Missále románum 1957 en préparation
|
|  Yüklə 4.47 Mb.
|
MISSÆ VOTÍVÆ AD DIVÉRSAIN CONSECRATIÓNE EPÍSCOPI¶ Missa dícitur de Offício diéi, sed sub única conclusióne cum 1a Oratióne addúntur sequéntes Oratiónes: et infra Actiónem dícitur Hanc ígitur, ut infra. Orátio
ADÉSTO supplicatiónibus nostris, omnípotens Deus: ut, quod humilitátis nostræ geréndum est ministério, tuæ virtútis impleátur efféctu. Per Dóminum. Secréta
Consecrátor dicit: SÚSCIPE, Dómine, múnera, quæ tibi offérimus pro hoc fámulo tuo: ut propítius in eo tua dona custódias. Per Dóminum. Consecrátus dicit: SÚSCIPE, Dómine, múnera, quæ tibi offérimus pro me fámulo tuo: ut propítius in me tua dona custódias. Per Dóminum. Infra Actiónem Consecrátor dicit: HANC ígitur oblatiónem servitútis nostræ, sed et cunctæ famíliæ tuæ, quam tibi offérimus étiam pro hoc fámulo tuo, quem ad Episcopátus órdinem promovére dignátus es, quǽsumus, Dómine, ut placátus accípias, et propítius in eo tua dona custódias: ut, quod divíno múnere consecútus est, divínis efféctibus exsequátur: diésque nostros in tua pace dispónas, atque ab ætérna damnatióne nos éripi, et in electórum tuórum júbeas grege numerári. Per Christum Dóminum nostrum. Amen. Consecrátus dicit: HANC ígitur oblatiónem servitútis nostræ, sed et cunctæ famíliæ tuæ, quam tibi offérimus étiam pro me fámulo tuo, quem ad Episcopátus órdinem promovére dignátus es, quǽsumus, Dómine, ut placátus accípias, et propítius in me tua dona custódias: ut, quod divíno múnere consecútus sum, divínis efféctibus éxsequar: diésque nostros in tua pace dispónas, atque ab ætérna damnatióne nos éripi, et in electórum tuórum júbeas grege numerári. Per Christum Dóminum nostrum. Amen. Postcommúnio PLENUM, quǽsumus, Dómine, in nobis remédium tuæ miseratiónis operáre: ac tales nos esse pérfice propítius, et sic fovéri; ut tibi in ómnibus placére valeámus. Per Dóminum.
MISSÆ VOTÍVÆ AD DIVÉRSAIN ANNIVERSÁRIOELECTIÓNIS ET CONSECRATIÓNISEPÍSCOPI¶ In Anniversário Electiónis Epíscopi, vel, si Epíscopus ex ália Sede translátus fúerit, Translatiónis, nec non in Anniversário Consecratiónis ejusdem, in ecclésiis Cathedrálibus et Collegiátis Diœcésis, accedénte Epíscopi mandáto, dícitur ad modum votívæ solémnis, juxta Rúbricas, sequens Missa. Intróitus Ps. 131, 9-10 SACERDÓTES tui, Dómine, índuant justítiam, et sancti tui exsúltent: propter David servum tuum, non avértas fáciem Christi tui. (T. P. Allelúja, allelúja.) Ps. ibid., 1 Meménto, Dómine, David: et omnis mansuetúdinis ejus. V/. Glória Patri. Orátio
DEUS, ómnium fidélium pastor et rector, fámulum tuum N., quem pastórem ecclésiæ N. præésse voluísti, propítius réspice: da ei, quǽsumus, verbo et exémplo, quibus præest, profícere; ut ad vitam, una cum grege sibi crédito, pervéniat sempitérnam. Per Dóminum. Léctio Epístolæ beáti Pauli Apóstoli ad Hebrǽos. Hebr. 5, 1-4 FRATRES: Omnis póntifex ex homínibus assúmptus, pro homínibus constitúitur in iis, quæ sunt ad Deum: ut ófferat dona et sacrifícia pro peccátis: qui condolére possit iis, qui ignórant et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo, tamquam Aaron. Graduále Ps. 131, 16-17 Sacerdótes ejus índuam salutári: et sancti ejus exsultatióne exsultábunt. V/. Illuc prodúcam cornu David: parávi lucérnam Christo meo. Allelúja, allelúja. V/. Ps. 109, 4 Jurávit Dóminus, et non pænitébit eum: Tu es sacérdos in ætérnum, secúndum órdinem Melchísedech. Allelúja. Post Septuagésimam, omíssis Allelúja et Versu sequénti, dícitur Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiæ in domo ejus: et justítia ejus manet in sǽculum sǽculi. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 109, 4 Jurávit Dóminus, et non pænitébit eum: Tu es sacérdos in ætérnum, secúndum órdinem Melchísedech. Allelúja. V/. Eccli. 45, 9 Amávit eum Dóminus, et ornávit eum: stolam glóriæ índuit eum. Allelúja. + Sequéntia sancti Evangélii secúndum Marcum. Marc. 13, 33-37 IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri præcépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte. Credo.
Offertórium Ps. 88, 25 Véritas mea et misericórdia mea cum ipso: et in nómine meo exaltábitur cornu ejus. (T. P. Allelúja.) Secréta
OBLÁTIS, quǽsumus, Dómine, placáre munéribus: et fámulum tuum N., quem pastórem ecclésiæ N. præésse voluísti, assídua protectióne gubérna. Per Dóminum. Commúnio Matth. 24, 46-47 Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum. (T. P. Allelúja.) Postcommúnio HÆC nos, quǽsumus, Dómine, divíni sacraménti percéptio prótegat: et fámulum tuum N., quem pastórem ecclésiæ N. præésse voluísti; una cum commísso sibi grege, salvet semper, et múniat. Per Dóminum. MISSÆ VOTÍVÆ AD DIVÉRSAIN COLLATIÓNESACRÓRUM ORDINUM¶ In Sábbatis Quatuor Témporum et in Sábbato infra Hebdómadam IV Quadragésimæ, Missa dícitur de Sábbato, et réliquis diébus de Offício diéi; sed sub única conclusióne cum 1a Oratióne addúntur sequéntes: Orátio
EXÁUDI, quǽsumus, Dómine, súpplicum preces, et devóto tibi péctore famulántes, perpétua defensióne custódi: ut nullis perturbatiónibus impedíti, líberam servitútem tuis semper exhibeámus offíciis. Per Dóminum. Secréta
TUIS, quǽsumus, Dómine, operáre mystériis: ut hæc tibi múnera dignis méntibus offerámus. Per Dóminum. Postcommúnio QUOS tuis, Dómine, réficis sacraméntis, contínuis attólle benígnus auxíliis: ut tuæ redemptiónis efféctum, et mystériis capiámus, et móribus: Qui vivis et regnas.
MISSÆ VOTÍVÆ AD DIVÉRSAIN BENEDICTIÓNE ABBÁTIS¶ Missa dícitur de Offício diéi, sed sub única conclusióne cum 1a Oratióne addúntur sequéntes Oratiónes: Orátio
Póntifex dicit: CONCÉDE, quǽsumus, Dómine, huic fámulo tuo: ut prædicándo et exercéndo quæ recta sunt, per exémplum bonórum óperum ánimos suórum ínstruat subjectórum; et ætérnæ remuneratiónis mercédem a te piíssimo Pastóre percípiat. Per Dóminum. Eléctus dicit: CONCÉDE, quǽsumus, Dómine, mihi fámulo tuo: ut prædicándo et exercéndo quæ recta sunt, per exémplum bonórum óperum ánimos meórum ínstruam subjectórum; et ætérnæ remuneratiónis mercédem a te piíssimo Pastóre percípiam. Per Dóminum. Secréta Póntifex dicit: MÚNERA nostra, quǽsumus, Dómine, súscipe placátus: et hunc fámulum tuum semper et ubíque misericórditer prótege. Per Dóminum. Abbas dicit: MÚNERA, quǽsumus, Dómine, súscipe placátus: et me fámulum tuum semper et ubíque misericórditer prótege. Per Dóminum. Postcommúnio Póntifex dicit: HÆC nos commúnio, Dómine, purget a crímine; et hunc fámulum tuum benígna pietáte consérvet. Per Dóminum. Abbas dicit: HÆC nos commúnio, Dómine, purget a crímine; et me fámulum tuum benígna pietáte consérvet. Per Dóminum. MISSÆ VOTÍVÆ AD DIVÉRSAIN BENEDICTIÓNE ABBATÍSSƶ Missa dícitur de Offício diéi, sed sub única conclusióne cum 1a Oratióne addúntur sequéntes Oratiónes: Orátio
DA, quǽsumus, Dómine, huic fámulæ tuæ, quam virginitátis honóre dignátus es decoráre, inchoáti óperis consummátum efféctum: et, ut perféctam tibi ófferat plenitúdinem, inítia sua perdúcere mereátur ad finem. Per Dóminum. Secréta
OBLÁTIS hóstiis, quǽsumus, Dómine, præsénti fámulæ tuæ perseverántiam perpétuæ virginitátis accómmoda: ut, apértis jánuis, summi Regis advéntu, regnum cæléste cum lætítia mereátur intráre. Per Dóminum. Postcommúnio RÉSPICE, Dómine, fámulæ tuæ tibi débitam servitútem, ut inter humánæ fragilitátis incérta, nullis adversitátibus opprimátur, quæ de tua protectióne confídit. Per Dóminum.
