Missále románum 1957 en préparation

DOMÍNICA II POST EPIPHANÍAM

Intróitus Ps. 65, 4

OMNIS terra adóret te, Deus, et psallat tibi: psalmum dicat nómini tuo, Altíssime. Ps. ibid., 1-2 Jubiláte Deo, omnis terra, psalmum dícite nómini ejus: date glóriam laudi ejus. V/. Glória Patri.

¶ Dícitur Glória in excélsis in ómnibus Domínicis ante Septuagésimam, étiam Sábbato anticipátis, juxta Rúbricas; non dícitur autem in diébus feriálibus, quando resúmitur Missa Domínicæ præcedéntis.

Orátio

Oratiónes pro diversitáte Témporum assignátæ, ut post diem 29 Decémbris Tábula Oratiónum.

Léctio Epístolæ beáti Pauli Apóstoli ad Romános.

Rom. 12, 6-16

FRATRES: Habéntes donatiónes secúndum grátiam, quæ data est nobis, differéntes: sive prophetíam secúndum ratiónem fídei, sive ministérium in ministrándo, sive qui docet in doctrína, qui exhortátur in exhortándo, qui tríbuit in simplicitáte, qui præest in sollicitúdine, qui miserétur in hilaritáte. Diléctio sine simulatióne. Odiéntes malum, adhæréntes bono: Caritáte fraternitátis ínvicem diligéntes: Honóre ínvicem præveniéntes: Sollicitúdine non pigri: Spíritu fervéntes: Dómino serviéntes: Spe gaudéntes: In tribulatióne patiéntes: Oratióni instántes: Necessitátibus sanctórum communicántes: Hospitalitátem sectántes. Benedícite persequéntibus vos: benedícite, et nolíte maledícere. Gaudére cum gaudéntibus, flere cum fléntibus: Idípsum ínvicem sentiéntes: Non alta sapiéntes, sed humílibus consentiéntes.

Graduále Ps. 106, 20-21 Misit Dóminus verbum suum, et sanávit eos: et erípuit eos de intéritu eórum. V/. Confiteántur Dómino misericórdiæ ejus: et mirabília ejus fíliis hóminum.

Allelúja, allelúja. V/. Ps. 148, 2 Laudáte Dóminum, omnes Angeli ejus: laudáte eum, omnes virtútes ejus. Allelúja.

¶ Sic dícitur Allelúja cum suo Versu post Graduále in ómnibus Domínicis minóribus post Epiphaníam, étiam si Missa Domínicæ in Fériis resumátur.

+ Sequéntia sancti Evangélii secúndum Joánnem.

Joann. 2, 1-11

IN illo témpore: Núptiæ factæ sunt in Cana Galilǽæ: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeæ hýdriæ sex pósitæ secúndum purificatiónem Judæórum, capiéntes síngulæ metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilǽæ: et manifestávit glóriam suam, et credidérunt in eum discípuli ejus.

Credo.

Offertórium Ps. 65, 1-2 et 16 Jubiláte Deo, univérsa terra: psalmum dícite nómini ejus: veníte, et audíte, et narrábo vobis, omnes qui timétis Deum, quanta fecit Dóminus ánimæ meæ, allelúja.

OBLÁTA, Dómine, múnera sanctífica: nosque a peccatórum nostrórum máculis emúnda. Per Dóminum.

Præfátio de Ssma Trinitáte.

Commúnio Joann. 2, 7, 8, 9 et 10-11 Dicit Dóminus: Impléte hýdrias aqua, et ferte architriclíno. Cum gustásset architriclínus aquam vinum factam, dicit sponso: Servásti bonum vinum usque adhuc. Hoc signum fecit Jesus primum coram discípulis suis.

Postcommúnio

AUGEÁTUR in nobis, quǽsumus, Dómine, tuæ virtútis operátio: ut divínis vegetáti sacraméntis, ad eórum promíssa capiénda, tuo múnere præparémur. Per Dóminum.

DOMÍNICA III POST EPIPHANÍAM

ADORÁTE Deum, omnes Angeli ejus: audívit, et lætáta est Sion: et exsultavérunt fíliæ Judæ. Ps. ibid., 1 Dóminus regnávit, exsúltet terra: læténtur ínsulæ multæ. V/. Glória Patri.

Orátio

OMNÍPOTENS sempitérne Deus, infirmitátem nostram propítius réspice: atque ad protegéndum nos, déxteram tuæ majestátis exténde. Per Dóminum.

Léctio Epístolæ beáti Pauli Apóstoli ad Romános.

Rom. 12, 16-21

FRATRES: Nolíte esse prudéntes apud vosmetípsos: nulli malum pro malo reddéntes: providéntes bona non tantum coram Deo, sed étiam coram ómnibus homínibus. Si fíeri potest, quod ex vobis est, cum ómnibus homínibus pacem habéntes: Non vosmetípsos defendéntes, caríssimi, sed date locum iræ. Scriptum est enim: Mihi vindícta: ego retríbuam, dicit Dóminus. Sed si esuríerit inimícus tuus, ciba illum: si sitit, potum da illi: hoc enim fáciens carbónes ignis cóngeres super caput ejus. Noli vinci a malo, sed vince in bono malum.

