Uvumo Lokholo lweWestminster

2. NgoNkulunkulu langoZiqu-zinthathu ongcwele

1. 
   Ukhona munye kuphela^a uNkulunkulu ophilayo loweqiniso^b, ongelasiphelo kubukhona lekupheleleni^c, uMoya ocwengeke kakhulu^d, ongabonwayo^e, ongelamzimba, zitho^f, loba imizwa^g, ongelanguquko^h, omkhulukaziⁱ, ongelasiphelo^k, ongaqedisisekiyo^l, uSomandla^m, ohlakaniphe ngokupheleleyoⁿ, ongcwele ngokupheleleyo^o, okhululeke ngokupheleleyo^p, ophelele ngokupheleleyo^q, esebenza zonke izinto ngecebo lentando yakhe elingaguqukiyo njalo elunge ngokupheleleyo^r, esenzela olwakhe udumo^s; othanda ngokupheleleyo^t olomusa, olesihawu, obekezelayo, owande ukulunga leqiniso, exolela ububi, iziphambeko lesono^u; umvuzi walabo abamdingisisayo^w; laphezu kwalokho eqonde nqo, esesabeka ekwahluleleni kwakhe^x, ezonda sonke isono^y, njalo engasoze ayekele olecala^z.
   
2. 
   UNkulunkulu ulayo yonke impilo^a, udumo^b, ukulunga^c, ukubusiseka^d, kuye njalo kuvela kuye; njalo uyedwa wonele ngokupheleleyo kuye langakuye, ongasweli laziphi izidalwa azenzileyo^e, engazuzi laluphi udumo oluvela kuzo^f, kodwa obonakalisa udumo lwakhe phakathi kwazo, ngazo, kuzo, laphezu kwazo. Yena nguye yedwa umthombo wokukhona konke, okuvela kuye, okungaye, lokukuye izinto zonke^g, njalo ulokubusa lobukhosi okupheleleyo phezu kwazo okuthi enze ngazo, esenzela zona, laphezu kwazo okumthokozisayo^h. Ebusweni bakhe zonke izinto zembulekile njalo zisobalaⁱ. Ulwazi lwakhe alulasiphelo, alulamposiso njalo alweyamanga esidalweni^k. Ngakho kuye akulasehlakalo esingalindelwe njalo akulantandabuzo^l. Ungcwele ngokupheleleyo kuwo wonke amacebo akhe, lakuyo yonke imisebenzi yakhe, lakuyo yonke imilayo yakhe^m. Yena ufanelwe ngokuvela kuzingilosi labantu laso sonke esinye isidalwa, layiphi inkonzo, ukusetshenzelwa kumbe ukulalelwa okumthokozisa ukukufuna kiboⁿ.
   
3. 
   Ebunyeni bobuNkulunkulu kuleziqu ezintathu, eziluqobo lunye, amandla laphakade: UNkulunkulu uYise, uNkulunkulu iNdodana, loNkulunkulu uMoya oyiNgcwele^o. UYise kaveli kubani, njalo kazalwanga, kaphumi kubani. INdodana izalwa nguYise ngokulaphakade^p. UMoya oyiNgcwele uphuma ngokulaphakade kuYise leNdodana^q.
   

3. Ngesimiso sikaNkulunkulu esilaphakade

1. 
   UNkulunkulu kulo lonke iphakade, ngecebo leyakhe intando ehlakaniphe lengcwele ngokupheleleyo, ngokukhululeka njalo ngokungaphenduki, wamisa konke okwenzakalayo^a; kube kanti, uNkulunkulu kasimqalisi wesono^b, njalo intando yezidalwa kayibanjwa ngamandla, njalo inkulukeko lendlela eyejwayelekileyo yezenzakalo ayisuswa, kodwa-ke iyamiswa^c.
   
2. 
   Lanxa uNkulunkulu esazi konke okungenzakala lokulokwenzakala ngenxa yayo yonke imimo^d; kube kanti kamisanga lutho ngoba elubone ngaphambili lungoluzayo, kumbe lungoluzakwenzakala ngenxa yalezozimo^e.
   
3. 
   Ngesimiso sikaNkulunkulu, esenzelwa ukubonakalisa udumo lwakhe, abanye abantu lezingilosi^f bamiselwa ngaphambili ukuphila okulaphakade, njalo abanye bamiselwa ngaphambili ukufa okulaphakade^g.
   
4. 
   Lezi izingilosi labantu abamiselwe ngaphambili abaqunyelwe ngaphambili ngokunye, bamiswa ngokukhethekileyo lokungaguqukiyo. Lenani labo lihlala liqotho kangaka ukuthi kalengezwa kumbe liphungulwe^h.
   
5. 
   Labo ebantwini abamiselwe ngaphambili ukuphila, uNkulunkulu wabakhetha, kungakasekwa umhlaba, ngenjongo yakhe ephakade engeke iguqulwe, lecebo lakhe lemfihlo lokufisa okuhle kwentando yakhe, kuKristu, kudumo oluphakadeⁱ, kuphela ngesisa sakhe esikhululekileyo lothando, ngaphandle kokubona ngaphambili kokholo kumbe imisebenzi emihle, kumbe ukuphikelela lakukuphi kwazo, kumbe laluphi olunye ulutho kusidalwa, okunjengezimo kumbe imbangela ezimdonsela kulokho^k; konke kudumise umusa wakhe olodumo^l.
   
6. 
   Njengoba uNkulunkulu wamisa abakhethiweyo kudumo, ngokunjalo yena, ngenjongo yentando yakhe ephakade lekhululeke ngokupheleleyo, uqume ngaphambili zonke indlela zalo^m. Ngakho labo abakhethiweyo, bewile kuAdamu, bahlengwa nguKristuⁿ, babizelwa ngokuphumelelayo kukholo kuKristu ngoMoya wakhe osebenza ngesikhathi esifaneleyo, bayalungisiswa, bamiswa njengabantwana, bayangcweliswa^o, balondolozwa ngamandla akhe ngokholo kusindiso^p. Njalo abakho abanye abahlengwa nguKristu, ababizwa ngokuphumelelayo, abalungisiswayo, abamiswa njengabantwana, abangcweliswayo, labasindiswayo, kodwa kuphela abakhethiweyo^q.
   
7. 
   Abaseleyo ebantwini uNkulunkulu wathokoza ukubedlula, ngecebo lentando yakhe elingelakuhlolwa, enika kumbe egodla umusa ngayo, njengokuthanda kwakhe, esenzela udumo lwamandla akhe alobukhosi phezu kwezidalwa zakhe, lokubamisela ihlazo lolaka ngesono sabo, kusenzela udumo lokulunga kwakhe okulenkazimulo^r.
   
8. 
   Imfundiso yale imfihlakalo ephakemeyo yokumisela ngaphambili ifanele iphathwe ngenhlakanipho lokunanzelela okukhethekileyo^s, ukuze abantu, benanzelela intando kaNkulunkulu eyambulwe eLizwini lakhe, njalo belalela kuyo, ngenxa yokuqiniseka ngokubizwa kwabo okuphumelelayo, bangaba leqiniso lokhetho lwabo olwaphakade^t. Ngalokho limfundiso izanika into yokubongwa, ukuhlonitshwa, lokubatshazwa kukaNkulunkulu^u, lokuthobeka, ukukhuthala, lokududuzwa okukhulu kubo bonke abalalela ivangeli ngeqiniso^w.