Ana səhifə

Press-reliZ 23 Fevral 2012-ci IL Bakı, Azərbaycan


Yüklə 21.98 Kb.
tarix25.06.2016
ölçüsü21.98 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ
23 Fevral 2012-ci il

Bakı, Azərbaycan




"BAKIDA VƏ REGİONLARDA FƏALİYYƏT GÖSTƏRƏN QHT VƏ QHT FƏALLARININ NƏZƏRİNƏ!

  Sizi kommunikasiya strategiyaları və texniki bacarıqların inkişafı üzrə təlimlərimizə dəvət edirik.

  RATİ, Demokratik Jurnalistika Məktəbi  və RİHMM vətəndaş cəmiyyətinin kommunikasiya imkanlarını təkmilləşdirmək, bölgələrdəki ictimai problemləri və olayları daha yaxşı işıqlandırmaq üçün yeni layihəyə başlayır. Təlimlərdə iştirak etməklə siz aşağıdakı bilik və vərdişlərə yiyələnə bilərsiniz:

- xəbər, foto və videoların hazırlamağın və yaymağın texniki üsulları;

- QHT və digər təşkilatların öz işində xalq jurnalistikasında uğurla faydalana bilməsi imkanları;

- etik və hüquqi problemlərin həlli yolları;

- internetdən istifadə etməklə potensial partnyorlarla peşəkar şəbəkənin qurulması və inkişafı;

- əldə olan vasitələrdən, kompüter proqramlarından, vebsaytlardan istifadə etməklə fəaliyyətin gücləndirilməsi;

  Təlimlər 5 bölgədə (Bakı, Gəncə, Lənkəran, Kürdəmir və Naxçıvan) keçiriləcək. Fevralın 15-dən başlayaraq, ölkənin müxtəlif bölgələrində təşkil edəcəyimiz təlimlərdə iştirakçılarını seçiminə başladıq. İstəyiniz varsa, son müraciət tarixinədək özünüz haqda bizə yazın (obyektiv.kadr@gmail.com). Harada yaşayırsınız, yaşınız, təhsiliniz, məşğuliyyətiniz, internetdəki maraqlarınız  barədə və s. 

  Mart ayı ərzində Bakı, Gəncə və Lənkəranda keçiriləcək təlimlərin keçiriləcəyi tarixlər:

  Bakı  – 5-6 mart (müraciət üçün son tarix 29 fevral);

Gəncə – 17-18 mart (müraciət üçün son tarix 12 mart);

Lənkəran – 31 mart-1 aprel (müraciət üçün son tarix 26 mart)

 

Əlaqə: 


Telefon:(012) 4087530 "
ƏVƏZ ZEYNALLININ HƏBSİNİN 4 AYI TAMAM OLDU
Bu gün (23 fevral) Reportyorların Azadlıq və Təhlükəsizlik İnstitutunun (RATİ) mətbuat mərkəzində “Xural” qəzetinin həbsdə olan baş redaktoru Əvəz Zeynallının işi üzrə jurnalistlərin “Preventiv tədqiqat qrupunun” hesabatının ingilis dilində olan versiyasının təqdimatı keçirilib.

    Bu gündən etibarən hesabatın beynəlxalq təşkilatlar, KİV, habelə “Eurovision 2012” müsabiqəsinin xarici iştirakçıları arasında yayılmasına başlanır.

    Preventiv qrupun rəhbəri jurnalist Əfqan Muxtarlı bildirib ki, qrup hakimiyyətin və istintaq orqanlarının Zeynallı barəsində hərəkətlərini izləməyə davam edir. O, “Xural”ın müsadirə olunmuş əmlakının redaksiyadan xəbərsiz satıldığını və qəzetin vergi yoxlamasına başlandığını qeyd edib.

    Redaktorun vəkili Elçin Sadıqov məlumat verib ki, Vergi Auditi Departamenti 7251,20 manat məbləğində vergidən yayınma ittihamı ilə cinayət işi açıb və bununla əlaqədar 3625.60 manat vergi cəzası tətbiq edib.

    Bu məbləğ belə bir hesablama nəticəsində ortaya çıxıb: 2006-cı ildən bəri hər gün hər biri 40 qəpikdən 2200 tirajla 226 nömrə. Amma qəzet nümayəndələri bildiriblər ki, qəzet heç vaxt bu qədər tirajla çıxmayıb. Vergi müfəttişləri isə satılmış qəzetlərlə bağlı real göstəriciləri nəzərə almayıblar, qəzet nüsxələri 26 qəpiyə satılıb ki, bu da sənədləşdirilib. Sadıqov qeyd edib ki, müdafiə tərəfi vergi müfəttişlərinin əməllərindən məhkəməyə şikayət verəcək və yoxlanış aktının ləğvini tələb edəcək.

