Ana səhifə

Palapala hoopii


Yüklə 108 Kb.
tarix26.06.2016
ölçüsü108 Kb.
PALAPALA HOOPII.

I ka Peresidena, ka Ahaolelo a me ka Lahuikanaka o Amerika Huipuia.

Ke hoike haahaa aku nei keia Palapala Hoopii e like me ia mahope iho:

1. O ko oukou poe hoopii, he poe lakou e noho ana ma ko Hawaii Paeaina; he poe Hawaii oiwi kumu maoli ka hapanui o lakou; a ua loaa hoi ia lakou a pau na haawina kupono i hoakakaia no na poe koho i na Lunamakaainana iloko o ka Ahaolelo Hawaii ma o ke Kumu-kanawai a me na kanawai e mau ana ma ko Hawaii Paeaina ma. ka la o ka hookahulihiaia ana o ke Aupuni Kumukanawai Hawaii, Ianuari 17, l893.

2. Ua paa na poe kokua o ke Kumukanawai o 1887 i ka hoomaluia, mai ia wa mai a hiki i nei wa iloko o ka makahiki 1897, ma o na pualikoa la i lako me na mea kaua o ke Au-puni Kuikawa o ko Hawaii Paeaina, a o kona hope aku, ka Repubalika o Hawaii; a aole loa hoi i haawi pio iki, a aohe hoi i ike aku i kekahi noho'na makaainana i ulu wale ae, a i ole ia, laulea a kokua wale aku paha hoi i ua Aupuni Kuikawa la i oleloia, a i ole ia, i ka Repubalika o Hawaii i oleloia.

3. Aohe hoi he mana o ke Aupuni o ka Repubalika o Hawaii no kona ku mau ana iloko o ke kokua ana o ka lahui o keia mau Paemoku; ua kukala a ua kukuluia, a ua mau hoi ma-mua a ke mau nei no hoi, me ka noonoo ole ae i na pono a me na makemake o kekahi hapa-nui loa o na poe noho, mai na oiwi maoli a me na haole i hanauia, o ko Hawaii Paeaina; a ua oi loa aku hoi eia ke Aupuni i oleloia ke mau a ke malama nei iaia iho ma o ka ikaika wale la no o na mea kaua, e kue ana hoi i na pono a me na makemake o ka lahui kumu i aneane e pau holookoa loa o keia mau Paemoku

4 Aole hoi a aole loa no ua Repubalika la i hookahuaia a i lawelaweia paha hoi malu-na o kekahi kahua o ke Aupuni i hoihoiia e ka lahui, a i ole ia, hookeleia ma ke ano repubalika; ua aponoia hoi kona Kumukanawai e kekahi aha-elele, he hapanui hoi o kona mau lala ka i koho.maoli iho no ia lakou iho, a o ke koena aku hoi o kona mau lala ua kohoia lakou e kekahi heluna hapauuku mailuilu haalele loa o na kane kupa a poe noho haole a oiwi maoli o keia mau Paemoku; ua hui hoi me kahi hapanui o na poe i koho ai pela no na elele i ua Aha-elele Hana Kumukanawai la he poe malihini, a o kekahi hapanui hoi o na malihini i oleloia, he poe hou loa o ka noho ana mai, me na pomaikai dala ole a noho'na ano laulea paha hoi ma keia mau Paemoku.

5. Aole loa ke Kumukanawai i aponoia ai pela e ka Aha-elele i oleloia i waihoia mai no kekahi koho ana o ka lahuikanaka o keia mau Paemoku; eia nae, ua kukalaia a hookahuaia maluna ae o na Paemoku i oleloia, a ua mau mai no hoi ia malamaia ana, mamuli wale no o ka ikaika o na lako kaua, a me ka hoomaopopo ole ae hoi i ka makemake o ka lahui kumu holo-okoa maoli no, a uie kekahi hapanui hewahewa loa no hoi o ka lahuikanaka o keia mau Paemoku.

6. Ua lawe a ke hooia nei ke Aupuni i oleloia, e mau nei hoi pela malalo o ka inoa o ka Repubalika o Hawaii, i ke kuleana e kinai loa i ke kulana Lahui o na Hawaii, i mau hoi mamua aku nei, a e hoohui a hoolilo aku hoi i na kuleana a pau o ka noho mana kiekie ana maloko a maluna ae o ko Hawaii Paeaina a me ko lakou mau panalaau i kekahi mana okoa aku, oia hoi, ia Amerika Huipuia.

7. Ua lohe hoi ko oukou poe hoopii me ka ehaeha a me ke kahaha ua komo aelike pu ae ka Peresidena o Amerika Huipuia, a ua waiho aku hoi no ka aponoia mai e ko Amerika Huipuia Aha Senate ma kekahi Kuikahi me ke Aupuni o ka Repubalika o Hawaii, a ma ia hoi i manaoia ai e kinai loa i ko makou noho ana ma ke ano he Aupuni, a e hoohui aku hoi i ko makou aina ia Amerika Huipuia.

8. Ua maa hoi ka lahui Hawaii, no kekahi manawa i oi i kekahi hapa keneturia ma-mua aku o na hana i haiia ae la maluna, i ke komo pu ana ma na ano hooponopono Aupuni ku i ke Kumukanawai, ma ke koho ana i na Ahaolelo, ma ka hooko ana i ka pono hookolokolo ma o na lunakanawai, na aha hookolokolo a me na kiure i hookohu kupono ia, a ma o ka hoo-ponopono ana hoi i na hana o ka lehulehu ma o na luna la o na makaainana, a ma ia hoi i aeia ai a i hookahua paa loa ia ai hoi ka loina hooponopono aupuni ma o na hapanui 1a.

9. Ke kue haahaa aku nei ko oukou poe hoopii, aka, me ka manao ikaika loa no ka hoo-koia aku o nei keehia mai o ko lakou mau pono kalaiaina; a ke uwalo aku nei hoi lakou me ka manao kuoo loa i ka Peresidena, ka Ahaolelo a me ka Lahuikanaka o Amerika Huipuia, e hooki ma ke komo hou ana aku ma ka hana hewa i manaoia ai pela ae 1a ka e hana mai ai; a ke pule aku nei lakou ma ke kakoo ana i keia palapala hoopii i ka manao o kela Palapala ola mau loa, ke Kuahaua o ke Kuokoa Amerika, a oi loa aku hoi, i ka oiaio i hoikeia maloko o laila, ua loaa i na Aupuni ko lakou mau mana kaulike mai ka ae aku o na poe i hoomaluia,—a ke puana hou nei hoi maanei, aole loa ia i uiia mai a aole no hoi i haawiia aku ka ae ana o ka lahuikanaka o ko Hawaii Paeaina i na ano o ke Aupuni i hookauia iho e ka Repubalika o Ha-waii i hea wale ia, a i ua Kuikahi Hoohui la hoi i manaoia ai, i ke Aupuni i oleloia, a i ole ia, i ke kumuhana Hoohuiaina i oleloia.

10. O ka hookoia ana aku o ke kumuhana Hoohuiaina i hoakakaia maloko o ke Kui-kahi i oleloia, he kinai ana no ia i na pono pilikino a kalaiaina o keia poe hoopii, a o ka lahui a Aupuni Hawaii hoi, a he hoole loa ana no hoi ia i na pono a me na loina i kukalaia ai ma ke Kuahaua o ke Kuokoa Amerika, maloko o ke Kumukanawai o Amerika Huipuia, a ma na ano o ka hooponoponoia ana o na Aupuni makaainana a naauao e ae a pau loa

11. Nolaila. ke waiho haahaa aku nei ko oukou |poe hoopii ua kuleana no hoi lakou, i emi ole iho hoi i ko na makaainana o kekahi mokuaina Amerika, e wae, kauoha a kukulu ae no lakou iho, i na ano o ke Aupuni a lakou e manao ai ua kupono loa ia no ko lakou palekana a me ka hauoli; a o na ninau hoi i ano nui loa i ka lahui Hawaii e like la hoi me ia i manaoia ai e hooponoponoia ma o ke Kuikahi i oleloia, he mau ninau ia i kuleana ai ka lahui i oleloia, maloko o ka waihona o ka Lunaikehala, e hooloheia mai; a hiki mai nae hoi i nei wa ua hooleia ka lahui Hawaii i oleloia i ke kuleana e hooloheia maluna o na ninau i oleloia.

12. A ke nonoi haahaa aku nei hoi ko oukou poe hoopii i ka Peresidena, ka Ahaolelo a me ka lahuikanaka o Amerika Huipuia, aole loa kahi keehina hou aku e laweia no ka hoapono loa ana aku i ke Kuikahi i oleloia,. a i ole ia, ma ke kinai ana paha hoi i ke Kulana Lahui o na Hawaii, a i ole ia, ma ka alapoho ana aku paha hoi i ka lahui a me ka aina Hawaii iloko o ka mahele kalaiaina a panalaau no Amerika Huipuia, ma ke ano uuku loa nae hoi, aia a hiki i ko ka lahui Hawaii wa e kupono ai no na koho ana o na lunamakaainana iloko o ka Aha-olelo, ke loaa he manawa e hoike ai ma ka pahu balota, i ko lakou mau manao ana ina paha e aeia a e hooleia paha hoi ua kumuhana Hoohuiaina la, e like me ia i ku hope ia ai e kela poe makaainana a poe noho hoi o ko Hawaii Paeaina, i kaa nui malalo o na hoakaka ana o ke Kumukanawai Hawaii i kukalaia ia i Iulai 7, 1887.

13. A o ko oukou poe hoopii hoi, no lakou iho, a ma ka aoao hoi o ka lahui Hawaii, a no na poe noho hoi o ko Hawaii Paeaina, ke hoopaa nei i ko lakou manaoio ina e haawiia mai ana ia lakou ka pono o ke koho balota ana maluna o na ninau i oleloia, ma kekahi koho ana kuokoa a kaulike e malamaia aku ana no ia mea; a ina hoi ua hoikeia ae ma ka helu pono ia ana o na balota e kohoia ana ma ia koho balota ana ua kokua kekahi hapanui ma ia hoohui ana, e haawi pio aku no keia poe hoopii, a me ka lahui Hawaii i kekahi ae hololea a oluolu ana ma ia kumuhana i oleloia.

the signatures above are:

1. J. Kalua Kahookano

2. Samuel K. Pua

3. F. J. Testa

4. C. B. Maile

5. Samuel K. Kamakaia, Komite o ka Lehulehu (Citizens’ Committee)

6. James Keauiluna Kaulia, Peresidena o ka Ahahui Hawaii Aloha Aina



7. David Kalauokalani, Peresidena o ka Hui Kalaiaina Hawaii.


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət