Uvumo Lokholo lweWestminster

22. Ngezifungo lezithembiso ezisemthethweni

1. 
   Isifungo esisemthethweni siyingxenye yenkonzo yokholo^a, lapho okuthi, ngesizatho esifaneleyo, umuntu ofungayo ngokunzulu ebiza uNkulunkulu ukuthi afakaze lokho akuqinisayo kumbe akuthembisayo, njalo amahlulele ngokweqiniso kumbe ngokwamanga akufungayo^b.
   
2. 
   Ibizo likaNkulunkulu kuphela yilo lodwa okumele abantu bafunge ngalo, lapho-ke kumele lisetshenziswe ngokwesaba konke okungcwele langenhlonipho^c. Ngakho ukufunga ngeze kumbe ngokungananzeleli ngalelobizo elilodumo lelesabekayo, kumbe ukufunga nje langayiphi into, kuyisono njalo kufanele kwenyanywe^d. Kube kanti endabeni ezilobunzima leziqakathekileyo, isifungo siyavunyelwa yilizwi likaNkulunkulu, ngaphansi kweThestamente eLitsha njalo langaphansi kweLidala^e. Ngakho isifungo esisemthethweni, aluba sithwaliswa ngabaphathi abalegunya elisemthethweni, endabeni ezinjalo kumele senziwe^f.
   
3. 
   Loba ngubani owenza isifungo kufanele ananzelele ngokufaneleyo ngesisindo salesosenzo esinzulu kangaka; ngalokho kumele angaqinisi lutho ngaphandle kwalokho akukholwayo ngokupheleleyo ukuthi kuliqiniso^g. Futhi akumelanga umuntu loba engubani azibophele lakuyiphi into ngesifungo ngaphandle kwalokho okulungileyo njalo okuqondileyo, futhi lokho akukholwayo ukuthi kunjalo, lalokho alamandla njalo azimisele ukuthi akwenze^h. Kube kanti kuyisono ukwala ukufunga mayelana layiphi into elungileyo njalo eqondileyo, aluba kuthwaliswa ngabaphathi abalegunya elisemthethweniⁱ.
   
4. 
   Isifungo kumele senziwe ngamazwi alomutsho obalulekileyo lowejwayelekileyo, angalabuqili kumbe ukugodla engqondweni^k. Kasilakho ukumbamba ngamandla ukuthi one; kodwa lakuyiphi into engeyisikona, uba senziwe, sibopha ukuthi yenziwe, lanxa kungamlimaza umuntu^l. Futhi akufanele sephulwe, lanxa senziwe kubabhazuki kumbe kubahedeni^m.
   
5. 
   Isithembiso esiqinileyo silemvelo efanana lesifungo sokuthembisa, njalo kufanele senziwe ngokunanzelela kokholo okufananayo, njalo senziwe ngothembeko olufananayoⁿ.
   
6. 
   Akumelanga senziwe lakusiphi isidalwa, kodwa kuNkulunkulu kuphela^o; njalo ukuze semukeleke, kumele senziwe ngokukhululekileyo, ngokholo, langokunanzelela imfanelo, ngendlela yokubonga isihawu esemukelweyo, kumbe ukuzuza lokho esikufunayo; okuthi ngakho zisibophelisise ngokusemthethweni emfanelweni ezidingekayo, kumbe lakwezinye izinto ezingathi zincedise kulokho^p.
   
7. 
   Akuvunyelwa muntu ukuthi afunge ukwenza laluphi ulutho olunqatshelweyo elizwini likaNkulunkulu, kumbe okungavimbela lasiphi isenzo esilayiweyo lapho, kumbe okungekho emandleni akhe, njalo ukukwenza lokhu akalasithembiso samandla awaphiwe nguNkulunkulu^q. Ngakho izifungo zokuzehlukanisa zaboPapa zokuthi umuntu uzahlala kokuphela engagananga, ukukhetha ubuyanga, njalo ukulalela okungelampikiso, akusizozimiso zokuphelela okukhulu kangaka, ngakho zimiyijibila eyinkolelo eyisono, umKristu okungamele azihilele kikho^r.
   

17. 23. Ngomantshi welizwe

1. 
   UNkulunkulu, uMbusi ongaphezulu leNkosi yomhlaba wonke, ubekile omantshi belizwe, ukuba, babengaphansi kwakhe, phezu kwabantu, kusenzelwa udumo lwakhe, lobuhle babantu. Njalo ngenxa yalokho, ubahlomise ngamandla omhedla, ukuvikela lokukhuthaza labo abalungileyo, lokujezisa abenza okubi^a.
   
2. 
   Kusemthethweni ukuthi amaKristu emukele njalo asebenze isikhundla sobumantshi nxa bebizelwe kuso^b. Ekusebenzeni kwaso, njengoba bafanele ngokukhethekileyo ukugcina ubumnene, ukulunga, lokuthula, ngokuvumelana lemithetho elungileyo yalowo lalowombuso^c; ngokunjalo ngenxa yalokho bangathi ngokusemthethweni, khathesi ngaphansi kweThestamente eLitsha, balawule impi, ngesizathu esiqondileyo langamathuba afaneleyo^d.
   
3. 
   Umantshi welizwe angezithathele ukutshunyayelwa kweLizwi lokuphiwa kwamasakramente, kumbe amandla ezihluthulelo zombuso wezulu^e. Kube kanti ulegunya, futhi kuyimfanelo yakhe ukuthi amise ukuthi ubudlelwano lokuthula kulondolozwe ebandleni, ukuze iqiniso likaNkulunkulu ligcinwe lihlanzekile liphelele, ukuze yonke inhlamba lokubhazuka kucindezelwe, konke ukubola lokuphatha kubi enkonzweni lokulaya kuvikelwe kumbe kuguqulwe, njalo inkonzo zonke zikaNkulunkulu zimiswe, zisetshenziswe, zigcinwe ngemfanelo^f. Ukuze kusetshenziswe ngcono lokhu, ulamandla okubiza amasinodi (izinkundla ezinkulu zebandla), lokuthi abe khona kuzo, njalo aqinise ukuthi konke okwenziwayo kuyo kuvumelana lengqondo kaNkulunkulu^g.
   
4. 
   Kuyimfanelo yabantu ukuthi bathandazele omantshi^h, ukubahloniphaⁱ, ukuthela kubo lezinye imfanelo^k, ukulalela imilayo yabo esemthethweni, njalo lokuba ngaphansi kwegunya labo, ngenxa yesazela^l. Ukungabi lokholo, kumbe umehluko kulo ukholo, kakwenzi ze igunya labomantshi elilungileyo lelisemthethweni^m, loba kukhulule abantu ekubalaleleni okufaneleyoⁿ, abakhokheli bebandla kabangaphandle kwalokho, ngitsho laye uPapa kalamandla lokubusa phezu kwabo esigabeni sabo, kumbe laphezu kwawuphi umuntu wabo; njalo ikakhulu ukubathathela izigaba zabo, kumbe impilo yabo, uba engabahlulela ukuthi bangababhazuki, njalo langasiphi esinye isizatho angasibumba^o.
   

18. 24. Ngomtshado lokuchithwa kwawo

1. 
   Umtshado kumele ube phakathi kwendoda eyodwa lomfazi oyedwa; njalo akukho emthethweni ukuthi loba yiyiphi indoda ibe labafazi abedlula oyedwa, kumbe loba nguwuphi umfazi abe lamadoda adlula eyodwa, ngasikhathi sinye^a.
   
2. 
   Umtshado wamiselwa ukusizana kwababili umfazi lendoda^b, ukwandisa abantu ngenzalo esemthethweni, lebandla ngenzalo engcwele^c; lokuvimbela ukungcola^d.
   
3. 
   Kusemthethweni ukuthi bonke abantu abehlukeneyo batshade, abalengqondo yokuvumelana^e. Kube kanti kuyimfanelo yamaKristu ukuthi atshade kuphela eNkosini^f. Njalo ngenxa yalokho labo abavuma ukholo lweqiniso oluguquliweyo akumele batshade labangelakholo, amaRoma, kumbe abanye abakhonza izithombe; njalo labo abakholwayo akumele babotshwe ngejogwe elingalinganiyo ngokutshada lalabo abaxhwalileyo kakhulu empilweni yabo, kumbe ababambelele emfundisweni ezifanele zilahlwe^g.
   
4. 
   Umtshado awufanele ukuba phakathi kwezinini kumbe ukuzalana okwenqatshelwa yiLizwi^h. Njalo leyomitshado yensendo ingeze yenziwa ibe semthethweni langawuphi umthetho wabantu, kumbe ngokuvumelana kwababili, ukuze labobantu bahlale ndawonye njengendoda lomfaziⁱ. Indoda ingeke ithathe kwabazalana lomfazi wayo abaseduze ngegazi, njengoba layo ingeze yakwenza kwabegazi layo; lomfazi laye kuzinini zendoda eziseduze egazini njengezakhe^k.
   
5. 
   Ubufebe kumbe ukuphinga okwenziwa ngemva kwesivumelwano, kuvunjululwa umtshado ungakafiki, kunikwa isizatho esiqondileyo kulowo omsulwa kwababili ukuthi adilize lesosivumelwano^l. Nxa kulobufebe obenziwe emva komtshado, kusemthethweni kulowo omsulwa kwababili ukuthi amangale edinga ukuchitha umtshado^m; njalo emva kokuchithwa komtshado angazitshadela lomunye, njengokungathi owenze okubi kwababili ebefileⁿ.
   
6. 
   Lanxa ukubola komuntu kunjalo ukuthi kulungele ukudinga izizatho ezingafanele zokwahlukanisa labo uNkulunkulu abahlanganise ndawonye ngomtshado; kube kanti kakulalutho ngaphandle kobufebe, kumbe lokhokutshiya ngokuthanda okungeze kwake kulungiswe libandla kumbe ngumantshi welizwe, kuyimbangela eyaneleyo yokuchitha ifindo lomtshado^o: lapho okumele ngendlela esobala njalo esemthethweni inanzelelwe, futhi lalabo ababili bangayekelwa entandweni yabo lokuhlakanipha kwabo, endabeni yabo ngokwabo^p.