Ana səhifə

Missále románum 1957 en préparation


Yüklə 4.47 Mb.
səhifə125/128
tarix25.06.2016
ölçüsü4.47 Mb.
1   ...   120   121   122   123   124   125   126   127   128

FESTA MAJI


Die 1 Maji

Commemorátio


S. EVERMÁRI


Mártyris
Missa Protexísti, de Commúni uníus Mártyris Témpore Pascháli 1 loco, cum oratiónibus ut infra:

Orátio


PRÆSTA, quǽsumus, omnípotens Deus: ut, qui beáti Evermári Mártyris tui natalítia cólimus, intercessióne ejus, in tui nóminis amóre roborémur. Per Dóminum.

Secréta


MUNÉRIBUS nostris, quǽsumus, Dómine, precibúsque suscéptis: et cæléstibus nos munda mystériis, et cleménter exáudi. Per Dóminum.

Postcommúnio

DA, quǽsumus, Dómine Deus noster: ut, sicut tuórum commemoratióne Sanctórum temporáli gratulámur offício; ita perpétuo lætémur aspéctu. Per Dóminum.
Die 7 Maji

DEDICÁTIO

ECCLÉSIÆ CATHEDRÁLIS


Duplex I classis
Missa Terríbilis, de Commúni Dedicatiónis. Credo.
Die 12 Maji

S. DOMITIÁNI


Epíscopi et Confessóris

Duplex
Missa Státuit, de Commúni Confessóris Pontíficis 1 loco, præter Oratiónes sequéntes:

Orátio

MISERICÓRDIÆ tuæ nos, quǽsumus, Dómine, sancti Pontíficis tui Domitiáni pia comméndet orátio, cujus hódie celebrátur in tuo conspéctu pretiósa conféssio. Per Dóminum.



Secréta

OBLÁTUM tibi, Dómine, sacrifícium, intercedénte beáto Domitiáno, Confessóre tuo atque Pontífice, munímen in nobis operétur perpétuum. Per Dóminum.

Postcommúnio

SUMPTIS, Dómine, redemptiónis nostræ munéribus: præsta, quǽsumus; ut, intervéntu beáti Domitiáni, Confessóris tui atque Pontíficis, hæc éadem nobis impéndant salútem mentis et córporis. Per Dóminum nostrum.


Die 13 Maji

S. SERVÁTII


Epíscopi et Confessóris

Duplex
Intróitus Ps. 131, 9-10

SACERDÓTES tui, Dómine, índuant justítiam, et sancti tui exsúltent: propter David servum tuum, non avértas fáciem Christi tui, allelúja, allelúja. Ps. ibid., 1 Meménto, Dómine, David: et omnis mansuetúdinis ejus. V/. Glória Patri.

Orátio


DEUS, qui pópulo tuo sanctum dedísti Servátium prædicatórem: concéde ut tanti Pontíficis intercessióne, et tuæ pietátis defensióne, ab ómnibus liberémur advérsis, et tranquílla prosperitáte in tua laude lætémur. Per Dóminum.

Léctio Epístolæ beáti Pauli Apóstoli ad Hebrǽos.

Hebr. 5, 1-4

FRATRES: Omnis póntifex ex homínibus assúmptus, pro homínibus constitúitur in iis, quæ sunt ad Deum, ut ófferat dona et sacrifícia pro peccátis: qui condolére possit iis, qui ignórant et errant: quóniam et ipse circúmdatus est infirmitáte: et proptérea debet, quemádmodum pro pópulo, ita étiam et pro semetípso offérre pro peccátis. Nec quisquam sumit sibi honórem, sed qui vocátur a Deo, tamquam Aaron.

Allelúja, allelúja. V/. Ps. 109, 4 Jurávit Dóminus, et non pænitébit eum: Tu es sacérdos in ætérnum, secúndum órdinem Melchísedech. Allelúja. V/. Eccli. 45, 9 Amávit eum Dóminus, et ornávit eum: stolam glóriæ índuit eum. Allelúja.

+ Sequéntia sancti Evangélii secúndum Matthǽum.

Matth. 24, 42-47

IN illo témpore: Dixit Jesus discípulis suis: Vigiláte, quia nescítis qua hora Dóminus vester ventúrus sit. Illud autem scitóte, quóniam si sciret paterfamílias, qua hora fur ventúrus esset, vigiláret útique, et non síneret pérfodi domum suam. Ideo et vos estóte paráti: quia qua nescítis hora, Fílius hóminis ventúrus est. Quis, putas, est fidélis servus et prudens, quem constítuit dóminus suus super famíliam suam, ut det illis cibum in témpore? Beátus ille servus, quem, cum vénerit dóminus ejus, invénerit sic faciéntem. Amen dico vobis, quóniam super ómnia bona sua constítuet eum.