MISSÆ VOTÍVÆ AD DIVÉRSAIN BENEDICTIÓNEET CONSECRATIÓNE VÍRGINUM¶ Missa dícitur de Offício diéi, sed sub única conclusióne cum 1a Oratióne addúntur sequéntes Oratiónes: Orátio
DA, quǽsumus, Dómine, his famulábus tuis, quas virginitátis honóre dignátus es decoráre, inchoáti óperis consummátum efféctum: et, ut perféctam tibi ófferant plenitúdinem, inítia sua perdúcere mereántur ad finem. Per Dóminum. Secréta
OBLÁTIS hóstiis, quǽsumus, Dómine, præséntibus famulábus tuis perseverántiam perpétuæ virginitátis accómmoda: ut, apértis jánuis, summi Regis advéntu, regnum cæléste cum lætítia mereántur intráre. Per Dóminum. Postcommúnio DEUS, qui habitáculum tuum in corde pudíco fundásti: réspice super has fámulas tuas; et quæ castigatiónibus assíduis póstulant, tua consolatióne percípiant. Per Dóminum.
MISSÆ VOTÍVÆ AD DIVÉRSAIN BENEDICTIÓNE CŒMETÉRII¶ Missa dícitur de Offício diéi, sed sub única conclusióne cum 1a Oratióne addúntur sequéntes Oratiónes: Orátio
DEUS, cujus miseratióne ánimæ fidélium requiéscunt: huic cœmetério, quǽsumus, Dómine, Angelum tuum sanctum députa custódem, et quorum quarúmque córpora hic sepeliúntur, ánimas eórum ab ómnibus absólve vínculis delictórum; ut in te semper cum Sanctis tuis sine fine læténtur. Per Dóminum. Secréta
MÚNERA, Dómine, obláta sanctífica: et, qui te ipsum in sepúlcro poni voluísti, et exémplum resurgéndi fidélibus tuis largíri dignátus es, da, quǽsumus, fidélium tuórum animábus hic in te quiescéntium véniam peccatórum; ut hæc salutáris hóstia sit remédium et réquies animárum eórum et córporum: Qui vivis. Postcommúnio MUNÉRIBUS sacris satiáti, quǽsumus, Dómine Deus noster: ut plebs tua, quæ in futúro a morte córporis resurrectúra créditur, te miseránte, a morte ánimæ resúrgere mereátur. Per Dóminum.
MISSÆ VOTÍVÆ AD DIVÉRSAIN RECONCILIATIÓNEECCLÉSIÆ ET CŒMETÉRII¶ Missa dícitur de Offício diéi, sed sub única conclusióne cum 1a Oratióne addúntur sequéntes Oratiónes: Orátio
DEUS, qui dixísti: Domus mea domus oratiónis vocábitur: domum istam infidélium spurcítiis contaminátam mundáre et sanctificáre dignéris; et ómnium preces et vota hoc in loco ad te clamántium cleménter exáudias, et benígnus suscípias. Per Dóminum. Secréta
HÆC hóstia, quǽsumus, Dómine, et locum istum ab ómnibus immundítiis expúrget: et supplicatiónes nostras semper et ubíque reddat tibi accéptas. Per Dóminum. Postcommúnio PERCIPIÉNTES, Dómine, múnera salútis ætérnæ, súpplices exorámus: ut templum hoc et cœmetérium, ab infidélium inquinaméntis emundátum, benedictióne tua máneat sanctificátum; et péctora nostra ab omni sorde vitiórum alienáta tibíque devóta semper exsístant. Per Dóminum.
MISSÆ VOTÍVÆ AD DIVÉRSAMISSAPRO SPONSO ET SPONSA¶ Si solémnis benedíctio Nuptiárum, intra Missam, faciénda sit die Domínica, vel álio die Festo, sive de præcépto, licet supprésso, sive Dúplici I vel II classis, aut in Octávis Epiphaníæ, Páschatis, Pentecóstes aut Córporis Christi, vel in Fériis ac Vigíliis privilegiátis, dicátur Missa de Offício occurrénti, cum Glória in excélsis et Credo, si illa Missa id requírat, et cum Commemoratióne sequéntis Missæ pro Sponso et Sponsa, et réliquis, quæ pro Communióne, et compleménto benedictiónis in ea habéntur. Si autem solémnis benedíctio Nuptiárum, intra Missam, faciénda sit áliis diébus, etiámsi in iis occúrrat Festum Duplex majus vel minus, dicátur sequens Missa votíva pro Sponso et Sponsa, prætérquam in Commemoratióne Ómnium Fidélium Defunctórum, in qua et Missa votíva et solémnis benedíctio Nuptiális prohibéntur. Intróitus Tob. 7, 15; 8, 19 DEUS Israël conjúngat vos: et ipse sit vobíscum, qui misértus est duóbus únicis: et nunc, Dómine, fac eos plénius benedícere te. (T. P. Allelúja, allelúja.) Ps. 127, 1 Beáti omnes qui timent Dóminum: qui ámbulant in viis ejus. V/. Glória Patri. Orátio
EXÁUDI nos, omnípotens et miséricors Deus: ut, quod nostro ministrátur offício, tua benedictióne pótius impleátur. Per Dóminum nostrum. Léctio Epístolæ beáti Pauli Apóstoli ad Ephésios. Ephes. 5, 22-33 FRATRES: Mulíeres viris suis súbditæ sint, sicut Dómino: quóniam vir caput est mulíeris: sicut Christus caput est Ecclésiæ: ipse, salvátor córporis ejus. Sed sicut Ecclésia subjécta est Christo, ita et mulíeres viris suis in ómnibus. Viri, dilígite uxóres vestras, sicut et Christus diléxit Ecclésiam, et seípsum trádidit pro ea, ut illam sanctificáret, mundans lavácro aquæ in verbo vitæ, ut exhibéret ipse sibi gloriósam Ecclésiam, non habéntem máculam, aut rugam, aut áliquid hujúsmodi, sed ut sit sancta et immaculáta. Ita et viri debent dilígere uxóres suas, ut córpora sua. Qui suam uxórem díligit, seípsum díligit. Nemo enim umquam carnem suam ódio hábuit: sed nutrit, et fovet eam, sicut et Christus Ecclésiam: quia membra sumus córporis ejus, de carne ejus et de óssibus ejus. Propter hoc relínquet homo patrem et matrem suam, et adhærébit uxóri suæ: et erunt duo in carne una. Sacraméntum hoc magnum est, ego autem dico in Christo et in Ecclésia. Verúmtamen et vos sínguli, unusquísque uxórem suam, sicut seípsum díligat: uxor autem tímeat virum suum. Graduále Ps. 127, 3 Uxor tua sicut vitis abúndans in latéribus domus tuæ. V/. Fílii tui sicut novéllæ olivárum in circúitu mensæ tuæ. Allelúja, allelúja. V/. Ps. 19, 3 Mittat vobis Dóminus auxílium de sancto: et de Sion tueátur vos. Allelúja. Post Septuagésimam, omíssis Allelúja et Versu sequénti, dícitur Tractus Ps. 127, 4-6 Ecce sic benedicétur omnis homo, qui timet Dóminum. V/. Benedícat tibi Dóminus ex Sion: et vídeas bona Jerúsalem ómnibus diébus vitæ tuæ. V/. Et vídeas fílios filiórum tuórum: pax super Israël. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 19, 3 Mittat vobis Dóminus auxílium de sancto: et de Sion tueátur vos. Allelúja. V/. Ps. 133, 3 Benedícat vobis Dóminus ex Sion: qui fecit cælum et terram. Allelúja. + Sequéntia sancti Evangélii secúndum Matthǽum. Matth. 19, 3-6 IN illo témpore: Accessérunt ad Jesum pharisǽi tentántes eum, et dicéntes: Si licet hómini dimíttere uxórem suam quacúmque ex causa? Qui respóndens, ait eis: Non legístis, quia qui fecit hóminem ab inítio, másculum et féminam fecit eos? et dixit: Propter hoc dimíttet homo patrem et matrem, et adhærébit uxóri suæ, et erunt duo in carne una. Itaque jam non sunt duo, sed una caro. Quod ergo Deus conjúnxit, homo non séparet. Offertórium Ps. 30, 15-16 In te sperávi, Dómine: dixi: Tu es Deus meus: in mánibus tuis témpora mea. (T. P. Allelúja.) Secréta SÚSCIPE, quǽsumus, Dómine, pro sacra connúbii lege munus oblátum: et, cujus largítor es óperis, esto dispósitor. Per Dóminum. ¶ Dicto Pater noster, Sacérdos ántequam dicat Líbera nos, quǽsumus, Dómine, stans in cornu Epístolæ versus Sponsum et Sponsam ante Altáre genufléxos, dicit super eos sequéntes Oratiónes: Orémus. Orátio PROPITIÁRE, Dómine, supplicatiónibus nostris, et institútis tuis, quibus propagatiónem humáni géneris ordinásti, benígnus assíste: ut, quod te auctóre júngitur, te auxiliánte servétur. Per Dóminum. Orémus.
