Missále románum 1957 en préparation
|
|  Yüklə 4.47 Mb.
|
FESTA SEPTÉMBRISDie 3 Septémbris B. MARÍÆ VÍRGINISDIVÍNI PASTÓRIS MATRISMissa Salve, de Commúni Festórum beátæ Maríæ Vírginis, præter Oratiónem sequéntem, et dícitur Credo. Orátio
DÓMINE Jesu Christe, pastor bone, qui pro óvibus tuis ánimam dedísti, nosque pópulum tuum et oves páscuæ tuæ in cruce pendens Matri Vírgini commendásti: ipsa interveniénte concéde; ut, te pastórem nostrum sequéntes in terris, ad páscua ætérnæ vitæ perducámur in cælis: Qui vivis. Secréta
TUA, Dómine, propitiatióne, et beátæ Maríæ semper Vírginis intercessióne, ad perpétuam atque præséntem hæc oblátio nobis profíciat prosperitátem et pacem. Per Dóminum. Præfátio de beáta María Vírgine Et te in Festivitáte. Postcommúnio SUMPTIS, Dómine, salútis nostræ subsídiis: da, quǽsumus, beátæ Maríæ semper Vírginis patrocíniis nos ubíque prótegi; in cujus veneratióne hæc tuæ obtúlimus majestáti. Per Dóminum. MISSÆ PRO ALÍQUIBUS LOCISDie 4 Septémbris S. ROSÆ VITERBIÉNSISVírginis Missa Dilexísti, de Commúni Vírginum 3 loco, præter Oratiónem sequéntem. Orátio
DEUS, qui beátam Rosam sanctárum tuárum Vírginum collégio aggregáre dignátus es: tríbue nobis, quǽsumus; ut ejus précibus et méritis a culpis ómnibus expiémur, et tuæ majestátis consórtio perfruámur ætérno. Per Dóminum. Secréta
ACCÉPTA tibi sit, Dómine, sacrátæ plebis oblátio pro tuórum honóre Sanctórum: quorum se méritis de tribulatióne percepísse cognóscit auxílium. Per Dóminum. Postcommúnio SATIÁSTI, Dómine, famíliam tuam munéribus sacris: ejus, quǽsumus, semper interventióne nos réfove, cujus solémnia celebrámus. Per Dóminum.
MISSÆ PRO ALÍQUIBUS LOCISDie 9 Septémbris S. PETRI CLAVERConfessóris Intróitus Ps. 106, 9-10 SATIÁVIT Dóminus ánimam inánem: sedéntes in ténebris et umbra mortis, vinctos in mendicitáte et ferro. Ps. ibid., 8 Confiteántur Dómino misericórdiæ ejus: et mirabília ejus fíliis hóminum. V/. Glória Patri. Orátio DEUS, qui abréptos in servitútem Nigrítas ad agnitiónem tui nóminis vocatúrus, beátum Petrum mira in eis juvándis caritáte et patiéntia roborásti: ejus nobis intercessióne concéde; ut, quæ Jesu Christi sunt quæréntes, próximos ópere et veritáte diligámus. Per eúmdem Dóminum. Léctio Isaíæ Prophétæ. Isai. 58, 6-9 et 10 HÆC dicit Dóminus: Dissólve colligatiónes impietátis, solve fascículos depriméntes: dimítte eos, qui confrácti sunt, líberos, et omne onus dirúmpe. Frange esuriénti panem tuum, et egénos, vagósque induc in domum tuam: cum víderis nudum, óperi eum, et carnem tuam ne despéxeris. Tunc erúmpet quasi mane lumen tuum, et sánitas tua cítius oriétur, et anteíbit fáciem tuam justítia tua, et glória Dómini cólliget te. Tunc invocábis, et Dóminus exáudiet: clamábis, et dicet: Ecce adsum. Cum effúderis esuriénti ánimam tuam, et ánimam afflíctam repléveris, oriétur in ténebris lux tua, et ténebræ tuæ erunt sicut merídies. Graduále Ps. 71, 12-14 Liberábit páuperem a poténte, et páuperem cui non erat adjútor: parcet páuperi et ínopi, et ánimas páuperum salvas fáciet. V/. Ex usúris et iniquitáte rédimet ánimas eórum: et honorábile nomen eórum coram illo. Allelúja, allelúja. V/. Ps. 9, 33 et 35 Exsúrge, Dómine Deus, exaltétur manus tua: ne obliviscáris páuperum: tibi derelíctus est pauper: órphano tu eris adjútor. Allelúja.
Tractus Isai. 61, 1 Misit me Dóminus ut medérer contrítis corde, et prædicárem captívis indulgéntiam. V/. 1 Cor. 9, 22 Factus sum infírmis infírmus, ut infírmos lucrifácerem. V/. Omnibus ómnia factus sum, ut omnes fácerem salvos. Témpore autem Pascháli omíttitur Graduále, et ejus loco dícitur: Allelúja, allelúja. V/. Ps. 123, 7 Anima nostra, sicut passer, erépta est de láqueo venántium: láqueus contrítus est, et nos liberáti sumus. Allelúja. V/. Ps. 84, 10 Prope timéntes Dóminum Deum salutáre ipsíus: ut inhábitet glória in terra nostra. Allelúja. + Sequéntia sancti Evangélii secúndum Lucam. Luc. 10, 29-37 IN illo témpore: Legisperítus quidam, volens justificáre seípsum, dixit ad Jesum: Et quis est meus próximus? Suscípiens autem Jesus, dixit: Homo quidam descendébat ab Jerúsalem in Jéricho, et íncidit in latrónes, qui étiam despoliavérunt eum: et plagis impósitis abiérunt, semivívo relícto. Accidit autem, ut sacérdos quidam descénderet eádem via: et viso illo præterívit. Simíliter et levíta, cum esset secus locum, et vidéret eum, pertránsiit. Samaritánus autem quidam iter fáciens, venit secus eum: et videns eum, misericórdia motus est. Et apprópians alligávit vúlnera ejus, infúndens óleum et vinum: et impónens illum in juméntum suum, duxit in stábulum, et curam ejus egit. Et áltera die prótulit duos denários, et dedit stabulário, et ait: Curam illíus habe: et quodcúmque supererogáveris, ego cum redíero, reddam tibi. Quis horum trium vidétur tibi próximus fuísse illi, qui íncidit in latrónes? At ille dixit: Qui fecit misericórdiam in illum. Et ait illi Jesus: Vade, et tu fac simíliter. Offertórium Job. 29, 12-13 et 15-16 Eo quod liberássem páuperem vociferántem, et pupíllum, cui non esset adjútor, benedíctio peritúri super me veniébat, et cor víduæ consolátus sum: oculus fui cæco, et pes claudo: pater eram páuperum. Secréta CARITÁTIS víctima, quam immolántes offérimus, sit nobis, Dómine, te miseránte, propitiábilis: et, beáti Petri précibus et méritis, ad obtinéndum patiéntiæ et caritátis augméntum, éfficax et salutáris. Per eúmdem Dóminum. Commúnio Ezech. 34, 15-16 Ego pascam oves meas: et ego eas accubáre fáciam, dicit Dóminus Deus. Quod períerat requíram, et quod abjéctum erat redúcam, et quod confráctum fúerat alligábo, et quod infírmum fúerat consolidábo. Postcommúnio CRESCAT in nobis, Dómine, tuæ pietátis efféctus salutáris: ut, cælésti pábulo nutríti, ætérnæ vitæ corónam, beáto Petro intercedénte, felíciter assequámur. Per Dóminum.
MISSÆ PRO ALÍQUIBUS LOCIS |