Missále románum 1957 en préparation

FESTA NOVÉMBRIS

SACRÁRUM RELIQUIÁRUM

MULTÆ tribulatiónes justórum, et de his ómnibus liberávit eos Dóminus: Dóminus custódit ómnia ossa eórum: unum ex his non conterétur. Ps. ibid., 2 Benedícam Dóminum in omni témpore: semper laus ejus in ore meo. V/. Glória Patri.

Orátio

AUGE in nobis, Dómine, resurrectiónis fidem, qui in Sanctórum tuórum Relíquiis mirabília operáris: et fac nos immortális glóriæ partícipes; cujus in eórum cinéribus pígnora venerámur. Per Dóminum.

Eccli. 44, 10-15

HI viri misericórdiæ sunt, quorum pietátes non defuérunt: cum sémine eórum pérmanent bona, heréditas sancta nepótes eórum, et in testaméntis stetit semen eórum: et fílii eórum propter illos usque in ætérnum manent: semen eórum et glória eórum non derelinquétur. Córpora ipsórum in pace sepúlta sunt, et nomen eórum vivit in generatiónem et generatiónem. Sapiéntiam ipsórum narrent pópuli, et laudem eórum núntiet Ecclésia.

Graduále Ps. 149, 5 et 1 Exsultábunt sancti in glória: lætabúntur in cubílibus suis. V/. Cantáte Dómino cánticum novum: laus ejus in ecclésia sanctórum.

Allelúja, allelúja. V/. Ps. 67, 4 Justi epuléntur, et exsúltent in conspéctu Dei: et delecténtur in lætítia. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 125, 5-6 Qui séminant in lácrimis, in gáudio metent. V/. Eúntes ibant et flebant, mitténtes sémina sua. V/. Veniéntes autem vénient cum exsultatióne, portántes manípulos suos.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Eccli. 39, 19 Sancti tui, Dómine, florébunt sicut lílium, et sicut odor bálsami erunt ante te. Allelúja. V/. Ps. 115, 15 Pretiósa in conspéctu Dómini mors sanctórum ejus. Allelúja.

+ Sequéntia sancti Evangélii secúndum Lucam.

Luc. 6, 17-23

IN illo témpore: Descéndens Jesus de monte, stetit in loco campéstri, et turba discipulórum ejus, et multitúdo copiósa plebis ab omni Judǽa, et Jerúsalem, et marítima, et Tyri, et Sidónis, qui vénerant, ut audírent eum, et sanaréntur a languóribus suis. Et qui vexabántur a spirítibus immúndis, curabántur. Et omnis turba quærébat eum tángere: quia virtus de illo exíbat, et sanábat omnes. Et ipse elevátis óculis in discípulos suos, dicébat: Beáti páuperes: quia vestrum est regnum Dei. Beáti, qui nunc esurítis: quia saturabímini. Beáti, qui nunc fletis: quia ridébitis. Beáti éritis, cum vos óderint hómines, et cum separáverint vos, et exprobráverint, et ejécerint nomen vestrum tamquam malum, propter Fílium hóminis. Gaudéte in illa die, et exsultáte: ecce enim merces vestra multa est in cælo.

Offertórium Ps. 67, 36 Mirábilis Deus in sanctis suis: Deus Israël, ipse dabit virtútem et fortitúdinem plebi suæ: benedíctus Deus, allelúja.

Secréta

IMPLORÁMUS, Dómine, cleméntiam tuam: ut Sanctórum tuórum, quorum Relíquias venerámur, suffragántibus méritis, hóstia, quam offérimus, nostrórum sit expiátio delictórum. Per Dóminum.

Commúnio Ps. 32, 1 Gaudéte, justi, in Dómino: rectos decet collaudátio.

Postcommúnio

MULTÍPLICA super nos, quǽsumus, Dómine, per hæc sancta, quæ súmpsimus, misericórdiam tuam: ut, sicut in tuórum solemnitáte Sanctórum, quorum Relíquias cólimus, pia devotióne lætámur; ita eórum perpétua societáte, te largiénte, fruámur. Per Dóminum.

MISSÆ PRO ALÍQUIBUS LOCIS

S. STANISLÁI KOSTKÆ

CONSUMMÁTUS in brevi explévit témpora multa: plácita enim erat Deo ánima illíus: propter hoc properávit edúcere illum de médio iniquitátum. Ps. 112, 1 Laudáte, púeri, Dóminum: laudáte nomen Dómini. V/. Glória Patri.

Orátio

DEUS, qui inter cétera sapiéntiæ tuæ mirácula, étiam in ténera ætáte matúra sanctitátis grátiam contulísti: da, quǽsumus; ut, beáti Stanislái exémplo, tempus instánter operándo rediméntes, in ætérnam íngredi réquiem festinémus. Per Dóminum.

Sap. 4, 7-16

JUSTUS, si morte præoccupátus fúerit, in refrigério erit. Senéctus enim venerábilis est non diutúrna, neque annórum número computáta: cani autem sunt sensus hóminis, et ætas senectútis vita inmaculáta. Placens Deo factus est diléctus, et vivens inter peccatóres translátus est. Raptus est ne malítia mutáret intelléctum ejus, aut ne fíctio decíperet ánimam illíus. Fascinátio enim nugacitátis obscúrat bona, et inconstántia concupiscéntiæ transvértit sensum sine malítia. Consummátus in brevi explévit témpora multa: plácita enim erat Deo ánima illíus: propter hoc properávit edúcere illum de médio iniquitátum: pópuli autem vidéntes, et non intelligéntes, nec ponéntes in præcórdiis tália: quóniam grátia Dei, et misericórdia est in sanctos ejus, et respéctus in eléctos illíus. Condémnat autem justus mórtuus vivos ímpios, et juvéntus celérius consummáta longam vitam injústi.

Graduále Ps. 20, 3-4 Desidérium cordis ejus tribuísti ei: et voluntáte labiórum ejus non fraudásti eum. V/. Quóniam prævenísti eum in benedictiónibus dulcédinis.

Allelúja, allelúja. V/. Ps. 118, 152 Inítio cognóvi de testimóniis tuis, quia in ætérnum fundásti ea. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiæ in domo ejus: et justítia ejus manet in sǽculum sǽculi.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Jac. 1, 12 Beátus vir, qui suffert tentatiónem: quóniam, cum probátus fúerit, accípiet corónam vitæ. Allelúja. V/. Eccli. 45, 9 Amávit eum Dóminus, et ornávit eum: stolam glóriæ índuit eum. Allelúja.

+ Sequéntia sancti Evangélii secúndum Matthǽum.

Matth. 19, 13-21

IN illo témpore: Obláti sunt Jesu párvuli, ut manus eis impóneret, et oráret. Discípuli autem increpábant eos. Jesus vero ait eis: Sínite párvulos, et nolíte eos prohibére ad me veníre: tálium est enim regnum cælórum. Et cum imposuísset eis manus, ábiit inde. Et ecce unus accédens, ait illi: Magíster bone, quid boni fáciam ut hábeam vitam ætérnam? Qui dixit ei: Quid me intérrogas de bono? Unus est bonus, Deus. Si autem vis ad vitam íngredi, serva mandáta. Dicit illi: Quæ? Jesus autem dixit: Non homicídium fácies: Non adulterábis: Non fácies furtum: Non falsum testimónium dices: Honóra patrem tuum, et matrem tuam, et díliges próximum tuum sicut teípsum. Dicit illi adoléscens: Omnia hæc custodívi a juventúte mea: quid adhuc mihi deest? Ait illi Jesus: Si vis perféctus esse, vade, vende quæ habes, et da paupéribus, et habébis thesáurum in cælo: et veni, séquere me.

Offertórium Ps. 42, 4 Introíbo ad altáre Dei: ad Deum, qui lætíficat juventútem meam.

Secréta

ANGELÓRUM pane, quǽsumus, Dómine, beáti Stanislái nos intercéssio dignos effíciat, qui eo méruit angélica manu recreári. Per Dóminum.

Commúnio Eccli. 15, 3 Cibávit illum Dóminus pane vitæ et intelléctus, et aqua sapiéntiæ salutáris potávit illum.

Postcommúnio

UT nobis, Dómine, cæléstis, quem súmpsimus, panis sit vitæ: beáto Stanisláo Confessóre tuo intercedénte, quǽsumus; ut panis sit intelléctus, et potus aqua sapiéntiæ salutáris. Per Dóminum.

MISSÆ PRO ALÍQUIBUS LOCIS

Sábbato

B. MARÍÆ VÍRGINIS

DIVÍNÆ PROVIDÉNTIÆ MATRIS

MÚLIER, ecce fílius tuus, dixit Jesus matri: deínde dixit discípulo quem diligébat: Ecce mater tua. Ps. 105, 1 Confitémini Dómino, quóniam bonus: quóniam in sǽculum misericórdia ejus. V/. Glória Patri.

Orátio

DEUS, cujus providéntia in sui dispositióne non fállitur, te súpplices exorámus: ut, intercedénte beáta Vírgine ac Genitríce Fílii tui María; nóxia cuncta submóveas, et ómnia nobis profutúra concédas. Per eúmdem Dóminum.

Eccli. 24, 1 et 4-13

SAPIÉNTIA laudábit ánimam suam, et in Deo honorábitur, et in médio pópuli sui gloriábitur. Et in multitúdine electórum habébit laudem et inter benedíctos benedicétur, dicens: Ego ex ore Altíssimi prodívi primogénita ante omnem creatúram: Ego feci in cælis ut orirétur lumen indefíciens, et sicut nébula texi omnem terram: Ego in altíssimis habitávi, et thronus meus in colúmna nubis. Gyrum cæli circuívi sola, et profúndum abýssi penetrávi, in flúctibus maris ambulávi, et in omni terra steti: et in omni pópulo, et in omni gente primátum hábui: et ómnium excelléntium et humílium corda virtúte calcávi: et in his ómnibus réquiem quæsívi, et in hereditáte Dómini morábor. Tunc præcépit, et dixit mihi Creátor ómnium: et qui creávit me, requiévit in tabernáculo meo, et dixit mihi: In Jacob inhábita, et in Israël hereditáre, et in eléctis meis mitte radíces.

Graduále Isai. 49, 15 Numquid oblivísci potest múlier infántem suum, ut non misereátur fílio úteri sui? V/. Et si illa oblíta fúerit, ego tamen non oblivíscar tui.

Allelúja, allelúja. V/. Tob. 13, 17 Tu autem lætáberis in fíliis tuis, quóniam omnes benedicéntur, et congregabúntur ad Dóminum. Allelúja.
Post Septuagésimam, omíssis Allelúja et Versu sequénti, dícitur

Tractus Prov. 8, 32-35 Nunc ergo, fílii, audíte me: Beáti, qui custódiunt vias meas. V/. Audíte disciplínam, et estóte sapiéntes, et nolíte abjícere eam. V/. Beátus homo qui audit me, et qui vígilat ad fores meas quotídie, et obsérvat ad postes óstii mei. V/. Qui me invénerit, invéniet vitam, et háuriet salútem a Dómino.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Isai. 66, 10 et 13 Lætámini et exsultáte, omnes qui dilígitis eam. Allelúja. V/. Quómodo si cui mater blandiátur, ita ego consolábor vos. Allelúja.

+ Sequéntia sancti Evangélii secúndum Joánnem.

Joann. 2, 1-11

IN illo témpore: Núptiæ factæ sunt in Cana Galilǽæ: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeæ hýdriæ sex pósitæ secúndum purificatiónem Judæórum, capiéntes síngulæ metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilǽæ: et manifestávit glóriam suam, et credidérunt in eum discípuli ejus.

Credo.

Secréta

Præfátio de beáta María Vírgine Et te in Festivitáte.

Commúnio Ps. 127, 3 Fílii tui sicut novéllæ olivárum in circúitu mensæ tuæ.

Postcommúnio

CÆLÉSTIS mensæ virtus, miséricors Deus, in fámulis tuis júgiter persevéret: ut, divínæ providéntiæ Matris intercessióne, regnum et justítiam tuam ante ómnia quæréntes, temporálibus non destituántur auxíliis. Per Dóminum.

MISSÆ PRO ALÍQUIBUS LOCIS

S. LEONÁRDI A PORTU MAURÍTIO

DÓMINUS implébit splendóribus ánimam tuam, et ossa tua liberábit, et eris quasi hortus irríguus, et sicut fons aquárum, cujus non defícient aquæ. Ps. 80, 2 Exsultáte Deo adjutóri nostro: jubiláte Deo Jacob. V/. Glória Patri.

Orátio

DEUS, qui in obstinátis peccatórum córdibus ad pœniténtiam flecténdis beátum Leonárdum Confessórem tuum ópere ac sermóne poténtem effecísti: da, quǽsumus; ut per ejus preces et mérita e córdibus nostris contritiónis lácrimas elícere valeámus. Per Dóminum.

Ephes. 1, 3-14

BENEDÍCTUS Deus et Pater Dómini nostri Jesu Christi, qui benedíxit nos in omni benedictióne spirituáli in cæléstibus in Christo, sicut elégit nos in ipso ante mundi constitutiónem, ut essémus sancti et immaculáti in conspéctu ejus in caritáte. Qui prædestinávit nos in adoptiónem filiórum per Jesum Christum in ipsum: secúndum propósitum voluntátis suæ, in laudem glóriæ grátiæ suæ, in qua gratificávit nos in dilécto Fílio suo. In quo habémus redemptiónem per sánguinem ejus, remissiónem peccatórum secúndum divítias grátiæ ejus, quæ superabundávit in nobis in omni sapiéntia et prudéntia: ut notum fáceret nobis sacraméntum voluntátis suæ, secúndum beneplácitum ejus, quod propósuit in eo, in dispensatióne plenitúdinis témporum, instauráre ómnia in Christo, quæ in cælis, et quæ in terra sunt, in ipso. In quo étiam et nos sorte vocáti sumus prædestináti secúndum propósitum ejus, qui operátur ómnia secúndum consílium voluntátis suæ: ut simus in laudem glóriæ ejus nos, qui ante sperávimus in Christo. In quo et vos, cum audissétis verbum veritátis, (Evangélium salútis vestræ) in quo et credéntes signáti estis Spíritu promissiónis Sancto, qui est pignus hereditátis nostræ, in redemptiónem acquisitiónis, in laudem glóriæ ipsíus.

Graduále Ps. 91, 13 et 14 Justus ut palma florébit: sicut cedrus Líbani multiplicábitur in domo Dómini. V/. Ibid., 3 Ad annuntiándum mane misericórdiam tuam, et veritátem tuam per noctem.

Allelúja, allelúja. V/. Isai. 52, 7 Quam pulchri super montes pedes annuntiántis et prædicántis pacem: annuntiántis bonum, prædicántis salútem. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 111, 1-3 Beátus vir, qui timet Dóminum: in mandátis ejus cupit nimis. V/. Potens in terra erit semen ejus: generátio rectórum benedicétur. V/. Glória et divítiæ in domo ejus: et justítia ejus manet in sǽculum sǽculi.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Ps. 111, 1 Beátus vir, qui timet Dóminum: in mandátis ejus cupit nimis. Allelúja. V/. Osée 14, 6 Justus germinábit sicut lílium: et florébit in ætérnum ante Dóminum. Allelúja.

+ Sequéntia sancti Evangélii secúndum Lucam.

Luc. 10, 1-9

IN illo témpore: Designávit Dóminus et álios septuagínta duos: et misit illos binos ante fáciem suam in omnem civitátem et locum, quo erat ipse ventúrus. Et dicébat illis: Messis quidem multa, operárii autem pauci. Rogáte ergo dóminum messis, ut mittat operários in messem suam. Ite: ecce ego mitto vos sicut agnos inter lupos. Nolíte portáre sácculum, neque peram, neque calceaménta, et néminem per viam salutavéritis. In quamcúmque domum intravéritis, primum dícite: Pax huic dómui: et si ibi fúerit fílius pacis, requiéscet super illum pax vestra: sin autem, ad vos revertétur. In eádem autem domo manéte, edéntes et bibéntes quæ apud illos sunt: dignus est enim operárius mercéde sua. Nolíte transíre de domo in domum. Et in quamcúmque civitátem intravéritis, et suscéperint vos, manducáte quæ apponúntur vobis: et curáte infírmos, qui in illa sunt, et dícite illis: Appropinquávit in vos regnum Dei.

Offertórium 2 Cor. 3, 5-6 Non sumus sufficiéntes cogitáre áliquid a nobis, quasi ex nobis: sed sufficiéntia nostra ex Deo est, qui et idóneos nos fecit minístros novi testaménti.

Secréta

IMMACULÁTAM hóstiam tibi, Dómine, offérimus deprecántes: ut, sancti Leonárdi Confessóris interveniénte suffrágio, semper in nobis dilécti Fílii tui passiónis memória persevéret et fructus. Per eúmdem Dóminum.

Commúnio 2 Cor. 5, 20 Pro Christo legatióne fúngimur, tamquam Deo exhortánte per nos: obsecrámus pro Christo, reconciliámini Deo.

Postcommúnio

CITO antícipent nos miséricórdiæ tuæ, quǽsumus, Dómine, intercedénte sancto Confessóre tuo Leonárdo: ut, a culpis expiáti, in electórum número esse mereámur. Per Dóminum.

MISSÆ PRO ALÍQUIBUS LOCIS

S. JOÁNNIS BERCHMANS

MISSÆ PRO ALÍQUIBUS LOCIS

B. MARÍÆ VÍRGINIS IMMACULÁTÆ

A SACRO NUMISMATE

ERIT quasi signum in manu tua, et quasi monuméntum ante óculos tuos, et ut lex Dómini semper sit in ore tuo. Ps. 104, 1 Confitémini Dómino, et invocáte nomen ejus: annuntiáte inter gentes ópera ejus. V/. Glória Patri.

Orátio

DÓMINE Jesu Christe, qui beatíssimam Vírginem Maríam Matrem tuam ab orígine immaculátam innúmeris miráculis claréscere voluísti: concéde; ut, ejúsdem patrocínium semper implorántes, gáudia consequámur ætérna: Qui vivis.

Apoc. 12, 1, 5, 14 et 15-16

SIGNUM magnum appáruit in cælo: Múlier amícta sole, et luna sub pédibus ejus, et in cápite ejus coróna stellárum duódecim. Et péperit fílium másculum, qui rectúrus erat omnes gentes in virga férrea: et raptus est fílius ejus ad Deum, et ad thronum ejus. Et datæ sunt mulíeri alæ duæ áquilæ magnæ ut voláret in desértum in locum suum. Et misit serpens ex ore suo post mulíerem, aquam tamquam flumen, ut eam fáceret trahi a flúmine. Et adjúvit terra mulíerem, et apéruit terra os suum, et absórbuit flumen, quod misit draco de ore suo.

Graduále Ps. 104, 5 et 27 Mementóte mirabílium ejus, quæ fecit: prodígia ejus, et judícia oris ejus. V/. Pósuit in ea verba signórum suórum, et prodigiórum suórum in terra.

Allelúja, allelúja. V/. Ps. 18, 7 A summo cælo egréssio ejus, nec est qui se abscóndat a calóre ejus. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 86, 1-2 Fundaménta ejus in móntibus sanctis: díligit Dóminus portas Sion super ómnia tabernácula Jacob. V/. Ibid., 3 Gloriósa dicta sunt de te, cívitas Dei. V/. Ibid., 5 Homo natus est in ea, et ipse fundávit eam Altíssimus.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Judith 15, 10 Tu glória Jerúsalem, tu lætítia Israël, tu honorificéntia pópuli nostri. Allelúja. V/. Cant. 4, 7 Tota pulchra es, María: et mácula originális non est in te. Allelúja.

+ Sequéntia sancti Evangélii secúndum Joánnem.

Joann. 2, 1-11

IN illo témpore: Núptiæ factæ sunt in Cana Galilǽæ: et erat mater Jesu ibi. Vocátus est autem et Jesus, et discípuli ejus ad núptias. Et deficiénte vino, dicit mater Jesu ad eum: Vinum non habent. Et dicit ei Jesus: Quid mihi et tibi est, múlier? nondum venit hora mea. Dicit mater ejus minístris: Quodcúmque díxerit vobis, fácite. Erant autem ibi lapídeæ hýdriæ sex pósitæ secúndum purificatiónem Judæórum, capiéntes síngulæ metrétas binas vel ternas. Dicit eis Jesus: Impléte hýdrias aqua. Et implevérunt eas usque ad summum. Et dicit eis Jesus: Hauríte nunc, et ferte architriclíno. Et tulérunt. Ut autem gustávit architriclínus aquam vinum factam, et non sciébat unde esset, minístri autem sciébant, qui háuserant aquam: vocat sponsum architriclínus, et dicit ei: Omnis homo primum bonum vinum ponit: et cum inebriáti fúerint, tunc id, quod detérius est. Tu autem servásti bonum vinum usque adhuc. Hoc fecit inítium signórum Jesus in Cana Galilǽæ: et manifestávit glóriam suam, et credidérunt in eum discípuli ejus.

Credo.

Secréta

Præfátio de beáta María Vírgine Et te in Conceptióne immaculáta.

Commúnio Eccli. 36, 6-7 et 10 Innova signa, et immúta mirabília. Glorífica manum tuam, et bráchium déxterum. Festína tempus, et meménto finis, ut enárrent mirabília tua.

Postcommúnio

DÓMINE Deus omnípotens, qui per immaculátam Genitrícem Fílii tui ómnia nos habére voluísti: da nobis tantæ Matris auxílio, præséntis témporis perícula devitáre; ut vitam consequámur ætérnam. Per eúmdem Dóminum.

II

COMMUNE SANCTÓRUM

PRO ALÍQUIBUS LOCIS

JUXTA DECRÉTUM S. R. C. DIÉI 22 MAJI 1914

MISSÆ PRO ALÍQUIBUS LOCIS

COMMUNE PLÚRIUM

CONFESSÓRUM PONTÍFICUM

SACERDÓTES Sion índuam salutári, et sancti ejus exsultatióne exsultábunt, dicit Dóminus: illuc prodúcam cornu David, parávi lucérnam Christo meo. (T. P. Allelúja, allelúja.) Ps. ibid., 1 Meménto, Dómine, David: et omnis mansuetúdinis ejus. V/. Glória Patri.

Orátio

DEUS, qui nos beatórum N. et N. Confessórum tuórum atque Pontíficum confessiónibus gloriósis circúmdas et prótegis: da nobis, et eórum imitatióne profícere, et intercessióne gaudére. Per Dóminum.

ECCLÉSIAM tuam, Dómine, beatórum N. et N. Confessórum tuórum atque Pontíficum contínua protectióne custódi: ut, sicut illos pastorális sollicitúdo gloriósos réddidit; ita nos eórum intercéssio in tuo semper fáciat amóre fervéntes. Per Dóminum.

Léctio Epístolæ beáti Pauli Apóstoli ad Hebrǽos.

Hebr. 13, 7-17

FRATRES: Mementóte præpositórum vestrórum, qui vobis locúti sunt verbum Dei: quorum intuéntes éxitum conversatiónis, imitámini fidem. Jesus Christus heri, et hódie: ipse et in sǽcula. Doctrínis váriis et peregrínis nolíte abdúci. Optimum est enim grátia stabilíre cor, non escis, quæ non profuérunt ambulántibus in eis. Habémus altáre, de quo édere non habent potestátem, qui tabernáculo desérviunt. Quorum enim animálium infértur sanguis pro peccáto in Sancta per pontíficem, horum córpora cremántur extra castra. Propter quod et Jesus, ut sanctificáret per suum sánguinem pópulum, extra portam passus est. Exeámus ígitur ad eum extra castra, impropérium ejus portántes. Non enim habémus hic manéntem civitátem, sed futúram inquírimus. Per ipsum ergo offerámus hóstiam laudis semper Deo, id est, fructum labiórum confiténtium nómini ejus. Beneficéntiæ autem, et communiónis nolíte oblivísci: tálibus enim hóstiis promerétur Deus. Obedíte præpósitis vestris, et subjacéte eis. Ipsi enim pervígilant, quasi ratiónem pro animábus vestris redditúri.

Graduále Ps. 106, 22 et 32 Sacríficent Dómino sacrifícium laudis: et annúntient ópera ejus in exsultatióne. V/. Et exáltent eum in ecclésia plebis: et in cáthedra seniórum laudent eum.

Allelúja, allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui læténtur in bonis. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 131, 8-10 Surge, Dómine, in réquiem tuam: tu et arca sanctificatiónis tuæ. V/. Sacerdótes tui induántur justítiam, et sancti tui exsúltent. V/. Propter David servum tuum, non avértas fáciem Christi tui.

Témpore autem Pascháli omíttitur Graduále, et ejus loco dícitur:

Allelúja, allelúja. V/. 2 Paral. 6, 41 Sacerdótes tui, Dómine Deus, induántur salútem, et sancti tui læténtur in bonis. Allelúja. V/. Jerem. 31, 14 Ego Dóminus inebriábo ánimam sacerdótum pinguédine: et pópulus meus bonis meis adimplébitur. Allelúja.

+ Sequéntia sancti Evangélii secúndum Marcum.

Marc. 13, 33-37

IN illo témpore: Dixit Jesus discípulis suis: Vidéte, vigiláte, et oráte: nescítis enim quando tempus sit. Sicut homo, qui péregre proféctus relíquit domum suam, et dedit servis suis potestátem cujúsque óperis, et janitóri præcépit ut vígilet. Vigiláte ergo, (nescítis enim quando dóminus domus véniat: sero, an média nocte, an galli cantu, an mane) ne cum vénerit repénte, invéniat vos dormiéntes. Quod autem vobis dico, ómnibus dico: Vigiláte.

Offertórium Ps. 105, 3 Beáti, qui custódiunt judícium, et fáciunt justítiam in omni témpore. (T. P. Allelúja.)

Secréta

MÚNERA nostra, Dómine, sacris altáribus offeréntes, quǽsumus cleméntiam tuam: ut éadem, suffragántibus beatórum N. et N. Pontíficum méritis, et suprémam tibi glóriam operéntur, et ubérrimam nobis grátiam assequántur. Per Dóminum.

Alia Secréta

HANC nostræ oblatiónis hóstiam, Deus, gratam óculis tuæ majestátis effíciant beatórum N. et N. Pontíficum expetíta suffrágia: qui digne in hoc sǽculo sacrifícia tibi, ac preces in salútem pópuli obtulérunt. Per Dóminum.

Commúnio Marc. 13, 34 Homo péregre proféctus relíquit domum suam, et dedit servis suis potestátem cujúsque óperis, et janitóri præcépit ut vígilet. (T. P. Allelúja.).

Postcommúnio

REFECTIÓNE sacra enutrítos, fac nos, omnípotens Deus, vestígiis beatórum N. et N. Pontíficum semper insístere: qui studuérunt pérpeti devotióne te cólere, et indeféssa ómnibus caritáte profícere. Per Dóminum.

Alia Postcommúnio

MENSA cæléstis, omnípotens Deus, intercedéntibus beatórum N. et N. Pontíficum méritis, supérnas in ómnibus vires firmet et áugeat: ut et fídei donum íntegrum custodiámus, et per osténsum salútis trámitem ambulémus. Per Dóminum.

MISSÆ PRO ALÍQUIBUS LOCIS

COMMUNE PLÚRIUM

CONFESSÓRUM NON PONTÍFICUM

CONFITEÁNTUR tibi, Dómine, ómnia ópera tua, et sancti tui benedícant tibi: glóriam regni tui dicent, et poténtiam tuam loquéntur. (T. P. Allelúja, allelúja.) Ps. ibid., 1 Exaltábo te, Deus meus Rex: et benedícam nómini tuo in sǽculum, et in sǽculum sǽculi. V/. Glória Patri.

Orátio

CONCÉDE, quǽsumus, omnípotens Deus: ut ad meliórem vitam beatórum N. et N. Confessórum tuórum exémpla nos próvocent; quátenus, quorum memóriam ágimus, étiam actus imitémur. Per Dóminum.

DEUS, qui nos beatórum N. et N. Confessórum tuórum méritis et intercessióne lætíficas: concéde propítius; ut, qui tua per eos benefícia póscimus, dono tuæ grátiæ consequámur. Per Dóminum.

Léctio libri Sapiéntiæ.

Eccli. 2, 7-13

METUÉNTES Dóminum, sustinéte misericórdiam ejus: et non deflectátis ab illo ne cadátis. Qui timétis Dóminum, crédite illi: et non evacuábitur merces vestra. Qui timétis Dóminum, speráte in illum: et in oblectatiónem véniet vobis misericórdia. Qui timétis Dóminum, dilígite illum: et illuminabúntur corda vestra. Respícite, fílii, natiónes hóminum: et scitóte quia nullus sperávit in Dómino, et confúsus est. Quis enim permánsit in mandátis ejus, et derelíctus est? aut quis invocávit eum, et despéxit illum? Quóniam pius et miséricors est Deus, et remíttet in die tribulatiónis peccáta: et protéctor est ómnibus exquiréntibus se in veritáte.

Graduále Ps. 30, 24-25 Dilígite Dóminum, omnes sancti ejus, quóniam veritátem requíret Dóminus, et retríbuet abundánter faciéntibus supérbiam. V/. Viríliter ágite, et confortétur cor vestrum, omnes qui sperátis in Dómino.

Allelúja, allelúja. V/. Ps. 9, 11 Sperent in te qui novérunt nomen tuum: quóniam non dereliquísti quæréntes te, Dómine. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 33, 9-11 Gustáte, et vidéte, quóniam suávis est Dóminus: beátus vir, qui sperat in eo. V/. Timéte Dóminum, omnes sancti ejus: quóniam non est inópia timéntibus eum. V/. Dívites eguérunt et esuriérunt: inquiréntes autem Dóminum non minuéntur omni bono.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Ps. 9, 11 Sperent in te qui novérunt nomen tuum: quóniam non dereliquísti quæréntes te, Dómine. Allelúja. Ps. 139, 14 Justi confitebúntur nómini tuo, Dómine: et habitábunt recti cum vultu tuo. Allelúja.

+ Sequéntia sancti Evangélii secúndum Lucam.

Luc. 12, 35-40

IN illo témpore: Dixit Jesus discípulis suis: Sint lumbi vestri præcíncti, et lucérnæ ardéntes in mánibus vestris, et vos símiles homínibus exspectántibus dóminum suum, quando revertátur a núptiis: ut, cum vénerit, et pulsáverit, conféstim apériant ei. Beáti servi illi, quos, cum vénerit dóminus, invénerit vigilántes: amen dico vobis, quod præcínget se, et fáciet illos discúmbere, et tránsiens ministrábit illis. Et si vénerit in secúnda vigília, et si in tértia vigília vénerit, et ita invénerit, beáti sunt servi illi. Hoc autem scitóte, quóniam si sciret paterfamílias, qua hora fur veníret, vigiláret útique, et non síneret pérfodi domum suam. Et vos estóte paráti: quia qua hora non putátis, Fílius hóminis véniet.

Offertórium Ps. 67, 4 Justi epuléntur, et exsúltent in conspéctu Dei, et delecténtur in lætítia. (T. P. Allelúja.)

Secréta

HÓSTIAS ad altáre tuum offeréntibus, Dómine, da nobis illum pietátis afféctum, quem beátis N. et N. Confessóribus tuis infudísti: ut pura mente ac férvido corde rei sacræ attendámus, et sacrifícium tibi plácitum nobísque profícuum immolémus. Per Dóminum.

Alia Secréta

MÚNERA, Dómine, obláta sanctífica: et intercedéntibus beátis N. et N. Confessóribus tuis, nos per hæc a peccatórum nostrórum máculis emúnda. Per Dóminum.

Commúnio Luc. 12, 37 Beáti servi illi, quos, cum vénerit Dóminus, invénerit vigilántes: amen dico vobis, quod præcínget se, et fáciet illos discúmbere, et tránsiens ministrábit illis. (T. P. Allelúja.)

Postcommúnio

TRÍBUAT nobis, omnípotens Deus, suffragántibus beatórum N. et N. Confessórum tuórum précibus, reféctio sacra subsídium: ut et castitátis mundítiam observémus in córpore, et lumen veritátis exhibeámus in ópere. Per Dóminum.

Alia Postcommúnio

SÚPPLICES te rogámus, omnípotens Deus: ut, quos tuis réficis sacraméntis, intercedéntibus beátis N. et N. Confessóribus tuis, tibi étiam plácitis móribus dignánter tríbuas deservíre. Per Dóminum.

MISSÆ PRO ALÍQUIBUS LOCIS

COMMUNE PLÚRIUM VÍRGINUM

I

Pro Virgínibus et Martýribus

DEUS meus, impollúta via ejus: elóquia Dómini igne examináta: protéctor est ómnium sperántium in se. (T. P. Allelúja, allelúja.) Ps. ibid., 2-3 Díligam te, Dómine, fortitúdo mea: Dóminus firmaméntum meum, et refúgium meum, et liberátor meus. V/. Glória Patri.

Orátio

DA nobis, quǽsumus, Dómine Deus noster, beatárum N. et N. Vírginum et Mártyrum tuárum palmas incessábili devotióne venerári: ut, quas digna mente celebráre non póssumus, humílibus saltem frequentémus obséquiis. Per Dóminum.

OMNÍPOTENS sempitérne Deus, qui beátas N. et N. virginitátis et martýrii glória decorásti: da nobis eárum précibus ita córporis et mentis serváre puritátem; ut nec blandítiis carnis, nec malórum acerbitáte vincámur. Per Dóminum.

Léctio Epístolæ beáti Pauli Apóstoli ad Corínthios.

2 Cor. 4, 6-11 et 16-17

FRATRES: Deus illúxit in córdibus nostris ad illuminatiónem sciéntiæ claritátis Dei, in fácie Christi Jesu. Habémus autem thesáurum istum in vasis fictílibus: ut sublímitas sit virtútis Dei, et non ex nobis. In ómnibus tribulatiónem pátimur, sed non angustiámur: aporiámur, sed non destitúimur: persecutiónem pátimur, sed non derelínquimur: dejícimur, sed non perímus: semper mortificatiónem Jesu in córpore nostro circumferéntes, ut et vita Jesu manifestétur in corpóribus nostris. Semper enim nos, qui vívimus, in mortem trádimur propter Jesum: ut et vita Jesu manifestétur in carne nostra mortáli. Propter quod non defícimus: sed licet is, qui foris est, noster homo corrumpátur: tamen is, qui intus est, renovátur de die in diem. Id enim, quod in præsénti est momentáneum et leve tribulatiónis nostræ, supra modum in sublimitáte ætérnum glóriæ pondus operátur in nobis.

Graduále Ps. 43, 8-9 Salvásti enim nos, Deus, de affligéntibus nos: et odiéntes nos confudísti. V/. In Deo laudábimur tota die: et in nómine tuo confitébimur in sǽculum.

Allelúja, allelúja. V/. Apoc. 12, 11 Vicérunt dracónem propter sánguinem Agni, et propter verbum testimónii sui. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 144, 5-7 Magnificéntiam glóriæ sanctitátis tuæ, Dómine, loquéntur: et mirabília tua narrábunt. V/. Et virtútem terribílium tuórum dicent: et magnitúdinem tuam narrábunt. V/. Memóriam abundántiæ suavitátis tuæ eructábunt: et justítia tua exsultábunt.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Apoc. 12, 11 Vicérunt dracónem propter sánguinem Agni, et propter verbum testimónii sui. Allelúja. V/. Sap. 4, 1 et 2 Casta generátio in perpétuum coronáta triúmphat, incoinquinatórum certáminum prǽmium vincens. Allelúja.

+ Sequéntia sancti Evangélii secúndum Matthǽum.

Matth. 25, 1-13

IN illo témpore: Dixit Jesus discípulis suis parábolam hanc: Símile erit regnum cælórum decem virgínibus: quæ accipiéntes lámpadas suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, neque horam.

Offertórium Ps. 88, 16-17 Dómine, in lúmine vultus tui ambulábunt, et in nómine tuo exsultábunt tota die: et in justítia tua exaltabúntur. (T. P. Allelúja.)

Secréta

INTÉNDE, quǽsumus, Dómine, múnera altáribus tuis pro beatárum Vírginum et Mártyrum tuárum N. et N. honóre propósita: ut, sicut per hæc sacra mystéria illis glóriam contulísti, ita nobis indulgéntiam largiáris. Per Dóminum.

Alia Secréta

HÓSTIA nómini tuo, Dómine, reverénter exhíbita, glorióso beatárum Vírginum et Mártyrum tuárum N. et N. suffrágio commendétur: quæ se tibi gratas pudóris et fídei víctimas immolárunt. Per Dóminum.

Commúnio Matth. 25, 4 et 6 Prudéntes vírgines accepérunt óleum in vasis suis cum lampádibus: média autem nocte clamor factus est: Ecce sponsus venit, exíte óbviam ei. (T. P. Allelúja.)

Postcommúnio

PRÆSTA nobis, quǽsumus, Dómine: intercedéntibus beátis Virgínibus et Martýribus tuis N. et N.; ut, quod ore contíngimus, pura mente capiámus. Per Dóminum.

Alia Postcommúnio

CÆLÉSTIA sacraménta, quǽsumus, Dómine, suffragántibus beátis Virgínibus et Martýribus tuis N. et N., sua nos virtúte commúniant: ut, quarum pie venerámur in fídei confessióne victóriam, imitémur in morum puritáte constántiam. Per Dóminum.

MISSÆ PRO ALÍQUIBUS LOCIS

COMMUNE PLÚRIUM VÍRGINUM

II

Pro Virgínibus tantum

VÍRGINES laudent nomen Dómini, quia exaltátum est nomen ejus solíus: conféssio ejus super cælum et terram. (T. P. Allelúja, allelúja.) Ps. ibid., 1 Laudáte Dóminum de cælis: laudáte eum in excélsis. V/. Glória Patri.

Orátio

CONCÉDE, quǽsumus, omnípotens Deus: ut qui beatárum Vírginum N. et N. puritátem húmili venerámur obséquio; étiam piæ conversatiónis imitémur exémplum. Per Dóminum.

FIDÉLES tuos, quǽsumus, Dómine, intercedéntibus beátis Virgínibus N. et N., ita córpore et mente purífica: ut a nóxiis delectatiónibus elongéntur, ac tua júgiter suavitáte pascántur. Per Dóminum.

Léctio Epístolæ beáti Pauli Apóstoli ad Corínthios.

1 Cor. 7, 25-34

FRATRES: De virgínibus præcéptum Dómini non hábeo: consílium autem do, tamquam misericórdiam consecútus a Dómino, ut sim fidélis. Exístimo ergo hoc bonum esse propter instántem necessitátem, quóniam bonum est hómini sic esse. Alligátus es uxóri? noli quǽrere solutiónem. Solútus es ab uxóre? noli quǽrere uxórem. Si autem accéperis uxórem, non peccásti. Et si núpserit virgo, non peccávit: tribulatiónem tamen carnis habébunt hujúsmodi. Ego autem vobis parco. Hoc ítaque dico, fratres: Tempus breve est: réliquum est, ut et qui habent uxóres, tamquam non habéntes sint: et qui flent, tamquam non flentes: et qui gaudent, tamquam non gaudéntes: et qui emunt, tamquam non possidéntes, et qui utúntur hoc mundo, tamquam non utántur: prǽterit enim figúra hujus mundi. Volo autem vos sine sollicitúdine esse. Qui sine uxóre est, sollícitus est, quæ Dómini sunt, quómodo pláceat Deo. Qui autem cum uxóre est, sollícitus est, quæ sunt mundi, quómodo pláceat uxóri, et divísus est. Et múlier innúpta, et virgo cógitat quæ Dómini sunt, ut sit sancta córpore, et spíritu: in Christo Jesu Dómino nostro.

Graduále Ps. 44, 3 et 10 Speciósus forma præ fíliis hóminum: diffúsa est grátia in lábiis tuis. V/. Fíliæ regum in honóre tuo: ástitit regína a dextris tuis in vestítu deauráto, circúmdata varietáte.

Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 44, 14-16 Omnis glória ejus fíliæ Regis ab intus, in fímbriis áureis, circumamícta varietátibus. V/. Adducéntur Regi vírgines post eam, próximæ ejus afferéntur tibi. V/. Afferéntur in lætítia et exsultatióne, adducéntur in templum Regis.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Sap. 4, 1 O quam pulchra est casta generátio cum claritáte: immortális est enim memória illíus. Allelúja. V/. Isai. 56, 5 Ego Dóminus dabo eis nomen mélius a fíliis et filiábus: nomen sempitérnum dabo eis, quod non períbit. Allelúja.

+ Sequéntia sancti Evangélii secúndum Matthǽum.

Matth. 25, 1-13

IN illo témpore: Dixit Jesus discípulis suis parábolam hanc: Símile erit regnum cælórum decem virgínibus: quæ accipiéntes lámpadas suas, exiérunt óbviam sponso et sponsæ. Quinque autem ex eis erant fátuæ, et quinque prudéntes: sed quinque fátuæ, accéptis lampádibus, non sumpsérunt óleum secum: prudéntes vero accepérunt óleum in vasis suis cum lampádibus. Moram autem faciénte sponso, dormitavérunt omnes, et dormiérunt. Média autem nocte clamor factus est: Ecce sponsus venit, exíte óbviam ei. Tunc surrexérunt omnes vírgines illæ, et ornavérunt lámpades suas. Fátuæ autem sapiéntibus dixérunt: Date nobis de óleo vestro: quia lámpades nostræ exstinguúntur. Respondérunt prudéntes, dicéntes: Ne forte non suffíciat nobis, et vobis, ite pótius ad vendéntes, et émite vobis. Dum autem irent émere, venit sponsus: et quæ parátæ erant, intravérunt cum eo ad núptias, et clausa est jánua. Novíssime vero véniunt et réliquæ vírgines, dicéntes: Dómine, Dómine, áperi nobis. At ille respóndens, ait: Amen dico vobis, néscio vos. Vigiláte ítaque, quia nescítis diem, neque horam.

Offertórium Ps. 33, 6 Accédite ad Dóminum, et illuminámini: et fácies vestræ non confundéntur. (T. P. Allelúja.)

Secréta

MUNÉRIBUS tibi, Dómine, pro beatárum Vírginum N. et N. honóre dicátis, benedictiónem tuam propitiátus effúnde: ut per éadem, et a vítiis ómnibus emundémur, et cæléstibus delíciis impleámur. Per Dóminum.

Alia Secréta

OFFERÉNTES tibi hóstiam laudis, miséricors Deus, apud majestátem tuam beatárum Vírginum N. et N. suffrágio commendémur: quæ cónsonis opéribus in sua virginitáte jucúndum tibi habitáculum præparárunt. Per Dóminum.

Commúnio Matth. 25, 10 Venit sponsus: et vírgines, quæ parátæ erant, intravérunt cum eo ad núptias, et clausa est jánua. (T. P. Allelúja.)

Postcommúnio

SUMPTA mystéria, quǽsumus, Dómine, suffragántibus beatárum Vírginum N. et N. méritis, íncitent nos júgiter et illústrent: ut digne advéntum Fílii tui præstolémur, et ad supérnas ejus núptias admittámur. Per eúmdem Dóminum.

Alia Postcommúnio

CÓRPORIS et sánguinis tui sacra libátio, Dómine, intercedéntibus beátis Virgínibus N. et N., ab ómnibus nos cadúcis rebus avértat: ut valeámus tui et sincéra in terris caritáte profícere, et perpétua in cælis visióne gaudére: Qui vivis.

MISSÆ PRO ALÍQUIBUS LOCIS

COMMUNE PLÚRIUM NON VÍRGINUM

I

Pro Martýribus

DA nobis, Deus, auxílium de tribulatióne, quia vana salus hóminis: in Deo faciémus virtútem: et ipse ad níhilum dedúcet inimícos nostros. (T. P. Allelúja, allelúja.) Ps. ibid., 2 Parátum cor meum, Deus, parátum cor meum: cantábo, et psallam in glória mea. V/. Glória Patri.

Orátio

DEUS, cujus múnere virtus in infirmitáte perfícitur: da ómnibus, beatárum N. et N. Mártyrum tuárum glóriam recoléntibus; ut quæ abs te sumpsérunt robur ut víncerent, abs te quoque nobis vincéndi grátiam semper obtíneant. Per Dóminum.

DA nobis, quǽsumus, Dómine Deus noster, beatárum N. et N. Mártyrum tuárum palmas incessábili devotióne venerári: ut, quas digna mente celebráre non póssumus, humílibus saltem frequentémus obséquiis. Per Dóminum.

Léctio Epístolæ beáti Pauli Apóstoli ad Corínthios.

2 Cor. 4, 6-11 et 16-17

FRATRES: Deus illúxit in córdibus nostris ad illuminatiónem sciéntiæ claritátis Dei, in fácie Christi Jesu. Habémus autem thesáurum istum in vasis fictílibus: ut sublímitas sit virtútis Dei, et non ex nobis. In ómnibus tribulatiónem pátimur, sed non angustiámur: aporiámur, sed non destitúimur: persecutiónem pátimur, sed non derelínquimur: dejícimur, sed non perímus: semper mortificatiónem Jesu in córpore nostro circumferéntes, ut et vita Jesu manifestétur in corpóribus nostris. Semper enim nos, qui vívimus, in mortem trádimur propter Jesum: ut et vita Jesu manifestétur in carne nostra mortáli. Propter quod non defícimus: sed licet is, qui foris est, noster homo corrumpátur: tamen is, qui intus est, renovátur de die in diem. Id enim, quod in præsénti est momentáneum et leve tribulatiónis nostræ, supra modum in sublimitáte ætérnum glóriæ pondus operátur in nobis.

Graduále Ps. 59, 13-14 Da nobis, Deus, auxílium de tribulatióne, quia vana salus hóminis. V/. In Deo faciémus virtútem: et ipse ad níhilum dedúcet tribulántes nos.

Allelúja, allelúja. V/. Apoc. 7, 14 Venérunt de tribulatióne magna, et lavérunt stolas suas, et dealbavérunt eas in sánguine Agni. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 65, 10-12 Probásti nos, Deus: igne nos examinásti sicut examinátur argéntum. V/. Induxísti nos in láqueum, posuísti tribulatiónes in dorso nostro: imposuísti hómines super cápita nostra. V/. Transívimus per ignem et aquam: et eduxísti nos in refrigérium.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Apoc. 7, 14 Venérunt de tribulatióne magna, et lavérunt stolas suas, et dealbavérunt eas in sánguine Agni. Allelúja. V/. Apoc. 12, 11-12 Non dilexérunt ánimas suas usque ad mortem: proptérea lætámini, cæli, et qui habitátis in eis. Allelúja.

+ Sequéntia sancti Evangélii secúndum Matthǽum.

Matth. 13, 44-52

IN illo témpore: Dixit Jesus discípulis suis parábolam hanc: Símile est regnum cælórum thesáuro abscóndito in agro: quem qui invénit homo, abscóndit, et præ gáudio illíus vadit, et vendit univérsa, quæ habet, et emit agrum illum. Íterum símile est regnum cælórum hómini negotiatóri, quærénti bonas margarítas. Invénta autem una pretiósa margaríta, ábiit, et véndidit ómnia, quæ hábuit, et emit eam. Íterum símile est regnum cælórum sagénæ missæ in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne sǽculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis hæc ómnia? Dicunt ei: Étiam. Ait illis: Ideo omnis scriba doctus in regno cælórum símilis est hómini patrifamílias, qui profert de thesáuro suo nova et vétera.

Offertórium Ps. 104, 4 Quǽrite Dóminum, et confirmámini: quǽrite fáciem ejus semper. (T. P. Allelúja.)

Secréta

OBLÁTA tibi, Dómine Deus, in honórem beatárum N. et N. Mártyrum tuárum dona intuére propítius: ut accéptum nostræ tibi fáciant servitútis obséquium, et opportúnum nobis tríbuant tuæ protectiónis auxílium. Per Dóminum.

Alia Secréta

INTÉNDE, quǽsumus, Dómine, múnera altáribus tuis pro beatárum Mártyrum tuárum N. et N. honóre propósita: ut, sicut per hæc sacra mystéria illis glóriam contulísti; ita nobis indulgéntiam largiáris. Per Dóminum.

Commúnio Matth. 13, 44 Símile est regnum cælórum thesáuro abscóndito in agro: quem qui invénit homo, abscóndit, et præ gáudio illíus vadit, et vendit univérsa, quæ habet, et emit agrum illum. (T. P. Allelúja.)

Postcommúnio

SANCTÍFICET et róboret nos, quǽsumus, Dómine, supernórum múnerum fructuósa recéptio: ut, suffragántibus beátis Martýribus tuis N. et N., et vitiórum ǽstibus obsistámus, et contra ómnium ímpetus hóstium repugnémus. Per Dóminum.

Alia Postcommúnio

PRÆSTA nobis, quǽsumus, Dómine: intercedéntibus beátis Martýribus tuis N. et N.: ut, quod ore contíngimus, pura mente capiámus. Per Dóminum.

MISSÆ PRO ALÍQUIBUS LOCIS

COMMUNE PLÚRIUM NON VÍRGINUM

II

Pro non Martýribus

DÓMINE Deus virtútum, non discédimus a te: vivificábis nos, et nomen tuum invocábimus. (T. P. Allelúja, allelúja.) Ps. ibid., 2 Qui regis Israël, inténde: qui dedúcis velut ovem Joseph. V/. Glória Patri.

Orátio

CONCÉDE, quǽsumus, omnípotens Deus: ut veneránda nobis beatárum N. et N. intercéssio tríbuat cæléste subsídium; quarum vita mirábilis ómnibus salutáre præstat exémplum. Per Dóminum.

TUÓRUM corda fidélium, Deus miserátor, illústra: et, beatárum N. et N. précibus ac méritis gloriósis; fac nos terréna cuncta despícere, et dona cæléstia possidére. Per Dóminum.

Léctio Epístolæ beáti Pauli Apóstoli ad Timótheum.

1 Tim. 2, 9-15; 5, 3-6

CARÍSSIME: Volo mulíeres oráre in hábitu ornáto, cum verecúndia, et sobrietáte ornántes se, et non in tortis crínibus, aut auro, aut margarítis, vel veste pretiósa: sed quod decet mulíeres, promitténtes pietátem per ópera bona. Múlier in siléntio discat cum omni subjectióne. Docére autem mulíeri non permítto, neque dominári in virum: sed esse in siléntio. Adam enim primus formátus est: deínde Heva. Et Adam non est sedúctus: múlier autem sedúcta in prævaricatióne fuit. Salvábitur autem per filiórum generatiónem, si permánserit in fide, et dilectióne, et sanctificatióne cum sobrietáte. Víduas honóra, quæ vere víduæ sunt. Si qua autem vídua fílios aut nepótes habet: discat primum domum suam régere, et mútuam vicem réddere paréntibus: hoc enim accéptum est coram Deo. Quæ autem vere vídua est, et desoláta, speret in Deum, et instet obsecratiónibus, et oratiónibus nocte ac die. Nam quæ in delíciis est, vivens mórtua est. Et hoc prǽcipe ut irreprehensíbiles sint: in Christo Jesu Dómino nostro.

Graduále Ps. 32, 20-21 Anima nostra sústinet Dóminum: quóniam adjútor et protéctor noster est. V/. Quia in eo lætábitur cor nostrum: et in nómine sancto ejus sperávimus.

Allelúja, allelúja. V/. Eccli. 1, 16 Inítium sapiéntiæ timor Dómini: cum eléctis féminis gráditur, et cum justis et fidélibus agnóscitur. Allelúja.
Post Septuagésimam, omíssis Allelúja et Versu sequénti, dícitur

Tractus Ps. 47, 10-12 Suscépimus Deus, misericórdiam tuam in médio templi tui. V/. Secúndum nomen tuum, Deus, sic et laus tua in fines terræ: justítia plena est déxtera tua. V/. Lætétur mons Sion, et exsúltent fíliæ Judæ, propter judícia tua, Dómine.

Témpore autem Pascháli omíttitur Graduále, et ejus loco dícitur:

Allelúja, allelúja. V/. Eccli. 1, 16 Inítium sapiéntiæ timor Dómini: cum eléctis féminis gráditur, et cum justis et fidélibus agnóscitur. Allelúja. V/. Ps. 23, 6 Hæc est generátio quæréntium Dóminum, quæréntium fáciem Dei Jacob. Allelúja

+ Sequéntia sancti Evangélii secúndum Matthǽum.

Matth. 13, 44-52

IN illo témpore: Dixit Jesus discípulis suis parábolam hanc: Símile est regnum cælórum thesáuro abscóndito in agro: quem qui invénit homo, abscóndit, et præ gáudio illíus vadit, et vendit univérsa, quæ habet, et emit agrum illum. Íterum símile est regnum cælórum hómini negotiatóri, quærénti bonas margarítas. Invénta autem una pretiósa margaríta, ábiit, et véndidit ómnia, quæ hábuit, et emit eam. Íterum símile est regnum cælórum sagénæ missæ in mare, et ex omni génere píscium congregánti. Quam, cum impléta esset, educéntes, et secus littus sedéntes, elegérunt bonos in vasa, malos autem foras misérunt. Sic erit in consummatióne sǽculi: exíbunt Angeli, et separábunt malos de médio justórum, et mittent eos in camínum ignis: ibi erit fletus, et stridor déntium. Intellexístis hæc ómnia? Dicunt ei: Étiam. Ait illis: Ideo omnis scriba doctus in regno cælórum símilis est hómini patrifamílias, qui profert de thesáuro suo nova et vétera.

Offertórium Ps. 104, 3 Laudámini in nómine sancto ejus: lætétur cor quæréntium Dóminum. (T. P. Allelúja.)

Secréta

OFFERÉNTES tibi, Dómine Deus, hóstiam pro beatárum N. et N. honóre propósitam, te súpplices exorámus: ut spem nostram in te fírmiter collocémus, et pias petitiónes cordis nostri abs te júgiter habeámus. Per Dóminum.

Alia Secréta

SACRIFÍCIUM nostrum, Dómine, suffragántibus beatárum N. et N. précibus, tibi reddátur accéptum: ut nobis idem et culpárum véniam largiátur, et meritórum cópiam operétur. Per Dóminum.

Commúnio Matth. 13, 45-46 Símile est regnum cælórum hómini negotiatóri, quærénti bonas margarítas: invénta autem una pretiósa margaríta, ábiit, et véndidit ómnia quæ hábuit, et emit eam. (T. P. Allelúja.)

Postcommúnio

DIVÍNI operátio sacraménti, omnípotens Deus, suffragántibus beatárum N. et N. méritis, illúminet nos páriter et inflámmet: ut et sanctis júgiter desidériis ferveámus, et bonis opéribus abundémus. Per Dóminum.

Alia Postcommúnio

ACCEPTÓRUM múnerum virtus, Dómine Deus, intercedéntibus beátis N. et N., suos in nobis efféctus ímpleat: ut simul et mortális vitæ subsídium cónferat, et gáudium perpétuæ felicitátis obtíneat. Per Dóminum.