Ana səhifə

Press-reliZ 16 iyun 2009-cu IL Bakı, Azərbaycan


Yüklə 32.83 Kb.
tarix25.06.2016
ölçüsü32.83 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ

16 iyun 2009-cu il

Bakı, Azərbaycan



  • ELAN!

  • EMİN HÜSEYNOVUN İDDİASINA ƏSASƏN QƏTNAMƏ SABAH ELAN OLUNACAQ

  • AVROPA ŞURASI AZƏRBAYCANDA KİV VƏ QHT HAQQINDA QANUNA TƏKLİF EDİLƏN DƏYİŞİKLİKLƏRDƏN NARAHATDIR

  • MİLLİ QHT FORUMUNUN İDARƏ HEYƏTİ QHT QANUNUNA DƏYİŞİKLİKLƏR LAYİHƏSİNƏ ETİRAZ EDİB

  • HÜQUQ MÜDAFİƏÇİSİ ELÇİN BEHBUDOV EYNULLA FƏTULLAYEVLƏ GÖRÜŞÜB

  • MTRŞ-YƏ QARŞI İDDİA ÜZRƏ MƏHKƏMƏ PROSESİ KEÇİRİLD

  • AZƏR ƏHMƏDOVUN İDDİASI ÜZRƏ KEÇİRİLMƏLİ OLAN MƏHKƏMƏ PROSESİ TƏXİRƏ SALINIB

  • MTRŞ ANS ÇM RADİOSUNA ŞİFAHİ XƏBƏRDARLIQ EDİB



ELAN!

 

SABAH – 17 İYUN SAAT 12:00 Reportyorların Azadlıq və Təhlükəsizlik İnstitutunun Mətbuat Mərkəzində vətəndaş Bəxtiyar Osmanov bacısı qızı Günel Məmmədovanın “Datasel” MMC-də işləyərkən haqsızlığa məruz qalması və qanunsuz işdən çıxarılması ilə bağlı mətbuat konfransı keçirəcək.

Konfransa jurnalistlər, diplomatik korpusun nümayəndələri, ictimai-siyasi xadimlər və hüquq müdafiəçiləri dəvət olunurlar.

EMİN HÜSEYNOVUN İDDİASINA ƏSASƏN QƏTNAMƏ SABAH ELAN OLUNACAQ
Bu gün (16 iyun) Nəsimi rayon Məhkəməsində hakim İkram Şirinovun sədrliyi ilə Reportyorların Azadlıq və Təhlükəsizlik İnstitutunun (RATİ) sədri Emin Hüseynovun polis təzyiqinə məruz qalması ilə bağlı Daxili İşlər Nazirliyinə (DİN), Nəsimi rayon Polis İdarəsinə (RPİ) və Nəsimi rayon Polis İdarəsinin 22-ci Polis Bölməsinə qarşı qaldırdığı iddia üzrə məhkəmə prosesi keçirildi.

Məhkəmə prosesində iddiaçı E.Hüseynovun səlahiyyətli nümayəndəsi, Media Hüququ İnstitutunun vəkili Elçin Sadıqov, cavabdeh tərəfdən Nəsimi RPİ və Nəsimi RPİ-nin 22-ci Polis Bölməsinin vəkili Məzahir Şahbarov iştirak edirdi. DİN-in nümayəndəsi prosesdə iştirak etmirdi.

Prosesdə tərəflərin ötən iclasdakı yekun çıxışları ilə bağlı replikaları dinlənildi və hakim iş üzrə qətnamənin elan olunması ilə son prosesi sabah (17 iyun) saat 17.00-a təyin etdi.

     Xatırladaq ki, Emin Hüseynov 14 iyun 2008-ci il tarixdə “Alaturka” restoranında olan dinc toplantıya polis müdaxiləsinin, jurnalist fəaliyyətinə müdaxilənin, 22-ci polis bölməsində saxlanmasının, bölmədə fiziki və mənəvi təzyiqə məruz qalmasının və bu işlə bağlı səmərəli araşdırma aparılmamasının qanunsuz hesab edilməsi və səhhətinə dəymiş zərərə, həmçinin mənəvi sarsıntılara görə cavabdehlərin hər birindən 150.000 (bir yüz əlli min manat) AZN alınaraq ödənilməsini məhkəmədən xahiş edib.

      Qeyd edək ki, E.Hüseynov 14 iyun  2008-ci il tarixində “ Alaturka” restoranında “Çe Gevara Fanatları Klubu”-nun keçirdiyi tədbir dağıdılarkən, 22-ci Polis Bölməsində fiziki və mənəvi təzyiqlərə məruz qalıb. Polisin təzyiqi nəticəsində huşunu itirən Emin Hüseynov 20 gündən artıq xəstəxanada müalicə alıb və müalicəsini indi də davam etdirməkdədir.

AVROPA ŞURASI AZƏRBAYCANDA KİV VƏ QHT HAQQINDA QANUNA TƏKLİF EDİLƏN DƏYİŞİKLİKLƏRDƏN NARAHATDIR

 

(Avropa Şurasının rəsmi bəyanatı)



 

Strasburq, 16.06.2009 – Biz Azərbaycanda Qeyri-hökumət Təşkilatları və KİV haqqında Qanuna təklif edilən bəzi dəyişikliklərdən çox narahatıq. Bu həftənin cümə günü parlamentdə müzakirəyə olunması təklif edilən əlavələr Azərbaycanda söz azadlığı və vətəndaş cəmiyyətinin normal fəaliyyəti üçün ciddi maneələr yarada bilər. Bu dəyişikliklər hətta Avropa Şurasının Bakıdakı Siyasi Elmlər Məktəbinin bağlanmasına da gətirib çıxara bilər.  

 

Ona görə də biz hökuməti təklif edilən əlavələr haqda qərar qəbul etməyi təxirə salmağa çağırırıq. Avropa Şurası hər hansı dəyişikliklərin Avropa Şurasının demokratiya və insan haqları standartlarına uyğun olmasını təmin etmək üçün yardım göstərməyə hazırdır.



 

Samuel Žbogar, Slovenyanın Xarici İşlər Naziri və Avropa Şurası Nazirlər Komitəsinin Ofis Sədri

Lluís Maria de Puig, Avropa Şurası Parlament Assambleyasının (AŞPA) Prezidenti

Terry Davis, Avropa Şurasının Baş katibi

   Link: https://wcd.coe.int/ViewDoc.jsp?id=1459985&Site=DC&BackColorInternet=F5CA75&BackColorIntranet=F5CA75&BackColorLogged=A9BACE



MİLLİ QHT FORUMUNUN İDARƏ HEYƏTİ QHT QANUNUNA DƏYİŞİKLİKLƏR LAYİHƏSİNƏ ETİRAZ EDİB

Milli QHT Forumu İdarə Heyətinin bu gün keçirilən fövqəladə iclasında 50-yə qədər qeyri-hökumət təşkilatının yaratdığı Vətəndaş Cəmiyyətini Müdafiə Komitəsinin təmsilçiləri də iştirak edib. “Mediaforum” saytının yaydığı məlumatda bildirilir ki, iclasda hər iki qurumun "Qeyri-hökumət təşkilatları (ictimai birliklər və fondlar) haqqında" qanuna dəyişikliklər layihəsini iyunun 18-də keçiriləcək birgə konfransda müzakirə etmək qərara alınıb.

