Missále románum 1957 en préparation

FESTA AUGÚSTI

S. ROCHI

Duplex
Missa Justus ut palma, de Commúni Confessóris non Pontíficis 2 loco, præter Oratiónem sequéntem:

Orátio

PÓPULUM tuum, quǽsumus, Dómine, contínua pietáte custódi: et, beáti Rochi suffragántibus méritis, ab omni fac ánimæ et córporis contagióne secúrum. Per Dóminum.

BEÁTÆ MARÍÆ VÍRGINIS

ÓMNIUM GRATIÁRUM MEDIATRÍCIS

ADEÁMUS cum fidúcia ad thronum grátiæ, ut misericórdiam consequámur, et grátiam inveniámus in auxílio opportúno. (T. P. Allelúja, allelúja.) Ps. 120, 1 Levávi óculos meos in montes: unde véniet auxílium mihi. V/. Glória Patri.

Orátio

DÓMINE Jesu Christe, noster apud Patrem mediátor, qui beatíssimam Vírginem matrem tuam, matrem quoque nostram et apud te mediatrícem constitúere dignátus es: concéde propítius; ut quisquis ad te benefícia petitúrus accésserit, cuncta se per eam impetrásse lætétur: Qui vivis et regnas cum eódem Deo Patre.

Isai. 55, 1-3 et 5

OMNES sitiéntes, veníte ad aquas: et qui non habétis argéntum, properáte, émite et comédite: veníte, émite absque argénto et absque ulla commutatióne vinum et lac. Quare appénditis argéntum non in pánibus, et labórem vestrum non in saturitáte? audíte, audiéntes me, et comédite bonum, et delectábitur in crassitúdine ánima vestra. Inclináte aurem vestram, et veníte ad me: audíte, et vivet ánima vestra. Ecce gentem, quam nesciébas, vocábis: et gentes, quæ te non cognovérunt, ad te current propter Dóminum Deum tuum, et Sanctum Israël, quia glorificávit te.

Graduále Eccli. 24, 25-26 In me grátia omnis viæ et veritátis, in me omnis spes vitæ et virtútis. V/. Transíte ad me, omnes qui concupíscitis me, et a generatiónibus meis implémini.

Allelúja, allelúja. V/. Salve, Mater misericórdiæ, Mater spei et grátiæ, o María. Allelúja.
¶ ¶ In Missis votívis post Septuagésimam, omíssis Allelúja et Versu sequénti, dícitur

Tractus Ap. 22, 16-17 Ego sum radix et genus David, stella pléndida et matutína. V/. Et spíritus et sponsa dicunt: Veni. Et qui audit, dicat: Veni. V/. Et qui sitit, véniat; et qui vult, accípiat aquam vitæ gratis.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Isai. 60, 4 Leva in circúitu óculos tuos, et vide: omnes isti congregáti sunt, venérunt tibi. Allelúja. V/. Fílii tui de longe vénient, et fíliæ tuæ de látere surgent. Allelúja.

+ Sequéntia sancti Evangélii secúndum Joánnem.

Joann. 19, 25-27

IN illo témpore: Stabant juxta crucem Jesu mater ejus, et soror matris ejus María Cléophæ, et María Magdaléne. Cum vidísset er go Jesus matrem, et discípulum stantem, quem diligébat, dicit matri suæ: Múlier, ecce fílius tuus. Deínde dicit discípulo: Ecce mater tua. Et ex illa hora accépit eam discípulus in sua.

Credo.

Secréta

Præfátio de beáta María Vírgine Et te in Festivitáte.

Commúnio Esther 15, 17 Valde mirábilis es, o María, et fácies tua plena est gratiárum. (T. P. Allelúja.)

Postcommúnio

SUBVÉNIAT nobis, Dómine, beátæ Maríæ Matris tuæ ac nostræ mediatrícis orátio: ut per hæc sacrosáncta commércia, tua grátia largiénte, ad redemptiónis ætérnæ proficiámus augméntum: Qui vivis.

FESTA SEPTÉMBRIS

S. REMÁCLI

Duplex
Missa Státuit, de Commúni Confessóris Pontíficis 1 loco, præter Oratiónes et Evangélium.

Orátio

DEUS, mundi auctor et creátor, qui hodiérnam festivitátem beáti Remácli Confessóris tui atque Pontíficis migratióne in cælum consecrásti: præsta, quǽsumus; ut cujus ánnua celebritáte devótis exsultámus obséquiis, ejus suffrágiis tuæ pietátis consequámur auxílium. Per Dóminum nostrum.

Luc. 10, 1-9

IN illo témpore: Designávit Dóminus et álios septuagínta duos et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quidem multa, operárii autem pauci. Rogáte ergo dóminum messis ut mittat operários in messem suam. Ite: ecce ego mitto vos sicut agnos inter lupos. Nolíte portáre sácculum, neque peram, neque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra: sin autem, ad vos revertétur. In eádem autem domo manéte edéntes et bibéntes quæ apud illos sunt: dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quæ apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.

Secréta

Postcommúnio

EXÍSTAT, quǽsumus, Dómine, beátus Remáclus Conféssor tuus et Póntifex pro nobis perpétuus intercéssor: ut mystéria quæ súmpsimus, non sint nobis reátus ad pœnam, sed sint fortitúdo nostræ infirmitátis, et ad vitam capesséndam ætérnam præparátio salutáris. Per Dóminum.
Die 7 Septémbris

S. MADELBÉRTÆ

Duplex
Missa Dilexísti, de Commúni Vírginum 3 loco, præter Oratiónem sequéntem:

Orátio

DEUS, innocéntiæ auctor et amátor, qui beátam Madelbértam Vírginem tuam hodiérna die ad cælos transvexísti: concéde nobis fámulis tuis, ipsíus sacra solémnia celebrántibus, ejúsdem pia intercessióne nostrórum véniam cónsequi peccatórum. Per Dóminum.

S. THEODÁRDI

Duplex
Missa Státuit, ut in Commúni uníus Mártyris Pontíficis, præter Oratiónes sequéntes:

Orátio

DEUS, qui nos beáti Theodárdi Mártyris tui atque Pontíficis gloriósa solemnitáte lætíficas: sólita pietátis tuæ largitáte concéde benígnus; ut cujus victóriæ triúmphum pio amóre venerámur in terris, societátis ejus lætítiam adipísci, te largiénte, mereámur in cælis. Per Dóminum.

HANC in conspéctu glóriæ magnitúdinis tuæ oblatiónis hóstiam, quǽsumus, Deus Pater omnípotens, beáti Mártyris tui atque Pontíficis Theodárdi comméndet orátio, qui sanctæ caritátis tuæ devíctus amóre, própriam sui córporis hóstiam in odórem suavitátis tibi óbtulit vivam. Per Dóminum.

Postcommúnio

SANCTA nos, quǽsumus, Dómine, sacraménti cæléstis participátio et ab hóstium tueátur incúrsu, et sancto intercedénte Theodárdo Mártyre tuo atque Pontífice, animárum nobis remédia cónferat sempitérna. Per Dóminum.

S. MATÉRNI

Duplex majus

STÁTUIT ei Dóminus testaméntum pacis, et príncipem fecit eum: ut sit illi sacerdótii dígnitas in ætérnum. Ps. 131, 1 Meménto, Dómine, David: et omnis mansuetúdinis ejus. V/. Glória Patri.

Orátio

DEUS, qui pópulo tuo sanctum dedísti Matérnum prædicatórem: concéde; ut tanti Pontíficis intercessióne et tuæ pietátis defensióne, ab ómnibus liberémur advérsis, et tranquílla prosperitáte in tua laude lætémur. Per Dóminum.

Rom. 10, 10-18

FRATRES: Corde enim créditur ad justítiam: ore autem conféssio fit ad salútem. Dicit enim Scriptúra: Omnis, qui credit in illum, non confundétur. Non enim est distínctio Judǽi et Græci: nam idem Dóminus ómnium, dives in omnes, qui ínvocant illum. Omnis enim, quicúmque invocáverit nomen Dómini, salvus erit. Quómodo ergo invocábunt, in quem non credidérunt? Aut quómodo credent ei, quem non audiérunt? Quómodo autem áudient sine prædicánte? Quómodo vero prædicábunt, nisi mittántur? Sicut scriptum est: Quam speciósi pedes evangelizántium pacem, evangelizántium bona! Sed non omnes obédiunt Evangélio. Isaías enim dicit: Dómine, quis crédidit audítui nostro? Ergo fides ex audítu, audítus autem per verbum Christi. Sed dico: Numquid non audiérunt? Et quidem in omnem terram exívit sonus eórum, et in fines orbis terræ verba eórum.

Graduále Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.

Allelúja, allelúja. V/. Ps. 109, 4 Tu es sacérdos in ætérnum, secúndum órdinem Melchísedech. Allelúja.

+ Sequéntia sancti Evangélii secúndum Marcum.

Marc. 16, 15-18

IN illo témpore: Dixit Jesus discípulis suis: Eúntes in mundum univérsum, prædicáte Evangélium omni creatúræ. Qui credíderit, et baptizátus fúerit, salvus erit: qui vero non credíderit, condemnábitur. Signa autem eos, qui credíderint, hæc sequéntur: In nómine meo dæmónia ejícient: linguis loquéntur novis: serpéntes tollent: et si mortíferum quid bíberint, non eis nocébit: super ægros manus impónent, et bene habébunt.

Offertórium Ps. 88, 21-22 Invéni David servum meum, óleo sancto meo unxi eum: manus enim mea auxiliábitur ei, et bráchium meum confortábit eum.

Secréta

Commúnio Luc. 12, 42 Fidélis servus et prudens, quem constítuit dóminus super famíliam suam: ut det illis in témpore trítici mensúram.

Postcommúnio

SANCTI Matérni Confessóris tui atque Pontíficis supplicatiónibus, Dómine, tríbue nos fovéri: ut cujus solemnitátem ánnuo celebrámus obséquio, ejus apud te intercessiónibus commendémur et méritis. Per Dóminum.

S. LAMBÉRTI

Diœcésis Patróni

GAUDEÁMUS omnes in Dómino, diem festum celebrántes sub honóre beáti Lambérti Mártyris: de cujus solemnitáte gaudent Angeli, et colláudant Fílium Dei. Ps. 32, 1 Exsultáte, justi, in Dómino: rectos decet collaudátio. V/. Glória Patri.

Orátio

INTERCÉSSIO, quǽsumus, Dómine, beáti Lambérti Mártyris tui atque Pontíficis, tuam nobis non désinat placáre justítiam, et nostrum tibi devótum effícere famulátum. Per Dóminum.

Hebr. 5, 1-6

FRATRES: Omnis póntifex ex homínibus assúmptus, pro homínibus constitúitur in iis, quæ sunt ad Deum: ut ófferat dona et sacrifícia pro peccátis: qui condolére possit iis, qui ignórant, et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo, tamquam Aaron. Sic et Christus non semetípsum clarificávit ut póntifex fíeret: sed qui locútus est ad eum: Fílius meus es tu, ego hódie génui te. Quemádmodum et in álio loco dicit: Tu es sacérdos in ætérnum, secúndum órdinem Melchísedech.

Graduále Eccli. 44, 16 Ecce sacérdos magnus, qui in diébus suis plácuit Deo. V/. Ibid., 20 Non est invéntus símilis illi, qui conserváret legem Excélsi.

Allelúja, allelúja. V/. Joann. 10, 14 Ego sum pastor bonus: et cognósco oves meas, et cognóscunt me meæ. Allelúja.

Sequéntia

CHRISTI nómine lætémur,

Et Lambérto gratulémur,

Inclyto Pontífici.

Cujus fidem, passiónem,

Tot labóres et agónem,

Digne decet récoli.

Hic ad glóriam paréntum

Pulchrum dedit ornaméntum:

Sanctus ab infántia.

Clarus per progenitóres,

Cláruit per pios mores,

Amplióri grátia.

Ad honórem præsulátus

Est Trajécti postulátus:

Fungens sacerdótio.

Gregem salvat, splendet signis,

Tungros lustrat vir insígnis

Novæ lucis rádio.

Cum de sede deturbátum,

Septem annos exsulátum

Pellit hostis ínvidus.

Monachórum petit ædem,

Post in primam redit sedem

Suo juri rédditus.

Reprobátus et abjéctus

Lapis iste nunc eréctus

Ad se traxit ómnia.

Taxándriam illustrávit,

Idolórum quam mundávit

Ab omni spurcítia.

Turba credit, fides crescit,

Error cedit, et claréscit

Nomen tanti Prǽsulis.

Qui constrúcto Dei templo,

Verbo docens et exémplo,

Corúscat miráculis.

Tandem orans immolátur:

Hasta dum transverberátur,

Subit cæli gáudia.

Mox Trajecti fuit curæ

Dare corpus sepultúræ,

Terra procul ália.

Angelórum dulce melos

Audítur, dum intrat cælos

Cum palma victóriæ.

Amen dicat plebs devóta,

Psallat ei mente tota

Qui triúmphat hódie.

Clerus omnis jucundétur,

Et Lambértus commendétur

Solémni melódia.

Légia quem venerátur,

Cujus sacri decorátur

Córporis custódia.

