Missále románum 1957 en préparation

FÉRIA QUINTA

IN CŒNA DÓMINI

DE OFFÍCIO DIVÍNO

MATUTÍNUM et LAUDES non anticipántur de sero, sed dicúntur mane, hora competénti; in ecclésiis vero, in quibus Missa chrísmatis celebrátur, Matutínum et Laudes anticipári possunt de sero;

HORÆ MINORES dicúntur hora competénti;

VÉSPERÆ ab iis qui Missæ vespertínæ interfuérunt, hódie non dicúntur;

COMPLETÓRIUM dícitur post denudatiónem altárium.

2. Horæ supra dictæ dicúntur ut in Breviário Románo, præter sequéntia:

In Láudibus, horis minóribus et Vésperis (in priváta tantum recitatióne), post antiphónam Christus factus est, dícitur Pater noster, totum sub siléntio; póstea, omísso psalmo 50 Miserere, statim subjúngitur orátio Réspice, quǽsumus, Dómine; sed Qui tecum dícitur sub siléntio;

Ad Completórium, absolúto cántico Simeónis Nunc dimíttis, dícitur antiphóna Christus factus est, deínde Pater noster, totum sub siléntio; póstea, omísso psalmo 50 Miserere, statim subjúngitur orátio Vísita, quǽsumus, Dómine; sed Per Dóminum dícitur sub siléntio, et omnes discédunt.

3. In priváta recitatióne omnes horæ dicúntur cóngruo témpore, ut in Breviário Románo, præter ea quæ supra (nn. 1-2) notántur.

DE MISSA CHRÍSMATIS

IN QUA BENEDÍCITUR ÓLEUM CATECHUMENÓRUM

ET INFIRMÓRUM,

ET CONFÍCITUR SACRUM CHRISMA

2. Hæ autem benedíctio et conféctio fiunt intra Missam chrísmatis, quæ celebránda est post Tértiam.

3. Antiphóna ad intróitum

Ex. 30, 25, 31

FÁCIES unctiónis óleum, et fíliis Israël dices: Hoc óleum unctiónis sanctum erit mihi in generatiónes vestras. Ps. 88, 2 Misericórdias Dómini in ætérnum cantábo: in generatiónem et generatiónem annuntiábo veritátem tuam in ore meo. Fácies unctiónis.

4. Decantátis antiphóna ad intróitum ac Kýrie, eléison, ut moris est, póntifex statim íncipit in tono solémni Glória in excélsis.

5. Orémus. Orátio

DÓMINE, Deus, qui in regenerándis plébibus tuis ministério úteris sacerdótum; tríbue nobis perseverántem in tua voluntáte famulátum; ut dono grátiæ tuæ, in diébus nostris, et méritis et número sacrátus tibi pópulus augeátur. Per Dóminum.

Et dícitur hæc tantum orátio.

6. Léctio Epístolæ beáti Jacóbi Apóstoli.

5, 13-16

7. Graduále Ps. 27, 7-8 In Deo sperávit cor meum, et adjútus sum. Et reflóruit caro mea: et ex voluntáte mea confitébor ei. V/. Dóminus fortitúdo plebis suæ: et protéctor salvatiónum Christi sui est.

8. + Sequéntia sancti Evangélii secúndum Marcum.

6, 7-13

Et non dícitur Credo.

9. Antiphóna ad offertórium Ps. 44, 7 Dilexísti justítiam, et odísti iniquitátem: proptérea unxit te Deus, Deus tuus, óleo lætítiæ.

10. Secréta

HUJUS sacrifícii poténtia, Dómine, quǽsumus, et vetustátem nostram cleménter abstérgat, et novitátem nobis áugeat et salútem. Per Dóminum nostrum.

11. PRÆFÁTIO

VERE dignum et justum est, æquum et salutáre, cleméntiam tuam supplíciter obsecráre, ut spirituális lavácri baptísmo renovándis creatúram chrísmatis in sacraméntum perféctæ salútis vitǽque confírmes; ut sanctificatióne unctiónis infúsa, corruptióne primæ nativitátis absórpta, sanctum uniuscujúsque templum acceptábilis vitæ innocéntiæ odóre redoléscat; ut secúndum constitutiónis tuæ sacraméntum, régio et sacerdotáli propheticóque honóre perfúsi, vestiménto incorrúpti múneris induántur: per Christum Dóminum nostrum. Per quem majestátem tuam laudant Angeli, adórant Dominatiónes, tremunt Potestátes. Cæli, cælorúmque Virtútes, ac beáta Séraphim, sócia exsultatióne concélebrant. Cum quibus et nostras voces ut admítti júbeas, deprecámur, súpplici confessióne dicéntes:

SANCTUS, sanctus, sanctus Dóminus Deus Sábaoth. Pleni sunt cæli et terra glória tua. Hosánna in excélsis. Benedíctus, qui venit in nómine Dómini. Hosánna in excélsis.

12. Communicántes, et quæ sequúntur usque ad consecratiónem, dicúntur ut in Cánone Missæ, nihil addéndo vel immutándo.

13. In benedictióne chrísmatis, quæ in Pontificáli Románo invenítur, versus finem præfatiónis quæ super chrisma benedicéndum cantátur, omittántur verba: ut spirituális lavácri baptísmatis usque ad vestiménto incorrúpti múneris induántur, quæ olim præfatiónem própriam Missæ chrísmatis constitúerant, et quæ in hoc instauráto ritu íterum locum suum obtinuérunt.

14. In hac Missa sacram communiónem distribúere non licet.

15. Post communiónem, póntifex, étiam si Missam solémnem vespertínam litatúrus sit, se ipsum et cálicem puríficat more sólito.

16. Antiphóna ad communiónem Marc. 6, 12-13 Prædicábant Apóstoli ut pœniténtiam ágerent, et ungébant óleo multos ægros, et sanábant.

17. Orémus. Postcommúnio

PRÆSTA, quǽsumus, Dómine: ut, sicut de prætéritis ad nova transímus; ita, vetustáte depósita, sanctificátis méntibus innovémur. Per Dóminum.

18. In fine Missæ, dicto Pláceat tibi, sancta Trínitas, datur benedíctio more sólito, et, omísso último Evangélio sancti Joánnis, dicúntur in choro Sexta et Nona.

19. Locórum Ordinárii, qui Missam chrísmatis mane celebráverint, possunt véspere Missam quoque solémnem in Cœna Dómini litáre.