İclas iştirakçıları Milli Məclisin sədri Oqtay Əsədova, parlament üzvlərinə, Prezident Administrasiyasının ictimai-siyasi şöbəsinin müdiri Əli Həsənova, həmçinin QHT-lərə Dövlət Dəstəyi Şurasının sədri Azay Quliyevə müraciət etməyi qərara alıblar. “Müraciətdə xahiş olur ki, qanun layihəsinin müzakirəsi Milli Məclisin plenar iclasının gündəliyindən çıxarılsın, parlament komitələrində yerli və beynəlxalq ekspertlərin nümayəndələri ilə birgə müzakirə olunsun. Məhz bundan sonra hər hansı ortaq məxrəcə gəlmək olar” – deyə Milli QHT Forumun sədri Rauf Zeyni bildirib
HÜQUQ MÜDAFİƏÇİSİ ELÇİN BEHBUDOV EYNULLA FƏTULLAYEVLƏ GÖRÜŞÜB
Dünən (15 iyun) İşgəncələr Əleyhinə Azərbaycan Komitəsinin rəhbəri, hüquq müdafiəçisi Elçin Behbudov 12 saylı cəzaçəkmə müəssisəsində həbsdə olan “Gündəlik Azərbaycan” və “Realnıy Azerbaydjan” qəzetlərinin baş redaktoru Eynulla Fətullayevlə görüşüb. Bu barədə Reportyorların Azadlıq və Təhlükəsizlik İnstitutuna (RATİ) E.Behbudovun özü məlumat verib. “İyunun 11-də Ədliyyə Nazirliyi Penitensiar Xidmətinin 12 saylı cəzaçəkmə müəssisəsində baş verən kütləvi iğtişaşla bağlı E.Fətullayevlə görüşdüm. Jurnalist məlum hadisə ilə bağlı cəzaçəkmə müəssisəsinin rəhbərliyi tərəfindən dindirildiyini və insidentlə heç bir əlaqəsinin olmadığını bildirdi” – deyən E.Behbudov, baş redaktorun qiyama cəhddə iştiraka təhrik edildiyini, lakin E.Fətullayevin bundan qəti surətdə imtina etdiyini də vurğulayıb.

Qeyd edək ki, iyunun 11-də 12 saylı cəzaçəkmə müəssisəndə yeməyin keyfiyyətsizliyi və məhbuslarla davranışa etiraz edən bir qrup məhbus həbsxana rəhbərliyinə qarşı qiyama cəhd göstərmişdi.

Xatırladaq ki, Eynulla Fətullayev 2007-ci ilin aprelin 21-də böhtan və təhqirdə ittiham olunaraq 2 il, 6 ay müddətinə azadlıqdan məhrum edilib. Sonradan baş redaktor terrorla hədələmə, etnik və dini düşmənçiliyin salınması, vergidən yayınma ittihamları ilə təqsirli bilinib və 2007-ci il oktyabrın 30-da əvvəlki həbsin müddəti də

daxil olmaqla ümumilikdə, 8 il 6 ay müddətinə azadlıqdan məhrumetmə cəzası verilib.



MTRŞ-YƏ QARŞI İDDİA ÜZRƏ MƏHKƏMƏ PROSESİ KEÇİRİLDİ
Bu gün (16 iyun) 1 saylı Bakı İqtisad Məhkəməsində hakim Müseyib Bayramovun sədrliyi ilə “Sumqayıt Gənclərinin Hüquqi Maarifləndirilməsi” (SGHM) ictimai birliyinin Milli Televiziya və Radio Şurasına (MTRŞ) qarşı qaldırdığı iddia üzrə məhkəmə prosesi keçirildi.

Prosesdə iddiaçı SGHM-in prezidenti Elçin Məmmədli və onun səlahiyyətli nümayəndəsi Müşfiq Abdullayev, cavabdeh tərəfdən isə MTRŞ-nin nümayəndəsi Toğrul Məmmədov iştirak edirdilər.

İddiaçı E.Məmmədli iddiasının əsaslı olduğunu deyərək, Sumqayıt şəhərində yeni bir tezliyin açılmasının zəruri olduğunu bildirdi və Sumqayıt əhalisinin tezliyin açılmasına görə toplanan imzaların siyahısının surətini məhkəməyə təqdim etdi.

Cavabdehin nümayəndəsi T.Məmmədov isə iddianı qəbul etməyərək, MTRŞ-yə qarşı vəzifəli şəxsin hərəkət (hərəkətsizliyindən) şikayət üzrə icraata xitam verilməsi barədə qərardad çıxarması barədə məhkəmə qarşısında vəsatət qaldırdı.