Mors est justi pretiósa,

Quam præcéssit gloriósa

Vitæ conversátio.

Hujus actus imitémur,

Ut ne frustra gloriémur

Ejus patrocínio.

Tu nos ex hac mortis valle

Duc ad vitam recto calle

Ejus per vestígia.

Jesu, nobis da benígne,

Ut cum sanctis te condígne

Laudémus in pátria.

Amen. Allelúja.

+ Sequéntia sancti Evangélii secúndum Joánnem.

Joann. 10, 11-16

IN illo témpore: Dixit Jesus pharisǽi: Ego sum pastor bonus. Bonus pastor ánimam suam dat pro óvibus suis. Mercenárius autem, et qui non est pastor, cujus non sunt oves própriæ, videt lupum veniéntem, et dimíttit oves, et fugit: et lupus rapit, et dispérgit oves: mercenárius autem fugit, quia mercenárius est, et non pértinet ad eum de óvibus. Ego sum pastor bonus: et cognósco meas, et cognóscunt me meæ. Sicut novit me Pater, et ego agnósco Patrem: et ánimam meam pono pro óvibus meis. Et álias oves hábeo, quæ non sunt ex hoc ovíli: et illas opórtet me addúcere, et vocem meam áudient, et fiet unum ovíle, et unus pastor.

Credo.

Offertórium Ps. 20, 4-5 Posuísti, Dómine, in cápite ejus corónam de lápide pretióso: vitam pétiit a te, et tribuísti ei, allelúja.

ADÉSTO, quǽsumus, Dómine, famulórum tuórum hóstiis, adésto munéribus, sancti Lambérti, Mártyris tui atque Pontíficis, précibus placátus ac méritis: et ejus gaudéntes solemnitáte, ab hóstium infestatiónibus cleménter tuére. Per Dóminum.

Commúnio Joann. 10, 14 Ego sum pastor bonus: et cognósco oves meas, et cognóscunt me meæ.

Postcommúnio

BEÁTI Pontíficis Lambérti, Mártyris tui, Dómine, mérita gloriósa recoléntibus, da nobis per hæc sacraménta, quæ súmpsimus, ut a culpis ómnibus expiáti, vitam consequámur ætérnam. Per Dóminum nostrum.

MISSA VOTÍVA

S. LAMBÉRTI

Missa ut in festo, sed omíttitur Sequéntia. Intróitus, et post Septuagésimam étiam Tractus sumúntur e Missa Státuit, de Commúni uníus Mártyris 1 loco. Témpore autem Pascháli Intróitus súmitur e Missa Protexísti, de Commúni Mártyrum 1 loco, et post Epístolam, omísso Graduáli, dícitur:

Allelúja, allelúja. V/. Joann. 10, 14 Ego sum pastor bonus: et cognósco oves meas, et cognóscunt me meæ. Allelúja. V/. Ps. 109, 4 Tu es sacérdos in ætérnum, secúndum órdinem Melchísedech. Allelúja.
Die 22 Septémbris

SS. MAURÍTII ET SOCIÓRUM

Duplex
Missa Intret, de Commúni plurimórum Mártyrum, præter Oratiónes et Epístolam.

Orátio

ANNUE, quǽsumus, omnípotens Deus: ut sanctórum Mártyrum tuórum Maurítii et Sociórum ejus nos lætíficet festíva solémnitas; ut, quorum suffrágiis nítimur, eórum natalítiis gloriémur. Per Dóminum.

Apoc. 7, 13-17

IN diébus illis: Respóndit unus de senióribus, et dixit mihi: Hi, qui amícti sunt stolis albis, qui sunt? et unde venérunt? Et dixi illi: Dómine mi, tu scis. Et dixit mihi: Hi sunt, qui venérunt de tribulatióne magna, et lavérunt stolas suas, et dealbavérunt eas in sánguine Agni. Ideo sunt ante thronum Dei, et sérviunt ei die ac nocte in templo ejus: et qui sedet in throno, habitábit super illos: non esúrient, neque sítient ámplius, nec cadet super illos sol, neque ullus æstus: quóniam Agnus, qui in médio throni est, reget illos, et dedúcet eos ad vitæ fontes aquárum: et abstérget Deus omnem lácrimam ab óculis eórum.

Secréta

Postcommúnio

CÆLÉSTIBUS refécti sacraméntis et gáudiis: súpplices te rogámus, Dómine; ut, quorum gloriámur triúmphis, protegámur auxíliis. Per Dóminum.