Press-reliZ 19 may 2009-cu IL Bakı, Azərbaycan
|
|  Yüklə 78 Kb.
|
| R A T İ
Reportyorların Azadlıq və Təhlükəsizlik İnstitutu PRESS-RELİZ 19 may 2009-cu il Bakı, Azərbaycan
RATİ-DƏ 24 SAAT ƏRZİNDƏ QAYNAR XƏTT ABŞ Dövlət Departamentinin maliyyə dəstəyi və İREX-in tərəfdaşlığı ilə “Media Müdafiəsi Fondu” layihəsi çərçivəsində Azərbaycanda (RATİ və “Media Hüququ İnstitutu”) media problemləri ilə bağlı operativ olaraq müraciətlərin qəbul edilməsi və araşdırılması üçün sutkanın 24 saatı ərzində aktiv olacaq qaynar xətt (055 816 40 04) fəaliyyət göstərəcək. Qaynar xəttə daxil olacaq zənglər əsasında RATİ əməkdaşları araşdırma apararaq hüquqi yardımın tələb edən işləri “Media Hüququ İnstitutu”na yönəldəcəklər. “Media Hüququ İnstitutu”nun direktoru Rəşid Hacılının bildirdiyinə görə, layihə çərçivəsində rəhbəri olduğu təşkilat diffamasiyaya görə məhkəməyə verilən KİV-lər (elektron və çap) və KİV əməkdaşlarına, müvafiq media problemlərinə görə məhkəməyə müraciət edəcək KİV və KİV nümayəndələrinə, hər hansı bir formada təzyiqlə üzləşən KİV və KİV nümayəndələrinə hüquqi yardım edəcək. “ÖLKƏ” QƏZETİ NƏŞRİNİ DAYANDIRIB “Ölkə “ qəzeti nəşrini dayandırıb. Bu barədə Reportyorların Azadlıq və Təhlükəsizlik İnstitutuna (RATİ) “Ölkə “ qəzetinin təsisçisi Xəzər Teyyublu məlumat verib. “Qəzet öz fəaliyyətini texniki problemlər, maliyyə çatışmazlığına görə müvəqqəti olaraq dayandırıb. Bu problemlər ən qısa zamanda aradan qalxacaq və qəzetin fəaliyyəti bərpa olunacaq “, - deyə X.Teyyublu bildirdi. BAŞ REDAKTORUN DÖYÜLMƏSİNDƏN ÜÇ İL ÖTSƏ DƏ CİNAYƏTKARLAR AZADLIQDADIR Bu gün (19 may) “Bizim Yol” qəzetinin baş redaktoru Bahəddin Həziyevin vəhşiliklə döyülməsinin 3 ili tamam oldu. Bu müddət ərzində hələ də baş vermiş ağır cinayət hadisəsinə görə heç kim cəzalandırılmayıb. B. Həziyev isə hələ də ümidlərini itirməyib. “Mən bu işlə bağlı dəfələrlə Daxili İşlər Nazirliyinə, Respublika Prokurorluğuna və Milli Təhlükəsizlik Nazirliyinə müraciət etmişəm. Hər dəfə də Daxili İşlər Nazirliyindən cavab alıram ki, hadisə ilə bağlı Abşeron rayon Polis İdarəsində başlanan cinayət işinin istintaqı davam edir. Amma məni istintaqın gedişi ilə tanış etmirlər”, - deyə qeyd edən B. Həziyevin sözlərinə görə, əgər istintaq yaxın gələcəkdə də bir nəticə ortaya qoymayacaqsa, bu halda istintaq orqanı haqqında məhkəmə müraciət etmək haqqında düşünə bilər. DİN ictimaiyyətlə əlaqələr şöbəsinin əməkdaşı Ehsan Zahidov isə RATİ-nin əməkdaşı ilə telefon söhbətində bildirib ki, baş vermiş cinayət işi ilə bağlı istintaq davam edir: “İstintaq yekunlaşan kimi, bu barədə ictimaiyyətə, habelə Bahəddin Həziyevin özünə məlumat veriləcək”. Xatırladaq ki, 2006-cı il may ayının 18-dən 19-a keçən gecə naməlum şəxslər tərəfindən B.Həziyev yaşadığı evin yaxınlığından oğurlanaraq ağır işgəncələrə məruz qoyulub. B. Həziyevi mayın 19-u səhər ayağı sındırılmış və bədəninin müxtəlif yerlərindən çoxsaylı travmalar almış vəziyyətdə Abşeron rayonunun Masazır qəsəbəsi ərazisində yerləşən “Duzlu” gölün kənarında tapılmışdı. “ÇAP EVİ” MƏTBƏƏSİ “NOTA” QƏZETİNİ ÇAP ETMƏKDƏN İMTİNA EDİB “Çap evi” mətbəəsi “Nota” qəzetini, çap etməkdən imtina edib. Bu barədə Reportyorların Azadlıq və Təhlükəsizlik İnstitutuna (RATİ) “Nota” qəzetinin baş redaktor əvəzi Sərdar Əlibəyli məlumat verib. ““Çap evi” mətbəəsinin rəhbəri Şahbaz Xuduoğlu mayın 17-də mənə zəng edərək Mətbuat Şurası (MŞ) tərəfindən “Nota” qəzeti “reket” qəzetlər siyahısına daxil edildiyini və bu səbəbdən qəzetimizi daha çap etməyəcəklərini bilirdi”, - deyə qeyd edən S.Əlibəyli vurğuladı ki, “Nota” qəzetinin “reket” qəzetlər siyahısına daxil etdiyi üçün MŞ barədə sabah (20 may) Binəqədi rayon məhkəməsinə iddia ərizəsi təqdim edəcək. “Çap evi” mətbəəsinin rəhbəri Şahbaz Xuduoğlu məsələ ilə bağlı RATİ-yə bildirdi ki, bu qəzetin dərc edilməsindən MŞ-nin qərarına görə deyil, “Nota” qəzetinin bazar günü, yəni qeyri-iş günündə çap olunması ilə əlaqədar mtina edib: “Bu barədə də sözügedən qəzet rəhbərliyinə məlumat vermişik”. “Həftənin bazar günü də daxil olmaqla qeyri-iş günlərində “Çap evi” mətbəəsində digər qəzetlər nəşr olunur, bəs niyə imtina yalnız “Nota” qəzetinə aid edilib” - sualına isə Ş.Xuduoğlu cavab verməkdən imtina etdi. “YENİ ÇAĞ”, “ELÇİ” VƏ “HÜNƏR MEYDANI” QƏZETLƏRİNİN MƏHKƏMƏSİ TƏXİRƏ SALINDI Bu gün (19 may) Bakı Apellyasiya Məhkəməsində hakim Əflatun Qasımovun sədrliyi ilə Qazax rayon sakinləri Vidadi Yusifov və Təranə Yusifovanın “Yeni Çağ” , “Elçi” və “Hünər Meydanı” qəzetlərinə qarşı iddiası üzrə məhkəmə prosesi keçirilməli idi. Prosesdə cavabdehlərdən yalnız “Yeni Çağ” qəzetinin baş redaktoru Aqil Ələsgər (Fərəcov) və onun vəkili Ağalar Ağaşirinov iştirak edirdi. Ağalar Ağaşirinov digər cavabdehlərin prosesdə iştirak etməməyini əsas gətirərək məhkəmənin təxirə salınması ilə bağlı vəsatət qaldırdı. Hakim vəsatəti təmin edərək prosesi 2 iyun saat 11:30-a qədər təxirə saldı. Xatırladaq ki, iddiaya hər üç qəzetdə dərc olunmuş “Qazaxlı sahibkar” başlıqlı məqalə səbəb olub. İddiaçılar məqalədə şərəf və ləyaqətlərinin alçaldığını iddia ediblər və cavabdehlərin hər birinin 100 min manat həcmində cərimələnməsini tələb edirlər. “NOTA” QƏZETİNİN BAŞ REDAKTOR ƏVƏZİ VƏ ƏMƏKDAŞLARINA QARŞI KEÇİRİLMƏLİ OLAN MƏHKƏMƏ PROSESİ TƏXİRƏ SALINIB Bu gün (19 may) Xətai rayon Məhkəməsində hakim Bəhram Şükürovun sədrliyi ilə “Azadlıq Hərəkatçıları Birliyi”nin (AHB) sədri Təhmasib Novruzovun “Nota” qəzetinin baş redaktor əvəzi Sərdar Əlibəyliyə (Əliyev) qarşı Azərbaycan Respublikası Cinayət Məcəlləsinin (CM) 148-ci (təhqir), qəzetin əməkdaşları Ramiz Tağıyev və Fərəməz Novruzoğluna (Allahverdiyev) qarşı isə 147.2 - ci (ağır və ya xüsusilə ağır cinayətdə ittiham etməklə böhtan atma) maddələrinə əsasən xüsusi ittiham qaydasında qaldırdığı iddia üzrə məhkəmə hazırlıq iclası keçirilməli idi. Lakin hakim B. Şükürov məhkəmə prosesini mayın 20-i saat 15:00-a təxirə saldı. Buna səbəb kimi o, T.Novruzov haqqında yazılmış məqalələrin dərc olunduğu qəzetin həqiqətən də “Çap Evi” mətbəəsində çap edilməsini təsdiq edən arayışı almaq istəməsi ilə əlaqələndirib. Qeyd edək ki, mart ayında T.Novruzov haqqında yazılmış məqalələrlə bağlı Sərdar Əlibəyli, Ramiz Tağıyev və Fərəməz Novruzoğlu barəsində iddia qaldırmış və 31 mart tarixində Xətai rayon Məhkəməsində hakim Toğrul Əliyev yazılmış məqalələrin yanlış olması ilə bağlı “Nota” qəzetinin təkzib verməsi, üzr istəməsi barədə qətnamə qəbul etmişdi. Qətnaməyə əsasən təkzib verməli olan “Nota” qəzetinin 05-11 Aprel 2009 -cu il tarixli sayında dərc olunan “Şərəfi tapdanmış, ləyaqəti alçalmış Təhmasib Novruzovdan üzrxahlıq yazısı” başlıqlı məqaləyə görə T.Novruzov yenidən xüsusi ittiham qaydasında iddia qaldırmış və cavabdehlərin CM-nin 147.2 və 148-ci maddələrinə əsasən xüsusi ittiham qaydasında cəzalandırılmasını istəyir.
Bu gün (19 may) Xətai rayon Məhkəməsində hakim Habil Məmmədovun sədrliyi ilə Daxili İşlər Nazirinin müavini, Daxili Qoşunların komandanı, general-leytenant Zakir Həsənovun “Nota” qəzetinin baş redaktor əvəzi Sərdar Əlibəyliyə qarşı Cinayət Məcəlləsinin 147.2 (böhtan atma) maddəsi ilə xüsusi ittiham qaydasında qaldırdığı iddia üzrə məhkəmə hazırlıq iclası keçirilməli idi. Amma hakim H. Məmmədov məhkəmə hazırlıq iclasını 2 iyun saat 16:00-a qədər təxirə saldı. S.Əlibəylinin sözlərinə görə, hakim işlə əlaqədar olaraq yeni faktların olduğunu və bunları araşdırmaq məqsədilə hazırlıq iclasını təxirə saldığını bildirib. Xatırladaq ki, general-leytenant Zakir Həsənov “Nota“ qəzetində Daxili Qoşunlarla bağlı şərəf və ləyaqəti ləkələyən, onu nüfuzdan salan məqalələr dərc edildiyini iddia edərək Sərdar Əlibəylini CM-nin 147.2 (ağır və ya xüsusilə ağır cinayətdə ittiham etməklə böhtan atma) maddəsi ilə xüsusi ittiham qaydasında məhkəməyə verib. İDDİAÇILAR NAZİM QULİYEVİ BAĞIŞLADILAR Bu gün (19 may) Nəsimi rayon məhkəməsində hakim Elman Əhmədovun sədrliyi ilə “Azəri-Türk” Qadınlar Birliyinin sədri Tənzilə Rüstəmxanlı və Səbirə Mahmudovanın “İdeal” qəzetinin təsisçisi Nazim Quliyevə qarşı Cinayət Məcəlləsi 147.2 (ağır və ya xüsusilə ağır cinayətdə ittiham etməklə böhtan atma) və 148-ci (təhqir) maddələri ilə xüsusi ittiham qaydasında qaldırdığı iddia üzrə məhkəmə prosesi keçirilib. Qeyd edək ki, məhkəmə prosesinə jurnalistlər buraxılmayıb. Daha sonra məhkəmə müşavirəyə gedib və hakim E.Əhmədov məhkəmə prosesi günün ikinci yarısına təyin edib. S.Mahmudova jurnalistlərə bildirib ki, N.Quliyevin ailə vəziyyətini nəzərə alaraq xüsusi ittiham qaydasında olan iddialarını geri götürüblər və barışıq ərizəsini yazıblar. S. Mahmudova həmçinin onu da bildirdi ki,“İdeal” qəzetinin bağlanması ilə bağlı iddiasını geri götürməyib. Günün ikinci yarısı keçirilən məhkəmə prosesinə jurnalistlər yenə buraxılmadılar. Məhkəmə peosesi 20 may saat 15.00-a təyin edilib. Xatırladaq ki, T. Rüstəmxanlı və S. Mahmudova qaldırdıqları iddiada “İdeal” qəzetinin təsisçisi N.Quliyevin CM-nin 147.2, 148-ci maddələri ilə cinayət məsuliyyətinə cəlb edilməsi barəsində ittiham hökmünün çıxarılmasını məhkəmədən xahiş edirlər. Tənzilə Rüstəmxanlı və Səbirə Mahmudovanın 2008-ci il noyabrında Nəsimi rayon məhkəməsində N.Quliyevə qarşı xüsusi ittiham qaydasında iddia qaldırmış və hakim Elman Əhmədov N. Quliyev haqqında həbs-qətimkan tədbirinin seçilməsi barədə qərar çıxarmışdı. Lakin N.Quliyev məhkəməyə gəlmədiyinə görə barəsində axtarış elan olunmuş və 24 aprel 2009-cu ildə həbs olunmuşdur. “TURAN SERVİS”İN İDDİASI ÜZRƏ BAŞLANAN MƏHKƏM PROSESİ TƏXİRƏ SALINDI Bu gün (19 may) hakim Tahirə Əsədovanın sədrliyi ilə 1 saylı Yerli Bakı İqtisad Məhkəməsində “Turan Servis” şirkətinin direktoru Samir İsmayılovun Bakı Şəhər Vergilər Departamentinə qarşı qaldırdığı iddia üzrə məhkəmə prosesi keçirilməli idi. Lakin cavabdeh tərəfdən baş dövlət vergi müfəttişinin nümayəndələri Elman Məmmədov və Cəmil Məmmədovun məhkəmə prosesinə gəlmədiyindən hakim T.Əsədova prosesi 22 may, saat 14:00-a təxirə saldı. S.İsmayılovun sözlərinə görə, Vergilər Departamenti “Turan Servis” şirkətində audit yoxlama aparıb və şirkətin guya 3400 manat vergidən yayındığını aşkarlayıb. Bunun müqabilində department şirkəti 800 manat məbləğində cərimə edib. Bununla razılaşmayan və bunun doğru olmadığını deyən şirkətin direktoru S.İsmayılov yoxlamaların nəticələrinin ləvğ olunmasını, silinən məbləğin geri qaytarılmasını və məhkəmə xərclərinin iddiaçı tərəfindən ödənilməsini tələb edir. Xatırladak ki, iddiaçı “Turan Servis” Şirkətinin Bakı şəhər VD-inə qarşı Səyyar vergi yoxlamasının keçirilməi barədə 0801020031979300 №-li bildirişin, Səyyar vergi yoxlıamsının keçirilməsi haqqında 07.07.3008-ci il tarixli 08000100148398 №-li qərarın, Səyyar vergi yoxlamasının keçirilməsi haqqında qərarın müddətinin uzadılması haqqında olan 17.09.2008-ci il tarixli 08001700692341 №-li qərarın, Səyyar vergi yoxlamsı haqqında 18.09.2008-ci il tarixli 08000102683297 №0-li AKT-ın etibarsız hesab edilərək ləğv edilməsi, iddiaçıdan tutulmuş 972 manat 54 qəpik pul məbləğinin ona geri qaytarılması, vurulmuş maddi zərərə görə iddiaçıya 7000 manat, iddiaçının çəkdiyi məhkəmə xərclərinə görə 2000 manat cavabdehdən alınaraq iddiaçıya ödənilməsi, icranın dayandırılması barədə məhkəmə qərardadı olduğu halda cavabdehin iddiaçının bank hesablarına yeni sərəncamlar qoyması və iddiaçının hesabından pul sildirməsinin qanunsuz hesab olunmağını tələb edir.
Bu gün (19 may) Reportyorların Azadlıq və Təhlükəsizlik İnstitutunun (RATİ) mətbuat mərkəzində 1-ci qrup Qarabağ əlili, jurnalist, "Əlillərin hüquqlarını müdafiə komitəsi"nin sədri Məğrur Bədəlsoy əlillərin qanunla qorunan hüquqlarının tapdanması ilə bağlı mətbuat konfransı keçirdi. Tədbirdə çıxış edən M.Bədəlsoy əlillərin formal olaraq beynəlxalq konvensiyalara, ölkə konstitusiyasına və qanunlara uyğun olaraq geniş hüquqlara malik olduğunu, lakin Azərbaycanda qanunların icra və tətbiq olunmadığını bildirdi. O, "Torpaq islahatı haqqında" qanunun 14 və 19-cu maddəsinə görə müharibə əlillərinə dövlət torpaqlarından 2 pay, bələdiyyə torpaqlarından bir dəfə pulsuz torpaq verilməli olduğu halda bələdiyyələrin əlillərə torpaq verməkdən imtina etdiklərini bildirdi. "Əlillərin sosoal müdafiəsi haqqında" qanunun 30-cu maddəsində icra orqanlarının əlillərə qeyri-yaşayış otaqları vermək və xammalla təmin etməklə sahibkarlıq fəaliyyətləri və evdə əməklərinin təşkilinə şərait yaradılması təsbit olunsa da, bu hüquqdan da məhrum edilmişik", - deyə M.Bədəlsoy qeyd etdi. O, vergi əməkdaşlarının ondan aylıq haqq istədiklərini, verməyəndə isə haqsız yerə cərimə olunduğunu bildirdi: "2 saylı yerli İqtisad məhkəməsi (hakim-İlham Əhmədov) mən xəstəxanada olduğum halda (arayış təqdim olunub) iddia ərizəsi belə vermədən VN-nin sifarişi ilə əmlakımın satışa çıxarılması barədə qətnamə qəbul edib. Apellyasiya Məhkəməsi (hakim-Vaqif Mursaqulov) də mənə xəbər etmədən qətnaməni qüvvədə saxlayıb", - deyən M.Bədəlsoy vəkillə təmin olunmadığı üçün kassasiya şikayəti verə bilmədiyini də qeyd etdi.
web: www.irfs.az skype: irfs.az  |