DEUS, qui potestáte virtútis tuæ de níhilo cuncta fecísti: qui dispósitis universitátis exórdiis, hómini ad imáginem Dei facto, ídeo inseparábile mulíeris adjutórium condidísti, ut femíneo córpori de viríli dares carne princípium, docens quod ex uno placuísset instítui, numquam licére disjúngi: Deus, qui tam excellénti mystério conjugálem cópulam consecrásti, ut Christi et Ecclésiæ sacraméntum præsignáres in fǿdere nuptiárum: Deus, per quem múlier júngitur viro, et socíetas principáliter ordináta, ea benedictióne donátur, quæ sola nec per originális peccáti pœnam, nec per dilúvii est abláta senténtiam: réspice propítius super hanc fámulam tuam, quæ maritáli jungénda consórtio, tua se éxpetit protectióne muníri: sit in ea jugum dilectiónis et pacis: fidélis et casta nubat in Christo, imitatríxque sanctárum permáneat feminárum: sit amábilis viro suo, ut Rachel: sápiens, ut Rebécca: longǽva et fidélis, ut Sara: nihil in ea ex áctibus suis ille auctor prævaricatiónis usúrpet: nexa fídei mandatísque permáneat: uni thoro juncta, contáctus illícitos fúgiat: múniat infirmitátem suam róbore disciplínæ: sit verecúndia gravis, pudóre venerábilis, doctrínis cæléstibus erudíta: sit fecúnda in sóbole, sit probáta et ínnocens: et ad beatórum réquiem, atque ad cæléstia regna pervéniat: et vídeant ambo fílios filiórum suórum, usque in tértiam et quartam generatiónem, et ad optátam pervéniant senectútem. Per eúmdem Dóminum. ¶ Tunc Sacérdos revérsus ad médium Altáris dicat Líbera nos, quǽsumus, Dómine, et réliqua more sólito; et postquam súmpserit Sánguinem, commúnicet Sponsos: et prosequátur Missam. Commúnio Ps. 127, 4 et 6 Ecce sic benedicétur omnis homo, qui timet Dóminum: et vídeas fílios filiórum tuórum: pax super Israël. (T. P. Allelúja.) Postcommúnio
DEUS Abraham, Deus Isaac, et Deus Jacob sit vobíscum: et ipse adímpleat benedictiónem suam in vobis: ut videátis fílios filiórum vestrórum usque ad tértiam et quartam generatiónem, et póstea vitam ætérnam habeátis sine fine: adjuvánte Dómino nostro Jesu Christo, qui cum Patre et Spíritu Sancto vivit et regnat Deus, per ómnia sǽcula sæculórum. R/. Amen. ¶ Móneat eos Sacérdos sermóne gravi, ut sibi ínvicem servent fidem: oratiónis témpore, et præsértim jejuniórum ac solemnitátum, casti máneant: et vir uxórem, atque uxor virum díligat: et in timóre Dei permáneant. Póstea eos aspérgat aqua benedícta, et dicto Pláceat tibi, sancta Trínitas, det benedictiónem: et legat, ut sólitum est, Evangélium S. Joánnis: In princípio erat Verbum, vel áliud, juxta Rúbricas. MISSÆ VOTÍVÆ AD DIVÉRSAMISSAPRO FÍDEI PROPAGATIÓNEIntróitus Ps. 66, 2-3 DEUS misereátur nostri, et benedícat nobis: illúminet vultum suum super nos, et misereátur nostri: ut cognoscámus in terra viam tuam, in ómnibus géntibus salutáre tuum. (T. P. Allelúja, allelúja.) Ps. ibid., 4 Confiteántur tibi pópuli, Deus: confiteántur tibi pópuli omnes. V/. Glória Patri. Orátio DEUS, qui omnes hómines vis salvos fíeri, et ad agnitiónem veritátis veníre: mitte, quǽsumus, operários in messem tuam, et da eis cum omni fidúcia loqui verbum tuum; ut sermo tuus currat et clarificétur, et omnes gentes cognóscant te solum Deum verum, et quem misísti Jesum Christum Fílium tuum, Dóminum nostrum: Qui tecum vivit et regnat. Léctio libri Sapiéntiæ. Eccli. 36, 1-10 et 17-19 MISERÉRE nostri, Deus ómnium, et réspice nos, et osténde nobis lucem miseratiónum tuárum: et immítte timórem tuum super gentes, quæ non exquisiérunt te, ut cognóscant quia non est Deus nisi tu, et enárrent magnália tua. Alleva manum tuam super gentes aliénas, ut vídeant poténtiam tuam. Sicut enim in conspéctu eórum sanctificátus es in nobis, sic in conspéctu nostro magnificáberis in eis, ut cognóscant te, sicut et nos cognóvimus, quóniam non est Deus præter te, Dómine. Innova signa, et immúta mirabília. Glorífica manum et bráchium dextrum. Excita furórem, et effúnde iram. Tolle adversárium, et afflíge inimícum. Festína tempus, et meménto finis, ut enárrent mirabília tua. Da testimónium his, qui ab inítio creatúræ tuæ sunt, et súscita prædicatiónes, quas locúti sunt in nómine tuo prophétæ prióres. Da mercédem sustinéntibus te, ut prophétæ tui fidéles inveniántur: et exáudi oratiónes servórum tuórum, secúndum benedictiónem Aaron de pópulo tuo, et dírige nos in viam justítiæ, et sciant omnes, qui hábitant terram, quia tu es Deus conspéctor sæculórum. Graduále Ps. 66, 6-8 Confiteántur tibi pópuli, Deus: confiteántur tibi pópuli omnes: terra dedit fructum suum. V/. Benedícat nos Deus, Deus noster, benedícat nos Deus: et métuant eum omnes fines terræ. Allelúja, allelúja. V/. Ps. 99, 1 Jubiláte Deo, omnis terra: servíte Dómino in lætítia: introíte in conspéctu ejus, in exsultatióne. Allelúja.
Tractus Ps. 95, 3-5 Annuntiáte inter gentes glóriam Dómini, in ómnibus pópulis mirabília ejus. V/. Quóniam magnus Dóminus, et laudábilis nimis: terríbilis est super omnes deos. V/. Quóniam omnes dii géntium dæmónia: Dóminus autem cælos fecit. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 99, 1-2 Jubiláte Deo, omnis terra: servíte Dómino in lætítia: introíte in conspéctu ejus, in exsultatióne. Allelúja. V/. Scitóte quóniam Dóminus ipse est Deus: ipse fecit nos, et non ipsi nos. Allelúja. + Sequéntia sancti Evangélii secúndum Matthǽum. Matth. 9, 35-38 IN illo témpore: Circuíbat Jesus omnes civitátes et castélla, docens in synagógis eórum, et prǽdicans Evangélium regni, et curans omnem languórem et omnem infirmitátem. Videns autem turbas, misértus est eis: quia erant vexáti et jacéntes sicut oves non habéntes pastórem. Tunc dicit discípulis suis: Messis quidem multa, operárii autem pauci. Rogáte ergo Dóminum messis, ut mittat operários in messem suam. Offertórium Ps. 95, 7-9 Afférte Dómino, pátriæ géntium, afférte Dómino glóriam et honórem, afférte Dómino glóriam nómini ejus: tóllite hóstias, et introíte in átria ejus: adoráte Dóminum in átrio sancto ejus. (T. P. Allelúja.) Secréta PROTÉCTOR noster áspice Deus, et réspice in fáciem Christi tui, qui dedit redemptiónem semetípsum pro ómnibus: et fac; ut ab ortu solis usque ad occásum magnificétur nomen tuum in géntibus, ac in omni loco sacrificétur et offerátur nómini tuo oblátio munda. Per eúmdem Dóminum. Commúnio Ps. 116, 1-2 Laudáte Dóminum, omnes gentes: laudáte eum, omnes pópuli: quóniam confirmáta est super nos misericórdia ejus, et véritas Dómini manet in ætérnum. (T. P. Allelúja.) Postcommúnio REDEMPTIÓNIS nostræ múnere vegetáti: quǽsumus, Dómine; ut hoc perpétuæ salútis auxílio, fides semper vera profíciat. Per Dóminum.
Léctio Epístolæ beáti Pauli Apóstoli ad Timótheum. 1 Tim. 2, 1-7 OBSECRO primum ómnium fíeri obsecratiónes, oratiónes, postulatiónes, gratiárum actiónes, pro ómnibus homínibus: pro régibus et ómnibus qui in sublimitáte sunt, ut quiétam et tranquíllam vitam agámus, in omni pietáte et castitáte; hoc enim bonum est et accéptum coram Salvatóre nostro Deo, qui omnes hómines vult salvos fíeri, et ad agnitiónem veritátis veníre. Unus enim Deus, unus et mediátor Dei et hóminum, homo Christus Jesus: qui dedit redemptiónem semetípsum pro ómnibus, testimónium tempóribus suis: in quo pósitus sum ego prædicátor et apóstolus (veritátem dico, non méntior), doctor géntium in fide et veritáte. 
MISSÆ VOTÍVÆ AD DIVÉRSAMISSACONTRA PAGÁNOSIntróitus Ps. 43, 23-24 et 25-26 EXSÚRGE, quare obdórmis, Dómine? exsúrge, et ne repéllas in finem: quare fáciem tuam avértis, oblivísceris tribulatiónem nostram? Adhǽsit in terra venter noster: exsúrge, Dómine, ádjuva nos, et líbera nos. (T. P. Allelúja, allelúja) Ps. ibid., 2 Deus, áuribus nostris audívimus: patres nostri annuntiavérunt nobis. V/. Glória Patri. Orátio OMNÍPOTENS sempitérne Deus, in cujus manu sunt ómnium potestátes et ómnium jura regnórum: réspice in auxílium christianórum; ut gentes paganórum, quæ in sua feritáte confídunt, déxteræ tuæ poténtia conterántur. Per Dóminum. Léctio libri Esther. Esth. 13, 8-11, et 15-17 IN diébus illis: Orávit Mardochǽus ad Dóminum, dicens: Dómine, Dómine Rex omnípotens, in ditióne enim tua cuncta sunt pósita, et non est qui possit tuæ resístere voluntáti, si decréveris salváre Israël. Tu fecísti cælum et terram, et quidquid cæli ámbitu continétur. Dóminus ómnium es, nec est qui resístat majestáti tuæ. Et nunc, Dómine Rex, Deus Abraham, miserére pópuli tui, quia volunt nos inimíci nostri pérdere, et hereditátem tuam delére. Nec despícias partem tuam, quam redemísti tibi de Ægýpto. Exáudi deprecatiónem meam, et propítius esto sorti et funículo tuo, et convérte luctum nostrum in gáudium, ut vivéntes laudémus nomen tuum, Dómine, et ne claudas ora te canéntium, Dómine, Deus noster. Graduále Ps. 82, 19 et 14 Sciant gentes, quóniam nomen tibi Deus: tu solus Altíssimus super omnem terram. V/. Deus meus, pone illos ut rotam, et sicut stípulam ante fáciem venti. Allelúja, allelúja. V/. Ps. 79, 3 Excita, Dómine, poténtiam tuam, et veni: ut salvos fácias nos. Allelúja.
Tractus Ps. 78, 9-11 Adjuva nos, Deus salutáris noster: et propter honórem nóminis tui, Dómine, líbera nos: et propítius esto peccátis nostris, propter nomen tuum. V/. Ne quando dicant gentes: Ubi est Deus eórum? et innotéscat in natiónibus coram óculis nostris V/. Víndica sánguinem servórum tuórum, qui effúsus est: intret in conspéctu tuo gémitus compeditórum. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 79, 3 Excita, Dómine, poténtiam tuam, et veni: ut salvos fácias nos. Allelúja. V/. Ibid., 15-16 Deus virtútum, convértere, réspice de cælo et vide, et vísita víneam istam: et pérfice eam, quam plantávit déxtera tua. Allelúja. + Sequéntia sancti Evangélii secúndum Lucam. Luc. 11, 5-13 IN illo témpore: Dixit Jesus discípulis suis: Quis vestrum habébit amícum, et ibit ad illum média nocte, et dicet illi: Amíce, cómmoda mihi tres panes, quóniam amícus meus venit de via ad me, et non hábeo, quod ponam ante illum: et ille deíntus respóndens, dicat: Noli mihi moléstus esse, jam óstium clausum est, et púeri mei mecum sunt in cubíli, non possum súrgere et dare tibi. Et si ille perseveráverit pulsans: dico vobis, et si non dabit illi surgens eo quod amícus ejus sit, propter improbitátem tamen ejus surget, et dabit illi quotquot habet necessários. Et ego dico vobis: Pétite, et dábitur vobis: quǽrite, et inveniétis: pulsáte, et aperiétur vobis. Omnis enim qui petit, áccipit: et qui quærit, ínvenit: et pulsánti aperiétur. Quis autem ex vobis patrem petit panem: numquid lápidem dabit illi? Aut piscem: numquid pro pisce serpéntem dabit illi? Aut si petíerit ovum: numquid pórriget illi scorpiónem? Si ergo vos cum sitis mali, nostis bona data dare fíliis vestris: quanto magis Pater vester de cælo dabit spíritum bonum peténtibus se? Offertórium Ps. 17, 28 et 32 Pópulum húmilem salvum fácies: et óculos superbórum humiliábis: quóniam quis Deus præter te, Dómine? (T. P. Allelúja.) Secréta SACRIFÍCIUM, Dómine, quod immolámus, inténde: ut propugnatóres tuos ab omni éruas paganórum nequítia, et in tuæ protectiónis securitáte constítuas. Per Dóminum. Commúnio Ps. 118, 81, 84 et 86 In salutári tuo ánima mea, et in verbum tuum sperávi: quando fácies de persequéntibus me judícium? Iníqui persecúti sunt me, ádjuva me, Dómine Deus meus. (T. P. Allelúja.) Postcommúnio PROTÉCTOR noster áspice Deus: et propugnatóres tuos a paganórum defénde perículis: ut, omni perturbatióne submóta, líberis tibi méntibus desérviant. Per Dóminum.
MISSÆ VOTÍVÆ AD DIVÉRSAMISSAAD TOLLÉNDUM SCHISMAIntróitus Ps. 105, 47 SALVOS nos fac, Dómine Deus noster, et cóngrega nos de natiónibus: ut confiteámur nómini sancto tuo, et gloriémur in laude tua. (T. P. Allelúja, allelúja.) Ps. ibid., 1 Confitémini Dómino, quóniam bonus: quóniam in sǽculum misericórdia ejus. V/. Glória Patri. Orátio DEUS, qui erráta córrigis et dispérsa cóngregas, et congregáta consérvas: quǽsumus, super pópulum christiánum tuæ uniónis grátiam cleménter infúnde; ut, divisióne rejécta, vero pastóri Ecclésiæ tuæ se úniens, tibi digne váleat famulári. Per Dóminum. Léctio Epístolæ beáti Pauli Apóstoli ad Ephésios. Ephes. 4, 1-7 et 13-21 FRATRES: Obsecro vos, ut digne ambulétis vocatióne qua vocáti estis, cum omni humilitáte et mansuetúdine, cum patiéntia, supportántes ínvicem in caritáte, sollíciti serváre unitátem spíritus in vínculo pacis. Unum corpus, et unus spíritus, sicut vocáti estis in una spe vocatiónis vestræ. Unus Dóminus, una fides, unum baptísma. Unus Deus et Pater ómnium, qui est super omnes, et per ómnia, et in ómnibus nobis. Unicuíque autem nostrum data est grátia secúndum mensúram donatiónis Christi: donec occurrámus omnes in unitátem fídei et agnitiónis Fílii Dei, in virum perféctum, in mensúram ætátis plenitúdinis Christi: ut jam non simus párvuli fluctuántes, et circumferámur omni vento doctrínæ in nequítia hóminum, in astútia ad circumventiónem erróris. Veritátem autem faciéntes in caritáte, crescámus in illo per ómnia, qui est caput Christus: ex quo totum corpus compáctum et connéxum per omnem junctúram subministratiónis, secúndum operatiónem in mensúram uniuscujúsque membri, augméntum córporis facit in ædificatiónem sui in caritáte. Hoc ígitur dico et testíficor in Dómino, ut jam non ambulétis, sicut et gentes ámbulant in vanitáte sensus sui, ténebris obscurátum habéntes intelléctum, alienáti a vita Dei per ignorántiam quæ est in illis, propter cæcitátem cordis ipsórum, qui desperántes, semetípsos tradidérunt impudicítiæ in operatiónem immundítiæ omnis, in avarítiam. Vos autem non ita didicístis Christum: si tamen illum audístis, et in ipso edócti estis, sicut est véritas in Christo Jesu Dómino nostro. Graduále Ps. 121, 6-7 Rogáte quæ ad pacem sunt Jerúsalem: et abundántia diligéntibus te. V/. Fiat pax in virtúte tua: et abundántia in túrribus tuis. Allelúja, allelúja. V/. Ps. 147, 12 Lauda, Jerúsalem, Dóminum: lauda Deum tuum, Sion. Allelúja.
Tractus Ps. 75, 2-4 Notus in Judǽa Deus, in Israël magnum nomen ejus. V/. Et factus est in pace locus ejus, et habitátio ejus in Sion. V/. Ibi confrégit poténtias árcuum, scutum, gládium et bellum. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 147, 12 Lauda, Jerúsalem, Dóminum: lauda Deum tuum, Sion. Allelúja. V/. Ibid., 14 Qui pósuit fines tuos pacem, et ádipe fruménti sátiat te. Allelúja. + Sequéntia sancti Evangélii secúndum Joánnem. Joann. 17, 1 et 11-23 IN illo témpore: Sublevátis Jesus óculis in cælum, dixit: Pater sancte, serva eos in nómine tuo, quos dedísti mihi: ut sint unum, sicut et nos. Cum essem cum eis, ego servábam eos in nómine tuo. Quos dedísti mihi, custodívi: et nemo ex eis périit, nisi fílius perditiónis, ut Scriptúra impleátur. Nunc autem ad te vénio: et hæc loquor in mundo, ut hábeant gáudium meum implétum in semetípsis. Ego dedi eis sermónem tuum, et mundus eos ódio hábuit, quia non sunt de mundo, sicut et ego non sum de mundo. Non rogo, ut tollas eos de mundo, sed ut serves eos a malo. De mundo non sunt, sicut et ego non sum de mundo. Sanctífica eos in veritáte. Sermo tuus véritas est. Sicut tu me misísti in mundum, et ego misi eos in mundum. Et pro eis ego sanctífico meípsum, ut sint et ipsi sanctificáti in veritáte. Non pro eis autem rogo tantum, sed et pro eis, qui creditúri sunt per verbum eórum in me: ut omnes unum sint, sicut tu, Pater, in me, et ego in te, ut et ipsi in nobis unum sint: ut credat mundus, quia tu me misísti. Et ego claritátem, quam dedísti mihi, dedi eis, ut sint unum, sicut nos unum sumus. Ego in eis, et tu in me, ut sint consummáti in unum. Offertórium Rom. 15, 5-6 Det vobis Deus idípsum sápere in altérutrum: ut unánimes uno ore honorificétis Deum nostrum. (T. P. Allelúja.) Secréta MÚNERA hæc pro unióne pópuli christiáni tibi, Dómine, obláta sanctífica: per quæ unitátis et pacis in Ecclésia tua nobis dona concédas. Per Dóminum. Commúnio 1 Cor. 10, 17 Unus panis, et unum corpus multi sumus, omnes qui de uno pane et de uno cálice participámus. (T. P. Allelúja.) Postcommúnio HÆC tua, Dómine, sumpta sacra commúnio: sicut fidélium in te uniónem præsígnat; sic in tua Ecclésia unitátis, quǽsumus, operétur efféctum. Per Dóminum.
MISSÆ VOTÍVÆ AD DIVÉRSAMISSATÉMPORE BELLIIntróitus Ps. 24, 6, 3 et 22 REMINÍSCERE miseratiónum tuárum, Dómine, et misericórdiæ tuæ, quæ a sǽculo sunt: ne umquam dominéntur nobis inimíci nostri: líbera nos, Deus Israël, ex ómnibus angústiis nostris. (T. P. Allelúja, allelúja.) Ps. ibid., 1-2 Ad te, Dómine, levávi ánimam meam: Deus meus, in te confído, non erubéscam. V/. Glória Patri. Orátio DEUS, qui cónteris bella, et impugnatóres in te sperántium poténtia tuæ defensiónis expúgnas: auxiliáre fámulis tuis, implorántibus misericórdiam tuam; ut, inimicórum suórum feritáte depréssa, incessábili te gratiárum actióne laudémus. Per Dóminum. Léctio Jeremíæ Prophétæ. Jerem. 42, 1, 2 et 7-12 IN diébus illis: Accessérunt omnes príncipes bellatórum: dixerúntque ad Jeremíam prophétam: Ora pro nobis ad Dóminum Deum tuum. Et factum est verbum Dómini ad Jeremíam. Vocavítque omnes príncipes bellatórum, et univérsum pópulum a mínimo usque ad magnum. Et dixit ad eos: Hæc dicit Dóminus Deus Israël, ad quem misístis me, ut prostérnerem preces vestras in conspéctu ejus: Si quiescéntes manséritis in terra hac, ædificábo vos, et non déstruam; plantábo, et non evéllam: jam enim placátus sum super malo, quod feci vobis. Nolíte timére a fácie regis Babylónis, quem vos pávidi formidátis; nolíte metúere eum, dicit Dóminus: quia vobíscum sum ego, ut salvos vos fáciam, et éruam de manu ejus. Et dabo vobis misericórdias, et miserébor vestri, et habitáre vos fáciam in terra vestra: dicit Dóminus omnípotens. Graduále Ps. 76, 15-16 Tu es Deus, qui facis mirabília solus: notam fecísti in géntibus virtútem tuam. V/. Liberásti in bráchio tuo pópulum tuum, fílios Israël et Joseph. Allelúja, allelúja. V/. Ps. 58, 2 Eripe me de inimícis meis, Deus meus: et ab insurgéntibus in me líbera me. Allelúja.
