Uvumo Lokholo lweWestminster

7. Ngesivumelwano sikaNkulunkulu lomuntu

1. 
   Ummango ophakathi kukaNkulunkulu lesidalwa mkhulu kangaka, ukuthi lanxa izidalwa eziqedisisayo zifanele ukumlalela yena ongumdali wazo, kube kanti zingeke zibe lenzuzo kuye njengesibusiso lomvuzo, kodwa ngokuzithandela ukuzehlisa okuthize kukaNkulunkulu, athe ngokuthokoza wakubonakalisa ngendlela yesivumelwano^a.
   
2. 
   Isivumelwano sakuqala esenziwa lomuntu siyisivumelwano semisebenzi^b, uAdamu athenjiswa impilo kuso, njalo kuye kunzalo yakhe^c, kweyame ekulaleleni kwakhe uqobo okupheleleyo^d.
   
3. 
   Umuntu ngokuwa kwakhe, esezenze kabalakho ukuba lempilo ngalesosivumelwano, kwayithokozisa iNkosi ukwenza esesibili^e, esibizwa ngokwejwayelekileyo ngokuthi yisivumelwano somusa, athi kuso ngokukhululeka anikele kuzoni impilo losindiso ngoJesu Kristu, efuna kibo ukholo kuye, ukuze basindiswe^f, njalo ethembisa ukubapha bonke labo abamiselwe ukuphila okuphakade uMoya oyiNgcwele wakhe, ukubenza bavume njalo babelakho ukukholwa^g.
   
4. 
   Lesisivumelwano somusa sihlezi sibekwa obala emibhalweni ngebizo lokuthi yiThestamente, maqondana lokufa kukaJesu Kristu umenzi weThestamente, lelifa elingelasiphelo, lazo zonke izinto ezingelalo, ezabiwa kulo njengelifa^h.
   
5. 
   Lesisivumelwano saphathwa ngokwehlukeneyo ngesikhathi somthetho, langesikhathi sevangeliⁱ. Ngaphansi komthetho, saphathwa ngezithembiso, ngeziprofetho, ngeminikelo, ngokusoka, ngezinyane lePhasika, langeminye imifanekiso lezimiso ezinikwa ebantwini bamaJuda, zonke zitshengisa ngaphambili uKristu owayesiza^k; ezazonele ngalesosikhathi ziphumelela, ngokusebenza kukaMoya, ukufundisa lokwakha abakhethiweyo kukholo kuye uMesiya owayethenjisiwe^l, okungaye baba lokuthethelelwa kwezono okupheleleyo losindo lwaphakade; njalo sibizwa ngokuthi yiThestamente eLidala^m.
   
6. 
   Ngaphansi kwevangeli, lapho uKristu, ongumzimba uqoboⁿ, wabonakaliswa, izimiso lesisivumelwano esinikwe ngazo ziyikutshunyayelwa kwelizwi, lokunikwa kwamasakramente obhabhathizo lesidlo seNkosi^o; okuthi lanxa zinlutshwana ngenani futhi zinikwa ngobulula obukhulu, kungeladumo lwangaphandle; kube kanti kuzo, sibekwa obala ngokugcwala okukhulu, ukucaca lamandla omoya^p, kuzo zonke izizwe, kuzo zombili amaJuda labezizwe^q; njalo sibizwa ngokuthi yiThestamente eLitsha^r. Ngakho kazimbili izivumelwano zomusa zehlukene ngoqobo, kodwa sinye siyafanana, ngokunikwa okwehlukeneyo^s.
   

3. 8. NgoKristu UMlamuli

1. 
   Kwamthokozisa uNkulunkulu, kucebo lakhe eliphakade, ukukhetha lokubeka iNkosi uJesu, iNdodana yakhe ezelwe yodwa, abe ngumlamuli phakathi kukaNkulunkulu lomuntu^a; umProfethi^b, umPristi^c, leNkosi^d, iNhloko loMsindisi webandla lakhe^e, iNdlalifa yezinto zonke^f, loMahluli welizwe^g; okwathi kuye kulo lonke iphakade wanika abantu, ukuthi babe yinzalo yakhe^h, njalo ukuthi ngaye ngesikhathi bahlengwe, babizwe, balungisiswe, bangcweliswe, njalo badunyisweⁱ.
   
2. 
   INdodana kaNkulunkulu, isiqu sesibili kuZiqu-zinthathu, enguNkulunkulu oqotho lophakade, eqobo lunye njalo elingana loYise, sesifikile isikhathi esigcweleyo, wazithathela phezu kwakhe imvelo yomuntu^k, ulazo zonke izimo eziqakathekileyo lobuthakathaka obujwayelekileyo kwayo, kodwa engelasono^l; esemithwe ngamandla kaMoya oyiNgcwele kusizalo sentombi uMariya ngokomzimba wakhe^m; ukuze kuthi imvelo ezimbili ezigcweleyo, lezipheleleyo lezehlukeneyo, ubuNkulunkulu lobuntu, zahlanganiswa ngendlela engelakwehlukaniswa esiqwini sinye, ngaphandle kokuguquka, ukuxubana, kumbe ukuphanjaniswaⁿ. Lesosiqu singuNkulunkulu uqobo njalo singumuntu uqobo, kube kanti nguKristu munye, uMlamuli yedwa phakathi kukaNkulunkulu lomuntu^o.
   
3. 
   INkosi uJesu, ngemvelo yakhe yomuntu ohlanganiswe ngokunjalo leyobuNkulunkulu, wangcweliswa njalo wagcotshwa ngoMoya oyiNgcwele, ngokungelasilinganiso^p, elazo zonke inotho zenhlakanipho lolwazi^q, okwamthokozisa uYise ukuthi konke ukuphelela kuhlale kuye^r; ukuze kuthi, engcwele, emsulwa, engelasici, njalo egcwele umusa leqiniso^s, alungiselwe ngokupheleleyo ukusebenza isikhundla soMlamuli lesoMbambeli^t. Lesosikhundla kazithathelanga sona, kodwa wasibizelwa nguYise^u, owanikela wonke amandla lokwahlulela esandleni sakhe, wamupha umthetho ukuthi asisebenzise sona^x.
   
4. 
   Lesisikhundla iNkosi uJesu yazimisela ukusenza ngokuvuma okhukhulu^y, okuthi, ukuze asisebenzise, wenziwa waba ngaphansi komthetho^z, njalo wawugcwalisa ngokupheleleyo^a, wathwala inhlungu ezinzima ngokupheleleyo khona emphefumulweni wakhe^b, lenhlupheko ezibuhlungu ngokupheleleyo emzimbeni wakhe^c, wabethelwa, njalo wafa^d, wangcwatshwa, wahlala ngaphansi kwamandla okufa, kube kanti kabonanga ukubola^e. Ngosuku lwesithathu wavuka kwabafileyo^f elalowomzimba ahlupheka ngawo^g, futhi enyukela ngawo ezulwini, njalo ulapho ehlezi ngakwesokunene sikaYise^h, elabhelelelaⁱ, njalo uzabuya ezekwahlulela abantu lezingilosi ekucineni komhlaba^k.
   
5. 
   INkosi uJesu, ngokulalela kwakhe okupheleleyo, langokuzinikela kwakhe, okwathi yena, ngoMoya ongelasiphelo, wakunikela kwaba kanye kuNkulunkulu, wenelisa ngokupheleleyo umthetho kaYise^l; njalo wathenga, kungeyisikubuyisana kuphela, kodwa lelifa elingelasiphelo embusweni wezulu, elabo bonke uYise amnike bona^m.
   
6. 
   Lanxa umsebenzi wohlengo ungasetshenzwanga nguKristu obala kwaze kwaba esebeyinyama, kube kanti amandla lempumelelo lenzuzo zawo zanikwa abakhethiweyo kuzo zonke izizukulwana ngokulandelana kusukela ekudabukeni komhlaba, kulezo langalezo izithembiso, imifanekiso, lemihlatshelo, embulwa ngayo, njalo etshengiswa ukuba yinzalo yomfazi, ezachoboza ikhanda lenyoka, njalo iZinyane elahlatshwayo ekusekelweni komhlaba; yena onguye izolo lalamuhla laninininiⁿ.
   
7. 
   UKristu, emsebenzini wobulamuli, usebenza ngokwezimvelo zombili, ngaleyo laleyomvelo usenza lokho okuqondene layo^o; kube kanti ngobunye besiqu, lokho okuqondene lemvelo enye, kwesinye isikhathi emibhalweni kubalelwe isiqu esibizwa ngenye imvelo^p.
   
8. 
   Kubo bonke labo uKristu abathengele uhlengo, ngeqiniso langokuphumelela ufaka aphe khona lokho^q, ebalabhelela^r, njalo ebembulela eLizwini langalo imfihlakalo zosindiso^s, ebavumisa ngokuphumelelayo ngoMoya wakhe ukuthi bakholwe njalo balalele, ebusa inhliziyo zabo ngelizwi langoMoya wakhe^t; enqoba zonke izitha zabo ngamandla obuninimandla lokuhlakanipha kwakhe ngokunjalo langalezizindlela ezivumelana ngokupheleleyo lezenzo zakhe ezimangalisayo lezingelakuhlolwa^u.