Hakim M.Bayramov vəsatətlə bağlı qərarın növbəti prosesdə baxılacağını bildirdi və növbəti prosesi 24 iyun, saat 16:15-ə təyin etdi.

Xatırladaq ki, SGHM Sumqayıt şəhərində yeni telekanalın açılması təşəbbüsü ilə 2009-cu ilin yanvar ayında MTRŞ-na müraciət edib və rədd cavabı aldığı üçün “lisenziya verilməməsinin qanunsuz hesab olunması” iddiası ilə məhkəməyə müraciət edib.


AZƏR ƏHMƏDOVUN İDDİASI ÜZRƏ KEÇİRİLMƏLİ OLAN MƏHKƏMƏ PROSESİ TƏXİRƏ SALINIB

  Bu gün (16 iyun) Səbail rayon Məhkəməsində hakim Araz Hüseynovun sədrliyi ilə “Azadlıq” qəzetinin baş direktoru Azər Əhmədovun Milli Təhlükəsizlik Nazirliyinə Baş prokurorluğun Ağır Cinayətlərə dair İşlər İstintaq İdarəsinin rəisi Eldar Əhmədova qarşı telefon danışıqlarının dinlənilməsinin qanunsuz hesab olunması ilə bağlı qaldırdığı iddia üzrə məhkəmə prosesi baş tutmayıb. Azər Əhmədovun səlahiyyətli nümayəndəsi, Media Hüququ İnstitutunun vəkili Fariz Namazlı məhkəmə prosesində iştirak edə bilmədiyindən, proses 23 iyun saat 12.00-dək təxirə salınıb.

           Qeyd edək ki,  iddiaya səbəb “Azadlıq” qəzetinin əməkdaşı Aqil Xəlilin işi üzrə istintaqın gedişi zamanı A.Əhmədovun da telefon danışıqlarının dinlənilməsi olub. İddiaçı A.Əhmədov telefon danışıqlarının dinlənilməsinin qanunsuz hesab edilməsi və ona dəymiş mənəvi ziyana görə kompensasiya ödənilməsini tələb edir.

MTRŞ ANS ÇM RADİOSUNA ŞİFAHİ XƏBƏRDARLIQ EDİB
Milli Televiziya və Radio Şurasının (MTRŞ) Ekspertiza, proqramlaşdırma və analitik şöbəsi ANS ÇM radiostansiyasına şifahi xəbərdarlıq edib. Bu barədə Reportyorların Azadlıq və Təhlükəsizlik İnstitutuna (RATİ) Ekspertiza, proqramlaşdırma və analitik şöbəsinin müdiri Təvəkkül Dadaşov verib. “ANS ÇM radiostansiyasının “Gənc klub” verilişininin bir neçə buraxılışında milli-mənəvi dəyərləri pozan mövzular müzakirə olunub. Xüsusən də 1 iyun iyun 2009-cu il tarixdə Tural adlı aparıcı erotik və pornoqrafik filmlər barədə söhbətlər apardığına görə ANS ÇM-ə xəbərdarlıq olunub“ - deyən T.Məmmədov vurğuladı ki, hazırda faktların dəqiqləşdirilməsi prosesi gedir. Faktlar tam dəqiqləşəndən sonra isə bu məsələ MTRŞ-nın yaxın günlərdə keçiriləcək iclasında müzakirəyə çıxarılacaq.

ANS ÇM radiosunun baş redaktoru Aytən Zeynalova məsələ ilə əlaqədar RATİ-yə bildirib ki, radio MTRŞ-nin qərarlarına hörmətlə yanaşır və bir daha belə halların olmamasına çalışacaqlar.


.


MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN
Reportyorların Azadlıq və Təhlükəsizlik İnstitutu (RATİ)

Ünvan: Azərbaycan, Bakı şəh., Behbudov 8, mənzil 85/86

tel: (+99 412) 418-03-34, fax: (+ 99 412) 598-45-19

24 saat ərzində aktiv olan qaynar xətt: (+ 994 055) 816 40 04

e-mail: irfs.az@gmail.com

web: www.irfs.az  skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət