ad Deum fortem vivum: quando véniam et apparébo ante fáciem Dei? Ps. ibid., 2 Quemádmodum desíderat cervus ad fontes aquárum: ita desíderat ánima mea ad te, Deus. V/. Glória Patri.

Orátio

DEUS, qui beátam Catharínam, in contemplánda Fílii tui passióne, divíni amóris igne flagráre fecísti: quǽsumus; ut, ipsa intercedénte, tuæ in nobis flammam caritátis accéndas, et ejúsdem passiónis, partícipes dignánter effícias. Per eúmdem Dóminum.

Prov. 31, 10-31

MULÍEREM fortem quis invéniet? Procul, et de últimis fínibus prétium ejus. Confídit in ea cor viri sui, et spóliis non indigébit. Reddet ei bonum, et non malum, ómnibus diébus vitæ suæ. Quæsívit lanam et linum, et operáta est consílio mánuum suárum. Facta est quasi navis institóris, de longe portans panem suum. Et de nocte surréxit, dedítque prædam domésticis suis, et cibária ancíllis suis. Considerávit agrum, et emit eum: de fructu mánuum suárum plantávit víneam. Accínxit fortitúdine lumbos suos, et roborávit bráchium suum. Gustávit, et vidit quia bona est negotiátio ejus: non exstinguétur in nocte lucérna ejus. Manum suam misit ad fórtia, et dígiti ejus apprehendérunt fusum. Manum suam apéruit ínopi, et palmas suas exténdit ad páuperem. Non timébit dómui suæ a frigóribus nivis: omnes enim doméstici ejus vestíti sunt duplícibus. Stragulátam vestem fecit sibi: byssus, et púrpura induméntum ejus. Nóbilis in portis vir ejus, quando séderit cum senatóribus terræ. Síndonem fecit et véndidit, et cíngulum trádidit Chananǽo. Fortitúdo et decor induméntum ejus, et ridébit in die novíssimo. Os suum apéruit sapiéntiæ, et lex cleméntiæ in lingua ejus. Considerávit sémitas domus suæ, et panem otiósa non comédit. Surrexérunt fílii ejus, et beatíssimam prædicavérunt: vir ejus, et laudávit eam. Multæ fíliæ congregavérunt divítias: tu supergréssa es univérsas. Fallax grátia, et vana est pulchritúdo: múlier timens Dóminum, ipsa laudábitur. Date ei de fructu mánuum suárum: et laudent eam in portis ópera ejus.

Graduále Ps. 44, 3 Diffúsa est grátia in lábiis tuis: proptérea benedíxit te Deus in ætérnum. V/. Ibid., 5 Propter veritátem, et mansuetúdinem, et justítiam: et dedúcet te mirabíliter déxtera tua.

Allelúja, allelúja . V/. Ps. 72, 25-26 Quid mihi est in cælo? et a te quid vólui super terram? Defécit caro mea, et cor meum: Deus cordis mei et pars mea Deus in ætérnum. Allelúja.
Post Septuagésimam, omíssis Allelúja et Versu sequénti, dícitur

Tractus Veni, sponsa Christi, áccipe corónam, quam tibi Dóminus præparávit in ætérnum. V/. Ps. 44, 8 et 5 Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ præ consórtibus tuis. V/. Spécie tua et pulchritúdine tua inténde, próspere procéde, et regna.

Témpore autem Pascháli omíttitur Graduále, et ejus loco dícitur:

Allelúja, allelúja . V/. Ps. 72, 25-26 Quid mihi est in cælo? et a te quid vólui super terram? Defécit caro mea, et cor meum: Deus cordis mei et pars mea Deus in ætérnum. Allelúja. V/. Concáluit cor meum intra me: et in meditatióne mea exardéscet ignis. Allelúja.

+ Sequéntia sancti Evangélii secúndum Matthǽum.

Matth. 13, 44-52

IN illo témpore: Dixit Jesus discípulis suis parábolam hanc: Símile est regnum cælórum thesáuro abscóndito in agro: quem, qui invénit homo, abscóndit, et præ gáudio illíus vadit, et vendit univérsa, quæ habet, et emit agrum illum. Íterum símile est regnum cælórum hómini negotiatóri, quærénti bonas margarítas. Invénta autem una pretiósa margaríta, ábiit, et véndidit ómnia, quæ hábuit, et emit eam. Íterum símile est regnum cælórum sagénæ missæ in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne sǽculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis hæc ómnia? Dicunt ei: Étiam. Ait illis: Ideo omnis scriba doctus in regno cælórum símilis est hómini patrifamílias, qui profert de thesáuro suo nova et vétera.

Offertórium Ps. 107, 2 Parátum cor meum, Deus, parátum cor meum: cantábo, et psallam in glória mea.

Secréta

HIS sacrifíciis, quǽsumus, omnípotens Deus, propitiátus inténde: et, beáta Catharína intercedénte, spíritum in nobis tuæ dilectiónis accénde. Per Dóminum.

Commúnio Ps. 83, 3 Cor meum et caro mea exsultavérunt in Deum vivum.

Postcommúnio

SÚPPLICES te rogámus, omnípotens Deus: ut, quos tuis refícere dignátus es sacraméntis, intercedénte beáta Catharína, tríbuas pro tui amóre terréna despícere; et cæléstium semper participatióne gaudére. Per Dóminum.

MISSÆ PRO ALÍQUIBUS LOCIS

FESTA APRÍLIS

S. BENEDÍCTI JOSÉPHI LABRE

RÉLIQUI domum meam: dimísi hereditátem meam: inops et pauper ego sum: Dóminus autem assúmpsit me. (T. P. Allelúja, allelúja.) Ps. 41, 2 Quemádmodum desíderat cervus ad fontes aquárum, ita desíderat ánima mea ad te, Deus. V/. Glória Patri.

Orátio

DEUS, qui sanctum Benedíctum Joséphum Confessórem tuum, humilitátis stúdio et paupertátis amóre, tibi uni adhærére fecísti: da nobis ejus suffragántibus méritis; terréna cuncta despícere, et cæléstia semper inquírere. Per Dóminum.

1 Tim. 6, 6-12

CARÍSSIME: Est quæstus magnus píetas cum sufficiéntia. Nihil enim intúlimus in hunc mundum: haud dúbium quod nec auférre quid póssumus. Habéntes autem aliménta, et quibus tegámur, his conténti simus. Nam qui volunt dívites fíeri, íncidunt in tentatiónem, et in láqueum diáboli, et desidéria multa inutília et nocíva, quæ mergunt hómines in intéritum et perditiónem. Radix enim ómnium malórum est cupíditas: quam quidam appeténtes, erravérunt a fide, et inseruérunt se dolóribus multis. Tu autem, o homo Dei, hæc fuge: sectáre vero justítiam, pietátem, fidem, caritátem, patiéntiam, mansuetúdinem. Certa bonum certámen fídei, apprehénde vitam ætérnam.

Graduále Ps. 39, 5 et 18 Beátus vir, cujus est nomen Dómini spes ejus, et non respéxit in vanitátes et insánias falsas. V/. Ego autem mendícus sum et pauper: Dóminus sollícitus est mei. Adjútor meus, et protéctor meus tu es.

Allelúja, allelúja. V/. Ps. 38, 13 Exáudi oratiónem meam, Dómine, et deprecatiónem meam: áuribus pércipe lácrimas meas: quóniam ádvena ego sum apud te, et peregrínus. Allelúja.
Post Septuagésimam, omíssis Allelúja et Versu sequénti, dícitur

Tractus 1 Joann 2, 15, 16 et 17 Nolíte dilígere mundum, neque ea quæ in mundo sunt. Si quis díligit mundum, non est cáritas Patris in eo. V/. Omne, quod est in mundo, concupiscéntia carnis est, et concupiscéntia oculórum, et supérbia vitæ. V/. Et mundus transit, et concupiscéntia ejus: qui autem facit voluntátem Dei, manet in ætérnum.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Ps. 112, 5-6 Quis sicut Dóminus Deus noster, qui in altis hábitat, et humília réspicit in cælo et in terra? Allelúja. V/. Ibid., 7-8 Súscitans a terra ínopem, et de stércore érigens páuperem: ut cóllocet eum cum princípibus, cum princípibus pópuli sui. Allelúja.

+ Sequéntia sancti Evangélii secúndum Matthǽum.

Matth. 16, 24-27

IN illo témpore: Dixit Jesus discípulis suis: Si quis vult post me veníre, ábneget semetípsum, et tollat crucem suam, et sequátur me. Qui enim volúerit ánimam suam salvam fácere, perdet eam: qui autem perdíderit ánimam suam propter me, invéniet eam. Quid enim prodest hómini, si mundum univérsum lucrétur, ánimæ vero suæ detriméntum patiátur? Aut quam dabit homo commutatiónem pro ánima sua? Fílius enim hóminis ventúrus est in glória Patris sui cum Angelis suis: et tunc reddet unicuíque secúndum ópera ejus.

Offertórium Hebr. 13, 14 et 15 Non habémus hic manéntem civitátem, sed futúram inquírimus: offerámus ergo hóstiam laudis semper Deo, fructum labiórum confiténtium nómini ejus. (T. P. Allelúja.)

Secréta

OBLÁTA múnera, clementíssime Deus, propítius réspice: et, sancti Benedícti Joséphi Confessóris tui interveniénte suffrágio, in salútem nobis proveníre concéde. Per Dóminum.

Commúnio Matth. 5, 3 et 8 Beáti páuperes spíritu, quóniam ipsórum est regnum cælórum: beáti mundo corde, quóniam ipsi Deum vidébunt. (T. P. Allelúja.)

Postcommúnio

SACRIS, Dómine, refécti munéribus; quǽsumus; ut sancti Benedícti Joséphi Confessóris tui virtútes imitémur, cujus póscimus méritis adjuvári. Per Dóminum.

MISSÆ PRO ALÍQUIBUS LOCIS

B. MARÍÆ VÍRGINIS

DE BONO CONSÍLIO

GAUDEÁMUS omnes in Dómino, diem festum celebrántes sub honóre beátæ Maríæ Vírginis, Boni Consílii Matris: de cujus solemnitáte gaudent Angeli, et colláudant Fílium Dei. (T. P. Allelúja, allelúja.) Ps. 44, 2 Eructávit cor meum verbum bonum: dico ego ópera mea Regi. V/. Glória Patri.

Orátio

DEUS, qui Genitrícem dilécti Fílii tui matrem nobis dedísti, ejúsque speciósam Imáginem mira apparitióne clarificáre dignátus es: concéde, quǽsumus; ut, ejúsdem mónitis júgiter inhæréntes, secúndum cor tuum vívere, et ad cæléstem pátriam felíciter perveníre valeámus. Per eúmdem Dóminum.

Eccli. 24, 23-31

EGO quasi vitis fructificávi suavitátem odóris: et flores mei, fructus honóris et honestátis. Ego mater pulchræ dilectiónis, et timóris, et agnitiónis, et sanctæ spei. In me grátia omnis viæ et veritátis: in me omnis spes vitæ et virtútis. Transíte ad me, omnes qui concupíscitis me, et a generatiónibus meis implémini. Spíritus enim meus super mel dulcis, et heréditas mea super mel et favum. Memória mea in generatiónes sæculórum. Qui edunt me, adhuc esúrient: et qui bibunt me, adhuc sítient. Qui audit me, non confundétur: et qui operántur in me, non peccábunt. Qui elúcidant me, vitam ætérnam habébunt.

Graduále Prov. 8, 12 et 34 Ego sapiéntia hábito in consílio, et erudítis intérsum cogitatiónibus. V/. Beátus homo qui audit me, et vígilat ad fores meas quotídie, et obsérvat ad postes óstii mei.

Allelúja, allelúja. V/. Ibid., 35 Qui me invénerit, invéniet vitam, et háuriet salútem a Dómino. Allelúja.
Post Septuagésimam, omíssis Allelúja et Versu sequénti, dícitur

Tractus Prov. 8, 14, 17, et 20-21 Meum est consílium et ǽquitas, mea est prudéntia, mea est fortitúdo. V/. Ego diligéntes me díligo: et qui mane vígilant ad me, invénient me. V/. In viis justítiæ ámbulo, in médio semitárum judícii. V/. Ut ditem diligéntes me, et thesáuros eórum répleam.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Luc. 1, 28 Ave, María, grátia plena: Dóminus tecum: benedícta tu in muliéribus. Allelúja. V/. Per te, Dei Génitrix, nobis est vita pérdita data: quæ de cælo suscepísti prolem, et mundo genuísti Salvatórem. Allelúja.

+ Sequéntia sancti Evangélii secúndum Lucam.

Luc. 1, 26-33

IN illo témpore: Missus est Angelus Gábriel a Deo in civitátem Galilǽæ, cui nomen Názareth, ad Vírginem desponsátam viro, cui nomen erat Joseph, de domo David, et nomen Vírginis María. Et ingréssus Angelus ad eam, dixit: Ave, grátia plena: Dóminus tecum: benedícta tu in muliéribus. Quæ cum audísset, turbáta est in sermóne ejus: et cogitábat qualis esset ista salutátio. Et ait Angelus ei: Ne tímeas, María, invenísti enim grátiam apud Deum: ecce concípies in útero, et páries fílium, et vocábis nomen ejus Jesum. Hic erit magnus, et Fílius Altíssimi vocábitur, et dabit illi Dóminus Deus sedem David patris ejus: et regnábit in domo Jacob in ætérnum, et regni ejus non erit finis.

Credo.

Secréta

Præfátio de beáta María Vírgine Et te in Festivitáte.

Commúnio Regína mundi digníssima, María Virgo perpétua, intercéde pro nostra pace et salúte, quæ genuísti Christum Dóminum Salvatórem ómnium. (T. P. Allelúja.)

Postcommúnio

ADJUVET nos, quǽsumus, Dómine, gloriósæ tuæ Genitrícis sempérque Vírginis Maríæ, Matris Boni Consílii, intercéssio veneránda: ut, quos perpétuis cumulávit benefíciis; ea quæ agénda sunt júgiter vidére fáciat, et ad implénda quæ víderint convaléscere: Qui vivis.

MISSÆ PRO ALÍQUIBUS LOCIS