Offertórium Ps. 88, 25 Véritas mea, et misericórdia mea cum ipso: et in nómine meo exaltábitur cornu ejus, allelúja.

Secréta


HÆC oblátio, Dómine, quǽsumus, interveniénte beáto Servátio, Confessóre tuo atque Pontífice, nos ab ómnibus emúndet offénsis, et tota virtúte tuis fáciat servíre mandátis. Per Dóminum nostrum.

Commúnio Matth. 24, 46-47 Beátus servus, quem, cum vénerit dóminus, invénerit vigilántem: amen dico vobis, super ómnia bona sua constítuet eum, allelúja.

Postcommúnio

SALÚTIS nostræ libántes mystéria, præsta quǽsumus, omnípotens Deus, ut beáti Servátii, Pontíficis tui, nos ádjuvet orátio, et tua nos semper custódiat protéctio. Per Dóminum.



FESTA JÚNII


Die 16 Júnii

S. LUTGÁRDIS


Vírginis

Duplex
Missa Dilexísti, de Commúni Vírginum 3 loco, cum Oratióne ut infra:

Orátio

EXÁUDI nos, Deus salutáris noster: ut, sicut de beátæ Lutgárdis Vírginis tuæ festivitáte gaudémus; ita piæ devotiónis erudiámur afféctu. Per Dóminum.


Die 21 Júnii

S. MARTINI


Epíscopi et Confessóris

Duplex
Missa Státuit, de Commúni Confessóris Pontíficis 1 loco, præter Oratiónem sequéntem:

Orátio

OMNÍPOTENS sempitérne Deus, fidélium tuórum indefíciens conservátor, qui hunc diem gloriósi Confessóris tui atque Pontíficis Martíni glorificáre dignátus es solemnitáte: exáudi preces supplicántis Ecclésiæ, et præsta; ut quod devóte éxpetit, eo suffragánte cónsequi mereátur. Per Dóminum nostrum.


Die 26 Júnii

Commemorátio


S. PAPOLÉNI


Abbátis
Missa Os justi, de Commúni Abbátum cum Oratióne ut infra:

Orátio


INTERCÉSSIO nos, quǽsumus, Dómine, beáti Papoléni Abbátis comméndet: ut, quod nostris méritis non valémus, ejus patrocínio assequámur. Per Dóminum.

FESTA JÚLII


Die 3 Júlii

IN COMMEMORATIÓNE

ÓMNIUM SS. EPISCOPÓRUM DIŒCÉSIS


Duplex majus
Intróitus Ps. 131, 16-17

SACERDÓTES Sion índuam salutári, et sancti ejus exsultatióne exsultábunt, dicit Dóminus: illuc prodúcam cornu David, parávi lucérnam Christo meo. Ps. ibid., 1 Meménto, Dómine, David: et omnis mansuetúdinis ejus. V/. Glória Patri.

Orátio

OMNÍPOTENS, sempitérne Deus, qui per evangélicos labóres, beátos Pontífices nostros, in fide nobis Patres, ad immortálem glóriam evexísti: da nobis dignam pro eórum solemnitáte lætítiam; ut quos pia devotióne proséquimur, eórum précibus adjuvémur. Per Dóminum.



Léctio Epístolæ beáti Pauli Apóstoli ad Hebrǽos.

Hebr. 13, 7-17

FRATRES: Mementóte præpositórum vestrórum, qui vobis locúti sunt verbum Dei: quorum intuéntes éxitum conversatiónis, imitámini fidem. Jesus Christus heri, et hódie: ipse et in sǽcula. Doctrínis váriis et peregrínis nolíte abdúci. Optimum est enim grátia stabilíre cor, non escis, quæ non profuérunt ambulántibus in eis. Habémus altáre, de quo édere non habent potestátem, qui tabernáculo desérviunt. Quorum enim animálium infértur sanguis pro peccáto in Sancta per pontíficem, horum córpora cremántur extra castra. Propter quod et Jesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium ejus portántes. Non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est, fructum labiórum confiténtium nómini ejus. Beneficéntiæ autem, et communiónis nolíte oblivísci: tálibus enim hóstiis promerétur Deus. Obedíte præpósitis vestris, et subjacéte eis. Ipsi enim pervígilant, quasi ratiónem pro animábus vestris redditúri.

