Ana səhifə

Press-reliZ 16 avqust 2010-cu IL Bakı, Azərbaycan


Yüklə 22.06 Kb.
tarix25.06.2016
ölçüsü22.06 Kb.
R A T İ

Reportyorların Azadlıq və Təhlükəsizlik İnstitutu


PRESS-RELİZ
16 avqust 2010-cu il

Bakı, Azərbaycan



  • MİLLİ TELEVİZİYA VƏ RADİO ŞURASINA QARŞI MƏHKƏMƏ PROSESİ KEÇİRİLİB

  • NAZİM QULİYEVİN RAUF ARİFOĞLUYA QARŞI İDDİASI İCRAATA GÖTÜRÜLMƏDƏN RƏDD EDİLDİ


ELAN!

18 AVQUST SAAT 12.00-DA Reportyorların Azadlıq və Təhlükəsizlik İnstitutunun (RATİ) mətbuat mərkəzində barəsində həbs-qətimkan tədbiri seçilmiş ahıl yaşlı Abbasov Süleyman Xəliloviçin vəkili Elmar Süleymanov tərəfindən mətbuat konfransı keçiriləcək. Tədbirdə Abbasov Süleyman Xəliloviçin mülki xəstəxanaya yerləşdirilməsindən qəsdən imtina və nəticədə onun faktiki ölümə məhkum edilməsi barədə açıqlama veriləcək.

Tədbirə jurnalistlər, hüquq müdafiəçiləri, diplomatik korpus və aidiyyəti qurumların nümayəndələri və maraqlanan bütün şəxslər dəvətlidir.

Ətraflı məlumat üçün Elmar Süleymanova müraciət edə bilərsiniz - 055 644 70 80
MİLLİ TELEVİZİYA VƏ RADİO ŞURASINA QARŞI MƏHKƏMƏ PROSESİ KEÇİRİLİB

             Bu gün (16 avqust) Səbail rayon məhkəməsində hakim Kəmalə Əmirxanovanın sədrliyi  ilə “Televiziya və Alternativ Media İnkişaf Mərkəzi” İctimai Birliyinin təsisçisi Rəsul Cəfərov və “Mühakimə” qəzetinin baş redaktoru Yaşar Ağazadənin Milli Televiziya və Radio Şurasına qarşı iddia üzrə məhkəmə prosesi keçirilib.

Prosesdə iddiaçılar və cavabdehin nümayəndəsi Toğrul Məmmədov iştirak edirdilər.

İddiaçı Yaşar Ağazadə çıxışında iddianı müdafiə etdiyini bildirib. O vurğulayıb ki, MTRŞ-nin lisenziya verməkdən imtina etməsi və yeni müsabiqələri keçirməməsi onların milli və beynəlxalq qanunvericilikdə nəzərdə tutulan İfadə azadlığına ziddir. Ağazadə iddia ərizəsində Avropa Məhkəməsinin qərarlarına istinad edildiyini deyərək, yerli məhkəmələrin bu qərarlardan presedent kimi istifadə etməli olduğunu bildirib və iddianın təmin edilməsini xahiş edib.

Cavabdehin nümayəndəsi Toğrul Məmmədov isə bildirib ki, lisenziya yalnız müsabiqə əsasında verildiyi üçün, iddianı əsassız hesab edir və iddianın təmin edilməməsini istəyib.

Daha sonra Rəsul Cəfərov Televiziya və Radio Yayımı haqqında qanunun 16-cı maddəsinin şərh olunması üçün Konstitusiya Məhkəməsinə sorğu verilməsi barədə vəsatətlə çıxış etdi. O vurğuladı ki, sözügedən qanunda MTRŞ-nin ildə bir dəfədən az olmayaraq boş qalan istifadəyə yararlı efir radiotezliklərinin siyahısının sorğu vasitəsilə alaraq kütləvi informasiya vasitələrində dərc etdirilməsi ilə bağlı müddəa əksini tapıb. “Buna görə də hesab edirəm ki, “ildə bir dəfədən az olmayaraq” ifadəsi tezliklərin verilməsi üçün müsabiqələrin elan olunmasına da hesablanıb” – deyən Cəfərov bunun dəqiqləşdirilməsi üçün sorğunun göndərilməsini məhkəmədən xahiş edib.

Hakim bu vəsatətə növbəti prosesdə baxılacağını deyərək, prosesi 26 avqust saat 10.00-a təyin edib.

       Qeyd edək ki, iddiaçılar Bakı və Abşeron yarımadasında yayımlanacaq radionun müvafiq tezlikdə fəaliyyətə başlaması üçün lisenziya almaq məqsədilə MTRŞ-ya müraciət ediblər. MTRŞ kifayət qədər boş qalmış tezliyin olduğunu bildirsə də, tezlik ayırmaqdan və lisenziya verməkdən imtina etmişdir. İddiaçılar MTRŞ-nın hərəkətindən şikayət verərək dövlət qurumunun hərəkətinin qanunsuz hesab edilməsini və iddiaçılara lisenziya verilməsinin bu quruma həvalə olunmasını xahiş ediblər.

