Ana səhifə

Press-reliZ 23 aprel 2009-cu IL Bakı, Azərbaycan


Yüklə 23 Kb.
tarix26.06.2016
ölçüsü23 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ

23 aprel 2009-cu il

Bakı, Azərbaycan


  • ELAN!

  • MƏMMƏD ƏHMƏDOĞLU MƏTBUAT ŞURASININ TƏKZİB VERMƏSİNİ İSTƏYİR

  • PEN-KLUB” UN ÜZVLƏRİ MİRZƏ SAKİT VƏ HƏBSDƏ OLAN İKİ JURNALİSTİN AİLƏ ÜZVLƏRİ İLƏ GÖRÜŞÜBLƏR

  • EMİN HÜSEYNOVUN MƏHKƏMƏSİDƏ ŞAHİDLƏR DİNLƏNİLDİ



ELAN!
SABAH (24 APREL) SAAT 12:00-da Reportyorların Azadlıq və Təhlükəsizlik İnstitutunun mətbuat mərkəzində vətəndaş Səyyarə Heydərova öz barəsində Suraxanı rayon Məhkəməsində çıxarılmış qərarla bağlı mətbuat konfransı keçirəcək.

Tədbirə KİV rəhbərləri, jurnalistlər, hüquq müdafiəçiləri, diplomatik korpusların nümayəndələri və digər maraqlanan şəxslər də dəvətlidirlər.


MƏMMƏD ƏHMƏDOĞLU MƏTBUAT ŞURASININ TƏKZİB VERMƏSİNİ İSTƏYİR
Bu gün (23 aprel) Reportyorların Azadlıq və Təhlükəsizlik İnstitutunun (RATİ) mətbuat mərkəzində “Korrupsiya və Cəmiyyət ” jurnalın baş redaktoru Məmməd Əhmədoğlu "Mətbuat Şurası “Korrupsiya və Cəmiyyət” jurnalını şantaj edən R. Quliyev dəstəsinin üzvü olan şəxsin sifarişini yerinə yetirdi " mövzusunda mətbuat konfransı keçirib.

Tədbirdə çıxış edən “Korrupsiya və Cəmiyyət” jurnalının baş redaktoru Məmməd Əhmədoğlu Mətbuat Şurasının (MŞ) media reketliyi ilə mübarizə komissiyasının sədri Vüqar Rəhimzadə APA İnformasiya Agentliyinə reket qəzetlərin siyahısını açıqladıqdan sonra, Mətbuat Şurasına getdiyini bildirdi. MŞ-də isə ona bildiriblər ki, jurnal təşkilata daxil olan məktublar əsasında reketlər siyahısına daxil edilib: ”Mətbuat Şurası heç bir araşdırma aparmadan “Korrupsiya və Cəmiyyət” jurnalını özlərinin məsuliyyətsiz və əsassız qərarları ilə qara siyahıya daxil etdiklərinə görə bu komissiyanı məhkum edib tələb edirəm ki, komissiya üzvləri 24 saat ərzində APA vasitəsi ilə təkzib versinlər. Əks təqdirdə məhkəmə vasitəsilə mənəvi zərərin ödənməsi tələbini qoyacağam”.

Həmçinin M. Əhmədoğlu bildirib ki, Mətbuat Şurasına daxil olan yalan və böhtan xarakterli məktublar onu və jurnalını şantaj edən Ağakərim Əliyev və Əhmədli Muxtar adlı şəxslərin sifarişi əsasında yazılıb.

"Korrupsiya və Cəmiyyət " jurnalının baş redaktor müavini Mübariz Məsimoğlu öz çıxışında bildirdi ki, Mətbuat Şurası araşdırma aparmadan və məhkəmənin hökmü olmadan heç bir mətbu orqanı reket adlandıra bilməz.