Graduále Ps. 131, 16-17 Sacerdótes ejus índuam salutári: et sancti ejus exsultatióne exsultábunt. V/. Illuc prodúcam cornu David: parávi lucérnam Christo meo.

Allelúja, allelúja. V/. Ps. 109, 4 Jurávit Dóminus, et non pænitébit eum: Tu es sacérdos in ætérnum, secúndum órdinem Melchísedech. Allelúja.

+ Sequéntia sancti Evangélii secúndum Joánnem.

Joann. 10, 11-16

IN illo témpore: Dixit Jesus pharisǽi: Ego sum pastor bonus. Bonus pastor ánimam suam dat pro óvibus suis. Mercenárius autem, et qui non est pastor, cujus non sunt oves própriæ, videt lupum veniéntem, et dimíttit oves, et fugit: et lupus rapit, et dispérgit oves: mercenárius autem fugit, quia mercenárius est, et non pértinet ad eum de óvibus. Ego sum pastor bonus: et cognósco meas, et cognóscunt me meæ. Sicut novit me Pater, et ego agnósco Patrem: et ánimam meam pono pro óvibus meis. Et álias oves hábeo, quæ non sunt ex hoc ovíli: et illas opórtet me addúcere, et vocem meam áudient, et fiet unum ovíle, et unus pastor.

Offertórium Levit. 21, 6 Sacerdótes Dómini incénsum et panes ófferunt Deo: et ídeo sancti erunt Deo suo, et non pólluent nomen ejus.

Secréta


PRECES, quas tibi, Dómine, offérimus, intercedéntibus beátis Pontifícibus nostris cleménter inténde: et propugnatóres fídei sub tua protectióne custódi. Per Dóminum.

Commúnio Num. 16, 47-48 Obtulit Aaron thymiáma: et stans inter mórtuos ac vivéntes, pro pópulo deprecátus est, et plaga cessávit.

Postcommúnio

REPLÉTI, Dómine, benedictióne cælésti, súpplices te rogámus; ut beátos Pontífices nostros, quos in cælis gloriósos fecísti, Ecclésiæ tuæ constítuas perpétuos defensóres. Per Dóminum.


Die 4 Júlii

S. LIBÉRTI


Mártyris

Duplex
Missa In virtúte tua, de Commúni uníus Mártyris 3 loco præter Oratiónem sequéntem:

ADÉSTO supplicatiónibus nostris, omnípotens Deus: ut qui beáti Libérti Mártyris tui memóriam cólimus, ipsíus imitatióne próspera mundi despícere, et nulla ejus advérsa formidáre valeámus. Per Dóminum.
Die 8 Júlii

SS. LANDRÁDÆ ET AMELBÉRGÆ


Vírginum

Duplex
Intróitus Ps. 148, 12-14

VÍRGINES laudent nomen Dómini, quia exaltátum est nomen ejus solíus: conféssio ejus super cælum et terram. Ps. ibid., 1 Laudáte Dóminum de cælis: laudáte eum in excélsis. V/. Glória Patri.

Orátio


CONCÉDE, quǽsumus, omnípotens Deus: ut qui beatárum Vírginum Landrádæ et Amelbérgæ puritátem húmili venerámur obséquio; étiam piæ conversatiónis imitémur exémplum. Per Dóminum.

Léctio Epístolæ beáti Pauli Apóstoli ad Corínthios.

1 Cor. 7, 25-34

FRATRES: De virgínibus præcéptum Dómini non hábeo: consílium autem do, tamquam misericórdiam consecútus a Dómino, ut sim fidélis. Exístimo ergo hoc bonum esse propter instántem necessitátem, quóniam bonum est hómini sic esse. Alligátus es uxóri? noli quǽrere solutiónem. Solútus es ab uxóre? noli quǽrere uxórem. Si autem accéperis uxórem, non peccásti. Et si núpserit virgo, non peccávit: tribulatiónem tamen carnis habébunt hujúsmodi. Ego autem vobis parco. Hoc ítaque dico, fratres: Tempus breve est: réliquum est, ut et qui habent uxóres, tamquam non habéntes sint: et qui flent, tamquam non flentes: et qui gaudent, tamquam non gaudéntes: et qui emunt, tamquam non possidéntes, et qui utúntur hoc mundo, tamquam non utántur: prǽterit enim figúra hujus mundi. Volo autem vos sine sollicitúdine esse. Qui sine uxóre est, sollícitus est, quæ Dómini sunt, quómodo pláceat Deo. Qui autem cum uxóre est, sollícitus est, quæ sunt mundi, quómodo pláceat uxóri, et divísus est. Et múlier innúpta, et virgo cógitat quæ Dómini sunt, ut sit sancta córpore, et spíritu: in Christo Jesu Dómino nostro.