Graduále Ps. 101, 16-17 Timébunt gentes nomen tuum, Dómine, et omnes reges terræ glóriam tuam. V/. Quóniam ædificávit Dóminus Sion, et vidébitur in majestáte sua.

Allelúja, allelúja. V/. Ps. 96, 1 Dóminus regnávit, exsúltet terra: læténtur ínsulæ multæ. Allelúja.

+ Sequéntia sancti Evangélii secúndum Matthǽum.

Matth. 8, 1-13

IN illo témpore: Cum descendísset Jesus de monte, secútæ sunt eum turbæ multæ: et ecce leprósus véniens adorábat eum, dicens: Dómine, si vis, potes me mundáre. Et exténdens Jesus manum, tétigit eum, dicens: Volo, mundáre. Et conféstim mundáta est lepra ejus. Et ait illi Jesus: Vide, némini díxeris: sed vade, osténde te sacerdóti, et offer munus, quod præcépit Móyses, in testimónium illis. Cum autem introísset Caphárnaum, accéssit ad eum centúrio, rogans eum, et dicens: Dómine, puer meus jacet in domo paralýticus, et male torquétur. Et ait illi Jesus: Ego véniam, et curábo eum. Et respóndens centúrio, ait: Dómine, non sum dignus, ut intres sub tectum meum: sed tantum dic verbo, et sanábitur puer meus. Nam et ego homo sum sub potestáte constitútus, habens sub me mílites, et dico huic: Vade, et vadit; et álii: Veni, et venit; et servo meo: Fac hoc, et facit. Audiens autem Jesus, mirátus est, et sequéntibus se dixit: Amen dico vobis, non invéni tantam fidem in Israël. Dico autem vobis, quod multi ab Oriénte et Occidénte vénient, et recúmbent cum Abraham, et Isaac, et Jacob in regno cælórum: fílii autem regni ejiciéntur in ténebras exterióres: ibi erit fletus, et stridor déntium. Et dixit Jesus centurióni: Vade, et sicut credidísti, fiat tibi. Et sanátus est puer in illa hora.

Credo.

Secréta

Præfátio de Ssma Trinitáte.

Commúnio Luc. 4, 22 Mirabántur omnes de his, quæ procedébant de ore Dei.

Postcommúnio

QUOS tantis, Dómine, largíris uti mystériis: quǽsumus; ut efféctibus nos eórum veráciter aptáre dignéris. Per Dóminum.

¶ A die 3 Februarii usque ad Fériam III post Quinquagésimam inclusíve, in ómnibus Missis ritus Semidúplicis vel Símplicis, tam de Témpore quam de Sanctis, et in Missis votívis, quæ pro re gravi et pública simul causa non sint, nisi facta fúerit Commemorátio Dúplicis, vel cujúslibet Vigíliæ, vel Octávæ, vel sanctæ Maríæ in Sábbato, aut Missa fúerit de beáta María Vírgine, vel de áliqua Vigília vel Octáva, vel de Omnibus Sanctis, post Commemoratiónes forte occurréntes, dicúntur Oratiónes pro diversitáte Témporum assignátæ, nempe 2a ad poscénda suffrágia Sanctórum A cunctis, 3a ad líbitum eligénda. Et in eádem Oratióne A cunctis, sicut et in ejus Postcommunióne, ad lítteram N., exprímitur nomen Tituláris própriæ Ecclésiæ, dúmmodo Títulus non sit Persona divína, vel Mystérium Dómini, aut de ipso Título non dicátur Missa aut facta non sit Commemorátio, aut illíus nomen non sit in eádem Oratióne A cunctis expréssum, ac nómina sanctórum Angelórum et sancti Joánnis Baptístæ, si Tituláres fúerint, præponúntur nómini sancti Joseph. In hisce autem ómnibus cásibus omittúntur verba atque beáto N. Si vero Missa vel Commemorátio fúerit de sancto Joseph aut de sanctis Apostolis Petro et Paulo, in Oratióne et Postcommunióne omittúntur verba quæ eos respíciunt.

¶ In Vigíliis autem, infra Octávas tam privilegiátis quam commúnes, et in diébus Octávis Simplícibus per idem Tempus occurréntibus, loco earúmdem Oratiónum, dícitur, juxta Rúbricas, 2a Orátio de sancta María Concéde, 3a contra persecutóres Ecclésiæ vel pro Papa. Si tamen Vigília aut Octáva fúerit de beáta María Vírgine, sicut et in Missis ejusdem beátæ Maríæ Vírginis, et in Missis in quibus de ea facta sit Commemorátio, necnon in Missa votíva de Omnibus Sanctis, loco Oratiónis Concéde, dícitur Orátio de Spíritu Sancto.