Uvumo Lokholo lweWestminster

29. Ngesidlo seNkosi

1. 
   INkosi yethu uJesu, ngalobobusuku anikelwa ngabo, wamisa isakramente lomzimba legazi lakhe, elabizwa ngokuthi yisidlo seNkosi, ukuthi lilondolozwe ebandleni lakhe, kuze kube sekupheleni komhlaba, kusenzelwa isikhumbuzo esingapheliyo sokuzinikela kwakhe ekufeni kwakhe; ukuphawulwa kwenzuzo zonke ezivela kulo zisiya kumakholwa eqiniso, ukondliwa kwabo okomoya lokukhula kuye, ukuqhubeka kwabo ngomsebenzi emfanelweni zonke abalomlandu kuye ngazo; lokuba yisibopho lesibambiso sobudlelwano babo laye, njalo lakomunye lomunye, njengamalunga omzimba wakhe oyimfihlakalo^a.
   
2. 
   Kulelisakramente, uKristu kanikelwa kuYise; futhi kakulamhlatshelo uqobo ngitsho lakanye owenzelwa ukuthethelelwa kwezono zabaphilayo kumbe abafileyo^b, kodwa kuphela kuyisikhumbuzo salokhokuzinikela kwakhe kanye, ngaye ngokwakhe, esiphambanweni, kanye kuphela; njalo kungumnikelo womoya wokunathwa walo lonke udumo kuNkulunkulu olungenziwa^c; ngakho lowomnikelo waboPapa wemisa (njengokukubiza kwabo) kuyalimaza ngokwenyanyeka okupheleleyo umnikelo omunye kuphela kaKristu, oyiwo kuphela inhlawulo yokuthula yezono zonke zabakhethiweyo bakhe^d.
   
3. 
   INkosi uJesu kulesisimiso umisile abafundisi bakhe ukuthi batshumayele ilizwi lakhe lesimiso ebantwini, bathandaze, babusise izibonelelo zesinkwa lewayini, ngalokho bekususa kumsebenzi ojwayelekileyo bekusa kulowo ongcwele; njalo bathathe bahlephune isinkwa, bathathe inkezo, (labo behlanganyela kulokho) banike kokubili abemukeli^e; kodwa benganiki lamunye ongekho ebandleni mhlalokho^f.
   
4. 
   Imisa yangasese, kumbe ukwemukela lelisakramente ngumpristi kumbe lamunye eyedwa^g, njalo lokuncitsha abantu^h inkezo, ukukhonza izibonelelo, ukuziphakamisa kumbe ukuzithwala ubhoda lazo ukuze zikhonzwe, lokuzilondolozela lawuphi umsebenzi wokuzenzisa wokholo; konke lokhu kuphambene lemvelo yalelisakramente lesimiso sikaKristuⁱ.
   
5. 
   Izibonelelo ezangaphandle zalelisakramente, ezehlukaniselwe ngokufaneleyo imisebenzi eyamiswa nguKristu, zilobudlelwano laye ebethelwe ngokunjalo, ukuthi, eseqinisweni, kube kanti ngendlela yesakramente kuphela, ziyake zibizwe ngebizo lezinto ezizimeleyo, okutsho, umzimba legazi likaKristu^k; kube kanti entweni uqobo lwayo lemvelweni zisala lokhu ziyisinkwa lewayini ngoqotho kuphela, njengoba bezivele zinjalo^l.
   
6. 
   Leyomfundiso ebambelela kukuguqulwa kwento uqobo lwesinkwa lewayini kube yinto uqobo lomzimba legazi likaKristu (okubizwa ngokwejwayelekileyo kuthiwe yikuguqulwa kwesimo sento sibe yisimo sento enye) ngokwehlukaniswa ngumpristi, kumbe langayiphi enye indlela, kuyenyanyeka hatshi emibhalweni kuphela, kodwa lekucabangeni kuhle lengqondo; kudiliza imvelo yesakramente, njalo sekube yimbangela njalo kuyimbangela yenkolelo ezinengi, yebo yokukhonza izithombe okwesabekayo^m.
   
7. 
   Abemukeli abafaneleyo, abahlanganyela ngokwangaphandle izitshengiselo ezibonakalayo kulelisakramenteⁿ, kuthi njalo, ngokwangaphakathi ngokholo, ngeqiniso isibili, kube kanti hayi ngokwenyama kumbe ngomzimba, kodwa ngokwasemoyeni, bayemukela badle uKristu ebethelwe, lazo zonke inzuzo zokufa kwakhe; umzimba legazi likaKristu, ngalesosikhathi, kukhona, hatshi ngokomzimba kumbe ngokwenyama, kiso, laso, kumbe ngaphansi kwesinkwa lewayini; kube kanti, ngokweqiniso, kodwa ngokwasemoyeni, kukhona kukholo lwamakholwa kulesosimiso, njengoba izibonelelo ngokwazo zikhona ekuzweni kwawo kwangaphandle^o.
   
8. 
   Lanxa abantu abangaziyo labakhohlakeleyo besemukela izibonelelo zangaphandle zalelisakramente, kube kanti abemukeli lokhu okumelwe yilezizinto; kodwa ngokuza kwabo lapha okungafanele, balecala lomzimba legazi leNkosi kube sekugwetshweni kwabo. Ngakho, bonke abantu abangaziyo abangesabi uNkulunkulu, njengoba bengafanele ukujabulela ubudlelwano laye, ngokunjalo kabafanele isithebe seNkosi, njalo bangeke, ngaphandle kwesono esikhulu esimelene loKristu besesenjalo, bahlanganyele lalezimfihlakalo ezingcwele^p, kumbe bangengiswe kuso^q.
   

24. 30. Ngezijeziso zebandla

1. 
   Inkosi uJesu, njengeNkosi lenhloko yebandla lakhe, umisile ubukhokheli kulo, ezandleni zabaphathi bebandla, kwehlukene lomantshi welizwe^a.
   
2. 
   Kulababaphathi izihluthulelo zombuso wezulu zinikelwe; ngenxa yalokhu balamandla akho kokubili ukubamba lokuthethelela izono; ukuvalela abangaphendukanga lowombuso, ngeLizwi kanye lezijeziso; lokuwuvulela izoni eziphendukayo, ngokutshunyayelwa kwevangeli, langokwesulwa kwezijeziso, nxa kuyimfanelo yalelothuba^b.
   
3. 
   Izijeziso zebandla zifanele, ukuze kubuyiswe kumbe kuzuzwe abazalwane abonayo, lokwesabisa abanye ukuze bangenzi amacala afananayo, lokukhipha leyomvubelo engathelela isigaqa sonke umkhuhlane, lokulwela udumo lukaKristu, lovumo olungcwele lwevangeli, lokuvimbela ulaka lukaNkulunkulu, okungathi ngokusemthethweni luwele phezu kwebandla, nxa bengavumela ukuthi isivumelwano sakhe lempawu zaso zingcoliswe yizoni ezaziwayo leziyiziqholo^c.
   
4. 
   Ukuze kuzuzakale lezinjongo ngcono, abaphathi bebandla kufanele baqhubeke ngokukhuza; ukumisa kusakramente lesidlo seNkosi okwesikhathi; lokuxotsha ebandleni; kusiya ngesimo secala langokufanele izenzo zomuntu ezimbi^d.
   

25. 31. Ngamasinodi lemibuthano

1. 
   Kusenzelwa ubukhokheli obungcono, lokwengezwa ukwakhiwa kwebandla, kufanele kube lemihlangano enje ebizwa ngokwejwayelekileyo ngokuthi ngamasinodi kumbe imibuthano^a.
   
2. 
   Njengoba omantshi belizwe ngokusemthethweni bangabiza isinodi yabafundisi, labanye abantu abafaneleyo, ukubuzana lokucebisana labo, mayelana lendaba zokholo^b; ngokunjalo, nxa omantshi belizwe beyizitha zebandla ezisobala, abafundisi bakaKristu ngokwabo, ngegunya lesikhundla sabo, kumbe bona labanye abantu abafaneleyo abayizithunywa zamabandla abo, bangahlangana ndawonye emihlanganweni enje^c.
   
3. 
   Kusemandleni amasinodi lemibuthano, njengezisebenzi ukuze baqume impikisano zokholo njalo lendaba zesazela; bamise imilayo leziqondiso ukuze balungise ngcono inkonzo esobala kaNkulunkulu lokubuswa kwebandla lakhe, ukwemukela izikhalazo ezindabeni zempatho engafanelanga, njalo ngegunya bamise khona lokho. Lezizimiso lezinqumo nxa zivumelana leLizwi likaNkulunkulu, kufanele zemukelwe ngokuhlonipha langokuthobeka; kungangenxa yokuvumelana nje leLizwi, kodwa langenxa yamandla ezenziwe ngawo, njengesimiso sikaNkulunkulu esimiselwe khonokho eLizwini lakhe^d.
   
4. 
   Wonke amasinodi kumbe imibuthano, kusukela esikhathini sabaphostoli, jikelele kumbe ngokukhethekileyo, kungaphambanisa; njalo okunengi sekwaphambanisa. Ngakho akumele kwenziwe umthetho wokholo kumbe wengqubo; kodwa kufanele kusetshenziswe njengoncedo kukho kokubili^e.
   
5. 
   Amasinodi lemibuthano kakumele kuphathe kumbe kuphethe ulutho, ngaphandle kwalokho okungokwebandla, njalo kakumele kungenele endabeni zelizwe ezilokwenza lombuso, ngaphandle kokuthi kukwenze ngesicelo esithobekileyo, endabeni ezingejwayelekanga, loba ngendlela yokucebisa, ngokoneliswa kwesazela, nxa bebizelwe kukho ngumantshi welizwe^f.