Missále románum 1957 en préparation

ORDO

AD FACIÉNDAM

ET ASPERGÉNDAM

AQUAM BENEDÍCTAM

I

BENEDÍCTIO AQUÆ

V/. Adjutórium nostrum in nómine Dómini.

R/. Qui fecit cælum et terram.

Deínde absolúte íncipit exorcísmum salis.

EXORCÍZO te, creatúra salis, per Deum + vivum, per Deum + verum, per Deum + sanctum: per Deum, qui te per Eliséum prophétam in aquam mitti jussit, ut sanarétur sterílitas aquæ: ut efficiáris sal exorcizátum in salútem credéntium: et sis ómnibus suméntibus te sánitas ánimæ et córporis: et effúgiat atque discédat a loco, in quo aspérsum fúeris, omnis phantásia et nequítia, vel versútia diabólicæ fraudis, omnísque spíritus immúndus, adjurátus per eum, qui ventúrus est judicáre vivos et mórtuos, et sǽculum per ignem. R/. Amen.

Orémus. Orátio

IMMÉNSAM cleméntiam tuam, omnípotens ætérne Deus, humíliter implorámus: ut hanc creatúram salis, quam in usum géneris humáni tribuísti, bene+dícere, et sancti+ficáre tua pietáte dignéris; ut sit ómnibus suméntibus salus mentis et córporis: et, quidquid ex eo tactum vel respérsum fúerit, cáreat omni immundítia, omníque impugnatióne spiritális nequítiæ. Per Dóminum. R/. Amen.

Exorcísmus aquæ: et dícitur absolúte:

EXORCÍZO te, creatúra aquæ, in nómine Dei + Patris omnipoténtis, et in nómine Jesu + Christi Fílii ejus Dómini nostri, et in virtúte Spíritus + Sancti: ut fias aqua exorcizáta ad effugándam omnem potestátem inimíci, et ipsum inimícum eradicáre et explantáre váleas cum ángelis suis apostáticis, per virtútem ejúsdem Dómini nostri Jesu Christi: qui ventúrus est judicáre vivos et mórtuos, et sǽculum per ignem. R/. Amen.

Orémus. Orátio

DEUS, qui ad salútem humáni géneris, máxima quæque sacraménta in aquárum substántia condidísti: adésto propítius invocatiónibus nostris et eleménto huic, multímodis purificatiónibus præparáto, virtútem tuæ bene+dictiónis infúnde: ut creatúra tua, mystériis tuis sérviens, ad abigéndos dǽmones, morbósque pelléndos, divínæ grátiæ sumat efféctum; ut, quidquid in dómibus vel in locis fidélium hæc unda respérserit, cáreat omni immundítia, liberétur a noxa: non illic resídeat spíritus péstilens, non aura corrúmpens: discédant omnes insídiæ laténtis inimíci; et si quid est, quod aut incolumitáti habitántium ínvidet aut quiéti, aspersióne hujus aquæ effúgiat; ut salúbritas, per invocatiónem sancti tui nóminis expetíta, ab ómnibus sit impugnatiónibus defénsa. Per Dóminum. R/. Amen.

Hic ter mittat sal in aquam in modum crucis, dicéndo semel:

COMMÍXTIO salis et aquæ páriter fiat in nómine Pa+tris, et Fí+lii, et Spíritus + Sancti. R/. Amen.

V/. Dóminus vobíscum.

R/. Et cum spíritu tuo.

Orémus. Orátio

DEUS, invíctæ virtútis auctor et insuperábilis impérii rex ac semper magníficus triumphátor: qui advérsæ dominatiónis vires réprimis, qui inimíci rugiéntis sævítiam súperas, qui hostíles nequítias poténter expúgnas: te, Dómine, treméntes et súpplices deprecámur ac pétimus: ut hanc creatúram salis et aquæ dignánter aspícias, benígnus illústres, pietátis tuæ rore sanctífices; ut, ubicúmque fúerit aspérsa, per invocatiónem sancti nóminis tui, omnis infestátio immúndi spíritus abigátur: terrórque venenósi serpéntis procul pellátur: et præséntia Sancti Spíritus nobis, misericórdiam tuam poscéntibus, ubíque adésse dignétur. Per Dóminum nostrum Jesum Christum Fílium tuum: Qui tecum vivit et regnat in unitáte ejúsdem Spíritus Sancti Deus, per ómnia sǽcula sæculórum. R/. Amen.

II

ASPÉRSIO AQUÆ BENEDÍCTÆ

PER ANNUM

ASPÉRGES me, ¶ Dómine, hyssópo, et mundábor: lavábis me, et super nivem dealbábor. Ps. 50, 3 Miserére mei, Deus, secúndum magnam misericórdiam tuam. V/. Gloria Patri.

Et repétitur Ant. Aspérges me.

Finíta Antiphóna supradícto modo, Sacérdos, qui aspérsit aquam, revérsus ad Altáre, stans ante gradus Altáris, junctis mánibus dicat:

V/. Osténde nobis, Dómine, misericórdiam tuam.

R/. Et salutáre tuum da nobis.

V/. Dómine, exáudi oratiónem meam.

R/. Et clamor meus ad te véniat.

V/. Dóminus vobíscum.

R/. Et cum spíritu tuo.

Orémus. Orátio

EXÁUDI nos, Dómine sancte, Pater omnípotens, ætérne Deus: et míttere dignéris sanctum Angelum tuum de cælis; qui custódiat, fóveat, prótegat, vísitet atque deféndat omnes habitántes in hoc habitáculo. Per Christum Dóminum nostrum. R/. Amen.

TÉMPORE PASSIÓNIS

TÉMPORE PASCHÁLI

VIDI aquam ¶ egrediéntem de templo, a látere dextro, allelúja: et omnes, ad quos pervénit aqua ista, salvi facti sunt, et dicent: allelúja, allelúja. Ps. 117, 1 Confitémini Dómino, quóniam bonus: quóniam in sǽculum misericórdia ejus. V/. Glória Patri.

Repétitur Ant. Vidi aquam egrediéntem.

Finíta Antiphóna supradícto modo, Sacérdos qui aspérsit aquam, revérsus ad Altáre, stans ante gradus Altáris, junctis mánibus, dicat:

V/. Osténde nobis, Dómine, misericórdiam tuam, allelúja.

R/. Et salutáre tuum da nobis, allelúja.

V/. Dómine, exáudi oratiónem meam.

R/. Et clamor meus ad te véniat.

V/. Dóminus vobíscum.

R/. Et cum spíritu tuo.

Orémus. Orátio

EXÁUDI nos, Dómine sancte, Pater omnípotens, ætérne Deus: et míttere dignéris sanctum Angelum tuum de cælis; qui custódiat, fóveat, prótegat, vísitet atque deféndat omnes habitántes in hoc habitáculo. Per Christum Dóminum nostrum. R/. Amen.

¶ In Domínica vero Trinitátis resúmitur Ant. Aspérges me, Dómine, etc., ut supra.

¶ In die sancto Paschæ et Pentecóstes, ubi est Fons baptismális, fit aspérsio cum aqua prídie benedícta in Fonte Baptísmi, et ante infusiónem Olei et Chrísmatis accepta.