Foto: http://www.irfs.az/component/option,com_datsogallery/Itemid,30/func,viewcategory/catid,577/lang,az/

NAZİM QULİYEVİN RAUF ARİFOĞLUYA QARŞI İDDİASI İCRAATA GÖTÜRÜLMƏDƏN RƏDD EDİLDİ

Avqustun 13-də Yasamal rayon Məhkəməsində hakim Sərdar Mehrəliyevin sədrliyi ilə “İdeal” qəzetinin həbsdə olan baş redaktoru Nazim Quliyevin “Yeni Müsavat” qəzetinin baş redaktoru və təsisçisi Rauf Arifoğluya və onun 1-ci müavini Azər Ayxana qarşı xüsusi ittiham qaydasında iddia üzrə hazırlıq iclası keçirilib. Bu barədə Reportyorların Azadlıq və Təhlükəsizlik İnstitutuna (RATİ) cavabdehlərin vəkili Elçin Sadıqov məlumat verib.

Cavabdehin vəkili E.Sadıqov çıxışında iddiada göstərilən yazılarla bağlı Nizami Rayon Məhkəməsində Azər Ayxana bəraət hökmü verildiyini xatırladıb və hakimdən xüsusi ittihamı icraata qəbul etməməyi xahiş edib.

İddiaçının vəkili R.Məsimzadə hakimdən xüsusi ittihamın icraata götürülməsi haqda qərar çıxarmağı xahiş edib.

Hakim xüsusi ittihamın rədd edilməsinə qərar verib.

E.Sadıqov əlavə edib ki, “Yeni Müsavat” qəzeti Nizami rayon ərazisində yerləşsə də, Yasamal rayon ərazisində yerləşən “Azərbaycan” nəşriyyatında çap olunduğu üçün N.Quliyev bu rayonun məhkəməsinə müraciət edib.

Qeyd edək ki, iddiaya 2008-ci ilin noyabr ayından başlayaraq qəzetin 10 sayında iddiaçılar barəsində dərc olunan 20 məqalə səbəb olub. “Nazim Quliyev PKK-nı təbliğ edir”, “Nazim Quliyevin arxasında kim durur”, “Nazim Quliyev yenə Bəylər Əyyubovun adından istifadə edir”, “Nazim Quliyev Apellyasiya Məhkəməsinə 350 min manat rüşvət vermək istəyir” və digər yazıların səbəb olduğu iddiada cavabdehlərin CM-nin 147.2. (ağır və ya xüsusilə ağır cinayətdə ittiham etməklə böhtan atma) və 148-ci maddəsi (təhqir) ilə cinayət məsuliyyətinə cəlb edilməsi xahiş olunurdu. Eyni məqalələrlə bağlı Nizami rayon məhkəməsində də xüsusi ittiham qaydasında iddia qaldırılsa da, iddia 18.06.2010-cu ildə rədd edilib.

Xatırladaq ki, “İdeal” qəzetinin təsisçisi N.Quliyev diffamasiya maddələri ilə 20 may 2009-cu il tarixdə 6 ay müddətinə azadlıqdan məhrum edilmişdi. Sonradan ona qarşı  15 yanvar 2009-cu ildə isə Cinayət Məcəlləsinin 182.2.2-ci (hədə-qorxu ilə tələb etmə), 182.2.3-cü (hədə-qorxu ilə tələb etmə zor tətbiq etmə ilə törədildikdə), 182.3.2-ci (külli miqdarda əmlak əldə etmək məqsədi ilə törədildikdə), 221.1-ci (xuliqanlıq), 234.1-ci (Satış məqsədi olmadan qanunsuz olaraq narkotik vasitələri və ya psixotrop maddələri şəxsi istehlak miqdarından artıq miqdarda əldə etmə və ya saxlama) maddələri ilə təqsirli bilinərək, 13 il 3 ay müddətinə azadlıqdan məhrum edilib. N.Quliyevin həbsindən sonra “İdeal” qəzeti nəşrini dayandırıb. 1998-ci ilin noyabr ayından fəaliyyət göstərən “İdeal” qəzetinin nəşrində dəfələrlə fasilələr olub. Bu fasilələr əsasən təsisçi Nazim Quliyevin həbsləri ilə bağlı olub.

Xatırladaq ki, ölkənin ən çoxtirajlı qəzetlərindən olan “Yeni Müsavat” qəzeti 1989-cü ildən fəaliyyət göstərir və gündəlik çap olunur.

MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN

 

Reportyorların Azadlıq və Təhlükəsizlik İnstitutu (RATİ)



Ünvan: Azərbaycan, Bakı şəh., Behbudov 8, mənzil 85/86

tel: (+99 412) 418-03-34, fax: (+ 99 412) 598-45-19

24 saat ərzində aktiv olan qaynar xətt: (+ 994 055) 816 40 04

e-mail: irfs.az@gmail.com

web: www.irfs.az skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət