Ana səhifə

Reportyorların Azadlıq və Təhlükəsizlik İnstitutu


Yüklə 109.5 Kb.
tarix27.06.2016
ölçüsü109.5 Kb.
Reportyorların Azadlıq və Təhlükəsizlik İnstitutu

Azərbaycanda ifadə azadlığına dair gündəlik xəbərlər



16 avqust 2012-ci il

Bakı, Azərbaycan


  • YENİ MEDİADA ETİK QAYDALARLA BAĞLI TƏLİM KEÇİRİLƏCƏK

  • İNTERNET İDARƏÇİLİK FORUMU ÜZRƏ TƏLİMƏ DƏVƏT !

  • NİCAT ƏLİYEV HAQQINDA SEÇİLMİŞ HƏBS QƏTİMKAN TƏDBİRİNİN MÜDDƏTİ DAHA İKİ AY ARTIRILDI

  • SƏDƏRƏK GÖMRÜYÜNDƏ JURNALİSTƏ TƏZYİQ EDİLİB

  • FƏRƏMƏZ NOVRUZOĞLUNUN MƏHKƏMƏSİ YEKUNLAŞMAQ ÜZRƏDİR


YENİ MEDİADA ETİK QAYDALARLA BAĞLI TƏLİM KEÇİRİLƏCƏK

            Reportyorların Azadlıq və Təhlükəsizlik İnstitutu 22 avqust tarixində gənclər üçün yeni mediada etik qaydalar və hüquqi tənzimlənilməsi mövzusunda  təlim təşkil edir. Təlim İREX təşkilatının maliyyə  dəstəyi ilə həyata keçirilir.


            Təlimdə Bakıdan və Azərbaycanın digər regionlarından olan gənclər iştirak edə bilərlər. Regionlardan olan şəxslərin nəqliyyat xərcləri ödəniləcək. Seçilmiş şəxslər tam təlim müddətində iştirak etməlidirlər.
            İştirak etmək arzusunda olan şəxslər  CV-lərini  20 avqust tarixinə qədər mmtraning@gmail.com adresinə göndərə bilərlər. Üstünlük Azərbaycanın regionlarından olan gənclərə veriləcək.

Əlavə məlumat üçün 408-75-30 nömrəsinə zəng edə bilərsiniz. 



İNTERNET İDARƏÇİLİK FORUMU ÜZRƏ TƏLİMƏ DƏVƏT !

İfadə Azadlığı Təşəbbüsü və DW-AKADEMIE Sizi “İnternet İdarəçilik Forumunun işıqlandırılması” adlı beş günlük təlimə dəvət edir. Seminarın məqsədi İnternet İdarəçilik Forumunun təqdim olunması və bu tip mövzunun işıqlandırılmasına internet nöqteyi-nəzərindən yanaşmaların müzakirə olunmasıdır. Təlim müddətində iştirakçıların onlayn jurnalistikanın mahiyyəti barədə fikirlər irəli sürmək, janr məsələlərini və rəqəmsal media məzmunlarını müzakirə etmək imkanları olacaq, lakin seminar daha çox praktik mahiyyət daşıyacaq. İştirakçılar seminar müddətində web tapşırıqlar hazırlayacaq, onları tədqiq edəcək və təlimin internet saytında dərc edəcəklər.



Seminarın keçirilmə vaxtı və müddəti:

27-31 Avqust, 2012—saat 10.00 -17.00



Təlimin keçirilmə yeri:  RATİ ofisi, Rəşid Behbudov küç 8, mənzil 85/86

NİCAT ƏLİYEV HAQQINDA SEÇİLMİŞ HƏBS QƏTİMKAN TƏDBİRİNİN MÜDDƏTİ DAHA İKİ AY ARTIRILDI

Bu gün (16 avqust) Nəsimi Rayon Məhkəməsində hakim Şahin Abdullayevin sədrliyi ilə keçən prosesdə “azadxeber.org” saytının baş redaktoru Nicat Əliyev haqqında seçilmiş həbs qətimkan tədbirinin müddətinin daha 2 ay uzadılması barədə qərar çıxarılıb. Bu barədə “Media forum” xəbər saytı məlumat yayıb.

Məlumatda qeyd olunur ki, baş redaktorun vəkili Anar Qasımlı bu dəfəki məhkəmə prosesin bir ay bundan əvvəl baş tutmuş prosesə bənzədiyini bildirib.

“Bir ay əvvəl hüquqlarını müdafiə etdiyi Nicat Əliyevin həbs müddəti artırıldı. O vaxt istintaq yeni ittiham irəli sürüləcəyini açıqlamış və istintaq hərəkətlərinin aparılmasının vacibliyini əsas gətirmişdi. Lakin ötən müddət ərzində nə yeni ittiham irəli sürüldü, nə də istintaq hərəkəti aparıldı. Bu dəfə də istintaq tərəfi həbs müddətinin uzadılmasının zəruriliyini yeni ittiham irəli sürülməsi ilə əlaqələndirib”, - deyə A.Qasımlı bildirib.

Xatırladaq ki, 2012-ci may ayının  20-də axşam saat 19-20 radələrində İslam dini yönlü “azadxeber.az” saytının baş redaktoru Nicat Əliyev “Memar Əcəmi” metro stansiyası yaxınlığında yerləşən "Killer" kişi geyimləri mağazasının qarşısında saxlanılaraq Yasamal rayonu Polis İdarəsinin 27-ci Polis Bölməsinə aparılıb. Daha sonra baş redaktora qarşı  Cinayət Məcəlləsinin (CM) 234.1-ci maddəsi (qanunsuz olaraq narkotik vasitələri, psixotrop maddələri və ya prekursorları hazırlama, istehsal etmə, əldə etmə, saxlama, daşıma, göndərmə və ya satma) ilə ittiham irəli sürülüb və barəsində 2 ay müddətində  həbs qətimkan tədbiri seçilib. Hal-hazırda Nicat Əliyev Kürdəxanı təcridxanasında saxlanılır.

SƏDƏRƏK GÖMRÜYÜNDƏ JURNALİSTƏ TƏZYİQ EDİLİB

Reportyorların Azadlıq və Təhlükəsizlik İnstitutunun (RATİ) Naxçıvan Muxtar Respublikası üzrə bölgə müxbiri Elman Abbasov Sədərək gömrük-buraxılış məntəqəsinin əməkdaşları tərəfindən təzyiqlərə məruz qalıb. Bu barədə jurnalistin özü məlumat verib.

Avqustun 14-də o, Amerikanın İREX təşkilatının layihəsi çərçivəsində regionda miqrasiya proseslərinin jurnalist araşdırması ilə bağlı Türkiyəyə gedib. O, gömrükçülərin əsassız iradları ilə bağlı əvvəlki vəziyyəti nəzərə alaraq sərhədi keçərkən üzərində olan əşyaları qeyd etdirmək üçün blank istəyib. Lakin ona blank verilməyib və bildirilib ki, geri qayıdanda onsuz da yoxlanılacaq.

Avqustun 15-də qayıdarkən E.Abbasov saxlanılıb. Sədərək gömrük-buraxılış məntəqəsinin qaçaqmalçılıq şöbəsinin rəisi Vüsal Həsənovun iştirakı ilə onun əşyalarına baxış keçirilib.

E.Abbasovun sözlərinə görə, gömrükçülər fleş-kartda və fotoaparatda olanları yoxlayıblar, halbuki, orada şəxsi xarakterli informasiya olub. Bundan əlavə, kobud şəkildə E.Abbasovun əşyalarını, geyimlərini dağıdaraq diktofon axtarıblar.

E.Abbasov həmkarlarını çağırdıqdan sonra gömrükçülər onu buraxıblar.  

E.Abbasov və digər müstəqil jurnalistlər, vətəndaş cəmiyyətinin fəalları gömrük orqanının ünvanına tənqidi yazılarla əlaqədar dəfələrlə gömrükçülər tərəfindən təzyiqlərə məruz qalıblar.

Müşahidəçilərin fikrincə, E.Abbasovla indi baş verənlər yerli hakimiyyətin regionda miqrasiya prosesləri ilə bağlı jurnalist araşdırmasından yaranan narahatlığı ilə əlaqədardır.


FƏRƏMƏZ NOVRUZOĞLUNUN MƏHKƏMƏSİ YEKUNLAŞMAQ ÜZRƏDİR

Bu gün (16 avqust ) Nizami rayon Məhkəməsində hakim İmran Burcayevin sədrliyi ilə jurnalist Fərəməz Novruzoğlunun (Allahverdiyev) işi üzrə məhkəmə prosesi keçirildi.

            Prosesdə təqsirləndirilən Fərəməz Novruzoğlu və ona dövlət tərəfindən təyin edilmiş yeni vəkil Zabit Məmmədov, eləcə də dövlət ittihamçısı Əsədulla Ramazanov iştirak ediblər. 

F. Novruzoğlu iş üzrə ifadə verən şahidlərin ifadələrinin protokolda təhrif olunduğunu, məhkəmənin qərəz nümayiş etdirdiyini deyərək, məhkəmə tərkibinə etiraz etdiyini bildirib.

Qısa müşavirədən sonra hakim etirazın baxılmadan saxlanılması barədə qərarını elan edib.

Daha sonra vəkil Z. Məmmədov Novruzoğlunun barəsində bəraət hökmü çıxarılmasını məhkəmədən xahiş edib.

F. Novruzoğlu son çıxış üçün məhkəmədən vaxt istədi. Hakim İ. Burcayev məhkəməni 22 avqust saat 14:00-a təyin etdi.

             Xatırladaq ki, 18 aprel 2012-ci ildə jurnalist Fərəməz Novruzoğlu  gecə saatlarında Baş Prokurorluğunun Ağır Cinayətlərə Dair İşlər üzrə İstintaq İdarəsinin  xüsusi əməliyyatı nəticəsində həbs edilib. Jurnalist Cinayət Məcəlləsinin 220.2-ci (Hakimiyyət nümayəndəsinin qanuni tələblərinə fəal şəkildə tabe olmamağa və kütləvi iğtişaşlara, habelə vətəndaşlara qarşı zorakılıq etməyə çağırışlar etmə) və 318.1-ci (Azərbaycan Respublikasının mühafizə olunan dövlət sərhədini müəyyən edilmiş sənədlər olmadan və ya dövlət sərhədinin nəzarət-buraxılış məntəqələrindən kənarda keçmə) maddələri ilə ittiham olunur. Cinayət əməli təsdiq olunarsa, onu 10 ildən 15 ilə qədər həbs cəzası gözləyir.

Qeyd edək ki, F. Novruzoğlu müxtəlif qəzetlərdə çalışıb, son olaraq “Millətim” qəzetində baş məsləhətçi kimi çalışıb.

MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN

 

Reportyorların Azadlıq və Təhlükəsizlik İnstitutu (RATİ)



Ünvan: Azərbaycan, Bakı şəh., Behbudov 8, mənzil 85/86

tel: (+99 412) 408-08-42 ; 408-75-30, fax: (+ 99 412) 598-45-19

QAYNAR XƏTT + 994 12 408 75 30



e-mail: irfs.az@gmail.com

web: www.irfs.az skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət