Uvumo Lokholo lweWestminster

12. Ngokuma kwabantwana

1. 
   Bonke labo abalungisisiweyo, uNkulunkulu uyabathembisa, kuyo langenxa yeNdodana yakhe eyiyo yodwa uJesu Kristu, ukubenza abahlanganyeli bomusa wokuma kwabantwana^a; ngenxa yalokho bemukelwa kunani, njalo bakholisa izinkululeko lamathuba amahle abantwana bakaNkulunkulu^b; balebizo lakhe libekwe phezu kwabo^c, bemukele umoya wokuma kwabantwana^d, bangeniswe esihlalweni somusa ngesibindi^e, benziwe babelakho ukukhala bathi, Abba, Baba^f; bahawukelwe^g, bavikelwe^h, bondliweⁱ, batshaywe nguye njengoYise^k, kodwa bengasoze balahlwe^l, kodwa bananyathiselwe kuze kube lusuku lohlengo^m, badle ilifa lezithembisoⁿ, njengezindlalifa zosindiso oluphakade^o.
   

8. 13. Ngokungcweliswa

1. 
   Labo abake babizwa ngokuphumelelayo bazalwa kutsha, belenhliziyo entsha lomoya omutsha kudalwe phakathi kwabo, baqhubeke bengcweliswa oqotho bona uqobo, ngamandla okufa lokuvuka kukaKristu^a, ngeLizwi langoMoya wakhe kuhlala kibo^b. Ubukhosi bomzimba wonke wesono buyabhujiswa^c, lezinkanuko zawo ezinengi ziya zithundubezwa zibulawa^d; bona-ke baya belokhu bevuselelwa njalo beqiniswa kuzo zonke izisa ezisindisayo^e, ukuze benze ubungcwele obuqotho, ngaphandle kwalokho kakho umuntu ozayibona iNkosi^f.
   
2. 
   Lokhukungcweliswa kusabalele kubuntu bomuntu wonke^g, kube kanti kungaphelelanga kule impilo, ngoba kusasalele okunye kwensalela zokubola kuzo zonke ingxenye^h. Lapho okuvuka khona impi ephikelelayo engalakubuyisana, inyama ikhanuka okuphambene lomoya, lomoya umelane lenyamaⁱ.
   
3. 
   Kule impi, lanxa ukubola okuseleyo okwesikhathi kuphumelela kakhulu^k, kube kanti ngokwelekelela amandla njalonjalo avela kuMoya ongcwelisayo kaKristu, ingxenye ezelwe kutsha iyaphumelela^l. Ngokunjalo-ke abangcwele bakhula emuseni^m, bephelelisa ubungcwele ekumesabeni uNkulunkuluⁿ.
   

9. 14. Ngokholo olusindisayo

1. 
   Umusa wokholo, abakhethiweyo benziwa babelakho ukukholwa ngawo kusindiswe imiphefumulo yabo^a, ungumsebenzi woMoya kaKristu ezinhliziyweni zabo^b, njalo ngokwejwayelekileyo wenziwa yikusebenza kweLizwi^c, okuthi ngakho langokunikwa kwamasakramente lomthandazo, uyandiswa njalo uqiniswe^d.
   
2. 
   Ngalolokholo umKristu uyakholwa ukuthi kuliqiniso konke okwambulwe eLizwini, ngenxa yegunya likaNkulunkulu ngokwakhe ekhuluma kilo^e, njalo esebenza ngokwehlukeneyo ngalokho sonke isithathelo ngasinye ngasinye salo esikumumetheyo: Elalela imilayo^f, ethuthumela kuzesabiso^g njalo egona izithembiso zikaNkulunkulu ngokwale impilo, lakuleyo ezayo^h. Kodwa izenzo eziqakathekileyo zokholo olusindisayo ziyikuvuma, ukwemukela, lokweyama kuKristu yedwa kube yikulungisiswa, ukungcweliswa, lempilo elaphakade, ngamandla esivumelwano somusaⁱ.
   
3. 
   Lolukholo lwehlukene ngezilinganiso, lubuthakathaka kumbe luqinile^k; lungandisa ukuhlaselwa ngendlela ezinengi, njalo luthundubezwe, kodwa luyanqoba^l; luyakhula kwabanengi baze bazuze ukuqinisekiswa okugcweleyo ngoKristu^m, ongumqalisi lomphelelisi wokholo lwethuⁿ.
   

10. 15. Ngokuphendukela empilweni

1. 
   Ukuphendukela empilweni kungumusa wevangeli^a, imfundiso yalokho efanele ukutshunyayelwa ngabafundisi bonke bevangeli, njengoba kufanele benze njalo ngeyokholo kuKristu^b.
   
2. 
   Ngayo, isoni, sesibona njalo sisizwa hayi ingozi yodwa, kodwa lokungcola lobubi bezono zaso, eziphambene lemvelo engcwele lomthetho olungileyo kaNkulunkulu; njalo ngokuqedisisa isihawu sakhe kuKristu kulabo abaphendukayo, siyadabuka kangaka, sizonde izono zaso, size siphenduke kuzo zonke siye kuNkulunkulu^c, sizimisela njalo sizama ukuhamba laye kuzo zonke indlela zemithetho yakhe^d.
   
3. 
   Lanxa uphenduko kungeke kwathenjelwa kuyo, njengenhlawulo loba yiphi yesono, kumbe loba yiphi imbangela yothethelelo lwaso^e, okungumsebenzi womusa wesihle kaNkulunkulu kuKristu^f; kube kanti udingeka kangaka kuzo zonke izoni, ukuthi kakho ongalindela uthethelelo ngaphandle kwayo^g.
   
4. 
   Njengoba kungelasono esincane kangaka ukuthi kasifanele ukulahlwa^h, ngokunjalo akulasono esikhulu kangaka ukuthi siyaletha ukulahlwa phezu kwalabo abaphenduka ngeqinisoⁱ.
   
5. 
   Abantu akufanelanga boneliswe yikuphenduka nje okwejwayelekileyo, kodwa kuyimfanelo yakhe wonke umuntu ukuthi azame ukuphenduka kuzo izono ezingezakhe uqobo ngasinye^k.
   
6. 
   Njengoba wonke umuntu kumele avume izono zakhe kuNkulunkulu ngasese, ethandazela ukuthethelelwa kwazo^l, emva kwalokhu, lokuziyekela, uzathola umusa^m; ngokunjalo lowo ohleba umzalwane wakhe, kumbe ibandla likaKristu, kufanele avume ngovumo ngasese kumbe obala, langosizi ngesono sakhe, abike ukuphenduka kwakhe kulabo aboniweyoⁿ, emva kwalokhu bona bafanele babuyisane laye, njalo bamemukele ngothando^o.
   

11. 16. Ngemisebenzi emihle

1. 
   Imisebenzi emihle iyileyo kuphela elaywe nguNkulunkulu eLizwini lakhe elingcwele^a, kayisileyo ethi ingelagunya lalo, ecetshwe ngabantu kuvela ekukhuthaleni okuyibuphofu, kumbe lakuphi ukuzenzisa kwenhloso enhle^b.
   
2. 
   Le imisebenzi emihle, isenziwa ngokulalela imithetho kaNkulunkulu, iyizithelo lobufakazi bokholo lweqiniso njalo oluphilayo^c; njalo ngaleyo abakholwayo babonisa ukubonga kwabo^d, beqinisa ukuqinisekiswa kwabo^e, besakha abazalwane babo^f, bececisa ukuvuma kwevangeli^g, bevala imilomo yezitha^h, njalo bedumisa uNkulunkuluⁱ, abangumsebenzi wakhe, bedalelwe leyo kuKristu uJesu^k, ukuze kuthi belezithelo kube yibungcwele, babe lesiphetho, impilo elaphakade^l.
   
3. 
   Amandla abo okwenza imisebenzi elungileyo ayisiwabo lakanye, kodwa ngokupheleleyo avela kuMoya kaKristu^m. Njalo ukuze babe lamandla kuyo, phezu kwalezozisa asebazemukelayo, kufuneka ukuthululwa uqobo kwalowoMoya oyiNgcwele, ukuze asebenze kibo ukuthanda lokwenza okwentando yakhe elungileyoⁿ; kube kanti akumelanga ngenxa yalokhu batshaphaze, ngokungathi kakumele ukuthi benze lawuphi umsebenzi wemfanelo, ngaphandle kokuthi beqhutshwa nguMoya ngokukhethekileyo; kodwa kufanele bakhuthale ekuvuseleleni umusa kaNkulunkulu okibo^o.
   
4. 
   Bona abathi ekulaleleni kwabo bafinyelele ekupheleleni kwengqonga elokufinyelelwa kule impilo, behluleka kangaka ukwenza imisebenzi elunge okwedlula lokho okuyimfanelo yabo, njalo lokwenza okwedlula lokho uNkulunkulu akufunayo, okokuthi basilela kokunengi abafanele ukukwenza ngemfanelo^p.
   
5. 
   Ngemisebenzi yethu engcono kakhulu singeke sifanele ukuxolelwa kwesono kumbe impilo elaphakade esandleni sikaNkulunkulu, ngenxa yokungalingani okuphakathi kwayo lodumo oluzayo, lommango ongelasiphelo ophakathi kwethu loNkulunkulu, okuthi ngayo kasimzuzisi kumbe ukwenelisa umlandu wezono zethu zamandulo^q; kodwa sesenze konke esingakwenza, senze kuphela imfanelo yethu, njalo siyizisebenzi ezingasizi lutho^r; njalo ngoba, njengoba ilungile, ivela kuMoya wakhe^s; njalo njengoba isenziwa yithi ingcolile futhi ixubene lobuthakathaka lokungapheleli okunengi kangaka, ukuthi ingeze yathwala ubukhali bokwahlulela kukaNkulunkulu^t.
   
6. 
   Kube kanti lanxa kunjalo, ubuntu bamakholwa busemukelwa ngoKristu, imisebenzi yawo elungileyo layo iyemukelwa kuye^v; kungesukuthi kule impilo emsulwa njalo engasoleki ngokupheleleyo ebusweni bukaNkulunkulu^w; kodwa yena ebakhangela eNdodaneni yakhe, uyathokoza ukwemukela lokuvuza lokho okuqotho, lanxa kuxubene lobuthakathaka lokungapheleli okunengi^x.
   
7. 
   Imisebenzi eyenziwa ngabantu abangazalwanga kutsha, lanxa yona ngokwayo ingaba yilezozinto ezilaywe nguNkulunkulu, njalo eluncedo kibo lakwabanye^y, kube kanti ngenxa yokuthi ingaphumi enhliziyweni ehlanjululwe ngokholo^z, kumbe isenziwa ngendlela elungileyo njengokweLizwi^a, kumbe ngenjongo eqondileyo, udumo lukaNkulunkulu^b, ngakho iyikona, njalo ingeke imthokozise uNkulunkulu, kumbe yenze umuntu afanele ukwemukela umusa kuNkulunkulu^c. Kube kanti ukuyiyekela kwabo kuyikona kakhulu njalo kuyacunula uNkulunkulu^d.