Foto: http://www.irfs.az/component/option,com_datsogallery/Itemid,30/func,viewcategory/catid,232/lang,az/
PEN-KLUB” UN ÜZVLƏRİ MİRZƏ SAKİT VƏ HƏBSDƏ OLAN İKİ JURNALİSTİN AİLƏ ÜZVLƏRİ İLƏ GÖRÜŞÜBLƏR
Aprel ayının 21-də “Pen-klub” beynəlxalq təşkilatının nümayəndələri, Qrinviç Universitetinin dekanı, həmçinin klubun məhbəsdə olan yazıçıların müdafiəsi komitəsinin üzvü Alev Adil və klubun digər üzvü Eva Hoffman “Azadlıq” qəzetinin baş redaktoru Qənimət Zahidin (Zahidov) həyat yoldaşı Ayəndə Mürsəliyeva ilə görüşüblər. Bu barədə Reportyorların Azadlıq və Təhlükəsizlik İnstitutuna (RATİ) məlumat verən A. Mürsəliyevanın sözlərinə görə, təşkilat üzvləri Q. Zahidin həbsi, saxlanma şəraiti ilə maraqlanıb, baş redaktorun məhv edilmiş əlyazmaları ilə bağlı suallar veriblər. A. Mürsəliyeva təşkilat nümayəndələrindən beynəlxalq təşkilat olaraq öz təsir etmə imkanlarından istifadə etməklə Q. Zahidin işinə Avropa məhkəməsində prioritet qaydada baxılmasına yardım etmələrini xahiş edib. “Pen-klub” nümayəndələri isə öz növbəsində buna çalışacaqlarını söz veriblər.

Təşkilatın nümayəndələri həmçinin “Azadlıq” qəzetinin əməkdaşı, satirik yazar Mirzə Sakitlə (Sakit Zahidov) də görüşüblər. İlk öncə jurnalisti həbsdən azad olunması münasibəti ilə təbrik edən təşkilat üzvləri, daha sonra onun yaradıcılıq planlarının nədən ibarət olduğu barədə maraqlanıblar. M. Sakitin RATİ-ə bildirib ki, həbsinin sifarişli olması, 14 saylı cəzaçəkmə müəssisəsində ona qarşı yol verilən qanunsuzluqlar barədə təşkilat üzvlərinə ətraflı məlumat verib.

Dünən isə (22 aprel) “Pen-klub” un üzvləri, “Gündəlik Azərbaycan” və “Realnıy Azerbaydjan” qəzetlərinin həbsdə olan baş redaktoru Eynulla Fətullayevin ailəsinə baş çəkiblər. Bu barədə RATİ-ə məlumat verən baş redaktorun atası Emin Fətullayevin sözlərinə görə, klub üzvləri Eynulla Fətullayevin vəziyyəti, saxlanma şəraiti, eyni zamanda Azərbaycan mətbuatın hazırkı vəziyyəti, ölkədə jurnalistlərə qarşı olan təzyiqlərlə maraqlanıblar. Görüş zamanı baş redaktorun ailəsi ilə birgə “Gündəlik Azərbaycan” qəzetinin şef redaktoru Şahvələd Çobanoğlu və qəzetin əməkdaşları olan Natiq Cavadlı və Elşən Balaxanlı da iştirak ediblər. Hər üç jurnalist “Gündəlik Azərbaycan” və “Realnıy Azerbaydjan” qəzetlərinin yaranması, fəaliyyəti və bağlanması barədə qonaqların məlumatlandırıblar.

Emin Fətullayev oğlunu “Pen-klub”a fəxri üzvü seçdiklərinə görə, klub üzvlərinə təşəkkürünü bildirib. Beynəlxalq amnistiya təşkilatından Eynulla Fətullayevə ünvanlanan 12 mindən artıq məktub və açıqcaları qonaqlara təqdim edən Emin Fətullayev, Nyu Yorkda yerləşən “Jurnalistlərin Müdafiə Komitəsi”nin (CPJ) Cənub Qafqaz və Asiya üzrə koordinatoru Nina Oqnyanova və “Sərhədsiz Reportyorlar” Birliyinin rəhbəri Elza Vidal onların ailəsinə göstərdikləri maddi və mənəvi dəstəyi barədə məlumat verib. Həmçinin atası baş redaktorun vaxtilə yazdığı 4 kitabı qonaqlara hədiyyə edib. E. Fətullayevin sözlərinə görə, klub üzvləri baş redaktora və onun ailəsinə necə yardım etməkləri barədə suallar veriblər.