Tractus Ps. 102, 10 Dómine, non secúndum peccáta nostra, quæ fécimus nos: neque secúndum iniquitátes nostras retríbuas nobis. V/. Ps. 78, 8-9 Dómine, ne memíneris iniquitátum nostrárum antiquárum: cito antícipent nos misericórdiæ tuæ, quia páuperes facti sumus nimis. V/. Adjuva nos, Deus salutáris noster: et propter glóriam nóminis tui, Dómine, líbera nos: et propítius esto peccátis nostris, propter nomen tuum. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 58, 2 Eripe me de inimícis meis, Deus meus: et ab insurgéntibus in me líbera me. Allelúja. V/. Ibid., 17 Ego autem cantábo fortitúdinem tuam: et exsultábo mane misericórdiam tuam. Allelúja. + Sequéntia sancti Evangélii secúndum Matthǽum. Matth. 24, 3-8 IN illo témpore: Accessérunt ad Jesum discípuli secréto, dicéntes: Dic nobis, quando hæc erunt? et quod signum advéntus tui, et consummatiónis sǽculi? Et respóndens Jesus, dixit eis: Vidéte, ne quis vos sedúcat. Multi enim vénient in nómine meo, dicéntes: Ego sum Christus: et multos sedúcent. Auditúri enim estis prǽlia, et opiniónes præliórum. Vidéte ne turbémini. Opórtet enim hæc fíeri, sed nondum est finis. Consúrget enim gens in gentem, et regnum in regnum, et erunt pestiléntiæ, et fames, et terræmótus per loca. Hæc autem ómnia, inítia sunt dolórum. Offertórium Ps. 17, 28 et 32 Pópulum húmilem salvum fácies, Dómine, et óculos superbórum humiliábis: quóniam quis Deus præter te, Dómine? (T. P. Allelúja.) Secréta SACRIFÍCIUM, Dómine, quod immolámus, inténde placátus: ut ab omni nos éruat bellórum nequítia, et in tuæ protectiónis securitáte constítuat. Per Dóminum. Commúnio Ps. 30, 3 Inclína aurem tuam: accélera, ut erípias nos. (T. P. Allelúja.) Postcommúnio DEUS, regnórum ómnium regúmque dominátor, qui nos et percutiéndo sanas et ignoscéndo consérvas: præténde nobis misericórdiam tuam; ut tranquillitáte pacis, tua potestáte serváta, ad remédia correctiónis utámur. Per Dóminum.
MISSÆ VOTÍVÆ AD DIVÉRSAMISSAPRO PACEIntróitus Eccli. 36, 18 DA pacem, Dómine, sustinéntibus te, ut prophétæ tui fidéles inveniántur: exáudi preces servi tui, et plebis tuæ Israël. (T. P. Allelúja, allelúja.) Ps. 121, 1 Lætátus sum in his, quæ dicta sunt mihi: in domum Dómini íbimus. V/. Glória Patri. Orátio DEUS, a quo sancta desidéria, recta consília et justa sunt ópera: da servis tuis illam, quam mundus dare non potest, pacem; ut et corda nostra mandátis tuis dédita, et, hóstium subláta formídine, témpora sint tua protectióne tranquílla. Per Dóminum. Léctio libri Machabæórum. 2 Mach. 1, 1-5 FRÁTRIBUS qui sunt per Ægýptum, Judǽis, salútem dicunt fratres, qui sunt in Jerosólymis Judǽi et qui in regióne Judǽæ, et pacem bonam. Benefáciat vobis Deus, et memínerit testaménti sui, quod locútus est ad Abraham, et Isaac, et Jacob, servórum suórum fidélium: et det vobis cor ómnibus ut colátis eum, et faciátis ejus voluntátem, corde magno et ánimo volénti. Adapériat cor vestrum in lege sua et in præcéptis suis, et fáciat pacem. Exáudiat oratiónes vestras, et reconciliétur vobis, nec vos déserat in témpore malo, Dóminus Deus noster. Graduále Ps. 121, 6-7 Rogáte quæ ad pacem sunt Jerúsalem: et abundántia diligéntibus te. V/. Fiat pax in virtúte tua: et abundántia in túrribus tuis. Allelúja, allelúja. V/. Ps. 147, 12 Lauda, Jerúsalem, Dóminum: lauda Deum tuum, Sion. Allelúja.
Tractus Ps. 75, 2-4 Notus in Judǽa Deus, in Israël magnum nomen ejus. V/. Et factus est in pace locus ejus, et habitátio ejus in Sion. V/. Ibi confrégit poténtias árcuum, scutum, gládium et bellum. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 147, 12 Lauda, Jerúsalem, Dóminum: lauda Deum tuum, Sion. Allelúja. V/. Ibid., 14 Qui pósuit fines tuos pacem, et ádipe fruménti sátiat te. Allelúja. + Sequéntia sancti Evangélii secúndum Joánnem. Joann. 20, 19-23 IN illo témpore: Cum sero esset die illo, una sabbatórum, et fores essent clausæ, ubi erant discípuli congregáti propter metum Judæórum: venit Jesus, et stetit in médio, et dixit eis: Pax vobis. Et cum hoc dixísset, osténdit eis manus, et latus. Gavísi sunt ergo discípuli, viso Dómino. Dixit ergo eis íterum: Pax vobis. Sicut misit me Pater, et ego mitto vos. Hæc cum dixísset, insufflávit, et dixit eis: Accípite Spíritum Sanctum: quorum remiséritis peccáta, remittúntur eis: et quorum retinuéritis, reténta sunt. Offertórium Ps. 134, 3 et 6 Laudáte Dóminum, quia benígnus est: psállite nómini ejus, quóniam suávis est: ómnia quæcúmque vóluit, fecit in cælo et in terra. (T. P. Allelúja.) Secréta DEUS, qui credéntes in te pópulos nullis sinis cóncuti terróribus: dignáre preces et hóstias dicátæ tibi plebis suscípere; ut pax a tua pietáte concéssa, christianórum fines ab omni hoste fáciat esse secúros. Per Dóminum. Commúnio Joann. 14, 27 Pacem relínquo vobis: pacem meam do vobis, dicit Dóminus. (T. P. Allelúja.) Postcommúnio DEUS, auctor pacis et amátor, quem nosse vívere, cui servíre regnáre est: prótege ab ómnibus impugnatiónibus súpplices tuos; ut, qui in defensióne tua confídimus, nullíus hostilitátis arma timeámus. Per Dóminum.
MISSÆ VOTÍVÆ AD DIVÉRSAMISSAPRO VITÁNDA MORTALITÁTEIntróitus 2 Reg. 24, 16 RECORDÁRE, Dómine, testaménti tui, et dic Angelo percutiénti: Cesset jam manus tua, et non desolétur terra, et ne perdas omnem ánimam vivéntem. (T. P. Allelúja, allelúja.) Ps. 79, 2 Qui regis Israël, inténde: qui dedúcis, velut ovem, Joseph. V/. Glória Patri. Orátio DEUS, qui non mortem, sed pœniténtiam desíderas peccatórum: pópulum tuum ad te reverténtem propítius réspice; ut, dum tibi devótus exsístit, iracúndiæ tuæ flagélla ab eo cleménter amóveas. Per Dóminum. Léctio Libri Regum. 2 Reg. 24, 15-19 et 25 IN diébus illis: Immísit Dóminus pestiléntiam in Israël, de mane usque ad tempus constitútum, et mórtui sunt ex pópulo, a Dan usque ad Bersabée, septuagínta míllia virórum. Cumque extendísset manum suam Angelus Dómini super Jerúsalem, ut dispérderet eam, misértus est Dóminus super afflictióne, et ait Angelo percutiénti pópulum: Súfficit: nunc cóntine manum tuam. Erat autem Angelus Dómini juxta áream Aréuna Jebusǽi. Dixítque David ad Dóminum, cum vidísset Angelum cædéntem pópulum: Ego sum qui peccávi, ego iníque egi: isti, qui oves sunt, quid fecérunt? Vertátur, óbsecro, manus tua contra me, et contra domum patris mei. Venit autem Gad prophéta ad David in die illa, et dixit ei: Ascénde, constítue altáre Dómino in área Aréuna Jebusǽi. Et ascéndit David juxta sermónem Gad, quem præcéperat ei Dóminus. Et ædificávit altáre Dómino, et óbtulit holocáusta et pacífica: et propitiátus est Dóminus terræ, et cohíbita est plaga ab Israël. Graduále Ps. 106, 20-21 Misit Dóminus verbum suum, et sanávit eos: et erípuit eos de morte eórum. V/. Confiteántur Dómino misericórdiæ ejus: et mirabília ejus fíliis hóminum. Allelúja, allelúja. V/. Ps. 68, 2 Salvum me fac, Deus, quóniam intravérunt aquæ usque ad ánimam meam. Allelúja.
Tractus Ps. 102, 10 Dómine, non secúndum peccáta nostra, quæ fécimus nos: neque secúndum iniquitátes nostras retríbuas nobis. V/. Ps. 78, 8-9 Dómine, ne memíneris iniquitátum nostrárum antiquárum: cito antícipent nos misericórdiæ tuæ, quia páuperes facti sumus nimis. V/. Adjuva nos, Deus salutáris noster: et propter glóriam nóminis tui, Dómine, líbera nos: et propítius esto peccátis nostris, propter nomen tuum. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 68, 2 Salvum me fac, Deus, quóniam intravérunt aquæ usque ad ánimam meam. Allelúja. V/. Zach. 8, 7 et 8 Salvábo pópulum meum Israël in die malo, et ero eis in Deum, in veritáte et justítia. Allelúja. + Sequéntia sancti Evangélii secúndum Lucam. Luc. 4, 38-44 IN illo témpore: Surgens Jesus de synagóga, introívit in domum Simónis. Socrus autem Simónis tenebátur magnis fébribus: et rogavérunt illum pro ea. Et stans super illam, imperávit febri: et dimísit illam. Et contínuo surgens, ministrábat illis. Cum autem sol occidísset, omnes qui habébant infírmos váriis languóribus, ducébant illos ad eum. At ille síngulis manus impónens, curábat eos. Exíbant autem dæmónia a multis, clamántia, et dicéntia: Quia tu es Fílius Dei: et íncrepans non sinébat ea loqui, quia sciébant ipsum esse Christum. Facta autem die egréssus ibat in desértum locum, et turbæ requirébant eum, et venérunt usque ad ipsum: et detinébant illum, ne discéderet ab eis. Quibus ille ait: Quia et áliis civitátibus opórtet me evangelizáre regnum Dei: quia ídeo missus sum. Et erat prǽdicans in synagógis Galilǽæ. Offertórium Num. 16, 48 Stetit póntifex inter mórtuos et vivos, habens thuríbulum áureum in manu sua: et ófferens incénsi sacrifícium, placávit iram Dei, et cessávit quassátio a Dómino. (T. P. Allelúja.) Secréta SUBVÉNIAT nobis, quǽsumus, Dómine, sacrifícii præséntis oblátio: quæ nos et ab erróribus univérsis poténter absólvat, et a totíus erípiat perditiónis incúrsu. Per Dóminum. Commúnio Luc. 6, 17, 18 et 19 Multitúdo languéntium, et qui vexabántur a spirítibus immúndis, veniébant ad eum: quia virtus de illo exíbat, et sanábat omnes. (T. P. Allelúja.) Postcommúnio EXÁUDI nos, Deus salutáris noster: et pópulum tuum ab iracúndiæ tuæ terróribus líberum, et misericórdiæ tuæ fac largitáte secúrum. Per Dóminum.
MISSÆ VOTÍVÆ AD DIVÉRSAMISSAAD POSTULÁNDAM GRÁTIAMSPIRITUS SANCTIDícitur Missa de Spíritu Sancto, ut supra, cum Oratiónibus ut infra. Orátio
DEUS, cui omne cor patet et omnis volúntas lóquitur, et quem nullum latet secrétum: purífica per infusiónem Sancti Spíritus cogitatiónes cordis nostri; ut te perfécte dilígere, et digne laudáre mereámur. Per Dóminum nostrum Jesum Christum Fílium tuum, qui tecum vivit et regnat in unitáte ejúsdem Spíritus Sancti. Secréta
HÆC oblátio, quǽsumus, Dómine, cordis nostri máculas emúndet: ut Sancti Spíritus digna efficiátur habitátio. Per Dóminum nostrum Jesum Christum Fílium tuum: Qui tecum vivit et regnat in unitáte ejúsdem Spíritus Sancti. Postcommúnio CONCÉDE, quǽsumus, omnípotens Deus, Sanctum nos Spíritum votis promeréri sédulis: quátenus, ejus grátia, et ab ómnibus liberémur tentatiónibus, et peccatórum nostrórum indulgéntiam percípere mereámur. Per Dóminum nostrum Jesum Christum Fílium tuum: Qui tecum vivit et regnat in unitáte ejúsdem Spíritus Sancti.
MISSÆ VOTÍVÆ AD DIVÉRSAMISSAPRO REMISSIÓNE PECCATÓRUMIntróitus Sap. 11, 24, 25 et 27 MISERÉRIS ómnium, Dómine, et nihil odísti eórum quæ fecísti, dissímulans peccáta hóminum propter pœniténtiam et parcens illis: quia tu es Dóminus Deus noster. (T. P. Allelúja, allelúja.) Ps. 56, 2 Miserére mei, Deus, miserére mei: quóniam in te confídit ánima mea. V/. Glória Patri. Orátio EXÁUDI, quǽsumus, Dómine, súpplicum preces, et confiténtium tibi parce peccátis: ut páriter nobis indulgéntiam tríbuas benígnus, et pacem. Per Dóminum. Léctio Epístolæ beáti Pauli Apóstoli ad Romános. Rom. 7, 22-25 FRATRES: Condeléctor legi Dei secúndum interiórem hóminem: vídeo autem áliam legem in membris meis, repugnántem legi mentis meæ, et captivántem me in lege peccáti, quæ est in membris meis. Infélix ego homo, quis me liberábit de córpore mortis hujus? Grátia Dei per Jesum Christum Dóminum nostrum. Graduále Ps. 78, 9-10 Propítius esto, Dómine, peccátis nostris: ne quando dicant gentes: Ubi est Deus eórum? V/. Ibid., 9 Adjuva nos, Deus salutáris noster: et propter honórem nóminis tui, Dómine, líbera nos. Allelúja, allelúja. V/. Ps. 7, 12 Deus judex justus, fortis et pátiens: numquid iráscitur per síngulos dies? Allelúja.
Tractus Ps. 129, 1-4 De profúndis clamávi ad te, Dómine: Dómine, exáudi vocem meam. V/. Fiant aures tuæ intendéntes in oratiónem servi tui. V/. Si iniquitátes observáveris, Dómine: Dómine, quis sustinébit? V/. Quia apud te propitiátio est: et propter legem tuam sustínui te, Dómine. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 7, 12 Deus judex justus, fortis et pátiens: numquid irascétur per síngulos dies? Allelúja. V/. Ps. 50, 10 Audítui meo dabis gáudium, et lætítiam: et exsultábunt ossa humiliáta. Allelúja. + Sequéntia sancti Evangélii secúndum Lucam. Luc. 11, 9-13 IN illo témpore: Dixit Jesus discípulis suis: Pétite, et dábitur vobis: quǽrite, et inveniétis: pulsáte, et aperiétur vobis. Omnis enim qui petit, áccipit: et qui quærit, ínvenit: et pulsánti aperiétur. Quis autem ex vobis patrem petit panem: numquid lápidem dabit illi? Aut piscem: numquid pro pisce serpéntem dabit illi? Aut si petíerit ovum: numquid pórriget illi scorpiónem? Si ergo vos, cum sitis mali, nostis bona data dare fíliis vestris: quanto magis Pater vester de cælo dabit spíritum bonum peténtibus se? Offertórium Ps. 101, 2 Dómine, exáudi oratiónem meam: et clamor meus ad te pervéniat. (T. P. Allelúja.) Secréta HÓSTIAS tibi, Dómine, placatiónis et laudis offérimus: ut et delícta nostra miserátus absólvas, et nutántia corda tu dírigas. Per Dóminum. Commúnio Luc. 11, 9-10 Pétite, et accipiétis: quǽrite, et inveniétis: pulsáte, et aperiétur vobis. Omnis enim qui petit, áccipit: et qui quærit, ínvenit: et pulsánti aperiétur. (T. P. Allelúja.) Postcommúnio PRÆSTA nobis, ætérne Salvátor: ut, percipiéntes hoc múnere véniam peccatórum, deínceps peccáta vitémus. Per Dóminum.
MISSÆ VOTÍVÆ AD DIVÉRSAMISSAPRO PEREGRINÁNTIBUSET ITER AGÉNTIBUSIntróitus Ps. 25, 11-12 RÉDIME me, Dómine, et miserére mei: pes enim meus stetit in via recta: in ecclésiis benedícam Dóminum. (T. P. Allelúja, allelúja.) Ps. ibid., 1 Júdica me, Dómine, quóniam ego in innocéntia mea ingréssus sum: et in Dómino sperans non infirmábor. V/. Glória Patri. Orátio ADÉSTO, Dómine, supplicatiónibus nostris: et viam famulórum tuórum in salútis tuæ prosperitáte dispóne; ut inter omnes viæ et vitæ hujus varietátes, tuo semper protegántur auxílio. Per Dóminum. Léctio libri Génesis. Gen. 28, 10-12, 13-15, 18 et 20-22 IN diébus illis: Egréssus Jacob de Bersabée, pergébat Haran. Cumque venísset ad quemdam locum, et vellet in eo requiéscere post solis occúbitum, tulit de lapídibus qui jacébant, et suppónens cápiti suo, dormívit in eódem loco. Vidítque in somnis Dóminum dicéntem sibi: Ego sum Dóminus Deus Abraham patris tui, et Deus Isaac: terram, in qua dormis, tibi dabo et sémini tuo. Erítque semen tuum quasi pulvis terræ: dilatáberis ad Occidéntem, et Oriéntem, et Septentriónem, et Merídiem: et benedicéntur in te et in sémine tuo cunctæ tribus terræ. Et ero custos tuus quocúmque perréxeris, et redúcam te in terram hanc; nec dimíttam nisi complévero univérsa quæ dixi. Surgens ergo Jacob mane, tulit lápidem, quem supposúerat cápiti suo, et eréxit in títulum, fundens óleum désuper. Vovit étiam votum, dicens: Si fúerit Deus mecum, et custodíerit me in via per quam ego ámbulo, et déderit mihi panem ad vescéndum, et vestiméntum ad induéndum, reversúsque fúero próspere ad domum patris mei: erit mihi Dóminus in Deum, et lapis iste, quem eréxi in títulum, vocábitur domus Dei: cunctorúmque, quæ déderis mihi, décimas ófferam tibi. Graduále Ps. 22, 4 Si ámbulem in médio umbræ mortis, non timébo mala: quóniam tu mecum es, Dómine. V/. Virga tua, et báculus tuus, ipsa me consoláta sunt. Allelúja, allelúja. V/. Ps. 118, 133 Gressus meos dírige secúndum elóquium tuum: ut non dominétur mei omnis injustítia. Allelúja.
Tractus Ps. 90, 11-13 Angelis suis Deus mandávit de te, ut custódiant te in ómnibus viis tuis. V/. In mánibus portábunt te, ne umquam offéndas ad lápidem pedem tuum. V/. Super áspidem et basilíscum ambulábis, et conculcábis leónem et dracónem. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 118, 133 Gressus meos dírige secúndum elóquium tuum: ut non dominétur mei omnis injustítia. Allelúja. V/. Ps. 121, 1 Lætátus sum in his, quæ dicta sunt mihi: in domum Dómini íbimus. Allelúja. + Sequéntia sancti Evangélii secúndum Matthǽum. Matth. 10, 7-14 IN illo témpore: Dixit Jesus discípulis suis: Eúntes, prædicáte, dicéntes: Quia appropinquávit regnum cælórum. Infírmos curáte, mórtuos suscitáte, leprósos mundáte, dǽmones ejícite: gratis accepístis, gratis date. Nolíte possidére aurum, neque argéntum, neque pecúniam in zonis vestris: non peram in via, neque duas túnicas, neque calceaménta, neque virgam: dignus enim est operárius cibo suo. In quamcúmque autem civitátem, aut castéllum intravéritis, interrogáte quis in ea dignus sit: et ibi manéte donec exeátis. Intrántes autem in domum, salutáte eam, dicéntes: Pax huic dómui. Et si quidem fúerit domus illa digna, véniet pax vestra super eam: si autem non fúerit digna, pax vestra revertétur ad vos. Et quicúmque non recéperit vos, neque audíerit sermónes vestros: exeúntes foras de domo, vel de civitáte, excútite púlverem de pédibus vestris. Offertórium Ps. 16, 5 et 6-7 Pérfice gressus meos in sémitis tuis, ut non moveántur vestígia mea: inclína aurem tuam mihi, et exáudi verba mea: mirífica misericórdias tuas, qui salvos facis sperántes in te, Dómine. (T. P. Allelúja.) Secréta PROPITIÁRE, Dómine, supplicatiónibus nostris, et has oblatiónes, quas tibi offérimus pro fámulis tuis, benígnus assúme: ut viam illórum et præcedénte grátia tua dírigas, et subsequénte comitári dignéris; ut de actu atque incolumitáte eórum, secúndum misericórdiæ tuæ præsídia gaudeámus. Per Dóminum. Commúnio Ps. 118, 4-5 Tu mandásti mandáta tua custodíri nimis: útinam dirigántur viæ meæ, ad custodiéndas justificatiónes tuas. (T. P. Allelúja.) Postcommúnio TUA, Dómine, sacraménta quæ súmpsimus, fámulos tuos in te sperántes custódiant: et contra omnes advérsos tueántur incúrsus. Per Dóminum.
MISSÆ VOTÍVÆ AD DIVÉRSAMISSAPRO INFÍRMISIntróitus Ps. 54, 2-3 EXÁUDI, Deus, oratiónem meam, et ne despéxeris deprecatiónem meam: inténde in me, et exáudi me. (T. P. Allelúja, allelúja.) Ps. ibid., 3-4 Contristátus sum in exercitatióne mea: et conturbátus sum a voce inimíci, et a tribulatióne peccatóris. V/. Glória Patri. 1 Pro plúribus infírmis Orátio OMNÍPOTENS sempitérne Deus, salus ætérna credéntium: exáudi nos pro fámulis tuis infírmis, pro quibus misericórdiæ tuæ implorámus auxílium; ut, réddita sibi sanitáte, gratiárum tibi in Ecclésia tua réferant actiónes. Per Dóminum. 2 Pro uno infírmo Orátio
OMNÍPOTENS sempitérne Deus, salus ætérna credéntium: exáudi nos pro fámulo tuo infírmo, pro quo (fámula tua infírma, pro qua) misericórdiæ tuæ implorámus auxílium; ut, réddita sibi sanitáte, gratiárum tibi in Ecclésia tua réferant actiónes. Per Dóminum. Léctio Epístolæ beáti Jacóbi Apóstoli. Jac. 5, 13-16 CARÍSSIMI: Tristátur áliquis vestrum? oret. Æquo ánimo est? psallat. Infirmátur quis in vobis? indúcat presbýteros Ecclésiæ, et orent super eum, ungéntes eum óleo in nómine Dómini: et orátio fídei salvábit infírmum, et alleviábit eum Dóminus; et si in peccátis sit, remitténtur ei. Confitémini ergo altérutrum peccáta vestra, et oráte pro ínvicem, ut salvémini. Graduále Ps. 6, 3-4 Miserére mihi, Dómine, quóniam infírmus sum: sana me, Dómine. V/. Conturbáta sunt ómnia ossa mea: et ánima mea turbáta est valde. Allelúja, allelúja. V/. Ps. 101, 2 Dómine, exáudi oratiónem meam, et clamor meus ad te pervéniat. Allelúja. Post Septuagésimam, omíssis Allelúja et Versu sequénti, dícitur Tractus Ps. 30, 10-11 Miserére mei, Dómine, quóniam tríbulor: conturbátus est in ira óculus meus, ánima mea, et venter meus. V/. Quóniam defécit in dolóre vita mea, et anni mei in gemítibus. V/. Infirmáta est in paupertáte virtus mea: et ossa mea conturbáta sunt. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 101, 2 Dómine, exáudi oratiónem meam: et clamor meus ad te pervéniat. Allelúja. V/. Ps. 27, 7 In Deo sperávit cor meum, et adjútus sum: et reflóruit caro mea, et ex voluntáte mea confitébor ei. Allelúja. + Sequéntia sancti Evangélii secúndum Matthǽum. Matth. 8, 5-13 IN illo témpore: Cum introísset Jesus Caphárnaum, accéssit ad eum centúrio, rogans eum, et dicens: Dómine, puer meus jacet in domo paralýticus, et male torquétur. Et ait illi Jesus: Ego véniam, et curábo eum. Et respóndens centúrio, ait: Dómine, non sum dignus, ut intres sub tectum meum: sed tantum dic verbo, et sanábitur puer meus. Nam et ego homo sum sub potestáte constitútus, habens sub me mílites, et dico huic: Vade, et vadit; et álii: Veni, et venit; et servo meo: Fac hoc, et facit. Audiens autem Jesus, mirátus est, et sequéntibus se dixit: Amen dico vobis, non invéni tantam fidem in Israël. Dico autem vobis, quod multi ab Oriénte et Occidénte vénient, et recúmbent cum Abraham, et Isaac, et Jacob in regno cælórum: fílii autem regni ejiciéntur in ténebras exterióres: ibi erit fletus et stridor déntium. Et dixit Jesus centurióni: Vade, et sicut credidísti, fiat tibi. Et sanátus est puer in illa hora. Offertórium Ps. 54, 2-3 Exáudi, Deus, oratiónem meam, et ne despéxeris deprecatiónem meam: inténde in me, et exáudi me. (T. P. Allelúja.) 1 Pro plúribus infírmis Secréta
DEUS, cujus nútibus vitæ nostræ moménta decúrrunt: súscipe preces et hóstias famulórum tuórum, pro quibus ægrotántibus misericórdiam tuam implorámus; ut, de quórum perículo metúimus, de eórum salúte lætémur. Per Dóminum. 2 Pro uno infírmo Secréta DEUS, cujus nútibus vitæ nostræ moménta decúrrunt: súscipe preces et hóstias fámuli tui, pro quo (fámulæ tuæ, pro qua) ægrotánte misericórdiam tuam implorámus; ut, de cujus perículo metúimus, de ejus salúte lætémur. Per Dóminum. Commúnio Ps. 30, 17-18 Illúmina fáciem tuam super servum tuum, et salvum me fac in tua misericórdia: Dómine, non confúndar, quóniam invocávi te. (T. P. Allelúja.) 1 Pro plúribus infírmis Postcommúnio DEUS, infirmitátis humánæ singuláre præsídium: auxílii tui super infírmos fámulos tuos osténde virtútem; ut, ope misericórdiæ tuæ adjúti, Ecclésiæ tuæ sanctæ incólumes repræsentári mereántur. Per Dóminum. 2 Pro uno infírmo Postcommúnio DEUS, infirmitátis humánæ singuláre præsídium: auxílii tui super infírmum fámulum tuum (infírmam fámulam tuam) osténde virtútem; ut, ope misericórdiæ tuæ adjútus (adjúta), Ecclésiæ tuæ sanctæ incólumis repræsentári mereátur. Per Dóminum.
Orátio
OMNÍPOTENS et miséricors Deus, qui humáno géneri et salútis remédia, et vitæ ætérnæ múnera contulísti: réspice propítius fámulum tuum (fámulam tuam) infirmitáte córporis laborántem, et ánimam réfove, quam creásti; ut in hora éxitus illíus, absque peccáti mácula tibi Creatóri suo per manus sanctórum Angelórum repræsentári mereátur. Per Dóminum. Secréta
SÚSCIPE, quǽsumus, Dómine, hóstiam, quam tibi offérimus pro fámulo tuo (fámula tua) in extrémo vitæ constitúto (constitúta): et concéde, ut per eam univérsa illíus purgéntur delícta; ut, qui (quæ) tuæ dispositiónis flagéllis in hac vita attéritur, in futúra réquiem consequátur ætérnam. Per Dóminum. Postcommúnio Quǽsumus cleméntiam tuam, omnípotens Deus, ut per hujus virtútem sacraménti, fámulum tuum (fámulam tuam) grátia tua confirmáre dignéris: ut in hora mortis ejus non præváleat contra eum (eam) adversárius: sed cum Angelis tuis tránsitum habére mereátur ad vitam. Per Dóminum. ¶ Eadem Orátio dici potest in pluráli. MISSÆ VOTÍVÆ AD DIVÉRSAMISSAAD POSTULÁNDAM GRÁTIAMBENE MORIÉNDIIntróitus Ps. 12, 4 ILLÚMINA óculos meos, ne umquam obdórmiam in morte, ne quando dicat inimícus meus: Præválui advérsus eum. (T. P. Allelúja, allelúja.) Ps. ibid., 1 Usquequo, Dómine, obliviscéris me in finem? úsquequo avértis fáciem tuam a me? V/. Glória Patri. Orátio OMNÍPOTENS et miséricors Deus, qui humáno géneri et salútis remédia, et vitæ ætérnæ múnera contulísti: réspice propítius nos fámulos tuos, et ánimas réfove, quas creásti; ut in hora éxitus eárum, absque peccáti mácula tibi Creatóri suo per manus sanctórum Angelórum repræsentári mereántur. Per Dóminum. Léctio Epístolæ beáti Pauli Apóstoli ad Romános. Rom. 14, 7-12 FRATRES: Nemo nostrum sibi vivit, et nemo sibi móritur. Sive enim vívimus, Dómino vívimus: sive mórimur, Dómino mórimur. Sive ergo vívimus, sive mórimur, Dómini sumus. In hoc enim Christus mórtuus est et resurréxit: ut et mortuórum, et vivórum dominétur. Tu autem quid júdicas fratrem tuum? aut tu quare spernis fratrem tuum? Omnes enim stábimus ante tribúnal Christi. Scriptum est enim: Vivo ego, dicit Dóminus, quóniam mihi flectétur omne genu: et omnis lingua confitébitur Deo. Itaque unusquísque nostrum pro se ratiónem reddet Deo. Graduále Ps. 22, 4 Si ámbulem in médio umbræ mortis, non timébo mala: quóniam tu mecum es, Dómine. V/. Virga tua et báculus tuus, ipsa me consoláta sunt. Allelúja, allelúja. V/. Ps. 30, 2-3 In te, Dómine, sperávi, non confúndar in ætérnum: in justítia tua líbera me, et éripe me: inclína ad me aurem tuam, accélera, ut erípias me. Allelúja.
Tractus Ps. 24, 17-18 et 1-4 De necessitátibus meis éripe me, Dómine: vide humilitátem meam et labórem meum: et dimítte ómnia peccáta mea. V/. Ad te, Dómine, levávi ánimam meam: Deus meus, in te confído, non erubéscam: neque irrídeant me inimíci mei. V/. Etenim univérsi, qui te exspéctant, non confundéntur: confundántur omnes faciéntes vana. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 113, 1 In éxitu Israël de Ægýpto, domus Jacob de pópulo bárbaro. Allelúja. V/. Ps. 107, 2 Parátum cor meum, Deus, parátum cor meum: cantábo et psallam tibi, glória mea. Allelúja. + Sequéntia sancti Evangélii secúndum Lucam. Luc. 21, 34-36 IN illo témpore: Dixit Jesus discípulis suis: Atténdite vobis, ne forte gravéntur corda vestra in crápula, et ebrietáte, et curis hujus vitæ: et supervéniat in vos repentína dies illa: tamquam láqueus enim supervéniet in omnes, qui sedent super fáciem omnis terræ. Vigiláte ítaque, omni témpore orántes, ut digni habeámini fúgere ista ómnia, quæ futúra sunt, et stare ante Fílium hóminis. Offertórium Ps. 30, 15-16 In te sperávi, Dómine; dixi: Tu es Deus meus: in mánibus tuis témpora mea. (T. P. Allelúja.) Secréta SÚSCIPE, quǽsumus, Dómine, hóstiam, quam tibi offérimus pro extrémo vitæ nostræ, et concéde: ut per eam univérsa nostra purgéntur delícta; ut, qui tuæ dispositiónis flagéllis in hac vita attérimur, in futúra réquiem consequámur ætérnam. Per Dóminum. Commúnio Ps. 70, 16-17 et 18 Dómine, memorábor justítiæ tuæ solíus: Deus, docuísti me a juventúte mea: et usque in senéctam et sénium, Deus, ne derelínquas me. (T. P. Allelúja.) Postcommúnio Quǽsumus cleméntiam tuam, omnípotens Deus, ut per hujus virtútem sacraménti nos fámulos tuos grátia tua confirmáre dignéris: ut in hora mortis nostræ non præváleat contra nos adversárius; sed cum Angelis tuis tránsitum habére mereámur ad vitam. Per Dóminum. MISSÆ VOTÍVÆ AD DIVÉRSAMISSAPRO QUACÚMQUE NECESSITÁTEIntróitus SALUS pópuli ego sum, dicit Dóminus: de quacúmque tribulatióne clamáverint ad me, exáudiam eos: et ero illórum Dóminus in perpétuum. (T. P. Allelúja, allelúja.) Ps. 77, 1 Atténdite, pópule meus, legem meam: inclináte aurem vestram i n verba oris mei. V/. Glória Patri. Orátio INEFFÁBILEM misericórdiam tuam, Dómine, nobis cleménter osténde: ut simul nos et a peccátis ómnibus éxuas; et a pœnis, quas pro his merémur, erípias. Per Dóminum. Léctio Jeremíæ Prophétæ. Jerem. 14, 7-8 et 9 SI iniquitátes nostræ respónderint nobis: Dómine, fac propter nomen tuum, quóniam multæ sunt aversiónes nostræ: tibi peccávimus. Exspectátio Israël, salvátor ejus in témpore tribulatiónis. Tu autem in nobis es, Dómine, et nomen tuum invocátum est super nos, ne derelínquas nos, Dóminus Deus noster. Graduále Ps. 43, 8-9 Liberásti nos, Dómine, ex affligéntibus nos: et eos, qui nos odérunt, confudísti. V/. In Deo laudábimur tota die, et in nómine tuo confitébimur in sǽcula. Allelúja, allelúja. V/. Ps. 78, 9-10 Propítius esto, Dómine, peccátis nostris: ne quando dicant gentes: Ubi est Deus eórum? Allelúja.
Tractus Ps. 24, 17-18 et 1-4 De necessitátibus meis éripe me, Dómine: vide humilitátem meam, et labórem meum: et dimítte ómnia peccáta mea. V/. Ad te, Dómine, levávi ánimam meam: Deus meus, in te confído, non erubéscam: neque irrídeant me inimíci mei. V/. Etenim univérsi qui te exspéctant, non confundéntur: confundántur omnes faciéntes vana. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 78, 9-10 Propítius esto, Dómine, peccátis nostris: ne quando dicant gentes: Ubi est Deus eórum? Allelúja. V/. Ps. 30, 8 Exsultábo et lætábor in misericórdia tua, quóniam respexísti humilitátem meam: salvásti de necessitátibus ánimam meam. Allelúja. + Sequéntia sancti Evangélii secúndum Marcum. Marc. 11, 22-26 IN illo témpore: Dixit Jesus discípulis suis: Habéte fidem Dei. Amen dico vobis, quia quicúmque díxerit huic monti: Tóllere, et míttere in mare, et non hæsitáverit in corde suo, sed credíderit, quia quodcúmque díxerit, fiat, fiet ei. Proptérea dico vobis: Omnia quæcúmque orántes pétitis, crédite quia accipiétis, et evénient vóbis. Et cum stábitis ad orándum, dimíttite, si quid habétis advérsus áliquem: ut et Pater vester, qui in cælis est, dimíttat vobis peccáta vestra. Quod si vos non dimiséritis: nec Pater vester, qui in cælis est, dimíttet vobis peccáta vestra. Offertórium Ps. 137, 7 Si ambulávero in médio tribulatiónis, vivificábis me, Dómine: et super iram inimicórum meórum exténdes manum tuam, et salvum me fáciet déxtera tua. (T. P. Allelúja.) Secréta PURÍFICET nos, Dómine, quǽsumus, múneris præséntis oblátio: et dignos sacra participatióne perfíciat. Per Dóminum. Commúnio Ps. 118, 49-50 Meménto verbi tui servo tuo, Dómine, in quo mihi spem dedísti: hæc me consoláta est in humilitáte mea. (T. P. Allelúja.) Postcommúnio PRÆSTA, quǽsumus, Dómine: ut, terrénis afféctibus expiáti, ad supérni plenitúdinem sacraménti, cujus libávimus sancta, tendámus. Per Dóminum.
MISSÆ VOTÍVÆ AD DIVÉRSAMISSAPRO GRATIÁRUM ACTIÓNE¶ Dícitur Missa de Ssma Trinitáte, vel de Spíritu Sancto, vel de beáta María Vírgine, aut de áliquo Sancto canonizáto, in Martyrológio Románo descrípto, ádditis, sub única conclusióne étiam in Missis privátis, sequéntibus Oratiónibus. Orátio
DEUS, cujus misericórdiæ non est númerus, et bonitátis infinítus est thesáurus: piíssimæ majestáti tuæ pro collátis donis grátias ágimus, tuam semper cleméntiam exorántes; ut, qui peténtibus postuláta concédis, eósdem non déserens, ad prǽmia futúra dispónas. Per Dóminum. Secréta
ODÓREM, Dómine, sacrifícii hujus cum gratiárum actiónibus súscipe, et præsta: ut quos exaudíre et incólumes serváre dignátus es, ab omni in pósterum adversitáte custódias; et in tuo servítio et amóre concréscant. Per Dóminum. Postcommúnio DEUS, qui néminem in te sperántem, nímium afflígi permíttis, sed pium précibus præstas audítum: pro postulatiónibus nostris votísque suscéptis grátias ágimus, te piíssime deprecántes; ut per hæc quæ súmpsimus, a cunctis éripi mereámur advérsis. Per Dóminum.
|