Graduále Ps. 44, 3 et 10 Speciósus forma præ fíliis hóminum: diffúsa est grátia in lábiis tuis. V/. Fíliæ regum in honóre tuo: ástitit regína a dextris tuis in vestítu deauráto, circúmdata varietáte.

Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja.


¶ In Missis votívis post Septuagésimam, omíssis Allelúja et Versu sequénti, dícitur

Tractus Ps. 44, 14-16 Omnis glória ejus fíliæ Regis ab intus, in fímbriis áureis, circumamícta varietátibus. V/. Adducéntur Regi vírgines post eam, próximæ ejus afferéntur tibi. V/. Afferéntur in lætítia et exsultatióne, adducéntur in templum Regis.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja. V/. Isai. 56, 5 Ego Dóminus dabo eis nomen mélius a fíliis et filiábus: nomen sempitérnum dabo eis, quod non períbit. Allelúja.

+ Sequéntia sancti Evangélii secúndum Matthǽum.

Matth. 25, 1-13

IN illo témpore: Dixit Jesus discípulis suis parábolam hanc: Símile erit regnum cælórum decem virgínibus: quæ accipiéntes lámpadas suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, neque horam.

Offertórium Ps. 33, 6 Accédite ad Dóminum, et illuminámini: et fácies vestræ non confundéntur.

Secréta

MUNÉRIBUS tibi, Dómine, pro beatárum Vírginum Landrádæ et Amelbérgæ honóre dicátis, benedictiónem tuam propitiátus effúnde: ut per éadem, et a vítiis ómnibus emundémur, et cæléstibus delíciis impleámur. Per Dóminum.

Commúnio Matth. 25, 10 Venit sponsus: et vírgines, quæ parátæ erant, intravérunt cum eo ad núptias, et clausa est jánua.

Postcommúnio

SUMPTA mystéria, quǽsumus, Dómine, suffragántibus beatárum Vírginum Landrádæ et Amelbérgæ méritis, íncitent nos júgiter et illústrent: ut digne advéntum Fílii tui præstolémur, et ad supérnas ejus núptias admittámur. Per eúmdem Dóminum.
Die 9 Júlii

SS. MÁRTYRUM GORCOMIÉNSIUM


Duplex
Missa Intret in conspéctu, de Commúni plurimórum Mártyrum 1 loco, præter Oratiónem sequéntem:

Orátio


DEUS, qui beatórum Mártyrum tuórum Nicolái et Sociórum ejus, gloriósum pro orthodóxa fide certámen æternitátis láurea decorásti: concéde propítius; ut eórum méritis et imitatióne certántes in terris, cum ipsis coronári mereámur in cælis. Per Dóminum.
Secréta

ADÉSTO, Dómine, supplicatiónibus nostris, quas in Sanctórum tuórum commemoratióne deférimus: ut, qui nostræ justítiæ fidúciam non habémus, eórum qui tibi placuérunt, méritis adjuvémur. Per Dóminum.

Postcommúnio

Quǽsumus, Dómine, salutáribus repléti mystériis: ut, quorum solémnia celebrámus, eórum oratiónibus adjuvémur. Per Dóminum.
Die 16 Júlii

Commemorátio


S. VALENTINI


Epíscopi et Mártyris
Missa Státuit, de Commúni uníus Mart. Pontíficis 1 loco, cum Oratiónibus ut infra:

Orátio


INFIRMITÁTEM nostram réspice, omnípotens Deus: et, quia pondus própriæ actiónis gravat, beáti Valentíni Mártyris tui atque Pontíficis intercéssio gloriósa nos prótegat. Per Dóminum.

Secréta


HÓSTIAS tibi, Dómine, beáti Valentíni Mártyris tui atque Pontíficis dicátas méritis, benígnus assúme: et ad perpétuum nobis tríbue proveníre subsídium. Per Dóminum.

Postcommúnio

REFÉCTI participatióne múneris sacri, quǽsumus, Dómine Deus noster: ut, cujus exséquimur cultum, intercedénte beáto Valentíno Mártyre tuo atque Pontífice, sentiámus efféctum. Per Dóminum.
Die 21 Júlii

SS. MONÚLPHI ET GONDÚLPHI


Episcopórum et Confessórum

Duplex
Intróitus Ps. 131, 16-17

SACERDÓTES Sion índuam salutári, et sancti ejus exsultatióne exsultábunt, dicit Dóminus: illuc prodúcam cornu David, parávi lucérnam Christo meo. Ps. ibid., 1 Meménto, Dómine, David: et omnis mansuetúdinis ejus. V/. Glória Patri.

Orátio


EXÁUDI, Dómine, pópulum tuum, et sanctórum Confessórum tuórum atque Pontíficum Monúlphi et Gondúlphi solémnia celebrántem, temporális vitæ tríbue pace gaudére, et ætérnæ reperíre subsídium. Per Dóminum.

Léctio Epístolæ beáti Pauli Apóstoli ad Hebrǽos.

Hebr. 13, 7-17

FRATRES: Mementóte præpositórum vestrórum, qui vobis locúti sunt verbum Dei: quorum intuéntes éxitum conversatiónis, imitámini fidem. Jesus Christus heri, et hódie: ipse et in sǽcula. Doctrínis váriis et peregrínis nolíte abdúci. Optimum est enim grátia stabilíre cor, non escis, quæ non profuérunt ambulántibus in eis. Habémus altáre, de quo édere non habent potestátem, qui tabernáculo desérviunt. Quorum enim animálium infértur sanguis pro peccáto in Sancta per pontíficem, horum córpora cremántur extra castra. Propter quod et Jesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium ejus portántes. Non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est, fructum labiórum confiténtium nómini ejus. Beneficéntiæ autem, et communiónis nolíte oblivísci: tálibus enim hóstiis promerétur Deus. Obedíte præpósitis vestris, et subjacéte eis. Ipsi enim pervígilant, quasi ratiónem pro animábus vestris redditúri.

Graduále Ps. 106, 22 et 32 Sacríficent Dómino sacrifícium laudis: et annúntient ópera ejus in exsultatióne. V/. Et exáltent eum in ecclésia plebis: et in cáthedra seniórum laudent eum.

Allelúja, allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui læténtur in bonis. Allelúja.


¶ In Missis votívis post Septuagésimam, omíssis Allelúja et Versu sequénti, dícitur

Tractus Ps. 131, 8-10 Surge, Dómine, in réquiem tuam: tu et arca sanctificatiónis tuæ. V/. Sacerdótes tui induántur justítiam, et sancti tui exsúltent. V/. Propter David servum tuum, non avértas fáciem Christi tui.

Témpore autem Pascháli omíttitur Graduále, et ejus loco dícitur:

Allelúja, allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui læténtur in bonis. Allelúja. V/. Jerem. 31, 14 Ego Dóminus inebriábo ánimam sacerdótum pinguédine: et pópulus meus bonis meis adimplébitur. Allelúja.

+ Sequéntia sancti Evangélii secúndum Marcum.

Marc. 13, 33-37

IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri præcépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte.

Offertórium Ps. 105, 3 Beáti, qui custódiunt judícium, et fáciunt justítiam in omni témpore.

Secréta

SÚSCIPE, Dómine, preces nostras et múnera: quæ ut tuo digna sint conspéctu, sanctórum tuórum Monúlphi et Gondúlphi précibus adjuvémur. Per Dóminum nostrum.

Commúnio Marc. 13, 34 Homo péregre proféctus relíquit domum suam, et dedit servis suis potestátem cujúsque óperis, et janitóri præcépit ut vígilet.

Postcommúnio

REPLÉTI, Dómine Deus noster, munéribus sacris: quǽsumus; ut intercedéntibus sanctis Pontifícibus tuis Monúlpho et Gondúlpho, in gratiárum semper actióne maneámus. Per Dóminum nostrum.
Die 24 Júlii

B. CHRISTÍNÆ MIRABILIS


Vírginis

Simplex
Missa Dilexísti, ut in Commúni Vírginum 3 loco, præter Oratiónem sequéntem:

Orátio

IN beáta Vírgine Christína te, Dómine, mirábilem prædicántes, majestátem tuam supplíciter exorámus: ut sicut ejus tibi grata sunt mérita, sic nostræ servitútis accépta reddántur offícia. Per Dóminum.



1   ...   120   121   122   123   124   125   126   127   128


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət