Uvumo Lokholo lweWestminster

25. Ngebandla

1. 
   Ibandla lelizwe lonke kumbe labo bonke abakholwayo, elingabonwayo, lenziwa linani lonke labakhethiweyo, labo ababekhona, abakhona, lalabo abazakuba khona, libuthelwa ndawonye ngaphansi kukaKristu oyinhloko yalo, njalo lingumakoti, umzimba, lokugcwala kwalowo ogcwalisa konke jikelele^a.
   
2. 
   Ibandla elibonwayo, lalo elingelelizwe lonke kumbe labo bonke abakholwayo ngaphansi kwevangeli (kalivalelwanga esizweni esisodwa njengakuqala ngaphansi komthetho), lenziwa yilabo bonke elizweni jikelele abavuma ukholo lweqiniso^b, kanye labantwana babo^c, njalo lingumbuso weNkosi uJesu Kristu^d, indlu losapho lukaNkulunkulu^e, ngaphandle kwalo akwenzeki ukusindiswa ngendlela eyejwayelekileyo^f.
   
3. 
   Kulelibandla lelizwe lonke elibonwayo, uKristu unike ukutshunyayelwa, iLizwi, lezimiso zikaNkulunkulu, kusenzelwa ukubuthelelwa lokupheleliswa kwabangcwele, kule impilo, kuze kube sekupheleni komhlaba; njalo ngobukhona langoMoya wakhe, ngokwesithembiso sakhe, akwenze kuphumelelele lokhu^g.
   
4. 
   Lelibandla lelizwe lonke lalibonakale kakhulu kwesinye isikhathi langesinye isikhathi kancane^h. Njalo amabandla, elinye lelinye, angamalungu alo, acengekile kakhulu kumbe kancane, kusiya ngemfundiso zevangeli ezifundiswayo labazemukelayo, izimiso ezenziwayo, njalo inkonzo ezisobala ezenziwayo zicengekile kakhulu kumbe kancane kuwoⁱ.
   
5. 
   Amabandla acengeke kakhulu okwedlula amanye ngaphansi kwezulu angaba lokuxubana lempambaniso^k, njalo amanye asawa kangaka okokuthi kawasemabandla kaKristu, kodwa amasinagoge kaSathane^l. Lanxa kunjalo kuzahlala kulebandla emhlabeni lokukhonza uNkulunkulu ngokwentando yakhe^m.
   
6. 
   Kayikho enye inhloko yebandla ngaphandle kweNkosi uJesu Kristuⁿ. Ngitsho laye uPapa weRoma langayiphi ingqondo angeke abe yinhloko yalo: kodwa ungulowoMphikukristu, leyondoda yesono, lendodana yokubhujiswa, yena oziphakamisayo, ebandleni, emelana loKristu lakho konke okubizwa ngokuthi nguNkulunkulu^o.
   

20. 26. Ngobudlelwano babangcwele

1. 
   Bonke abangcwele, abahlanganiswe loJesu Kristu iNhloko yabo, ngoMoya wakhe, langokholo, balobudlelwano laye emuseni wakhe, enhluphekweni, ekufeni, ekuvukeni lakudumo^a: njalo, behlanganyela omunye komunye ngothando, balobudlelwano kuziphiwo zomunye lomunye lezisa^b, njalo kumele benze imfanelo ezinje, obala langasese, ezidonsela kukulunga komunye lomunye wabo, kokubili emuntwini wangaphakathi lowangaphandle^c.
   
2. 
   Abangcwele ngovumo bamele balondoloze uzwano lobudlelwano obungcwele ekukhonzeni uNkulunkulu, lekuphatheni kwabo izinkonzo zomoya ezidonsela ekwakhaneni kwabo^d: njalo lasekusizaneni ezintweni zangaphandle ngalokho abalamandla okukwenza labakuswelayo okwehlukeneyo. Lobobudlelwano, nxa uNkulunkulu enika ithuba, kumele belulelwe kibo bonke labo abathi kuzo zonke indawo babize ibizo leNkosi uJesu^e.
   
3. 
   Lobubudlelwano abangcwele abalabo loKristu, kabubenzi langaziphi indlela abahlanganyeli bobuNkulunkulu bakhe uqobo; kumbe ukuthi balingane loKristu langayiphi indlela; ukuqinisa okunye kwalokho kuyikuxhwala njalo kuyinhlamba^f. Futhi ubudlelwano babo omunye lomunye njengabangcwele, kabususi kumbe kabudilizi ilungelo lobunini umuntu ngamunye alabo ngempahla lemfuyo yakhe^g.
   

21. 27. Ngamasakramente

1. 
   Amasakramente ayiziboniso lempawu ezingcwele zesivumelwano somusa^a, amiswa nguNkulunkulu^b ngokwakhe, ukumela uKristu lenzuzo zakhe, njalo ukuqinisa ubudlelwano bethu laye^c, njalo ukubeka umehluko obonakalayo phakathi kwalabo abasebandleni labanye belizwe^d; njalo ukubangenisa ngokunzulu emsebenzini kaNkulunkulu kuKristu, ngokweLizwi lakhe^e.
   
2. 
   Kukhona, esakramenteni ngalinye, ukuhlangana komoya, kumbe ubunye besakramente, phakathi kwezitshengiselo lolutho olutshengiswayo; ngenxa yalokhu kwenzeka ukuthi amabizo lezilandelamuva zokunye zibalelwe kokunye^f.
   
3. 
   Umusa otshengiswa kuwo kumbe ngawo amasakramente, usetshenziswa ngokufaneleyo, kawunikwa langawaphi amandla akuwo, njalo amandla esakramente aweyami phezu kokulunga kumbe injongo yalowo oliphayo^g, kodwa phezu komsebenzi kaMoya^h, lelizwi lesimiso, elimumethe, kanye lomthetho olegunya lokulisebenzisa, isithembiso senzuzo kubo abalemukela ngokufaneleyoⁱ.
   
4. 
   Kulamasakramente amabili kuphela amiswa nguKristu iNkosi yethu evangelini, okuyikuthi, ubhabhathizo, lesidlo seNkosi; akumele ukuthi lalinye lawo liphiwe languwuphi ngaphandle komfundisi weLizwi omiswe ngokomthetho^k.
   
5. 
   Amasakramente eThestamente eLidala, mayelana lezinto zomoya ezitshengiswayo njalo kubonakaliswa ngawo, ayefanana lalawo aweLitsha ngoqobo^l.
   

22. 28. Ngobhabhathizo

1. 
   Ubhabhathizo lulisakramente leThestamente eLitsha, elamiswa nguJesu Kristu^a, kungayisikho kuphela ukuthi lowo obhabhathizwayo ungeniswa ngokunzulu ebandleni elisobala^b, kodwa njalo ukuze kube kuye yisitshengiselo lophawu lwesivumelwano somusa^c, lokugxunyekwa kwakhe kuKristu^d, lokuzalwa kutsha^e, lokuthethelelwa kwezono^f, njalo lokuzinikela kwakhe kuNkulunkulu ngoJesu Kristu, ukuze ahambe ebutsheni bempilo^g. Lelisakramente, ngokumiswa okungokukaKristu, limele liqhubeke ebandleni lakhe kuze kube sekupheleni komhlaba^h.
   
2. 
   Ulutho lwangaphandle olufanele lusetshenziswe kulelisakramente ngamanzi, umuntu abhabhathizwa ngawo, ebizweni likaYise, leleNdodana, lelikaMoya oyiNgcwele, ngumfundisi wevangeli, obizelwe kukho ngokusemthethweniⁱ.
   
3. 
   Ukutshonisa umuntu emanzini akusweleki; kodwa ubhabhathizo lunikwa ngokuqondileyo ngokuthela kumbe ukufafaza amanzi phezu komuntu^k.
   
4. 
   Kungeyisibo labo kuphela abathi ngeqiniso bavume ukholo kuye lokulalela uKristu^l, kodwa lazo izinsane zomzali oyedwa okholwayo kumbe bobabili abakholwayo zimele zibhabhathizwe^m.
   
5. 
   Lanxa kuyisono esikhulu ukudelela kumbe ukuyekela lesisimisoⁿ, kube kanti umusa losindiso akunamathelanga ngokungehlukanisekiyo kangaka laso, ukuthi kungabikho umuntu ongazalwa kutsha kumbe asindiswe ngaphandle kwaso^o; kumbe, ukuthi bonke ababhabhathizwayo bazelwe ngokutsha ngokungathandabuzekiyo^p.
   
6. 
   Amandla obhabhathizo kawabotshelwa kuwo umzuzu wesikhathi olwenziwa ngaso^q; kube kanti lanxa kunjalo ngokusetshenziswa okuqondileyo kwalesisimiso, umusa othenjisiweyo kawubekwanga kuphela, kodwa uyabonakaliswa njalo uphiwe ngeqiniso nguMoya oyiNgcwele, kulabo (loba bebadala kumbe bezinsane) lowomusa ongowabo, ngokwecebo lentando kaNkulunkulu ngesikhathi sakhe asimisileyo^r.
   
7. 
   Isakramente lobhabhathizo lenziwa kanye kuphela lakuwuphi umuntu^s.