“Pen-klubun” Azərbaycandakı şöbəsinin prezidenti Maqsud İbrahimbəyov və vitse-prezidenti Çingiz Abdullayevlə görüşdüyün deyən Emin Fətullayev bildirdi ki, baş redaktorun “Pen-klub”a fəxri üzv seçilməsindən və baş redaktora xarici dövlətlərdən yüzlərlə dəstək məktublarının gəlməsindən Ç. Abdullayevin xəbəri olmayıb. Bundan təəssüf hissi keçirdiyini qeyd edən Emin Fətullayev bütün bu məsələləri qonaqların nəzərinə çatdırıb.
EMİN HÜSEYNOVUN MƏHKƏMƏSİDƏ ŞAHİDLƏR DİNLƏNİLDİ
Bu gün (23 aprel) Nəsimi rayon Məhkəməsində hakim İkram Şirinovun sədrliyi ilə Reportyorların Azadlıq və Təhlükəsizlik İnstitutunun (RATİ) sədri Emin Hüseynovun polis təzyiqinə məruz qalması ilə bağlı Daxili İşlər Nazirliyinə, Nəsimi Rayon Polis İdarəsinə (RPİ) və Nəsimi Rayon Polis İdarəsinin 22-ci polis bölməsinə qarşı qaldırdığı iddia üzrə məhkəmə prosesi keçirilib. Prosesdə iddiaçı E. Hüseynov və onun səlahiyyətli nümayəndəsi – “Media Hüququ İnstitutu” nun vəkili Elçin Sadıqov, cavabdeh tərəflərdən isə Nəsimi RPİ-nin 22-ci Polis bölməsinin vəkili Məzahir Şahbarov iştirak edirdi.

Bu günkü prosesdə cavabdeh tərəfin məhkəməyə təqdim etdiyi şahidlər - Nəsimi RPİ-nin 22-ci polis bölməsinin tədqiqatçısı Yunus Əbdinov, bölmənin sahə müvəkkili Rafiq Əliyev və məhkəmə tibbi eksperti Ceyhun Allahverdiyev məhkəmə qarşısında baş vermiş hadisə ilə bağlı ifadə veriblər.

Y. Əbdinov öz ifadəsində bildirib ki, baş vermiş hadisə ilə əlaqədar 15 iyun 2008-ci il saat 23.00-da E. Hüseynovdan izahat alıb. İzahat əsasında isə tibbi ekspertiza təyin olundu.

Xəstəxanaya qəbul zamanı E. Hüseynovun qapalı kəllə beyin travması diaqnozu qoyulduğunu bildirən məhkəmə tibbi eksperti C. Allahverdiyev isə ifadəsində, 15 iyun 2008-ci ildə saat 18.00-da zərərçəkmiş şəxsi müayinə etdikdən sonra diaqnozun səhv qoyulduğu müəyyənləşdirildiyini deyib. E. Hüseynov isə bildirib ki, ifadə verən şəxslər iyunun 15-də deyil, hadisədən bir neçə gün keçdikdən sonar xəstəxanaya gəliblər.

İfadələrdən sonra hakim məhkəmədə fasilə élan edərək prosesi 8 may saat 10.00-a təyin etdi.

Xatırladaq ki, E Hüseynov 14 iyun 2008-ci il tarixində “Alaturka” restoranında  “Çe Gevara Fanatları Klubu”nun keçirdiyi tədbir dağıdılarkən 22-ci Polis Bölməsində fiziki və mənəvi təzyiqə məruz qalıb. Polisin təzyiqi nəticəsində huşunu itirən E. Hüseynov 20 gündən artıq müalicə alıb və müalicəsini indi də davam etdirməkdədir.



MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN

 

Reportyorların Azadlıq və Təhlükəsizlik İnstitutu (RATİ)



Ünvan: Azərbaycan, Bakı şəh., Behbudov 8, mənzil 85/86

tel: (+99 412) 418-03-34, fax: (+ 99 412) 598-45-19

e-mail: irfs.az@gmail.com

web: www.irfs.az  skype: irfs.az



Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət