Uvumo Lokholo lweWestminster

4. Ngendalo

1. 
   Kwamthokozisa uNkulunkulu uYise, iNdodana loMoya oyiNgcwele^a, kube yikwembulwa kodumo lwamandla akhe aphakade, inhlakanipho, lokulunga^b, ekuqaleni, ukudala kumbe ukwenza emayeni umhlaba lazo zonke izinto ezikuwo, loba ezibonwayo kumbe ezingabonwayo, phakathi kwensuku eziyisithupha; zonke zaba zinhle kakhulu^c.
   
2. 
   Emva kokuthi uNkulunkulu esenzile zonke izidalwa, wadala umuntu, isilisa lesifazana^d, belemiphefumulo eqedisisayo njalo engafiyo^e, baphiwa ulwazi, ukulunga, lobungcwele obuqotho, njengokomfanekiso wakhe uqobo^f; belomthetho kaNkulunkulu ulotshwe ezinhliziyweni zabo^g, lamandla okuwugcwalisa^h; kube kanti kulokwenzakala ukuthi bawone, beyekelwe kunkululeko yentando zabo ezazingaphendukaⁱ. Ngaphandle kwalo umthetho olotshwe ezinhliziyweni zabo bemukela umlayo wokuthi bangadli okwesihlahla solwazi lokuhle lokubi, okwathi besawulondolozile bathokoza kubudlelwano babo loNkulunkulu^k, babebusa phezu kwezidalwa^l.
   

5. Ngokongamela

1. 
   UNkulunkulu umdali omkhulu wazo zonke izinto uziphethe^a, uyaziqondisa, uyazimisa, njalo ebusa zonke izidalwa, izenzo lezinto^b, kusukela kwezinkulu kuze kube kwezincane^c, ngokongamela kwakhe okuhlakaniphileyo lokungcwele okupheleleyo^d, njengokolwazi lwakhe lwangaphambili olungelamposiso^e, njalo ngecebo lentando yakhe ekhululekileyo lengaguqukiyo^f, kube ludumo lobukhosi bokuhlakanipha, amandla, ukuqonda, ukulunga lesihawu sakhe^g.
   
2. 
   Lanxa, mayelana lolwazi lwangaphambili lesimiso sikaNkululunkulu, imbangela yokuqala, zonke izinto ziyenzakala ngokungelakuguqulwa, langokungelamposiso^h; kube kanti, ngalokhokongamela, uyazilawula ukuthi zenzakale ngokwesimo sembangela zesibili, loba ngemfanelo, ngenkululeko kumbe ngesehlakalo esingalindelweⁱ.
   
3. 
   UNkulunkulu ngokongamela kwakhe okwejwayelekileyo usebenzisa izindlela^k, kube kanti ukhululekile ukusebenza ngaphandle kwazo^l, ngaphezulu^m, langokuphikisana lazo ngokwentando yakheⁿ.
   
4. 
   Amandla amakhulu, inhlakanipho engahlolekiyo, lokulunga okungelamkhawulo kukaNkulunkulu kuzibonakalisa ekongameleni kwakhe kuze kuyefika lekuweni kokuqala, lakuzo zonke ezinye izono zezingilosi lezabantu^o; njalo kungasingemvumo nje yodwa^p, kodwa enjalo kuxubene lesibopho esilokuhlakanipha lesilamandla apheleleyo^q, lokuzilawula lokuzibusa, ngendlela ezinengi ezehlukeneyo, esenzela ezakhe injongo ezingcwele^r; kube kanti ngokunjalo, ukuthi ukonakala kwazo kuvela esidalweni kuphela, hatshi kuNkulunkulu, okuthi yena, engcwele elungile ngokupheleleyo, angeke abe, njalo akusuye umqalisi kumbe umvumeli wesono^s.
   
5. 
   UNkulunkulu ohlakaniphileyo, olungileyo, lolomusa opheleleyo wandisa ukutshiya okwesikhathi abantwana bakhe kuzilingo ezinengi ezehlukeneyo, lokubola kwezinhliziyo zabo, ukuze abajezise ngenxa yezono zabo zamandulo, kumbe abatshengise amandla asithekileyo obubi lenkohliso yezinhliziyo zabo, ukuze bathotshiswe^t; futhi ebaphakamisela ekweyameni okusondele kakhulu njalonjalo phezu kwakhe ukuze basekelwe, futhi ukuze abenze bananzelele kakhulu kuzo zonke izibanga ezizayo zamathuba esono, lakwezinye injongo ezehlukeneyo eziqondileyo lezingcwele^u.
   
6. 
   Ngalabo abakhohlakeleyo abantu abangelaNkulunkulu, okuthi uNkulunkulu njengomahluleli oqondileyo uyabaphofuza njalo abenze lukhuni ngezono zamandulo^x; kagodli umusa wakhe kibo kuphela, okungawo babengakhanyiselwa ekuqedisiseni kwabo, njalo usetshenzwe enhliziyweni zabo^y, kodwa ngesinye isikhathi laye abemuke iziphiwo ababelazo^z, abembulele kulezozinto okuthi inkohlakalo yabo yenze amathuba esono^a, kanye lakho konke abesebanikela kunkanuko zabo, kuzilingo zelizwe, lemandleni kaSathane^b; ngalokho kwenzeke ukuthi bazenze lukhuni, langaphansi kwalezondlela uNkulunkulu azisebenzisa ekwenzeni buthakathaka abanye^c.
   
7. 
   Njengoba ukongamela kukaNkulunkulu ngokwejwayelekileyo kufinyelele kuzo zonke izidalwa, ngokunjalo ngendlela ekhethekileyo kakhulu kunanzelela ibandla lakhe, njalo kumisela zonke izinto okuhle kwalo^d.
   

1. 6. Ngokuwa komuntu, ngesono, langesijeziso saso

1. 
   Abazali bethu bakuqala, sebekhohliswe yibuqili lesilingo sikaSathane, bona, ekudleni isithelo esasinqatshelwe^a. Lesisono sabo, uNkulunkulu wathokoza, ngokwecebo lakhe lenhlakanipho lobungcwele, ukusivumela, esezimisele ukusihlela esenzela olwakhe udumo^b.
   
2. 
   Ngalesisono bawa kukulunga kwabo komdabuko lakubudlelwano loNkulunkulu^c, ngakho-ke baba ngabafileyo esonweni^d, basebengcola ngokupheleleyo kuzo zonke izitho leminombo yomphefumulo leyomzimba^e.
   
3. 
   Njengoba bona babeyimpande yoluntu lonke, icala lalesisono labalelwa^f, lalokhokufa esonweni lemvelo ebolisiweyo kunikelwa, kulo lonke usendo lwabo oludabuka kibo ngokuzalwa okwejwayelekileyo^g.
   
4. 
   Kulokhukubola komdabuko, okungakho senziwa singafuni ngokupheleleyo, sehluleke, njalo senziwe siphambane lokulunga konke^h, futhi ngokupheleleyo sikhothamele kubo bonke ububiⁱ, kulapho kudabuka zonke iziphambeko zezenzo^k.
   
5. 
   Lokhukubola kwemvelo, kule impilo, kuyasala kulabo abazalwa kutsha^l; njalo lanxa, ngoKristu, kuxolelwa, njalo kusenziwa kufe, kube kanti khona kanye lokuhugeka kwakho ngeqiniso langokwakho kuyisono^m.
   
6. 
   Sonke isono, zombili esomdabuko lesezenzo, siyisiphambeko kumthetho olungileyo kaNkulunkulu, njalo siphikisana lawoⁿ, ngokwemvelo yaso, silethe icala phezu kwesoni^o, okwenza sibotshelwe kulo ulaka lukaNkulunkulu^p, lesiqalekiso somthetho^q, langalokho senziwa saba ngaphansi kokufa^r, lensizi zakomoya^s, zesikhathi^t, lezephakadeni^u.