RÁÐUNAUTAFUNDUR 2003
Notkun fjarkönnunar við mat á gróðurfarsbreytingum
Þórunn Pétursdóttir Landgræðslu ríkisins
YFIRLIT
Markmið rannsóknarinnar var nota loftmyndir og landfræðileg upplýsingakerfi (LUK) til að skoða og skrá útbreiðslu alaskalúpínu (Lupinus nootkatensis) í Morsárdal í Skaftafelli og skoða jafnframt hvort einhverjar breytingar hefðu átt sér stað á stærð Bæjarstaðarskógar samhliða útbreiðslu lúpínunnar. Skoðaðar voru loftmyndir frá árabilinu 1965–2000. Þekja lúpínu og skógarins var mæld í LUK og borin saman yfir tímabilið. Niðurstöður rannsóknarinnar sýna að á árabilinu 1965–1982 urðu litlar breytingar á útbreiðslu tegundanna, en frá 1982 til 2002 jókst útbreiðsla lúpínu úr 0,5 ha í tæpa 32 ha og Bæjarstaðaskógur stækkaði úr 11,4 ha í 22,4 ha. Einnig kom í ljós að víða á svæðinu er að finna staka lúpínubletti, sem benda til að á næstu árum muni lúpínan halda áfram að breiðast hratt út.
FJARKÖNNUN OG LANDFRÆÐILEG UPPLÝSINGAKERFI
Fjarkönnun er samheiti yfir ýmsa tækni, þar sem verið er að safna upplýsingum um land, vatn og andrúmsloft úr fjarlægð og eru til dæmis loft- og gervihnattamyndir dæmi um fjarkönnunargögn (Lillesand og Kiefer 1994). Fjarkönnun hentar einstaklega vel til athugana og mælinga á líf- og landfræðilegum einkennum landslags, vegna þess hve stórt og fjölbreytt svæði er hægt að skoða í einu. Þannig myndar landslagið eina heild og auðveldara er að sjá orsakasamhengi á milli ákveðinna vistfræðilegra ferla (Skånes 1996).
Það hvaða fjarkönnunartækni nýtist best fer eftir því hvers konar rannsóknir eiga í hlut. Atriði eins og stærð, dreifing og tíðni fyrirbæris sem á að skoða hafa mikið að segja um hvaða aðferð verður fyrir valinu í hvert skipti. Sem dæmi má nefna að þegar breytingar á smáum skala yfir 50 ára tímabil eru skoðaðar fer best á að nota loftmyndir og vinna með þær í þrívídd (Ihse 1989).
Landfræðilegt upplýsingakerfi (LUK) er gagnagrunnur sem nota má með loftmyndum. Þetta eru kerfi sem eru notuð til að safna, geyma, greina og túlka upplýsingar um ýmiskonar fyrirbæri á jörðinni (Lillesand og Kiefer 1994). Ein algengasta greiningin sem hægt er að vinna í LUK er yfirlagning; það er að leggja eina gerð gagna ofan á aðra til samanburðar og samþættingar. Þannig má leggja mörg lög korta/mynda, svokallaðar þekjur, saman í tímaröð og er þessi aðferð mjög mikilvæg til að rekja breytingar í landslagi í tíma og rúmi (Skånes 1996).
LÚPÍNA Í BÆJARSTAÐASKÓGI
Alaskalúpína er dæmi um tegund sem getur ýmist hindrað viðgang annarra tegunda eða búið í haginn fyrir þær (Morris og Wood 1989). Lúpína virðist oft haga sér sem ágeng planta í íslensku umhverfi, þó hún geti vaxið í jafnvægi við annan gróður í upprunalegum heimkynnum sínum. Hún hefur stór fræ, er hávaxin, myndar breiður og getur þar að auki unnið köfnunarefni úr andrúmslofti með hjálp baktería. Þannig er hún sjálfri sér nóg um það áburðarefni sem er hvað mest takmarkandi þáttur í íslenskum vistkerfum og getur vaxið á svæðum þar sem aðrar tegundir eiga erfitt uppdráttar (Borgþór Magnússon o.fl. 2001). Íslenskar rannsóknir sýna að þar sem lúpína nemur land og myndar breiðu á snauðum jarðvegi eykst köfnunarefnisinnhald hans allt að tífalt (Borgþór Magnússon o.fl. 1995a).
Um miðja síðustu öld var alaskalúpínu plantað og sáð í rofabörð ofan Bæjarstaðarskógar í Morsárdal í Skaftafelli. Fé gekk í Morsárdal fram til ársins 1978. Árið 1982 féllu aurskriður niður hlíðina þar sem Bæjarstaðarskógur vex. Mikið hefur verið reynt til að hefta útbreiðslu lúpínunnar í Bæjarstaðaskógi, en hins vegar hafa engar mælingar verið gerðar á því hversu mikil útbreiðslan er í raun og veru eða hvaða áhrif lúpínan hefur haft á viðgang skógarins.
Markmið þessarar rannsóknar var að nota loftmyndir og landfræðileg upplýsingakerfi til að skoða og skrá útbreiðslu alaskalúpínu í Morsárdal og skoða jafnframt hvort einhverjar breytingar hafi átt sér stað á stærð Bæjarstaðarskógar samhliða útbreiðslu lúpínunnar.
EFNI OG AÐFERÐIR
Bæjarstaðaskógur í Morsárdal er að meginstofni um 160 ára. Hann vex í dalnum vestanverðum, í hlíð er nefnist Háls. Sunnan hans er Réttargil, ofan er Háls og norðan skógarins halda Rauðhellar áfram í átt að dalnum Kjós. Framan skógarins eru Morsáraurarnir (Hjörleifur Guttormsson 1993). Rannsóknarsvæðið afmarkaðist af aurunum framan skógarins og hlíðinni ofan hans.
Notaðar voru loftmyndir frá árunum 1965, 1982, 1994, 1997 og 2000 til að kortleggja útbreiðslu meginlúpínubreiðunnar. Loftmyndirnar voru teknar af Landmælingum Íslands og Loftmyndum ehf. Allar loftmyndirnar voru teknar á sama árstíma, í kringum 20. ágúst. Loftmyndirnar voru bæði á tölvutæku formi og sem snertimyndir, þannig að hægt var að skoða þær nákvæmlega í þrívíddarsjá. Loftmyndirnar voru hnitsettar og réttar upp eftir þekktum GPS punktum sem safnað var á vettvangi. Því næst voru þær færðar inn í landfræðilegt upplýsingakerfi, þar sem niðurstöður greiningar hverrar loftmyndar voru skráðar inn og bornar saman.
NIÐURSTÖÐUR OG UMRÆÐUR
N
1. mynd. Þróun í útbreiðslu Bæjarstaðarskógar og lúpínu í Morsárdal tímabilið 1965–2000.
iðurstöður þessarar rannsóknar sýna að lúpína hefur breiðst hratt út í Morsárdal síðustu 20 árin og þekur nú ríflega 30 ha lands. Mælingar sýna að frá árinu 1965 fram að árinu 1982 var lúpína vart greinanleg á rann-sóknarsvæðinu. Árið 1988 þakti lúp-ína um 7 ha, þar af um 1 ha á aur-unum. Árið 2000 þakti lúpínu-breiðan um 31 ha í kringum skóginn og þar af um 23 ha á aurunum framan hans. Niðurstöðurnar sýna einnig ólíka þróun í útbreiðslu lúpínunnar í hlíðinni ofan skógarins og á aurunum neðan hans (sjá 1. mynd).
Árið 1988 hafði lúpína náð að þekja að mestu eystri hluta rasksins eftir skriðuföllin sumarið 1982, en engar merkjanlegar breytingar höfðu átt sér stað á nývexti skógarins. Árið 1994 var lúpínan ekki eins greinileg á myndinni, en birkið virtist vera að vaxa upp í staðinn. Árið 2000 var ekki lengur hægt að greina lúpínu í stórum hluta skriðufarsins, en birki vaxið upp í staðinn. Lúpínan hafði hins vegar breiðst út á raskaða svæðinu eftir skriðuna sem féll meðfram Réttargilinu.
Á sama tímabili og lúpínan hefur margfaldað útbreiðslu sína hefur flatarmál Bæjarstaðarskógar tvöfaldast, úr 11,4 ha í 22,4 ha. Það er því ljóst að stærð skógarins hefur verið ofmetin fram að þessu, því fyrri heimildir segja hann um 25 ha að stærð (Hjörleifur Guttormsson 1993). Út frá þessum niðurstöðum verður að draga í efa að skógurinn sé í hættu af völdum útbreiðslu lúpínunnar, þó ekki verði lagt mat á það hvort hún standi á einhvern hátt í vegi fyrir enn frekari nýliðun skógarins.
Útbreiðsla lúpínu á aurunum neðan skógarins fylgir lægðum og árfarvegum, enda berast lúpínufræ auðveldlega langar leiðir með vatni (Daði Björnsson 1997). Niðurstöður þessa hluta rannsóknarinnar sýna greinilega samsvörun við kenningar um hvernig ágengar plöntur dreifast í nýjum heimkynnum (sjá 1. mynd). Samkvæmt Hobbs og Humphries (1994) eru ágengar plöntur í nýjum heimkynnum oft í svokölluðum lag-fasa (n.k. dvali) fyrstu áratugina. Einhvers konar röskun vistkerfa (t.d. flóð) getur orðið til að rjúfa lag-fasann og opna fyrir mun víðtækari útbreiðslu plöntunnar. Þá tekur útbreiðsla hennar að margfaldast; færist í sk. log-fasa.
Líklegt er að friðun svæðisins fyrir beit ásamt skriðunum sem féllu sumarið 1982 séu ráðandi þættir í breytingum á útbreiðslu lúpínu og skógarins síðustu 20 ár.
Önnur rannsókn höfundar var unnin samhliða þessari á vettvangi sumarið 2001 og sýndi hún að útbreiðsla lúpínunnar í Morsárdal er ekki bundin við meginbreiðuna. Lúpínan vex líka í litlum blettum víðsvegar út frá meginbreiðunni í allt að tveggja kílómetra fjarlægð frá jaðri hennar (Kristín Svavarsdóttir o.fl. 2002). Margir blettanna eru þegar farnir að blómstra og bera fræ og því líklegt að útbreiðsla lúpínunnar í Morsárdal eigi eftir að verða enn hraðari á næstu árum en hún er í dag.
Gróðurfarsþróun í Morsárdal gefur til kynna hvers vænta má þegar plöntu eins og lúpínu er komið af stað í nýjum heimkynnum. Mikilvægt er að hafa þróunina í Morsárdal í huga áður en ráðist er í sáningu lúpínu á nýjum landsvæðum hérlendis.
ÞAKKARORÐ
Þessi grein er byggð á lokaverkefni höfundar við Jarð- og landfræðiskor Háskóla Íslands vorið 2002 (Þórunn Pétursdóttir 2002). Bestu þakkir er færðar leiðbeinendum, þeim Guðrúnu Gísladóttur og Kristínu Svavarsdóttur. Einnig Landgræðslu ríkisins, Náttúruvernd ríkisins og Nýsköpunarsjóði námsmanna sem styrktu þetta verkefni.
HEIMILDASKRÁ
Borgþór Magnússon, Bjarni Diðrik Sigurðsson & Snorri Baldursson, 1995. Vöxtur og uppskera alaskalúpínu. Í: Líffræði alaskalúpínu (Lupinus nootkatensis). Vöxtur, fræmyndun og áhrif sláttar. Fjölrit RALA nr. 178, 82 s.
Borgþór Magnússon, Sigurður H. Magnússon & Bjarni Diðrik Sigurðsson, 2001. Gróðurframvinda í lúpínu-breiðum. Fjölrit RALA nr. 207, 100 s.
Daði Björnsson, 1997. Útbreiðsluhættir alaskalúpínu í Heiðmörk raktir eftir loftmyndum. Fjölrit RALA nr. 192, 24 s.
Hjörleifur Guttormsson, 1993. Í ríki Vatnajökuls. Árbók Ferðafélags Íslands 1993. Ferðafélag Íslands, 287 s.
Hobbs, R.J. & Humphries, S.E., 1995. An intergrated approach to the ecology and management of plant invas-ion. Conservation Biology 9: 761–770.
Ihse, M., 1989. Air Photo Interpretation and Computer Carthography. Tool for Studying the Changes in the Cultural Landscape. Í: The cultural landscape – past, present and future (ritstj. Birks, H.H., Birks, H.J.B., Kaland, P.E & Moe, D.). Cambridge University Press, 153–163.
Kristín Svavarsdóttir, Þórunn Pétursdóttir & Guðrún Gísladóttir, 2002. Distribution dynamics of introduced Nootka lupin on a braided river bed in Skaftafell National Park, Iceland. Veggspjald á lúpínuráðstefnu á Laugarvatni 2002.
Lillesand, T.M. & Kiefer, R.W., 1994. Remote sensing and image interpretation. John Wiley & Sons, New York, 750 s.
Morris, F.W. & Wood, D.M., 1989. The role of lupine in succession on Mount Helen: Facilitation or Inhibition. Ecology 70: 697–703.
Skånes, H., 1996. Landscape Change and Grassland Dynamics – Retrospective studies based on aerial photo-graphs and old catastral maps during 200 years in South Sweden. Dissertation Series No. 8, I, IV. Department of Physical Geography, Stockholm University.
Þórunn Pétursdóttir, 2002. Útbreiðsla alaskalúpínu (Lupinus nootkatensis) í Morsárdal í Skaftafelli. BSc ritgerð. Jarð- og landfræðiskor Háskóla Íslands, 37 s.
Að auki voru eftirfarandi loftmyndir notaðar í rannsókninni:
Landmælingar Íslands, 1965. Svarthvít loftljósmynd. A 8471.
Landmælingar Íslands, 1982. Svarthvít loftljósmynd. G 5128.
Landmælingar Íslands, 1988. Svarthvít loftljósmynd. L 0040.
Landmælingar Íslands, 1994. Svarthvít loftljósmynd. N 1514.
Landmælingar Íslands, 1997. Svarthvít loftljósmynd. N8433.
Loftmyndir ehf., 2000. Loftljósmynd í lit. Bæjarstaðarskógur. |