Ana səhifə

Press-reliZ 13 avqust 2009-cu IL Bakı, Azərbaycan


Yüklə 17.5 Kb.
tarix27.06.2016
ölçüsü17.5 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ
13 avqust 2009-cu il

Bakı, Azərbaycan


  • BAŞ REDAKTORUN İDDİANIN RƏDD OLUNMASI İLƏ BAĞLI VƏSATƏTİ TƏMİN EDİLMƏDİ

  • JURNALİSTLƏRİN POLİSƏ QARŞI İDDİASI GERİ QAYTARILIB

  • METYU BRAYZA İLHAM ƏLİYEVLƏ GÖRÜŞDƏ GƏNC BLOQÇULARIN AZAD OLUNMASINI İSTƏYİB



İDDİANIN RƏDD OLUNMASI İLƏ BAĞLI BAŞ REDAKTORUN VƏSATƏTİ TƏMİN EDİLMƏDİ

Bu gün (13 avqust) Nərimanov rayon Məhkəməsində hakim Arif İsmayılovun sədrliyi ilə hüquq müdafiəçisi Çingiz Qənizadənin  “Millətim” qəzetinin baş redaktoru Fərəməz Novruzoğluna (Allahverdiyev) qarşı  xüsusi ittiham qaydasında iddiasına əsasən məhkəmə prosesi keçirildi. Prosesdə xüsusi ittihamçı Çingiz Qənizadə və onun nümayəndəsi Raqif Mustafayev, cavabdeh tərəfdən isə Fərəməz Novruzoğlu və vəkili İmran Kərimov iştirak edirdi.

F.Novruzoğlu xüsusi ittiham qaydasında iddianın Azərbaycan Respublikası Cinayət Prosessual Məcəlləsinə uyğun tərtib olunmamasını əsas gətirərək, iddianın rədd edilməsi ilə bağlı vəsatət qaldırdı. Hakim vəsatəti təmin etmədi. Daha sonra F.Novruzoğlu işlə bağlı dəlil və sübutların məhkəməyə təqdim olunması üçün hakimdən vaxt istədi. Hakim növbəti prosesi 17 avqust, saat 09.30-a təyin etdi.

Xatırladaq ki, hüquq müdafiəçisi Çingiz Qənizadə həbsxanalarda baş verən cinayət halları və bu halların hüquq müdafiəçiləri tərəfindən gizlədilməsi faktları barədə “Millətim” qəzetinin baş redaktoru F. Novruzoğlunun müəllifi olduğu yazılara görə Cinayət Məcəlləsinin 147.2 (ağır və xüsusilə ağır cinayətdə ittiham etməklə böhtan atma) və 148-ci (təhqir) maddələri ilə xüsusi ittiham qaydasında məhkəməyə müraciət edib.



JURNALİSTLƏRİN POLİSƏ İDDİASI GERİ QAYTARILIB
“Yüksəliş naminə” qəzetinin müxbiri Elçin Həsənov, “Yeni Müsavat” qəzetinin əməkdaşı Əfqan Muxtarlı və “Azadlıq” qəzetinin əməkdaşı Natiq Ədilovun polis təzyiqinə məruz qalmaları ilə bağlı Səbail rayon məhkəməsinə edilən müraciəti qəbul olunmayıb. Bu barədə Reportyorların Azadlıq və Təhlükəsizlik İnstitutuna (RATİ) “Yüksəliş naminə” qəzetinin müxbiri E. Həsənov məlumat verib.

Onun bildirdiyinə görə, hakim Kəmalə Əmirxanovanın imzası ilə daxil olan cavabda iddianın düzgün tərtib olunmaması və ərizədə qeyd olunanların həqiqəti əks etdirməməsi ifadə olunaraq, buna heç bir əsas göstərilməyib:

“Bizim məqsədimiz hadisə baş verən gün bizə fiziki təzyiq edən polislərin layiqli cəza almasıdır. Ona görə də yenidən Səbail rayon Məhkəməsinə müraciət edəcəyik. Nəticə eyni olacaqsa, apellyasiya məhkəməsinə və ardınca son instansiyaya qədər müraciət olunacaq.”

Qeyd edək ki, jurnalistlərin polis təzyiqinə məruz qalması ilə bağlı Səbail rayon prokurorluğunda araşdırma aparılmış və prokurorluqdan məhkəməyə müraciət etmələri tövsiyə olunmuşdu.

Xatırladaq ki, adıçəkilən jurnalistlər 10 may 2009-cu ildə Səbail RPİ-nin 39-cu polis bölməsinin qarşısında fiziki təzyiqə məruz qalıb. Onlar Azərbaycan Dövlət Neft Akademiyasındakı silahlı basqında həlak olanlarla bağlı mətəm elan olunmamağına və “Gül bayramı”na etiraz edən bir qrup gəncin saxlanılması ilə bağlı məlumat əldə etmək üçün  39-cu polis bölməsinin qarşısında olarkən polislər tərəfindən döyülüblər.
METYU BRAYZA İLHAM ƏLİYEVLƏ GÖRÜŞDƏ GƏNC BLOQÇULARIN AZAD OLUNMASINI İSTƏYİB
ABŞ dövlət katibinin sabiq köməkçisi Metyu Brayza həbsdə olan bloqçular Adnan Hacızadə və Emin Millinin (Abdullayev) azad olunması məsələsini prezident İlham Əliyevlə görüşdə qaldırıb. Bu barədə dünən Bakıda keçirilən mətbuat konfransında ABŞ dövlət katibinin köməkçisi Metyu Brayza “Turan”ın sualına cavabda bildirib:

“Biz bu məsələləri Azərbaycan prezidenti qarşısında qaldırmışıq və düşünürəm ki, problem Azərbaycan vətəndaşlarının hüquqlarının müdafiəsi çərçivəsində həll edilməli və söz azadlığı prinsiplərinə təkan verməlidir” - deyə M.Brayza bildirib.

Qeyd edək ki, Prezident İlham Əliyev Metyu Brayzanı ATƏT-in Minsk Qrupunun amerikalı həmsədri kimi fəaliyyətini başa vurması münasibətilə qəbul edib.

Xatırladaq ki, Emin Milli və Adnan Hacızadə 8 iyul tarixində  axşam saatlarında  dostları ilə Bakıda “Lebonese” (Livan) restoranında yemək yeyərkən qonşu masada onların söhbətini dinləyən idmançı görkəmli iki nəfər təxribatçı hücum edərək, Emin Milli və Adnan Hacızadəni döyərək, onlara xəsarət yetirib. Zərərçəkmiş şəxs qismində şikayət etmələrinə və xəsarət almalarına baxmayaraq, Səbail RPİ onlara xəsarət yetirənləri sərbəst buraxmış və döyülən gənclərin 48 saat müddətinə şübhəli şəxs qismində saxlanmasına qərar vermiş, iyulun 10-da isə Səbail rayon məhkəməsi “xuliqanlıq” maddəsi ilə təqsirləndirilən gənclər barəsində 2 aylıq həbs-qətimkan tədbirinin seçilməsi ilə bağlı qərar çıxarıb.  İyulun 20-də  Apellyasiya məhkəməsi sözügedən qərarı qüvvədə saxlayıb. Hazırda hər iki gənc Bakı İstintaq Təcridxanasında saxlanılır.




MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN
Reportyorların Azadlıq və Təhlükəsizlik İnstitutu (RATİ)

Ünvan: Azərbaycan, Bakı şəh., Behbudov 8, mənzil 85/86

tel: (+99 412) 418-03-34, fax: (+ 99 412) 598-45-19

24 saat ərzində aktiv olan qaynar xətt: (+ 994 055) 816 40 04

e-mail: irfs.az@gmail.com

web: www.irfs.az  skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət