Taarifa ya tume ya taifa ya uchaguzi kuhusu uchaguzi wa rais, wabunge na

1. 
   (i) Kituo kitafunguliwa saa 1.00 Asubuhi hadi saa 10.00 jioni. Hata hivyo yeyote atakayekuwepo wakati wa kufunga kituo saa 10.00 ataruhusiwa Kupiga Kura.
   
   2. 
      Mpiga Kura akumbuke kubeba Kadi yake ya kupigia Kura. Bila Kadi ya Kupiga Kura hataruhusiwa Kupiga Kura.
      
   3. 
      Akifika kituoni atapokelewa na Karani Mwongozaji ambaye atamsadidia kutafuta jina lake na kumwelekeza Kituo cha Kupiga Kura iwapo eneo hilo lina zaidi ya Kituo kimoja.
      
   4. 
      Atakapofika kwenye Kituo atawajibika kujipanga kwenye mstari. Hata hivyo wagonjwa, wanaoishi na ulemavu wa aina mbalimbali, wanawake wajawazito na wanaonyonyesha na wazee hawatatakiwa kujipanga kwenye mstari.
      
   5. 
      Wakati wote wa Upigaji na Uhesabuji Kura, Mawakala wa Vyama vya Siasa wawepo kwenye Vituo. Wajibu wao ni kulinda maslahi ya Vyama vyao na Wagombea. Hata hivyo hawatakiwi kuingilia masuala ya utendaji ambayo yamekabidhiwa Msimamizi wa Kituo. Iwapo wataona hitilafu yoyote na kushindwa kupata maelekezo ya kutosha kutoka kwa Msimamizi wa Kituo wataomba fomu maalum iliyotolewa na Tume kueleza malalamiko yao.
      
   6. 
      Kura zitahesabiwa katika kituo cha Kupigia Kura mara tu upigaji Kura utakapomalizika.
      
   7. 
      Baada ya Kura kuhesabiwa, matokeo yatajazwa kwenye Fomu maalum ambazo zitatiwa saini na Msimamizi wa Kituo na Mawakala. Kila Wakala atapewa nakala ya Fomu ya Matokeo na nakala nyingine itawekwa mahali pa wazi nje ya Kituo.
      
   8. 
      Msimamizi wa Kituo atapeleka fomu ya matokeo na vifaa vingine vilivyotumika kwenye zoezi la Upigaji Kura kwa Msimamizi wa Uchaguzi Mawakala wa Vyama wataruhusiwa kusindikiza msafara wa kupelekea matokeo hayo kwenda kwa Msimamizi wa Uchaguzi/Msimamizi Msaidizi.
      
   9. 
      Matokeo yote yakishapokelewa na Msimamizi wa Uchaguzi, kwa upande wa Uchaguzi wa Rais na Wabunge au na Msimamizi Msaidizi wa Uchaguzi kwa upande wa Uchaguzi wa Udiwani hujumlishwa mbele ya Mawakala na wote wanaoruhusiwa kuingia kwenye Vituo vya kujumlishia Kura.
      
   10. 
       Kama ilivyokuwa wakati wa kuhesabu Kura, baada ya ujumlishaji kukamilika, yatatiwa saini na Msimamizi wa Uchaguzi na Mawakala watakaokuwepo. Mawakala watapewa Nakala ya Matokeo na Nakala moja itawekwa mahali pa wazi nje ya Kituo cha ujumlishaji.
       
   11. 
       Matokeo ya Uchaguzi wa Bunge yatatangazwa na Msimamizi wa Uchaguzi wakati yale ya Uchaguzi wa Diwani yatatangazwa na Msimamizi Msaidizi wa Uchaguzi ngazi ya Kata. Matokeo ya Uchaguzi wa Rais yatatumwa Tume ya Taifa ya Uchaguzi ambayo nayo itayahakiki na kuyatangaza kama inavyoyapokea. Baada ya kupokea matokeo yote Tume itakaa pamoja na Mawakala na kuyajumlisha na hatimaye kutangaza Mshindi.
       

2. 
   Tume inapenda kusisitiza mambo muhimu yafuatayo:
   

1. 
   Vyama vyote vya Siasa vinavyoshiriki katika Uchaguzi Mkuu vinatakiwa kuhakikisha kwamba vinaweka Mawakala wake kwa Vituo vyote vya Kupigia Kura na kujumlisha Kura.
   
2. 
   Mawakala wa Vyama vya Siasa watatakiwa kuzingatia Sheria, Kanuni na taratibu zilizowekwa.
   
3. 
   Mara baada ya Kupiga Kura na kwa kuzingatia Maadili ya Uchaguzi Wapiga Kura wanatakiwa kuondoka vituoni na kurejea nyumbani. Kwa kuwa Vyama vya Siasa vitakuwa vimeweka Mawakala wake ambao watalinda maslahi ya Vyama husika na Wagombea wao.
   
4. 
   Mpiga Kura atapiga Kura kwenye Kituo chake alichojiandikisha au alichopangiwa na Tume ya Taifa ya Uchaguzi.
   
5. 
   Watu waliotajwa kwenye Sheria ndiyo pekee wanaoruhusiwa kuingia kwenye Vituo vya Kupigia Kura au Vituo vya kuhesabia Kura.
   
6. 
   Wapiga Kura wanaoishi na Ulemavu wa kutoona lakini wana Elimu ya Braille watapewa fursa ya kutumia kifaa cha “Tractile Ballot Folder” wale ambao hawawezi kukitumia kifaa hicho wataruhusiwa kuja kituoni na watu wanayemchagua wenyewe. Mtu mmoja anaweza kumsaidia mpiga Kura mmoja tu labda kama wapo Wapiga Kura zaidi ya mmoja kutoka katika familia moja.
   
7. 
   Inakatazwa kuvaa Sare za Chama kwenye Vituo au kuendesha Kampeni yoyote siku ya Uchaguzi.
   
8. 
   Tume itahakikisha kuwa hakuna Mpiga Kura atakayepiga Kura zaidi ya mara moja.
   
9. 
   Tume inapenda kusahihisha taarifa potofu zinazotolewa na baadhi ya Wadau wa Uchaguzi kwamba, Mpiga Kura ambaye yuko mbali na Kituo alichojiandikisha anaweza Kupiga Kura ya Uchaguzi wa Rais. Hii siyo kweli kwani ili mtu aweze Kupiga Kura ni lazima awemo kwenye Daftari la Wapiga Kura la Kituo husika. Hii ni kwa mujibu wa Sheria za Uchaguzi ambapo hata Tume haiwezi kutoa msimamo mwingine kinyume na Sheria.
   
10. 
    Wapiga Kura ambao watakuwa na Kadi zao za Kupigia Kura ila namba za Kadi hizo zikawa zinatofautiana na Namba yake katika Daftari wataruhusiwa Kupiga Kura.
    
11. 
    Aidha Wapiga Kura ambao taarifa zao zilizoko kwenye Daftari ni sawa na zile zilizopo kwenye Kadi zao ila tu kwamba picha zao hazipo kwenye Daftari nao vile vile wataruhusiwa Kupiga Kura.
    
12. 
    Upigaji Kura ni wa siri, hivyo kila mtu apige Kura yake kwa siri na mtu asishawishiwe na mtu yeyote kueleza nani amempigia Kura. KURA YAKO NI SIRI YAKO.
    
13. 
    Ni marufuku na ni kosa la Jinai kumkataza mtu kwenda Kupiga Kura.
    
14. 
    Tume ya Taifa pekee ndiyo yenye Mamlaka ya kutangaza Mshindi katika Uchaguzi wa Rais na kwa upande wa Uchaguzi wa Wabunge mwenye Mamlaka ya kutangaza Mshindi ni Msimamizi wa Uchaguzi. Kwa upande wa Uchaguzi wa Madiwani mwenye mamlaka ya kufanya hivyo ni Msimamizi Msaidizi wa Kata.
    
15. 
    Tume inapenda kuwahakikishai Wananchi kwamba kutakuwa na Ulinzi wa kutosha katika Vituo vya Kupigia Kura.
    

Kwa kumalizia, Tume inawasihi tena Wapiga Kura wote nchini kujitokeza kwa wingi Kupiga Kura ili kuwachagua Viongozi wao. KUMBUKA KUPIGA KURA NI HAKI YAKO YA MSINGI.

(Mst. Jaji Lewis M. Makame)

Mwenyekiti