Uvumo Lokholo lweWestminster

20. Ngenkululeko yamaKristu lenkululeko yesazela

1. 
   Inkululeko eyathengelwa amakholwa nguKristu ngaphansi kwevangeli imumethe inkululeko yabo ecaleni lesono, lakuntukuthelo elahlayo kaNkulunkulu, kusiqalekiso somthetho wokuziphatha^a; njalo lekukhululweni kwabo kulelilizwe lakhathesi elibi, kubuqili bukaSathane, lekubusweni yisono^b; lebubini benhlupheko, edonsini lokufa, ekunqobeni kwengcwaba, lekulahlweni okungelasiphelo^c; lekungeneni kwabo okukhululekileyo kuNkulunkulu^d, lekumlaleleni kwabo kungabangelwa yikwesaba kobugqili, kodwa uthando olufanana lolomntwana lengqondo evumayo^e. Konke lokho kwakujwayelekile kumakholwa ngaphansi komthetho^f. Kodwa ngaphansi kwesivumelwano esitsha, ukukhululeka kwamakholwa kuphindwa kwengezwe, ngokukhululeka kwabo kulo ijogwe lomthetho wemfuziselo, lowo ibandla lamaJuda elalingaphansi kwawo^g, langesibindi esengeziweyo sokungena kuso isihlalo somusa^h, langokunikwa okugcweleyo koMoya okhululekileyo kaNkulunkulu, okwedlula lokho amakholwa ayengaphansi komthetho ayezakuzuzaⁱ.
   
2. 
   UNkulunkulu yedwa uyiNkosi yesazela^k, njalo usitshiye sikhululekile kuzo imfundiso lemilayo yabantu, yona, langayiphi into ephambene lelizwi lakhe; kumbe ngaphandle kwalo, nxa kuzindaba zokholo kumbe ezenkonzo^l. Kuze kuthi, ukukholwa imfundiso ezinjalo, kumbe ukulalela imilayo enjalo, ngenxa yesazela^m, yikulahla inkululeko yesazela eyeqiniso. Lokufuna ukholo olungabuziyo lokulalela okupheleleyo kobuphofu kuyikudiliza inkululeko yesazela lomcabango futhiⁿ.
   
3. 
   Labo abathi, ngokuzenzisa ngenkululeko yobuKristu, benze lasiphi isono kumbe bondle layiphi inkanuko, ngokwenza njalo bayadiliza injongo yenkululeko yobuKristu, eyikuthi nxa sesikhululwe ezandleni zezitha zethu singayikhonza iNkosi singelakwesaba, ngobungcwele langokulunga phambi kwayo zonke insuku zempilo yethu^o.
   
4. 
   Ngoba amandla-ke uNkulunkulu awamisileyo, lenkululeko uKristu ayithengileyo, kawamiselwanga nguNkulunkulu ukudiliza, kodwa ngokuzwanana ukusekelana lokulondolozana, labo abathi ngokuzenzisa ngenkululeko yobuKristu bazaphikisa lawaphi amandla asemthethweni, kumbe ukusetshenziswa kwawo ngokusemthethweni, loba engawelizwe kumbe engawebandla, bamelane lesimiso sikaNkulunkulu^p. Langokumemezela kwabo imibono enjalo, kumbe ngokubambelela kwabo ezenzweni ezinjalo, eziphambene lokukhanya kwemvelo, kumbe lemilayo eyaziwayo yobuKristu, loba mayelana lokholo, lenkonzo, kumbe lengxoxo; kumbe ezimelana lamandla okukhonza uNkulunkulu; kumbe ngemibono kumbe izenzo zempambaniso, ezithi ngemvelo yazo kumbe ngendlela ezihlanyelwa ngayo kumbe okubanjelelwa kuzo, ezichitha ukuthula kwangaphandle lengqubo enhle uKristu ayimisayo ebandleni, bangamangalelwa ngokomthetho, ukuze bathonisiswe zinkundla zebandla^q langamandla kamantshi welizwe^r.
   

15. 21. Ngenkonzo yokholo losuku lweSabatha

1. 
   Ukukhanya kwemvelo kutshengisa ukuthi kuloNkulunkulu, olobukhosi lokongamela phezu kwakho konke, olungileyo, lowenza okulungileyo kubo bonke, ngakho kumele esatshwe, athandwe, adunyiswe, abizwe, athenjwe, akhonzwe, ngayo yonke inhliziyo, langawo wonke umphefumulo, langawo wonke amandla^a. Kodwa eyiyo indlela eyemukelekayo yokukhonza uNkulunkulu oqotho imiswe nguye ngokwakhe, ngakho-ke imiselwe imikhawulo ngentando yakhe ebonakalisiweyo, ukuze angakhonzwa ngemikhumbulo langamacebo abantu, kumbe ngokucatshangiswa nguSathane, langayiphi imifanekiso ebonakalayo kumbe langayiphi indlela engamiswanga emibhalweni engcwele^b.
   
2. 
   Inkonzo yokholo kumele iphiwe kuNkulunkulu, uYise, iNdodana, loMoya oyiNgcwele^c; njalo kuye yedwa; hatshi kuzingilosi, kwabangcwele, kumbe lakusiphi esinye isidalwa^d: njalo kusukela ekuweni kungengaphandle koMlamuleli; hatshi ngokulamula kwaloba nguwuphi omunye, kodwa ngoKristu yedwa^e.
   
3. 
   Umthandazo, ulokubonga, ngoba uyingxenye ekhethekileyo eyodwa yenkonzo yokholo^f, ufunwa nguNkulunkulu kuye wonke umuntu^g, lokuze wemukeleke, ufanele wenziwe ngebizo leNdodana^h, ngokuncedwa nguMoya wakheⁱ, uvumelana lentando yakhe^k, ulokuqedisisa, inhlonipho, ukuthobeka, ukutshiseka, ukholo, uthando lophikelelo^l, njalo nxa ungophunyiselwayo wenziwe ngolimi olwaziwayo^m.
   
4. 
   Umthandazo umele wenzelwe izinto ezivunyelwa ngumthethoⁿ, njalo imihlobo yonke yabantu abaphilayo, kumbe abazaphila emva kwalokho^o, kodwa hayi abafileyo^p, njalo hatshi labo abaziwayo sebone isono sokufa^q.
   
5. 
   Ukufundwa kwemibhalo kulokwesaba uNkulunkulu^r, intshumayelo eqondileyo^s, lokulalela iLizwi ngokunanzelela, ekulaleleni uNkulunkulu, ngokuqedisisisa, ngokholo langenhlonipho^t; ukuhlabela izihlabelelo^v belomusa enhliziyweni; njalo langokunikwa okufaneleyo langokwamukelwa okufaneleyo kwamasakramente amiswa nguKristu; konke kuzingxenye zenkonzo yokholo kaNkulunkulu eyejwayelekileyo^w: Lezifungo zokholo^x, izithembiso^y, ukuzila ukudla okunzulu^z lokubonga, ngezikhathi ezikhethekileyo^a, okumele kusetshenziswe ngezikhathi lamathuba ehlukeneyo, ngendlela engcwele leyokholo^b.
   
6. 
   Loba umthandazo, layiphi enye ingxenye yokukhonza kokholo, okwakhathesi ingaphansi kwevangeli kayibotshelwanga kumbe yenziwa yemukeleke ngcono ngenxa yaloba yiyiphi indawo lapho eyenzelwa khona, kumbe eqonde khona^c. Kodwa uNkulunkulu kufanele akhonzwe kuyo yonke indawo^d, ngomoya langeqiniso^e, njengakunsapho ezehlukeneyo^f, nsuku zonke^g, langasese umuntu ngamunye^h; ngokufananayo, ngendlela enzulu kakhulu kumibuthano esobala, engafanele ukudelwa kumbe ukuyekelwa ngobutshapha kumbe ngabomo, lapho uNkulunkulu ngeLizwi lakhe kumbe ngokongamela abizela kukhoⁱ.
   
7. 
   Njengoba kungumthetho wemvelo ukuthi ngokwejwayelekileyo isilinganiso esifaneleyo sesikhathi simiselwe ukukhonza uNkulunkulu; ngokunjalo elizwini lakhe, ngomlayo oqumayo, wokuziphatha, longaqamukiyo, ubopha bonke abantu kuzo zonke izizukulwana, wamisa ngokukhethekileyo usuku olulodwa kweziyisikhombisa, ukuthi lube liSabatha, lulondolozelwe yena lube ngcwele^k, kusukela ekudabukeni komhlaba kuze kuyefika ekuvukeni kukaKristu ekufeni, lwalulusuku lokucina lweviki, njalo kusukela ekuvukeni kukaKristu ekufeni lwaguqulelwa esukwini lokuqala lweviki^l, okuthi emibhalweni luthiwa luSuku lweNkosi^m, njalo lumele luqhubeke kuze kube sekupheleni komhlaba, njengeSabatha lamaKristuⁿ.
   
8. 
   LeliSabatha lilondolozwa lingcwele kusenzelwa iNkosi, nxa abantu, emva kwamalungiselelo afaneleyo enhliziyo zabo, lokulungisa mandulo izinto zabo ezejwayelekileyo, kabalondi nje ukuphumula okungcwele, usuku lonke, emisebenzini yabo, emazwini abo, lekukhumbuleni ngemisebenzi yelizwe lokuzilibazisa kwabo^o, kodwa bathatheke isikhathi sonke obala langasese ngezenzo zenkonzo yakhe, lemisebenzi yemfanelo lesihawu^p.