Uvumo Lokholo lweWestminster

17. Ngophikelelo lwabangcwele

1. 
   Labo uNkulunkulu abemukeleyo koThandiweyo wakhe, ababizileyo ngokuphumelelayo, njalo abangcwelisileyo ngoMoya wakhe, bangeke bawe ngokupheleleyo kumbe ekucineni basuke esimeni somusa; kodwa bazaphikelela sibili kuze kube sekupheleni, njalo basindiswe ngokungelasiphelo^a.
   
2. 
   Lokhukuphikelela kwabangcwele akweyamanga phezu kwentando yabo ekhululekileyo, kodwa phezu kokungaguquki kwesimiso sokhetho, sigeleza sivela ethandweni lwesihle lolungaguqukiyo lukaNkulunkulu uYise^b, phezu kwamandla okufanela lokulabhela kukaJesu Kristu^c, ukuhlala koMoya, lembewu kaNkulunkulu ngaphakathi kwabo^d, lesimo sesivumelwano somusa^e; njalo kukho konke kuvela lokuqiniseka lokungaguquki kwakho^f.
   
3. 
   Lanxa kunjalo, ngezilingo zikaSathane lezelizwe, lokwanda kokubola okusasele kibo, lokudela izindlela zokubalondoloza, bangawela ezonweni ezesabekayo^g, njalo okwesikhathi bahlale kuzo^h; ngalokho bezilethela intukuthelo kaNkulunkuluⁱ, njalo bedabukisa uMoya wakhe oyiNgcwele^k, kubenze bemukwe ngesilinganiso izisa lenduduzo zabo^l, inhliziyo zabo zisenziwa lukhuni^m, lezazela zabo zilimaleⁿ, badanise bakhubekise abanye^o, futhi bazilethele izigwebo zesikhatshana^p.
   

13. 18. Ngokuqinisekiswa komusa losindiso

1. 
   Lanxa abazenzisi labanye abantu abangazalwanga kutsha bengazikhohlisa ngeze ngamathemba amanga lokuzikhukhumeza kwenyama bethi bathandwa nguNkulunkulu, basesimeni sosindiso^a (lelothemba labo lizabhubha)^b; kube kanti labo abakholwayo ngeqiniso kuyo iNkosi uJesu Kristu, njalo beyithanda ngobuqotho, bezama ukuhamba ngesazela esihle phambi kwayo, kulelilizwe bangaqinisekiswa oqotho ukuthi basesimeni somusa^c, njalo bathokoze ethembeni lodumo lukaNkulunkulu, lelothemba elingasoze libenze babe lenhloni^d.
   
2. 
   Leliqiniso kakusikuvunyiswa nje lokuzicabangela ukuthi mhlawumbe kungenzeka, kugxile phezu kwethemba lemposiso^e; kodwa liyikuqinisekiswa okungelamposiso kokholo, lugxile phezu kweqiniso likaNkulunkulu lezithembiso zosindiso^f, ubufakazi bangaphakathi balezozisa okwenzelwe zona lezizithembiso zosindiso^g, ubufakazi boMoya wokuma kwabantwana bufakaza lemimoya yethu ukuthi singabantwana bakaNkulunkulu^h, lowoMoya oyisibambiso selifa lethu, esiphawulwa ngaye kuze kube lusuku lohlengoⁱ.
   
3. 
   Lokhukuqinisekiswa okungelamposiso kakusikho kwesiqokoqela sokholo ngokunjalo, ukuthi ikholwa leqiniso lingalinda isikhathi eside, njalo lilwisane lobunzima obunengi phambi kokuthi likuzuze^k: kube kanti linikwa amandla nguMoya ukwazi izinto eziphiwe ngesihle nguNkulunkulu, ngaphandle kwesambulo esingejwayelekanga, ekusebenziseni ngokuqondileyo indlela ezejwayelekileyo angafinyelela kukho^l. Ngakho-ke kuyimfanelo yakhe wonke umuntu, ukuthi atshisekele kakhulu ukuqinisa ubizo lokhetho lwakhe^m, ukuze ngakho inhliziyo yakhe yenziwe banzi ekuthuleni lekuthokozeni kuMoya oyiNgcwele, ethandweni lekubongeni kuNkulunkulu, njalo lemandleni lekuthokozeni kumfanelo zokulalelaⁿ, izithelo ezifaneleyo zalokhukuqinisekiswa; kukhatshana kangakanani ekudonseleni abantu ebutshapheni^o.
   
4. 
   Amakholwa eqiniso kungenzakala ukuthi ngendlela ezinengi ukuqinisekiswa kosindiso lwawo kunyikinywe, kuncitshiswe, kumiswe okwesikhathi; ngokuvilaphela ukukulondoloza, ngokuwela esonweni esikhethekileyo esilimaza isazela njalo sidabukise uMoya; ngokudunyelwa yisilingo esithile esilamandla, ngokugodlelwa nguNkulunkulu ukukhanya kobuso bakhe, njalo ngokuvumela lalabo abamesabayo ukuthi bahambe ebunyameni lokuthi bangabi lokukhanya^p; kube kanti kabasweli ngokupheleleyo leyombewu kaNkulunkulu, lempilo yokholo, lolothando lukaKristu labazalwane, lokhokuqinisekiswa kwenhliziyo, lesazela ngemfanelo, okuthi ngakho ngokusebenza kukaMoya lokhukuqinisekiswa ngesikhathi esifaneleyo kuvuselelwe^q; okuthi ngakho ngalesosikhathi basekelwe ukuze bangalahli ithemba ngokupheleleyo^r.
   

19. Ngomthetho kaNkulunkulu

1. 
   UNkulunkulu wapha uAdamu umthetho, njengesivumelwano semisebenzi, okwathi ngawo wambopha yena layo yonke inzalo yakhe, ukuthi balalele bona uqobo lwabo, wona wonke, ngokuyikho kanye, ngokungapheliyo, ethembisa impilo aluba ewonelisa, njalo esongela ukufa aluba ewephula, wamnika amandla lokwenelisa ukuwulondoloza^a.
   
2. 
   Lumthetho, emva kokuwa kwakhe, wahlala ungumthetho opheleleyo wokulunga, njalo, unjalo, wanikwa nguNkulunkulu phezu kwentaba yeSinayi, kumilayo elitshumi, njalo ulotshwe kuzibhebhe ezimbili^b. Imilayo yokuqala emine imumethe imfanelo yethu kuNkulunkulu; leminye eyisithupha imfanelo yethu kumuntu^c.
   
3. 
   Ngaphandle kwalo umthetho, obizwa ngokwejwayelekileyo ngokuthi ngowokuziphatha, uNkulunkulu wathokoza ukunika abantu bakoIsrayeli, njengebandla elingakakhuli, imithetho yemfuziselo, emumethe izimiso zemfuziselo ezehlukeneyo, ezinye ngokukhonza, kutshengisa ngaphambili uKristu, izisa, izenzo, inhlupheko, lenzuzo zakhe^d; njalo ezinye zibonakalisa imilayo eyehlukeneyo yemfanelo zokuziphatha^e. Yonke le imithetho yemfuziselo seyayekelwa ngaphansi kweThestamente eLitsha^f.
   
4. 
   Kibo njalo, njengesizwe esibambeneyo, wabanika imithetho eyehlukeneyo yokwahlulela, eyaphelayo ndawonye lombuso walesosizwe; khathesi kakho obanjwa yiyo ngaphandle kokuthi ukulunga kwakho konke kungakufuna^g.
   
5. 
   Umthetho wokuziphatha ubopha bonke kokuphela, labo abalungisisiweyo kanye labanye, ekulaleleni wona^h; kungayisikho kuphela mayelana lalokho okumunyethwe kuwo, kodwa lamayelana legunya likaNkulunkulu uMdali owawunikayoⁱ. Futhi uKristu kulo ivangeli kawudilizi langayiphi indlela, kodwa uyasiqinisa lesisibopho^k.
   
6. 
   Lanxa amakholwa eqiniso engekho ngaphansi komthetho, njengesivumelwano semisebenzi, ukuze alungisiswe kumbe alahlwe ngawo^l: kube kanti uluncedo olukhulu kibo, lakwabanye; ngalokhu ukuthi njengomthetho wempilo ubazisa intando kaNkulunkulu lemfanelo yabo, ubaqondisa, ubabopha ukuze bahambe ngokuvumelana lawo^m; bevumbulula njalo ukungcola okonakeleyo kwemvelo, kwezinhliziyo lokwempilo yaboⁿ, ukuze kuthi nxa bezihlola ngawo, bafinyelele ekuvunyisweni njalo, ekuthotshisweni, lekuzondeni isono^o, kanye lokuboniswa ngokucaca ukumswela kwabo uKristu, lokupheleliswa kokulalela kwakhe^p. Uyasebenza lakwabazelwe kutsha ukuthundubeza ukubola okunengi kwabo ngoba usalela isono^q; lokusongela kwawo kutshengisa lokho okufanelwe layizono zabo, lezinhlupheko kule impilo abangazilindela ngenxa yazo, lanxa bekhululwe kusiqalekiso sazo esisongelwe emthethweni^r. Izithembiso zawo ngokufananayo zibatshengisa ukwemukela kukaNkulunkulu ukulalela, lalezozibusiso abangazilindela emva kokuwenza^s, lanxa kungabafanele ngomthetho njengesivumelwano semisebenzi^t. Ngakho, nxa umuntu esenza okulungileyo, eyekela okubi, ngoba umthetho ukhuthaza okunye njalo usalela okunye, kakusibufakazi bokuthi ungaphansi komthetho hatshi ngaphansi komusa^v.
   
7. 
   Ngitsho ukusetshenziswa komthetho osekuqanjwe ngaphambili kakuphikisani lomusa wevangeli, kodwa ngokumnandi kuyavumelana lawo^w; uMoya kaKristu uthambisa futhi unika amandla intando yomuntu ukukwenza lokho ngokukhululeka langokuthokoza, okuthi intando kaNkulunkulu eyembulwe emthethweni ifuna kwenziwe^x.