    “Xural” redaktorunun ikinci vəkili Məsum Bayramov qeyd edib ki, istintaq təcridxanasında Zeynallının hüquqlarının pozulması faktları yayıldıqdan sonra Penitensiar Xidmətin ona münasibəti pisləşib. Belə ki, fevralın 22-də istintaq təcridxanasının işçiləri Zeynallının bəyanatını vəkil Elçin Sadıqovun əlindən alıblar. Sadıqov, Penitensiar Xidmətin əməllərindən məhkəməyə şikayət etmək niyyətində olduğunu bildirib.

    Qəzetin kollektivi və jurnalistlər Zeynallının hüquqlarının bundan sonra da müdafiəsi üçün bir sıra addımlar atılması barədə qərar qəbul ediblər. O cümlədən onlar ombudsmanla görüşmək, habelə həbsdə olan Əvəz Zeynallı ilə görüşə nail olmaq niyyətindədirlər.

RATİ sədri Emin Hüseynov isə çıxışı zamanı media qurumalarının, baş redaktorların, eləcə də digər media nümayəndələrinin müraciət hazırlayaraq Zeynallının saxlanıldığı həbsxana rəhbərliyinə göndərilməsi barədə təklif irəli sürdü:

“Bu gün faktiki olaraq, Əvəz bəyin ətrafında informasiya vakumu yaradılıb. Təklif edirəm ki, media qurumları adından Əvəz Zeynallı ilə Gülər Əhmədovanın iştirakı ilə birgə görüşə getmək üçün Penitensiar Xidmətə  məktub ünvanlayaq. Habelə  deputat Gülər Əhmədova hətta şikayətçi qismində olsa belə özü dindirmə və üzləşdirməyə getmir. İstintaqa Milli Məclis deputatının toxunulmazlıq hüququ olduğunu deyir, amma vətəndaş cəmiyyəti qarşısında onun toxunulmazlıq hüquq yoxdur”,- deyə E.Hüseynov bildirdi.

Sonda tədbir iştirakçıları Penitensiar Xidmətin rəisinə, ombudsmana və deputat Gülər Əhmədovaya Əvəz Zeynallı ilə görüş keçirmək üçün müraciət məktubu  ünvanlamaq barədə qərara gəldilər.

Xatırladaq ki, “Xural” qəzeti 2002-ci ilin oktyabr ayından həftəlik, 2011-ci il sentyabr ayının 20-dən gündəlik dərc olunurdu. Prezident Administrasiyasının rəhbəri Ramiz Mehdiyevə, KİV-ə Dövlət Dəstəyi Fondunun icraçı direktoru Vüqar Səfərliyə və digərlərinə olan ümumilikdə 19 min manat məhkəmə cəriməsini ödəyə bilmədiyinə görə, oktyabrın 19-da “Xural” qəzetinin əmlakı müsadirə olunub. Mətbəələr də qəzeti çap etməkdən imtina etdiyinə görə, qəzet oktyabrın 21-dən etibarən fəaliyyətini dayandırıb. Qəzetin baş redaktoru Əvəz Zeynallı isə Milli Məclisin deputatı Gülər Əhmədovanın iddiası ilə oktyabrın 28-də həbs edilib. Korrupsiyaya Qarşı Mübarizə İdarəsində baş redaktor barəsində Cinayət Prosessual Məcəlləsinin 311.3.3 (külli miqdarda rüşvət alma) və 311.3.4-cü (hədə-qorxu tətbiq olunmaqla rüşvət alma) maddələri ilə cinayət işi başlanıb və Nəsimi rayon Məhkəməsinin qərarı ilə haqqında 3 ay müddətinə həbs qətimkan tədbiri seçilib, yanvarın 17-də isə bu müddət daha 3 ay artırıldı.

AzTV-NİN SAYTINA HAKER HÜCUMU OLUB
Fevralın 22-də axşam saatlarında özlərini “İranın Kiber Ordusu” adlandıran hakerlər Azərbaycan Dövlət Televiziyasının saytına hücum ediblər.

Azərbaycanın Telekommunikasiya Nazirliyinin yaydığı məlumatda bildirilir ki, hakerlər televiziyanın ana səhifəsini siliblər, yerinə ingilis dilində «Life is Game, Game Over!» (Həyat oyundur, oyun bitdi) mesajını qoyublar. 

Qeyd edək ki, həmin günü “İdman Azərbaycan” və “Mədəniyyət TV” nin saytlarına da  haker hücumu olub. 

Hazırda AzTV və Mədəniyyət TV saytlarının işi bərpa olunub. “İdman Azərbaycan” saytının normal işi isə bərpa olunur.


MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN

 

Reportyorların Azadlıq və Təhlükəsizlik İnstitutu (RATİ)



Ünvan: Azərbaycan, Bakı şəh., Behbudov 8, mənzil 85/86

tel: (+99 412) 408-08-42 ; 408-75-30, fax: (+ 99 412) 598-45-19

QAYNAR XƏTT + 994 12 408 75 30



e-mail: irfs.az@gmail.com

web: www.irfs.az skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət