Missále románum 1957 en préparation

ORDO

HEBDÓMADÆ SANCTÆ

DOMÍNICA II PASSIÓNIS

SEU IN PALMIS

DE OFFÍCIO DIVÍNO

DE SOLÉMNI PALMÁRUM PROCESSIÓNE

IN HONÓREM CHRISTI REGIS

DE BENEDICTIÓNE RAMÓRUM

2. Color paramentórum est rúbeus.

3. Célebrans indúitur amíctu, alba, cíngulo, stola et pluviáli; minístri sacri amíctu, alba, cíngulo, subdiáconus ínsuper tunicélla, diáconus stola et dalmática.

3a . Célebrans indúitur amíctu, alba, cíngulo, stola et pluviáli, vel manet sine cásula.

4. Rami, nisi ab ipsis fidélibus jam in mánibus teneántur, paréntur super ábacum, tobalea alba coopértum, et pósitum in opportunióre loco presbytérii, ita tamen, ut máneat in conspéctu pópuli.

5. Omnibus rite dispósitis, célebrans, cum minístris sacris, seu ministrántibus, facta altári débita reveréntia, sistit retro ábacum, versus pópulum.

Intérim vero cantátur sequens

Antiphóna Matth. 21, 9

HOSÁNNA fílio David: benedíctus qui venit in nómine Dómini. Rex Israël: Hosánna in excélsis.

6. Deínde célebrans, mánibus junctis, benedícit ramos, dicens, in tono oratiónis feriális:

V/. Dóminus vobíscum.

Cui omnes respóndent:

R/. Et cum spíritu tuo.

7. In sequénti oratióne célebrans dicat, prout qualitáti ramórum cóngruit, hos palmárum ramos, vel hos olivárum ramos, vel hos árborum ramos, vel hos palmárum et olivárum ramos, aut hos palmárum (olivárum) et aliárum árborum ramos.

Orémus. Orátio

BÉNE+DIC, quǽsumus, Dómine, hos palmárum (seu olivárum aut aliárum árborum) ramos: et præsta; ut, quod pópulus tuus in tui veneratiónem hodiérno die corporáliter agit, hoc spirituáliter summa devotióne perfíciat, de hoste victóriam reportándo et opus misericórdiæ summópere diligéndo. Per Dóminum.

8. Tunc célebrans primum ter aspérgit ramos, super ábacum pósitos, póstea, ad cancéllos, ramos fidélium, ubi ipsi, ut dictum est, ramos jam in mánibus portant, nisi placúerit horum aspersiónem fácere transeúndo per aulam ecclésiæ.

9. Deínde célebrans ponit incénsum in thuríbulum, more sólito, et primum ter ádolet ramos benedíctos, super ábacum pósitos, póstea, ad cancéllos, vel transeúndo per aulam ecclésiæ, incénsat ramos fidélium.

Minístri sacri, vel ministrántes, celebrántem comitántur, tam in aspersióne, quam in incensatióne ramórum, fímbriam pluviális tenéntes.

DE DISTRIBUTIÓNE RAMÓRUM

11. Itaque, célebrans, stans in predélla altáris, versus pópulum, adjuvántibus minístris sacris, vel ministrántibus, dat ramos benedíctos primum ómnibus cléricis per órdinem, deínde ministrántibus, dénique, ad cancéllos, fidélibus.

12. Et cum incéperit distribúere, cantántur sequéntes antiphónæ et psalmi, hoc modo:

Antiphóna 1 Púeri Hebræórum, portántes ramos olivárum, obviavérunt Dómino, clamántes et dicéntes: « Hosánna in excélsis ».

Psalmus 23, 1-2 et 7-10

DÓMINI est terra, et plenitúdo ejus: * orbis terrárum, et univérsi qui hábitant in eo.

Quia ipse super mária fundávit eum: * et super flúmina præparávit eum.

Et repétitur antiphóna Púeri Hebræórum, portántes ramos olivárum, obviavérunt Dómino, clamántes et dicéntes: « Hosánna in excélsis ».

Attóllite portas, príncipes, vestras, et elevámini, portæ æternáles: * et introíbit Rex glóriæ.

Quis est iste Rex glóriæ? * Dóminus fortis et potens: Dóminus potens in prǽlio.

Et repétitur antiphóna Púeri Hebræórum, portántes ramos olivárum, obviavérunt Dómino, clamántes et dicéntes: « Hosánna in excélsis ».

Attóllite portas, príncipes, vestras, et elevámini, portæ æternáles: * et introíbit Rex glóriæ.

Quis est iste Rex glóriæ? * Dóminus virtútum ipse est Rex glóriæ.

Et repétitur antiphóna Púeri Hebræórum, portántes ramos olivárum, obviavérunt Dómino, clamántes et dicéntes: « Hosánna in excélsis ».

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Et repétitur antiphóna Púeri Hebræórum, portántes ramos olivárum, obviavérunt Dómino, clamántes et dicéntes: « Hosánna in excélsis ».

Antiphóna 2 Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Psalmus 46

OMNES Gentes, pláudite mánibus: * jubiláte Deo in voce exsultatiónis.

Quóniam Dóminus excélsus, terríbilis: * Rex magnus super omnem terram.

Et repétitur antiphóna Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Subjécit pópulos nobis: * et Gentes sub pédibus nostris.

Elégit nobis hereditátem suam: * spéciem Jacob, quam diléxit.

Et repétitur antiphóna Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Ascéndit Deus in júbilo: * et Dóminus in voce tubæ.

Psállite Deo nostro, psállite: * psállite Regi nostro, psállite.

Et repétitur antiphóna Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Quóniam Rex omnis terræ Deus: psállite sapiénter.

Regnábit Deus super Gentes: * Deus sedet super sedem sanctam suam.

Et repétitur antiphóna Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Príncipes populórum congregáti sunt * cum Deo Abraham.

Quóniam dii fortes terræ * veheménter eleváti sunt.

Et repétitur antiphóna Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Glória Patri, et Fílio, * et Spirítui Sancto.

Sicut erat in princípio, et nunc, et semper, * et in sǽcula sæculórum. Amen.

Et repétitur antiphóna Púeri Hebræórum vestiménta prosternébant in via, et clamábant dicéntes: « Hosánna fílio David; benedíctus qui venit in nómine Dómini. ».

Quæ si non suffíciant, repetántur quoúsque distribútio finiátur; si autem finiátur prius, cláuditur cum Glória Patri, et repétitur antiphóna.