Ana səhifə

Elanlar! İNternet idarəÇİLİk forumu üZRƏ TƏLİMƏ DƏVƏT !


Yüklə 22.11 Kb.
tarix24.06.2016
ölçüsü22.11 Kb.
Reportyorların Azadlıq və Təhlükəsizlik İnstitutu

Azərbaycanda ifadə azadlığına dair gündəlik xəbərlər



14 avqust 2012-ci il

Bakı, Azərbaycan


  • ELANLAR!

  • İNTERNET İDARƏÇİLİK FORUMU ÜZRƏ TƏLİMƏ DƏVƏT !

  • HİLAL MƏMMƏDOVLA BAĞLI APELLYASİYA ŞİKAYƏTİ TƏMİN EDİLMƏDİ

  • İCRA BAŞÇISI İLƏ BAŞ REDAKTORUN MƏHKƏMƏSİ 3 SENTYABRA QALDI

  • RATİ QUBADA TƏLİM KEÇİRİB


ELANLAR!

AVQUSTUN 15-DƏ RATİ-NİN MƏTBUAT MƏRKƏZİNDƏ KEÇİRİLƏCƏK TƏDBİRLƏRİN SİYAHISI

Saat 11:00-12:00

Uluslararası Güney Azərbaycan Türkləri Konseyinin Azərbaycan təmsilçisi Aynur İmranovanın təşkilatçılığı ilə Güney Azərbaycanda baş verən zəlzələ ilə bağlı mətbuat konfransı keçiriləcək. 



Saat 12:00-13:00

Hərbi xidmət zamanı intihar edən əsgər Pərviz İsgəndərlinin ölümü ilə əlaqədar həbs edilmiş əsgərlər Şahin Xudiyev, Vüsal İsgəndərli və Vidadi Mustafayevin valideynlərinin təşkilatçılığı ilə mətbuat konfransı keçiriləcək.



İNTERNET İDARƏÇİLİK FORUMU ÜZRƏ TƏLİMƏ DƏVƏT !

İfadə Azadlığı Təşəbbüsü və DW-AKADEMIE Sizi “İnternet İdarəçilik Forumunun işıqlandırılması” adlı beş günlük təlimə dəvət edir. Seminarın məqsədi İnternet İdarəçilik Forumunun təqdim olunması və bu tip mövzunun işıqlandırılmasına internet nöqteyi-nəzərindən yanaşmaların müzakirə olunmasıdır. Təlim müddətində iştirakçıların onlayn jurnalistikanın mahiyyəti barədə fikirlər irəli sürmək, janr məsələlərini və rəqəmsal media məzmunlarını müzakirə etmək imkanları olacaq, lakin seminar daha çox praktik mahiyyət daşıyacaq. İştirakçılar seminar müddətində web tapşırıqlar hazırlayacaq, onları tədqiq edəcək və təlimin internet saytında dərc edəcəklər.



Seminarın keçirilmə vaxtı və müddəti:

27-31 Avqust, 2012—saat 10.00 -17.00



Təlimin keçirilmə yeri:  RATİ ofisi, Rəşid Behbudov küç 8, mənzil 85/86

HİLAL MƏMMƏDOVLA BAĞLI APELLYASİYA ŞİKAYƏTİ TƏMİN EDİLMƏDİ
Bu gün (14 avqust) Bakı Apellyasiya məhkəməsində “Tolışi Sədo” qəzetinin baş redaktoru Hilal Məmmədovun barəsində həbs qətimkan tədbirinin seçilməsi ilə bağlı Nizami rayon məhkəməsinin 22 iyun tarixli qərarından verilmiş apellyasiya şikayətinə baxılıb.

Vəkil Ramiz Məmmədov Hilal Məmmədovun tutulduğu andan onunla bağlı toplanmış sübutların toplanmasında zorakılığa yol verildiyini bildirib. Vəkil həmçinin baş redaktor barəsində seçilmiş həbs-qətimkan tədbirinin qanun tələblərinə cavab vermədiyini bildirib və bunun dəyişdirilməsini xahiş edib. Hakim Vaqif Mursaqulov apellyasiya şikayətinin təmin edilməməsi ilə bağlı qərar qəbul edib.

Xatırladaq ki, Hilal Məmmədov bu il iyunun 21-də Nəsimi rayon Polis İdarəsinin əməkdaşları tərəfindən saxlanılıb və onun barəsində Cinayət Məcəlləsinin 234.4.3-cü maddəsi ilə (Qanunsuz olaraq külli miqdarda narkotik vasitələri, psixotrop maddələri və ya onların prekursorlarını hazırlama, istehsal etmə, əldə etmə, saxlama) cinayət işi açılıb. 33,074 qram heroini əldə edib saxlamada ittiham edilən baş redaktor saxlanıldıqdan sonra, polis onun evində də axtarış aparmış və köynəyinin cibindən narkotik maddə tapıldığını bildirmişdir.

İyulun 3-də isə Hilal Məmmədova CM-nin 274-cü (dövlətə xəyanət) və 283-cü (milli, irqi, sosial və ya dini nifrət və düşmənçiliyin salınması)  maddələri ilə əlavə ittiham irəli sürülüb.


İCRA BAŞÇISI İLƏ BAŞ REDAKTORUN MƏHKƏMƏSİ 3 SENTYABRA QALDI
Bu gün (14 avqust) Yasamal rayon məhkəməsində Laçın rayonunun icra başçısı Ramiz Cəbrayılovun “Gündəlik Bakı” qəzetinin baş redaktoru Habil Vəliyevə qarşı Cinayət Məcəlləsinin 147.2-ci (ağır və ya xüsusilə ağır cinayətdə ittiham etməklə böhtan atma) və 148-ci (təhqir) maddələrinə əsasən xüsusi ittiham qaydasında şikayətinə əsasən məhkəmə prosesi keçirilib. Hakim Xəqani Tağıyevin sədrliyi ilə keçirilən prosesdə Habil Vəliyev xüsusi ittiham qaydasında tərtib olunmuş şikayət ərizəsində prosessual pozuntulara yol verildiyini bildirib və bu səbəbdən də həmin şikayətin rədd edilməsi ilə bağlı vəsatət verib.

İcra başçısının vəkili Nüşabə Ağayeva isə vəsatəti əsassız hesab etdiyini və onun təmin edilməməsini xahiş edib.

Hakim vəsatətlə bağlı qərarın 3 sentyabr saat 12:00-da elan ediləcəyini bildirib.

Xatırladaq ki, Laçın rayon icra hakimiyyətinin başçısı Ramiz Cəbrayılov 2011-ci ildən başlayaraq “Gündəlik Bakı” qəzetində onun fəaliyyəti ilə bağlı yazılan silsilə məqalələrə görə məhkəməyə müraciət edib. Şikayət təmin olunarsa, baş redaktoru iki ilədək müddətə islah işləri və üç ilədək müddətə azadlıqdan məhrum etmə cəzası gözləyir.

Qeyd edək ki, avqustun 13-də Yasamal Rayon Məhkəməsinin hakimi Ayaz Məmmədovun sədrliyi ilə keçən prosesdə Neftçala Rayon İcra Hakimiyyətinin baş memarı Rüstəm Tofiq oğlu Tahirovun "Gündəlik Bakı" qəzeti redaksiyasına qarşı "şərəfin, ləyaqətin müdafiəsi, təkzib verilməsi, üzr istənilməsi və vurulmuş mənəvi ziyanın ödənilməsi" tələbinə dair iddia ərizəsi məhkəmə tərəfindən rədd edilib. Neftçalanın baş memarı Rüstəm Tahirov iddia ərizəsində ötən ilin iyun ayının 22-dən oktyabr ayının 27-nə kimi qəzetdə dərc olunan bir sıra məqalələri əsas gətirərək həmin yazılarda onun barəsində tamamilə yalan və həqiqətəuyğun olmayan, təhqiredici məlumatlar dərc olunduğunu iddia edərək, "Gündəlik Bakı" qəzeti redaksiyasından 100 min manat təzminat tələb etmişdi.

RATİ QUBADA TƏLİM KEÇİRİB

             Reportyorların Azadlıq və Təhlükəsizlik İnstitutu (RATİ) avqustun 13-də Qubada vətəndaş cəmiyyəti nümayəndələri və hüquq müdafiəçiləri üçün "Kommunikasiya Strategiyaları və Texniki Bacarıqlar" adlı təlim keçirib. Qubada keçirilmiş ilk təlim zamanı seçilən baş  təlimçi Aftandil Məmmədovla təlim koordinatoru Rövşən Hacıbəyli 1-ci sessiya zamanı iştirakçılara yeni medianın və xalq jurnalistikasının vətəndaş cəmiyyəti nümayəndələrinin həyatında rolu, jurnalist bacarıqlarından QHT kontekstində istifadə,  İnternetin yaratdığı yeni imkanlar barədə məlumat veriblər. 2-ci sessiyada təlimçi Günay İsmayılova bloggerliyin, xüsusi portalların və sosial medianın köməyi ilə xəbərləri, foto və videoları yaymağın açdığı yeni imkanlar, foto, video çəkmək və onları sosial şəbəkələrə yerləşdirmək qaydaları barədə bilgi verib. 3-cü sessiyada isə yeni mediada hüquqi və etik qaydalar, yeni media alətlərindən istifadə qaydaları barədə məlumat verilib. Təlimin sonunda iştirakçılara sertifikatlar təqdim olunub. Qeyd edək ki, təlim “Transparency İnternational Azerbaijan”-nın Qubada yerləşən ofisində keçirilib. "Kommunikasiya Strategiyaları və Texniki Bacarıqlar" təlimi Avropa Komissiyasının maliyyə dəstəyi ilə Reportyorların Azadlıq və Təhlükəsizlik İnstitutu, Demokratik Jurnalistika Məktəbi, Regional İnsan Hüquqları və Media Mərkəzi tərəfindən icra edilən "Yeni Medianın İnkişafı və Regionlara Yayılması" layihəsi çərçivəsində gerçəkləşib.




MƏLUMATLARIMIZDAN İSTİFADƏ EDƏRKƏN RATİ-YƏ İSTİNAD EDİN

 

Reportyorların Azadlıq və Təhlükəsizlik İnstitutu (RATİ)



Ünvan: Azərbaycan, Bakı şəh., Behbudov 8, mənzil 85/86

tel: (+99 412) 408-08-42 ; 408-75-30, fax: (+ 99 412) 598-45-19

QAYNAR XƏTT + 994 12 408 75 30



e-mail: irfs.az@gmail.com

web: www.irfs.az skype: irfs.az


Verilənlər bazası müəlliflik hüququ ilə müdafiə olunur ©atelim.com 2016
rəhbərliyinə müraciət