Ana səhifə

Press-reliZ 30 iyul 2009-cu IL Bakı, Azərbaycan


Yüklə 13.91 Kb.
tarix25.06.2016
ölçüsü13.91 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ
30 iyul 2009-cu il

Bakı, Azərbaycan


  • MAHAL İSMAYILOĞLU APELLYASİYA ŞİKAYƏTİ VERİB

  • SƏNƏT QƏZETİ”NİN BAŞ REDAKTORU POLİSƏ ÇAĞIRILIB



MAHAL İSMAYILOĞLU APELLYASİYA ŞİKAYƏTİ VERİB
“Yeni Müsavat” qəzetinin köşə yazarı, “Xalq qəzeti”nin keçmiş baş redaktoru Mahal İsmayıloğlu Abşeron rayon Məhkəməsinin çıxardığı hökmdən apellyasiya şikayəti verib. Bu barədə Reportyorların Azadlıq və Təhlükəsizlik İnstitutuna (RATİ) Media Hüquqları İnstitutunun vəkili Elçin Sadıqov məlumat verib. O bildirib ki, Sumqayıt Apellyasiya Məhkəməsinə verilmiş şikayətdə M.İsmayıloğluna bəraət istənilib.

Xatırladaq ki, M.İsmayıloğlu bağ qonşusu olan Daxili İşlər Nazirliyinin əməkdaşı Vahid İmanovun qulluqçusunun şikayəti əsasında 27 iyun 2008-ci ildə polisə çağırılmışdı. Şikayətə səbəb guya jurnalistin qonşusunun qulluqçusunu 3 və 21 iyun 2008-ci il tarixlərində döyməsi olub. Bu səbəbdən M.İsmayıloğluna cinayət işi açılmış və 1 iyul 2009-cu il tarixdə Abşeron rayon məhkəməsində CM-nin 127 (qəsdən sağlamlığa az zərər vurma), 128 (qəsdən sağlamlığa yüngül zərər vurma) və 221.3–cü (silah və ya silah qismində istifadə edilən əşyalar tətbiq edilməklə törədilən xuliqanlıq) maddələri ilə təqsirli bilinərək, 2 il azadlıqdan şərti məhrumetmə ilə cəzalandırılıb.

M.İsmayıloğlu isə ona şər atıldığını və jurnalist fəaliyyətinə görə böhtana məruz qaldığını və barəsində sifarişli hökm çıxarıldığını iddia edir.
SƏNƏT QƏZETİ”NİN BAŞ REDAKTORU POLİSƏ ÇAĞIRILIB
Dünən (29 iyul) “Sənət qəzeti”nin baş redaktoru Samir Sədaqətoğlu (Hüseynov) Lənkəran rayon Polis İdarəsinə çağırılıb. Bu barədə Reportyorların Azadlıq və Təhlükəsizlik İnstitutuna (RATİ) baş redaktorun özü məlumat verib. Onun sözlərinə görə, dünən Lənkəran Şəhər Polis Şöbəsinin tədqiqat bölməsinin rəisi Səadət Qəmbərov ona zəng edərək, həmin gün idarəyə onun haqqında şikayət daxil olduğunu bildirib: “Uzun müddətdir ki, Lənkəranda olmadığımdan şikayətin hansı əsasla və kim tərəfindən edildiyini başa düşə bilmirəm. Bundan başqa, şikayət edənin kimliyi barədə də mənə heç bir məlumat verilmədi. Ona görə də bu, mənə əvvəlcədən düşünülmüş bir iş kimi göründü və polis idarəsindən mənə yazılı şəkildə rəsmi sorğu göndərilməsini xahiş etdim.”

Məsələ ilə əlaqədar Lənkəran Şəhər Polis Şöbəsinin tədqiqat bölməsinin rəisi Səadət Qəmbərov RATİ-yə bildirdi ki, S.Sədaqətoğlu barəsində onun qohumu Quliyeva Qızdar Eynulla qızı tərəfindən şikayət ərizəsi daxil olub. “Şikayətçi ərizəsində bildirib ki, Samir onları tez-tez narahat edir. Həmçinin şikayətçi ərizədə Samirin əvvəllər həbs olunması və s. məsələlərə də toxunub” – deyən bölmə rəisi vurğuladı ki, Samir Sədaqətoğlu bu şikayətə əsasən izahat verməsi üçün şöbəyə dəvət edilib.

S.Sədaqətoğlu RATİ-yə bildirib ki, adıçəkilən qadın onun qohumu deyil. “Onun atası Məşədi Eynulla ilə əvvəllər aramızda ədavət olub və dəfələrlə bu adam barəsində polisə müraciət etmişəm” – deyən S.Sədaqətoğlu bu işi qurama hesab etdiyini də dilə gətirdi.

Xatırladaq ki, 2007-ci ilin may ayında Cinayət Məcəlləsinin 283-cü maddəsi ilə ittiham edilərək “Sənət qəzeti”nin baş redaktoru Samir Sədaqətoğlu dörd il, bu nəşrin yazarı Rafiq Tağı isə üç il həbs cəzası almış, 2007-ci il dekabrın 28-də imzalanan əfv fərmanı ilə hər iki jurnalist azadlığa buraxılmışdı. Qeyd edək ki, "Sənət qəzeti" maliyyə problemlərinə görə, müvəqqəti olaraq nəşrini dayandırıb.



MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN
Reportyorların Azadlıq və Təhlükəsizlik İnstitutu (RATİ)

Ünvan: Azərbaycan, Bakı şəh., Behbudov 8, mənzil 85/86

tel: (+99 412) 418-03-34, fax: (+ 99 412) 598-45-19

24 saat ərzində aktiv olan qaynar xətt: (+ 994 055) 816 40 04

e-mail: irfs.az@gmail.com

web: www.irfs.az  skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət